Q23141：
你好，請問9923移卡溝到依家$49，應該走定留？新手血淋淋的教訓，多謝指引
龔成老師︰
首先，你要清楚溝貨，到底在什麼時候才適合進行。我地決定加注與否，要睇幾個因素，記住，並不是「拉低平均買入價」為目的。
第一，要分析這股的質素，如果無質素，就再跌都唔加。
第二，這股的類別，如潛力或增長或收息類等，是否與你的財富組合匹配，比例是否適合。
第三，你要先計算加注後，這股佔你股票組合的比例會否太多，因為同一行業，同一股票。不能佔股票組合的比例太多。
第四，現價是否有投資價值率，要平，或起碼合理，不能貴。
第五，你要在加注後，仍有現金剩。
記住，重點不是「拉低平均價」，而是組合比例與配置。
移卡（9923）是有風險，有潛力的類別。
首先，佢的業務為一站式支付服務，包括基於應用程序的支付服務及傳統支付服務，並支持逾500款發卡機構的移動應用程序，以支付為基礎的科技平台。
其中包括微信支付、支付寶或雲閃付，涵蓋了中國大多數的電子錢包。
另外，佢業務亦有科技賦能商業服務，即是提供商戶ＳａａＳ產品（包括實時庫存管理、消費者關係管理、智能訂單管理及全方位僱員管理）、營銷服務（包括量身定製的精準營銷及客戶忠誠度計劃電子工具），以及金融科技服務（包括助貸服務、委託貸款及保險轉介服務）等增值服務。
佢係2019年才出現輕微盈利，過往都在虧損狀態。而且佢市值有成近140億，以2020年盈利只有逾4億，點都係有點貴。
睇翻佢的財務數據，增長快速，但業務變數大，行業有不確定性，估值上比較難，這一定會令股價上落大，這刻仍唔平，投資值博率只是一般。
你預佢有潛力，同時有風險，只宜小注投資。
若佢佔你組合較大比重，我建議你沽少少，去平衡風險。如果只係佔好少，可以守。
Q23142：
龔老師你好，本人打算報讀你投資班，不過想先請教一下我現在的情況該如何作出投資，
我今年28歲，月入4萬6千左右，積蓄大約有190萬，現在並無作任何投資。謝謝你！
龔成老師︰
當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。
例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。
以你現時28歲去計，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。
策略上，你可以投資「平穏增長股」和「潛力股」。你每月5成儲蓄做月供。其餘先儲起，用一邊月供一邊儲蓄的策略。
如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。
若你有一定投資經驗﹐潛力股比重可以相應調高，佔組合約3-5成，視乎你投資知識多寡和了解這些股票程度而定。
大市現處於合理水平，那190萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。
但由於投資增值，係一個長線策略，如果你投資知識不算多，我建議你唔好急，先上完堂。等你對投資增值技巧，有一個較完整的概念，才開始計劃你未來投資大計，咁會較穏當。
Q23143：
Hi 龔成，請問我仲應唔應該持有0178呀？
我由19年買入，無耐就遇到社運丶疫情。股價由入市2.7跌到得返1.7。仲要借錢買，買咗好多，一直都唔放因為相信係優質股，但現在都唔知疫情幾時完。
請問我可以點做？
龔成老師︰
從企業投資價值去考量，此有此股係無問題。但問題在於你用了借貸，而且過份集中此股。
借貸投資，通常我自己會視借貸投資，是我最後一張「皇牌」，真的有需要時才會動用，即是見到一個明顯的投資機會，全世界都平貨，值博率好高時，才會動用。
而且，個別企業和行業，不要佔組合15%和30以上，銀行業更加不要高於組合20%，否則會有過度集中性風險。當企業一出問題，你就會成個財富組合大受影響。
莎莎（0178）仍有質素，但佢已經無過往年代般的賺錢能力，同時香港的零售市道有風險，都令這股近年的表現較一般。
這企業本身在行業有一定的地位，賺錢能力不差，但就會受經濟及零售市道影響，令股價較為波動。
其實股票班我都有講這股的估值，在過往10年，自由行較為黃金年代過左，所以從估值上，無之前咁高。
佢在行業的優勢仍在，但整體行業及零售市道，無過往咁強。長遠仍有質素，但投資注碼不能太大注，亦要有耐心先有收成。
由於疫情未完全受控，故你預中短期佢都會較弱，要較長時間才會慢慢轉好。
你現時要做的，就是先審視個借貸息率，會唔會好高。若較高，最好盡量先還款。
如果係不太高，你可以保留部份莎莎(0178)作長線投資。餘下的就換碼至其他優質股，去減低過度集中性風險。
Q23144：
龔sir您好，我可唔可以問9988，6969，2160，3800尼幾隻股票前景，係我蝕得最多的，可否長線持有？
9988睇評論您也講咗好多，著重想問下6969
龔成老師︰
首先，你唔好用買入價或帳面賺蝕，作為判斷一隻股票優劣的標準。你應著眼佢本身有無質素，如果有，中短期價格波動，令到出現帳面虧損，係無問題，照可以長線持有。
但如果係無質素，就算而一刻是賺定蝕，你都要將佢沽出。重點分析的地方，係企業質素，而非股價上。
阿里(9988)近期受大市和政策風險影響，股價有較大幅度回調，雖然估值會下調少少，但核心質素唔見有明顯變化，照可長線持有，只要唔係佔太高比重就可以。
思摩爾國際（6969）係霧化科技解決方案提供商。近期國家衛健委表示電子煙並不健康，相信對佢會有影響。
中國將加強行業監管，對佢有核心不利，這點都會影響企業估值，加上這股一向唔平。
基本上業務不算差，有當中的獨特性，以及長遠有增長力。不過，現價唔算平，加上監管風險。若只持有小注係無問題，這股有長線投資價值的。太大注，就要沽少少，去平衡風險。
微創心通醫療科技（2160）有潛力的。係一家中國醫療器械企業，專注於心臟瓣膜疾病領域創新的經導管及手術解 決方案的研發和商業化。
企業有一定獨特性，同時長遠發展不差，不過估值方面就十分難，因為這刻仍未有似樣的盈利。因此，這股可長線，等佢更大收成，但要留意控制注碼。
保利協鑫能源(3800)比較麻煩，現時暫時停緊牌，因為佢仍未出到業績，將公佈業績的日期延遲了幾次。
最近現任核數師更請辭，我對這類股票，會較有保留。但由於現時停緊牌，暫時乜都做唔到，只有等。
初步睇佢的財務數據，都幾弱，相信日後就算復牌，股價都會受壓，要有心理準備。
Q23145：
你好，2318平安跌唔少，我平均價$78入，開頭諗住長線，但而家跌左差不多30%，請問應該點樣處理？
龔成老師︰
首先，一定要了解股價下跌的原因，基本上，股價中短期上落好正常，但如果上落太大，就要了解翻當中的事情，有無一些影響企業核心的因素。
中國平安（2318）有質素的，佢有規模，有品牌，近年的發展都不差，不過，股價有時會有少少波動，這主要受投資市場表現影響。
另外，疫情都令賺錢能力弱左。但相信這因素，只會中短期影響平保，核心投資價值依然存在。
這股有長線投資價值，是平穩增長型。現價算係合理區偏底位置，現貨照長線持有，係無問題。
Q23146：
老師，我嚟緊想去加拿大，我想係銀行用港幣買入加幣傳放在銀行戶口先，不動資產，以防萬一的，咁他日如果加拿大唔ok要回流返港，就等匯率高咗，兌返港幣，賺差額
因為呢筆錢係呀媽俾我（我又唔想用佢血汗錢）
龔成老師︰
在投資的角度，外匯不是最好的投資項目，因為說到尾，這些都只是一些貨幣，即是「政府借據」，貨幣中期會以週期的模式運作，但長期來說，都是貶值收場，因為貨幣只有「交易價值」，並無真正的財富價值。
而我地進行財富增值時，應該集中將資金投放在真正的資產，如物業、車位、優質股等。
不過，你係有實際用途，你兌換成加紙係可以。但要分析中短期一隻貨幣升跌，唔係易事，所以你唔好諗話賺差價之類，純粹係一個實用性操作，而唔係投資性操作。
兌換時較理想方法，係你將資金分成多份，每隔一段時間就換一份，去平衡價值波動的影響，相信會係對你較有利做法。
Q23147：
問多句。您認為香港樓市會。。。？持續升。或插水？
龔成老師︰
我認為香港樓，長期會向上。
首先，我用身邊的朋友去分析（因為佢地都是適婚年齡的），我見到一個現象，唔少朋友結婚後，買唔到樓，要同父母用住，這幾年都係咁，而且人數不斷增長。
佢地正在儲錢，正在等樓價跌，只要在適當時機，就會搬出去住，你知道這是甚麼？這就是潛在的購買力，而且不斷累積！
香港樓長期供應不足，需求正不斷累積，這將會令樓價保持向上，跌少少，又會升過。
另外，你要明白，樓是資產，現金不是真財富，所以物業長期一定向上，中間會有上落。這是財富系統最典型的模式，詳細概念你可以睇《財務自由行》，當中會話你知，點解資產長期一定升，現金一定跌。
Q23148：
0011較2638 可取 因為長遠增長及收息較高，銀行股 及公用股比較
大陸a股 如阿里巴巴 vs 貴州矛台有投資價值，股票價值太高 ？risk 又如何？
如果將資金投資股票上，應該是待佢派息後 股票價格下跌才入？
或月供加注？
另外 如將資金加入强積金戶口 作長遠投資 美股（因美股票價格上升不少），那種較可取 ？風險評估？
龔成老師︰
恆生(0011)相對港燈(2638)而言，增長力係會高少少，算係收息加少少平穏增長。
而2個行業比較，公用股風險會較細，始終銀行的營運模式，令佢有一定風險存在。故進行資產配置時，個別行業不要佔組合30%以上，銀行業更加不要高於組合20%。
阿里巴巴(9988)和貴州茅台(600519)都有投資價值。
阿里(9988)係業務層面，擁有相當的優勢，不少業務處於壟斷狀態，同時增長理想。加上正不斷發展延伸業務，這都會成為企業增長的潛力，整體質素會比貴州茅台(600519)高。
貴州茅台(600519)近期雖然從高位回落不少，但現時市盈率依然係去到4X倍，點都係有點貴，值博率唔算高。
相反，阿里(9988)只在合理部中下部，有一定值博率。但中央政策風險大左，暫時投資時不要太大注。
至於股票派息，會係除淨日壢而非派息日)進行除權，在股價中派息部份。你要係除淨日前，持有該股才會得到派息。
因此，你其實係除淨日前後買入，都唔會有分別。
而月供與否，你要考量翻你自己投資經驗。如果較淺，用月供方法去平衡買貴貨風險，會係較安全。另外，你都要睇埋成個配置，如果持貨已經太多，或者股價已經太貴，就不要再加注。
預期未來一段時間，中國和美國會係全球最重要的經濟體系。因此港股和美股，都係有投資價值。
但MPF中基本，一般費用率都會較高(但唔一定，你要自己了解翻)。如果你想投資美股，但對美股又唔係好認識，你可以投資係佢的相關ETF。以下2隻股ETF，都係不錯的選擇。
當中，QQQ波動性會較高，要注要風險。
Vanguard標普500指數ETF〈VOO〉，是追蹤標普500指數的ETF。
Invesco QQQ Trust(QQQ) 是追蹤納斯達克100指數。
現時美股在合理區頂，至略貴，故投資時只宜小注，或用長線月供去進行。
Q23149：
成哥想問下d基礎知識。
以8083為例，佢話會轉主板上市,如果現時我在創業板買左好多股，佢之後轉左主板，我既本金是否轉左落主板既中國有贊到？
另外，想問私有化的定義？你認為其他大型企業會私有化8083嗎？如果本身買左8083,但又被其他企業私有化左，咁會唔會冇晒本金,令散戶輸錢？
龔成老師︰
其實你要睇翻每隻股票，佢由非主板退市，再轉上主板的安排。
以中國有贊（8083）為例，首先佢會分派有贊科技，然後以主板模式上市，原有的就是以私有化模式，退市。
佢以每1股的8083，換取約0.05股新派的有贊科技，另外仲會加少少現金，約每股$0.13。就是以這個模式，將投資者轉上主板。
私有化通常由控權股東提出，以現金或證券(附有或不附有現金選擇權)的方式，向其他小股東全數買入股份。如私有化成功，上市公司會向香港聯合交易所有限公司(聯交所)申請撤銷上市地位。
至於私用化，可以係不同原因。有機會係股價大折讓，令大股東想用平價買回公司。或者，係個流通量好低，令上市意義不明顯等等因素。
中國有贊（8083）將來會否被私有化，但係無人知。但若果會的話，有關人士會向現有股東作出要約，如果你接受，就可以用要約上的價錢，將你手上股票賣比佢。
所以，係唔會無晒D錢。但至於對方會出什麼價錢，這個就要到時才知道，所以係有虧損的可能，但不至於本金全數損失。
Q23150：
想請教。長汽2333 公告，本公司擬回購的預留授予限制性股票數量合計為11,000股，由於本公司2020年前三季度利潤分配已實施完畢，
擬回購的預留授予限制性股票回購價格為20.80元╱股，並按《2020年股權激勵計劃》的規定加上同期銀行存款利息
是否要20.80 回購給佢 ?
我是新丁, 煩請幫忙看看, 謝謝
龔成老師︰
不是，如果你係一般投資者，這個回購通告與你無關。
這個通告主要針對6名在《2020年股權激勵計劃》中，授予限制性股票，但限售期屆滿前已離職或崗位調遷的員工。
此次回購註銷的限制性股票，共計1,478,200股，佔公司總股本的比例約為0.02%。故對整體財務數據，影響不大，不用太意。