Q27181：

本人育有倆女，一個自住物業已經供完。（市價$11M）。夫妻已經50歲，大倆15歲，細女8歲，連工人姐姐合共五個人。工作穩定。

因為兩個女都在中半山返學，我地想由將軍澳搬去中環，一來近佢哋返學；二來想搬大單位。住得舒服點。

已經睇中一個中區單位，樓價$17M.

1. 想re-financing 現有物業，可以借$5M。跟住就租出去收租，大約可以收租$20K

2. 同銀行按揭新物業$9.6M

3）1+2 合共借貸$15M

4）現金$4.5M，用來裝修，stamp duty和樓價餘額。已經沒有多餘現金。

先生和我年薪二百萬。如果借$15M，分二十五年還，每月還款六萬蚊，（用現有息率計算）。如果收租有兩萬蚊，實質供款係40,000。

本人想問是不是風險好大㗎？

如果吾搬屋，每月可儲蓄$5-6萬，唔知投資乜嘢？

龔成老師︰

由於係自住房，所以你從生活所需出發，適合你未來10-20年生活，同時你有信心一直"供得起"(你要考慮一點，你們已經50歲，供25年是否可行)，咁就可以。

至於，現有物業放租，都係一個可行方法。雖然負債多左，但整體負債/總資產比率，大致在5成，算係勉強可以。

雖然咁做就會令你地財富好偏重物業類，但香港物業買賣成本唔細，如果你現有物業質素唔係差，保留似乎會較理想。

但未來時間，你要盡力空出多點資金，去投資優質股，令你財富組合不致完全偏重於物業部份。

優質股方面，你可以集中投資一些平穩增值股類，例如指數基金，再加、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)。

佢地增長力雖然唔係最高，但勝在增長力穏定，較宜合中年人士。

Q27182：

龔成老師, 藥明生物有價值投資嗎？

龔成老師︰

藥明生物（2269），主要提供有關生物製劑藥物發現、開發與生產服務。

佢涵蓋生物製劑發展過程的所有五個階段，即藥物發現、臨床前開發、早期臨床開發、後期臨床開發及商業化生產。

潛力是有的，不過不確定性高，而且估值較爲困難，如果要投資，只適合小注。

Q27183：

老師你好！小朋友買左一份保險，入面有一部份係可以買基金，但我好少睇基金板塊，所以想問下有咩基金參考下，請放心哩份保單唔會需要供太多錢每月

在此多謝你

龔成老師︰

市面上的基金有好有壞，要仔細分析基金持有的資產，表現等再購買。我自己就無特別推介，但小朋友可增值時間長，可以選較有增長力基金。

另外，基金涉及收費，會影響你長遠的回報，如果你確定長期回報（扣除費用後），都能跑贏大市，可以考慮買入。

不過你的保險應該包含人壽成分，如果單純想投資幫小朋友儲蓄，可以簡單考慮指數型ETF。

當然，你都要分析你買入的保單當中的回報，是否比上述的ETF高，如果保單基金回報較高，一定先選擇保單基金。

Q27184：

老師968信義還值得持有嗎？16.5坐左好耐 10000股，想加注。是不是應該逢低收集，但又怕他愈跌愈低

龔成老師︰

首先，加注與否是要睇翻企業的質素，現時的值博率以及你的組合比例。

信義光能（0968）本質不差，業務保持有一定的增長力，股本回報率處高水平，加上現金流強勁，是有一定質素，可長線投資的股票，現價合理。

你可以每回調10-15%，再去加小小注。

但緊記我地唔好成個組合，只集中係1,2隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，如果此股已經佔比超過15%就不要加注。

你的買入價偏貴，加上你現時有一定數量的持股量，值博率不算高，因此，可以先守一守。

Q27185：

龔Sir你好，我住澳門的，現在很徬徨，想咨詢你專業意見，謝謝您

請問目前穩建又可長遠使用的投資方式係邊種？

我沒咩投資經驗，朋友提過股票，基金，期貨，加密貨幣（我之前遇到加密貨幣詐騙失去40萬）

目前資金只有10萬，想攞2-3萬少少地投資重新起步。

另外，請問你的初級投資班有網上授課嗎？

龔成老師︰

我自己教授，會係價值投資法，即係巴菲特用緊個套模式。

但當中有好多方法，以你一個投資初學者，我建議先從月供股票入手。因為你未懂定平貴，月供可以平衡這方面風險。

選股方面，你可以集中在一些指數ETF，佢地係一籃子優質股票，分佈在不同行業，具投資價值外，也能分散風險。

現時你可以用每月先用5成儲蓄做月供，其餘先儲起等機會。當大市出現一定程度的下跌，就可以動用現金去投資，在平宜價加大力度掃貨，然後長線投資。

至於，你所講期貨和加密貨幣，唔適合你。前者係估走勢，唔係投資好方法。後者風險太高，不適合投資初學者考慮。

另外，你要留意，上述月供方法，雖然可以幫助你在知識不多情況下，進行有限度的財富增值。但長線財富增值要做得好，必需再加強投資知識，提升選股分析和估值能力。令你可以因應市況平貴，自行制定入市策略。

因此，我建議你要多讀投資相關書本、年報，新聞和報讀相關課程。書本上，你可以睇我寫架《80後千萬富翁》、《財務自由行》和《股票勝經》，都適合初學者。

另外，本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資、評估平貴，在投資上已掌握了一定的知識。

至於股票班，由於內容太重要，只有實體班，唔會開網上課程。

因為之前實體股票班試過比人偷拍，之後放左上網賣，最後要搞到報海關先處理到，好煩。所以，網上類的教學，都好擔心有偷拍問題，風險太高，因為好多課堂內容，都唔想太公開，只想自己學生知，所以暫時都唔會搞。

其實我之前都有開過澳門班的，不過現時疫情，所以暫時停左，之後會再開翻的。

你或者可以預早留位，只要whatsapp 852-55457212我同事講，打「留位澳門班」就得。我地有具體資料就會 whatsapp你。

因為現時已有好多澳門人留左位。

Q27186：

sir, 價錢合理區中下個意思, 係咪即是仲係中間位偏低嘅意思？？？

龔成老師︰

係，你可以簡單咁理解。例如合理區在$50-$100，合理中下就是約$60

我地透過企業本身質素、行業發展、財務數據等，去估算出一個合理價值區間。

之後，我地就透過合適入市策略和組合配置，去分段慢慢儲貨，並長線持有，以達至財富增值目的。

Q27187：

龔成老師你好，follow你既 fb page有一段時間，好想跟你學習但無奈時機不對，唯有鼓起勇氣 inbox你問下意見。

我今年34歲，雖然本來係專業人士，月入4萬幾但因為屋企好窮，所以都已經係中女依然無車無樓只係得存款。半年前仲要因為家父猝逝，所有存款都拎左去幫佢還債，一鋪清袋。

今年初開始更因為疫情長期影響下減薪，依家只係得返 2萬月薪；好唔容易今個月終於捱到有額外5萬蚊左右既分紅，但下次再有額外收入已經唔知會係幾時。

想求教：我好想用呢 5萬開始去投資，希望可以快啲賺夠學費上你堂（依家每個月得返 2萬人工真係冇錢剩），同埋知道啲錢唔係唔聲唔聲咁蒸發左我會安心啲去繼續努力⋯⋯

如果係咁，我應該開始用供股既方式買盈富長揸定係買Tesla好？

龔成老師︰

過去的事，就由它過去。我地要看前看，好好把握手上資源，努力做好投資增值這件事。

對於投資初學者，我會建議先從月供股票入手。因為你未懂定平貴，月供可以平衡這方面風險。

TESLA都係優質股，現價合理。但佢波動性較大，你未必能處理好，如果想買，都係小小注好了。

其餘資金，你可以集中在一些指數ETF。佢地係一籃子優質股票，分佈在不同行業，具投資價值外，也能分散風險。

你5萬蚊，可以先用2-3萬，去入上述股票，其餘就先儲起。另外，你將來每月有閒錢，就可以開始月供計劃。

每月先用5成儲蓄做月供，其餘先儲起等機會。當大市出現一定程度的下跌，就可以動用餘下現金去投資，在平宜價加大力度掃貨，然後長線投資。

相信這個模式，雖然唔係最賺錢，但對你這類初學者會係最有利。

但你要留意，上述月供方法，雖然可以幫助你在知識不多情況下，進行有限度的財富增值。但長線財富增值要做得好，必需再加強投資知識，提升選股分析和估值能力。令你可以因應市況平貴，自行制定入市策略。

因此，我建議你要多讀投資相關書本、年報，新聞和報讀相關課程。書本上，你可以睇我寫架《80後千萬富翁》、《財務自由行》和《股票勝經》，都適合初學者。

另外，本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資、評估平貴，在投資上已掌握了一定的知識。

Q27188：

龔SIR，您好!我重倉左9988，一開始其實打算2~3年期持有，大概等幾年後賣左一半，再長期持有，現時平均持倉價位大概$190，

咁耐以尼我都不斷用新資金低買高賣溝返淡個成本，但其實自己好難計算返個價值，因為溝淡都係以幾手去做倉，同自己本來D貨相差甚遠，起依方邊有冇得心得建議我未來應該點做?

現時亦同時亦有一定債券類型派息基金，但基金價格最近亦有跌幅，初步亦嘗試進行溝淡，但打工仔新資金有限，我應該點進行溝淡方式，或者龔SIR有更好建議?

龔成老師︰

你有一個好錯架概念，就係愈跌就只懂去不斷溝淡，咁係好錯。

我地決定加注與否，要睇幾個因素，記住，並不是「拉低平均買入價」為目的。

第一，要分析這股的質素，如果無質素，就再跌都唔加。

第二，這股的類別，如潛力或增長或收息類等，是否與你的財富組合匹配，比例是否適合。

第三，你要先計算加注後，這股佔你股票組合的比例會否太多，因為同一行業，同一股票。不能佔股票組合的比例太多。

第四，現價是否有投資價值率，要平，或起碼合理，不能貴。

第五，你要在加注後，仍有現金剩。

記住，重點不是「拉低平均價」，而是組合比例與配置。

阿里巴巴(9988)雖然政策風險係略高，但都有長線投資價值。但問題係，任何股票都唔可以太集中，個股最多只可佔組合15%，阿里(9988)這類高風險，更加要控制在10%以內。

你要做，就係沽出部份，換至其他優質股，去平衡風險。

至於債券基金，主要係收息。如果你係年青至中年，應以增值為主，這類收息工具不適合你。

而且，佢係坊間分好多種，你要小心睇，因為有d風險低，無乜問題，有d則有潛在的風險，絕對不是保本的產品，有機會出現了「賺息蝕價」的情況。

第一，有些債券基金，會投資「高收益債券」，即是「垃圾債券」，你一定要睇睇佢所佔的比率。

第二，債券基金往往不是單純地持有債券，而是可以作買賣，以及利用衍生工具作對沖等策略，即是可能有價格上的波動。

第三，不少銀行都會提供借貸，以槓杆去放大回報，以平息借貸去賺取息差。低息環境時間題不大，但進入加息週期，不止借貸成本增加，同時債券價格往往在加息期下跌，雙從打擊下，投資價值成疑。當然，若然加息步伐不快，息差利潤就可觀。

我不是說債券基金有問題，只是說明當中的風險，因為市面上的基券基金好多，你要仔細分析。

Q27189：

我係的股票班股票班舊生，股票班學到的知識，是否能應用於美股???

龔成老師︰

當然可以，我教其實是價值投資法，本身巴菲特都係用而套去投資，所以美股係適用。

之前上堂的時候，我有連同上堂筆記派發左如何應用到美股上的相關資料。

如果沒有收到，又或者遺失，可以留下你的email，我會叫同事發送一份給你。

Q27190：

而家全球收水，一改以往放水政策，對股票有乜影響，有無邊D股票要特別注意?

龔成老師︰

收水的方法通常是「加息」、縮表等手段，最終令市場資金減少，以達至調整過熱經濟或股市目的。

加息對股市會有影響。因為加息令無風險利率上升，而對於有風險的股票，市場對其要求回報率就會向上。

舉例說，原本無風險都能賺到1%回報，加息令到回報增至3%。

如果收息股原本的股息率為4%，現時市場無風險回報都有3%，這樣，市場對收息要求回報就會增加，例如增至5%。

如果該企業無法增加派息，股價就會向下，令股息率自然調整至5%，令收息股股價受壓。

對於成長股（潛力股）來講，企業透過借貸發展好正常，「收水」令到這類型的企業借錢比例減少，又或者借錢成本增加，從而減少經濟活動，限制成長。

不過，這是一個複雜的問題，全球收水是因爲對將來經濟有信心，經濟處於一個好的狀態，未必一定會令股票下跌。