Q23501：

龔成老師你好, 今年先從FB認識你. 多謝你的分享, 很有啟發. 尤其是講解月供的部份.

唔識投資, 所以第一次買股票就係用月供2382, 18年底開始, 供咗2年, 有2手多D, 均價$110.

21年頭見到升過$200, 即刻放晒, 賺咗差價. 跟住心雄, 就拎呢筆錢去左買右買, 當然蝕返晒. 後悔, 最後又再用$182均價入返2382, 希望長線, 今次升浪都無賣過, 因為怕買唔返.....

今次想請教老師個倉美股同港股的分配:

今年5月再開始港股月供 (@$1000/隻): 1211 @$218 / 工行 @ $4.5 / 1299 @ $95 / 2800 @ $26

港股: 2382 @ $182 300股 / 9988 @$262 100股 / 5 @ $65 400股 / 3134 @ 9.05 1000股

現值$14萬

美股: TSLA @ $768 4股 / FUTU @ $130 40股 / PLTR @ $25.5 30股 / AMAT @ $131 11股 / LU @ 15 10股

現值US$9千幾 (希望持貨最少3年)

現金大約$1萬, 每月可投資連月供可投入$6000, 就40歲,

眼見美股升唔少 (入唔落手), 港股相對跌唔少, 但又未有心水 (想觀察政策同經濟方向). 想請教老師, 我應該放多D資金 (儲蓄或賣港股) 去美股 (因為對3D打印, 網絡安全相關的企業有興趣)?

仲有想問以上組合夠唔夠平衡?

手上仲有名牌包包, 牌子加價後二手價都升唔少, 現值9萬, 估計未來二手價會再升, 想問吓呢類當唔當資產? 還是我要將佢產生額外價值, 如出租, 先可以當資產?

多謝老師!

龔成老師︰

你過往賺差價的做法﹐係好多初學者常犯錯誤。記住，投資係要耐性，我地著眼點唔係個差價，要係企業長線發展的升值潛力，所以一隻好股票，一定要長線持有，才會有理想增值效果。

當我地對投資未有太深入了解時，儲貨用月供，之後長線持有，會係較理想做法。因為你定平貴能力和經驗都較弱，好易出現你所講的情況。

舜宇光學科技（2382）有一定的質素，過往手機市場高增長，令佢鏡頭業務受惠不少，但近年手機增速開始減慢，你預佢增長力會變得較平穏。不過，手機市場又開始向好。

在長遠，無論是手機鏡頭，又或是各種鏡頭方面的應用，只會愈來愈廣泛，前景正面，不過，中短期可能會有少少波動。

這股可以長線投資，你現貨照長線持有就可以。

以你40歲計，你現時月供和持有股票，都係適合，但要留意其中2隻。

比亞迪(1211)現價已經係偏高，暫時不宜月供，最好等回到$200才考慮。你可以用GX中國電車(2845)或者其他優質股，去暫時取締佢。

Palantir Technologies Inc (PLTR)業務主要為商業部門和政府部門構建軟件平台。

商業部門為非政府行業的客戶提供服務，政府部門為美國聯邦政府和非美國政府機構的客戶提供服務，專為國防和情報機構分析人員設計。

這企業業務有一定獨特性，政府客戶來頭都不少，CIA、5角大樓都是其客戶之一。

見佢營業額一直有上升，但問題是銷售和研發支出，增幅都唔少，令集團依然處於虧損狀態。而何時轉虧為盈，而個就無人知。

此股都有投資價值，但不確定性偏高，只宜小注。

現時港股只在合理區，而美股更在合理區頂至略貴水平。你現時持貨已佔組合大部份，所以餘下現金，最好等大市有明顯回調，才用來入平貨。

至於入港股定美股，你可以因應當時股價平貴，和你對這些股票的認知程度去決定。

而名牌袋這類產品，我自己無研究，唔知佢升值潛力係點。

若佢可以創造現金流，長線又有升值能力，都可以視之為資產。但名牌袋個版本過氣，或者變得老舊，相信個價值跌幅會較大，未必係一個理想的資產項。

Q23502：

龔sir 我想問下四環係咪玩完，因為都蝕左50%，依家係咪應該放嗮？

龔成老師︰

四環醫藥（0460）其實比以往已經算係好翻D。不過都建議你減持。

佢本身業務，並非完全集中係醫學美容，還包括腫瘤、代謝類、慢性病、精神神經類、消化疾病類、抗感染類以及心腦血管類等治療領域。

近期佢再大跌，純粹係一單新聞指佢某些獨家代理權，或出現問題。但官方已發通告，澄清有關代理權沒出現問題。

不過這股，過往曾停牌一段時間，2015年、2016年，曾經出現了核數師有「保留意見」的情況，反映盤數當時有點古怪。

雖然近年的業務比之前好轉，未必有賬目上的問題，但始終這股過往出現過這類問題，投資者要較小心。

我對投資這股有保留。

若只係佔你組合好少比重，你可以守住先。但如果比重較高，就要沽出部份，去平衡風險。

Q23503：

師傅， 福壽園而家值得入？ 另外1212利福是平區（ 以我自己計算，唯一見佢貸較高）可加注？

龔成老師︰

福壽園（1448）有質素，不過都會擔心監管風險。

佢係中國最大的殯儀企業，有一定的規模，而針對的是高端市場，服務有一定的質素，擁品牌及知名度，有相當的賺錢能力，財務穩健負債少，因此企業本質不錯。

由於行業處增長的市場，而新競爭者要入行不易，因此對原有企業有利，故福壽園是優質的企業。

佢憑著本身的優勢，能取得比同業更好的回報，而福壽園管理層表明會持續擴展，策略上會透過併購同業及買墓園去擴充。

由於福壽園的模式成功，因此只要投入資金去發展，複製過往的成功，已經能取得理想的再投資回報率，長期來說此股有一定的增長潛力。

不過，由於佢賺錢能力強，而從事殯儀業，都會擔心佢受到監管，這是潛在風險，因此都要控制注碼。

至於企當估值方面，現價算係合理區中上部，無貨已經可以首注。暫時睇，長遠發展仍是不差的。

利福國際（1212）主要從事經營生活時尚百貨店及其他零售業務，以及物業發展及物業投資業務。

佢透過崇光在香港專門經營百貨店。

中短期一定弱，但長遠仍會正面，不過回勇就要時間。而且，正如你所講，佢負債的確較高，會扣分。此股不宜投資太大注，現價合理區底部位置，可以分注。

Q23504：

龔成老師你好，我今年買入了1038長實4手@46 on average，0270粤海1手@11.7，2800盈富4手@26 average ，近期長實下跌至42.9，應繼續入手，還是停一停？

我還持有0066 mtr 2 手，1398 工商1手，2388 boc 1手，2638 港燈3手，6823 電訊1 手，每月最多投放約20k於股票,請老師指點是否再入手，還是停一停

龔成老師︰

你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

長建（1038）是不錯的企業，有一定規模，資產亦有一定質素，並擁有相當充足的現金，而過往的發展亦很理想，能平穩發展及再投資的回報亦不算差，而開拓新業務亦能平衡當中的風險回報，整體有相當的質素。不過，規模大，國家保護資產，都令這企業增長力有所減弱。

長建有不少歐洲及英國業務，脫歐因素、歐洲經濟較弱難免對其造成影響，反而，脫歐情況明朗化會更有利企業，可說是最壞情況已過，之後將會慢慢向好。

其實長建近年仍不斷進行投資，但由於歐洲業務較弱，令股價並沒有顯現，但只要歐洲情況慢慢好轉，當中的資產價值就會更有效反映。

不過，歐洲的經濟，總不能用「強」去形容，所以長建並不是高增長類，只是最弱時期相信已過，往後會平穩向上。但回勇之路，仍然較長。

另外，由於企業已有一定規模，加上作風穩健，發展的速度不會太快，但平穩增長則無問題，手持的現金相信會逐漸收購其他海外業務。

雖然近期股價有所回落，但未見核心質素變差，你可以長線持有。

你現時持有股票，都係有質素，而且現價都合理。但是否加注，要睇你持貨佔組合比重，若已經較多，就等有明顯回調才出手。

若佔比較少，可以考慮現階段加注，但每注最好相隔10-15%。如果這些股票現價，跟上次入貨時未有太大變動，就唔洗急，等佢再回調，才再加注。

Q23505：

衷心感謝老師解答。我也很想參加老師的投資課程 ，但由於那段時間未放工，故暫時未能參予。

請問月供股票在銀行買還是證券行買好？

請問月供股票是否只選一隻月供會較好？

請問老師現在月供01109華潤置地可以嗎？現在是合理區嗎？

龔成老師︰

月供其實係銀行買，定是證券行買都無所謂。你只要睇翻個費用、月供服務有無你想供的股票、邊個較方便你，咁就可以。

但我地個月供組合，唔會只集中係1隻股票身上，如果未有選股能力，可考慮指數基金。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，建立後長期持有，不是買賣賺差價，而是成為你財富組合一部分。

至於邊D股票適合，你可以參考翻之前翻你個訊息。

華潤置地（1109）有D質素，佢係華潤集團旗下的地產業務旗艦，是中國內地最具實力的綜合型地產開發商之一。

主要業務為物業發展、物業投資及管理、酒店經營、建造及裝修的服務及其他業務。

佢所持的土地儲備大部分是用作住宅發展用途，是中國地產行業規模最大、盈利能力最強的地產企業之一。

長遠仍有發展，這股有長線投資的價值，現價大約在合理區中上部，無貨已可以入首注。

另外，我間中都會開星期六班的，通常一年開1、2次，星期六下午時間。

下次在2022年年頭。

你或者可以預早留位，只要whatsapp 55457212我同事，打「留位星期六班」就得。我地有具體資料就會 whatsapp。

Q23506：

老師，我決定月供2382、1810、1211、1177

+煤氣0003+ 龍源0916。月供2萬

多謝老師指導

龔成老師︰

你所選的股票，都有一定質素，但都有少少問題你要注意翻。

首先﹐比亞迪（1211）現價係略貴水平，暫時不宜月供。等到回至$200以下，才開始月供會較好。但如果真的好想儲貨，同時現金足，現價以小注模式去月供，都可以的。

又或者可考慮GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

另外，你而家月供組合太偏重左係潛力股(2382,1211,1810,1177)，佢地雖然有增長潛力，同時風險都較高，不宜持有過多。

若你係較年青，潛力股都只可佔約4-5成，餘下應用以下平穏增長股。若你投資經驗較淺，潛力股比重，要再調至2-3成以下。到你學到一定投資知識，才慢慢調高。

建議你最好加入一些平穏增長股，去調高翻個組合平衡性，咁會較好。

現時大市只在合理區，每月儲蓄唔好盡用，要留有部份等大跌市機會。

Q23507：

老師 我係你舊生，想問868，合理市盈率為10-13 (過往平均係7-9 , 但近期浮法玻璃有市場，所以略為提高數值）

EPS 為 1.8 （2021 中期報告eps 為1.3，但受能耗雙控影響，所以對來年eps 有保留）

估值：18 - 23.4

咁樣合唔合理？佢值唔值更高既PE?

龔成老師︰

信義玻璃（0868）在技術上有優勢，在中央政策支持光伏發展，加上新能車刺激需求的前題下，相信集團發展會理想。

你預計市盈率係合理，不過，由於近年玻璃價格波動，EPS可以在1.5-2，才較反映情況。

其實"能耗雙控"中短期會拖慢生產，但政策最終目標，係想減少國內對化石能源依賴，有利於再生能源類發展。

合理估值︰HKD15-26，現時估值在合理區中，無貨可首注。同時，你預佢中短期會比較波動，要長期先見到收成。

Q23508：

龔sir，番工大部分時間都係發夢，我想利用發夢時間增值自己，是否可行？

本人銀行做，因為剛剛入行，想問下你之前番工既日子係咪都係多數番工等放工？

真係好需要你指導 因為好驚被社會化

龔成老師︰

其實返工，除左工作上知識，待人接物、溝通、統籌技巧、時間管理等，都係你學習的範疇。而這些知識，係對你一生都有用。

所以，你唔好完全覺得返工，就等同無野增值，浪費時間。返工地方其實好多知識存在，視乎你自己把唔把握倒。

你初入行，我會建議你努力做好現時的工作先，要學習，要有熱誠。

如果你真係好得閒，你可以試下把握這些空檔，去提升自己投資知識。睇投資新聞、睇書(你可以影底係手機)、睇年報等等，令你唔會浪費左D時間。

這些事情，唔單單可以係工作中偷閒時做，平時你搭車、行路(但小心出意外)都可以做。

看似只是一些小時間，但好多時這些細節位，就係成為一個成功者和失敗者的分水嶺。

當然，我唔係叫你返工偷懶唔做野，必需係先做好正事，不影響同事之下，才可以考慮去做。

Q23509：

Sir午安 我係一個自己做生意既, 月入15-20萬左右家庭開支達11-12一個月, 非常多應酬開支, 接近零積蓄, 到左呢個年紀想學投資, 準備將來～

想請問每月2-3萬流動＄如何選擇, 如果有100萬現金又如何選擇, 金融投資應該從邊方面開始學習？

謝謝

龔成老師︰

金融投資，只係整個理財計劃的一部份。投資優質股，係其中一個最常用的財富增值方法，但唔係唯一。

我地要因應自己情況和強項，去進行配置。

以你現時情況計，其實你有一盤運作得唔錯的生意，就應該以之為重點。因為一個生意營運得好，回報係可以比投資優質股高好多。

但我意思唔係話，你唔需要投資股票，但個目的會唔同左。優質股變成用來平衡你資產組合風險的方法，以保障你整個財富組合，唔會完全集中晒係生意類別裡面。

因此，你每月餘下資金，應優先預留部份作生意發展，而非全數用來投入優質股之中。

策略上，你可以投資「平穏增長股」和「潛力股」。你每月5成儲蓄做月供。其餘先儲起，用一邊月供一邊儲蓄的策略。

由於你現時無太多投資經驗和知識，潛力股這類風險較高的股票，你就不要持有過多，最多維持2成好了，甚至先集中係平穏增長股類。

到你有一定投資知識﹐潛力股比重可以相應調高，佔組合約3-4成，視乎你當時投資知識多寡和了解這些股票程度而定。

現時大市只是合理區，你現有100萬資金可以先投入20-30萬，用"分注"形式，慢慢買貨。餘下資金和每月所儲倒的資金，就等你有更多投資知識，或者大市出現一定程度的下跌，才大力度掃貨，然後長線投資。

你可以睇我架《80後百萬富翁》、《財務自由行》和《股票勝經》，適合初學者，可以加強你對投資方面的概念。

Q23510：

老師你好！30幾歲，無投資概念，應該從何開始？

龔成老師︰

你要做三樣野，第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。《股票勝經》適合初階者的。

第二，了解銀行及證券行，去開一個證券戶口，並準備做月供股票。

其實兩者都可以，銀行就較方便，但手續費就較貴，證券行收費就較平，香港的監管不差的，風險不大。你可以先了解下不同的收費。

第三，將每月的部分資金，去做月供股票，如果不懂選基金股，就供指數基金。對初階投資者來說，月供股票是一個很好的累積財富方法，因為可避免你一次過在高位買入的風險。

原理如同儲錢，不過就不是儲現金，而是儲股票。計劃要長期進行。

另外，盈富是一個組合，適合絕大部分人投資，風險不高，長期儲貨可助你財富平穩增值，記住要長線持有。

當你在做上述三件事的同時，開始學下股票，了解下那些股票適合你自己。上述只同你簡單供盈富，當你過幾個月，有知識及少少經驗後，就可以利用你手上的資金，其中一部分，去投資股票。