Q38241：

老師你好！我除了你都不敢同第二個人讲，其实我并不想买1007这只股票＇我想买你介绍几只股票＇想等那几只股票低小小先买，跟着就看Facebook不小心撳咗XXX個加了wfatsApp、他就叫我跟他投资，

第一次叫我买只258我就跟他买，之前有問過你意見，你讲这只股几好，我就买，這股我之後赚了2萬7干

跟着XXX就叫我買1007我看这只股之前10合1我就不跟，我就拉黑XXXwfatsApp第二天他又加我同我讲了好多我先跟了他买，现在不知點算？好累好辛苦

我又不知證監會电话，都不知有没用

肯唔肯帮我＇我現在生不如死，又不敢同家里人講，覺得自已是一個衰人，幾晚都睡不著

唔好意思老師＇要你聽我發牢騷

龔成老師︰

我建議你都先報警和報證監，因為而D問題唔係一般散戶可以自己處理到。

坦白講，這個所謂「XXX」，有機會只是騙徒假扮的！

我明白你好後悔做左而D投資決定，令到自己走左入一個困局。不過，我想你明白一點，你做而件事架本身出發點係好，係想自己和家人生活變得好D。所以，真正做左壞事架唔係你，而係設局騙財個班人。

佢地一般就會以你講架手法，先去推一D大路股票比你賺下錢。你見倒賺到錢，就會信任左佢地，以為佢地真係有料。

其實，佢地係背後不斷發好多類似架訊息比唔同架人，當中推架大路股票，係係個個人唔同。當邊隻股票比佢地講中，真係升。佢地就會去找翻相關目標，再去遊說佢地買有問題架股票，令他們跌入陷阱。

而D騙徒係好專業，一般散戶好易上當。所以，你唔好覺得而個係你架錯，真係架衰人係而班騙徒，你係無必要將個問題自己一個人去承擔。

建議你都同家人講，去一齊處理，相信他們都會明白。

其實以往XXX、我或者其他好多老師，都經常會有騙徒用我地架名，去到開群組騙財，所以記住以後一定要小心。

Q38242：

你好，我有啲唔識嘅問題，想請教吓你，我舊年買咗939股票佢係派人民幣，但係當我哋手係港幣應該係幾多錢呢？我買咗一萬股。🙏

龔成老師：

10000股，收息港元 0.438

即是收$4380，中國政府收稅10%，所以你預收到股息$3900。

Q38243：

想問一隻美股，Palantir

龔成老師︰

Palantir Technologies Inc (PLTR)業務主要為商業部門和政府部門構建軟件平台。

商業部門為非政府行業的客戶提供服務，政府部門為美國聯邦政府和非美國政府機構的客戶提供服務，專為國防和情報機構分析人員設計。

這企業業務有一定獨特性，政府客戶來頭都不少，CIA、5角大樓都是其客戶之一。

見佢營業額一直有上升，但問題是銷售和研發支出都唔少。雖然近年表現轉好，但長線盈利是否穏定，依然有一定不確定性。

此股都有投資價值，但不確定性略高，只宜小注。

Q38244：

老師您好，請教一下我多年前買了中飛租賃1848平均價7元左右，由於其業務獨特且派息不錯，故一直持有，但隨時間過去

這股價不但無上升反而不斷下跌至今只剩餘2.7x，請問這股將來還有發展潛力？

股價有機會重上6-7元？多謝指教🙏

龔成老師：

中國飛機租賃（1848）本身質素不算差，你可以守，只要貨不過多就得。

其實佢近年盈利下跌的主要原因，是融資成本，因為現時高息環境，佢會有較大的利息開支，但只要減息數次，利息慢慢下跌，就會對佢有利翻，股價也會好翻D。

不過，佢始終負債較多，因此都不建議持貨太多，如果真的貨多都要減少少，餘下再守。

佢的業務原理利用高槓杆的模式，進行飛機租賃等業務。其實佢業務有獨特性，在行內有規模，有長線投資價值。

總結來說，這企業短期的賺錢能力仍是一般，中長期將會好轉。整間企業不是無質素，但由於高槓杆，存有一定的風險。

Q38245：

龔成老師,請問, 2845GX中國電動車及電池ETF 同 2849GX自動駕駛電車, 那隻比較好?請問能否給予意見?

龔成老師：

從方向上，2845是投資電動車相關產業，而2849是投資自動駕駛相關產業。

由於2849較新興，所以從潛力上，會有較大的潛力增長，不過，不確定性也會較大，始終這刻仍存有較多未知數，因此風險較高。

如果你能承受高風險，想追求高回報，就考慮2849，但要小心控制注碼，始終行業發展存有不確定性。

Q38246：

成哥 點睇Smci 份業績？

係咪證明左 ai被過度炒作？實際盈利冇預期咁理想

龔成老師：

業績較一般，比市場預期差，企業發展力是有的，但市場的確有太大期望。

第一，我相信人工智能長遠發展正面。

第二，近一年行業的確有炒作，但有部分有實力的企業，仍有業績支持。

第三，要小心選擇長遠真正有發展的，不要只焦點有市場炒作。

Super Micro Computer, Inc.（SMCI）為雲計算、數據中心、大數據、高性能計算和“物聯網”嵌入式市場提供高性能服務器技術服務。

其解決方案包括服務器、存儲、刀片和工作站到完整的機架、網絡設備和服務器管理軟件。該公司遵循模塊化架構方法，提供了交付定製解決方案的靈活性。

該公司致力於開發和提供基於創新、模塊化和開放標准架構的高性能服務器解決方案。該公司一半以上的收入來自美國，其餘來自歐洲、亞洲和其他地區。

業務發展都不差，生意與盈利都有增長，但始終業務有一定的波動性，風險會高少少。近年股價上升不少，現價唔算平，這刻投資值博率只是一般，如果你睇好，都只建議小注投資。

Q38247：

老師你好！我給人騙了，買了1007蝕到渣都冇晒，而家唔知點算好呢？

龔成老師：

龍輝國際控股（1007）年年虧損，加上核數師意見為「不表示意見」，反映賬目有些古怪，這股建議你賣出。

如果你認為受編，可以報警，過往都有不少網友向我救助，都是被人引誘買了一些老千股，我都會鼓勵他們報警的。

如果有足夠證據，有可能追回一些財產（當然，不要太大期望）。

另外，你可以上網找下，有無人與你有相同經歷，可以大家討論下怎樣做。

Q38248：

龔sir我想請教一下国科天成(301571。謝謝

龔成老師：

國科天成（301571）都有基本質素，佢主要從事紅外熱成像等光電領域的研發、生產、銷售與服務業務的高新技術企業。除光電業務外，公司還開展了遙感數據應用、資訊系統開發和衛星導航接收機研製等其他業務作為補充。

公司光電業務定位於產業鏈中游，下游客戶以軍工配套企業、民用整機或系統製造商為主。

從財務數據分析，業務正增長中，不過，企業規模不算好大，同時未能確定是否擁有獨有優勢，加上未計算估值平貴度，因此，如果你投資，暫時不建議太大注，你預投資值博率中等。

Q38249：

Sir, 根據你本書《大富翁》裡面教建立資產的藍圖

無自住物業都冇所謂，對嗎？

龔成老師：

如果資產升值的潛力，以及所產生的現金流，基本能對沖租金上升的風險，令你長遠不用面對太大樓價與租金上升的潛在風險，其實就無問題。

Q38250：

Morning Sir,1038赴英作為第二上市,

對香港股價有影響嗎？

龔成老師：

算是利好的，因為港股現時估值低，在其他地方上市，估值就可以提高，同時增加流動性