Q23001：

你好，老師。信義能源（3868）派息比率107%，即係所有盈利100%都拿出來派息，另外再係股東權益部份拿7%派，如果長期咁做，

係咪公司無多餘盈利發展，咁股票係咪唔會帶動向上？

龔成老師︰

你要先明白派息比率公式，佢係用"每股派息/ 每股盈利"去計出來。

而每股盈利，即等同"純利 / 已發行股數"。

當派息比率大於100%，有機會係企業用之前保留盈利，去加派息。這個做法有好有壞，要睇翻企業本身質素和原因，不一定係壞事。

而信義能源（3868）則是另一個情況，其實純利這個數字，除了包含佢實際賺到的錢外，也有一些會計數字調整。

你留意2020年年報損益表的附註7，你會發現純利中有近4億元的折舊，這個不是真實成本，只是會計調整。若你將這部份加回純利當中，你就會發現派息比率少於100%，佢係純粹派緊當年賺到的錢，無派突。

至於，無多餘盈利唔代表就發展唔倒，因為還有借貸這個選項。只要唔好借得過多，咁就無問題。

Q23002：

老師，非常感謝你的指點，我現在34歲，有兩個小朋友，工作地盤，現在收入約3萬3，比1萬8千太太家用，其餘的自己存起來，因爲自己又唔識做生意，好想學點投資，增值下自己

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你34歲計，就應以增值為主，建議你用「平穏增長股」 + 「潛力股」作組合，去創造一個增值平台。

你係初學者，對企業估值，點去定平貴未必太了解。我建議你先利用月供模式，去建立一個股票組合，以減低買貴貨風險。

現在你每月先用5成儲蓄做月供。其餘先儲起，用一邊月供一邊儲蓄的策略。

由於「潛力股」係需要一定經驗和有一定波動性，如果你經驗較淺，可以先小注，大約佔組合3成左右，甚至先集中係平穏增長股。若你係有一定經驗，你可以投資到約5成比重。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

同時間，你要去多讀投資相關書本、年報，新聞和課程。

書本上，你可以睇我寫架"80後百萬富翁"、"財務自由行"和"股票勝經"，都適合初學者。

另外，本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資、評估平貴，在投資上已掌握了一定的知識。

Q23003：

老師，6669 抽中了一手，首日大跌，應該點算？

龔成老師︰

先瑞達醫療(6669)是一家領先的中國創新醫療器械企業，以「介入無植入」為理念，提供多種血管疾病治療方案。

集團研發了多款具有領先技術（尤其在藥物塗層球囊(DCB)領域以及血栓抽吸導管領域）的介入醫療器械。

以2020年產生的收益計，首款外周DCB產品以約86.9%的市場份額在中國外周DCB市場中佔據主導地位。

第二款DCB產品於2019年被FDA認定為「突破性器械」，並於2020年12月獲得國家藥監局批准上市，成為全球首款（截至最後實際可行日期，也是全球唯一一款）基於多中心隨機對照臨床試驗結果而獲監管部門批准上市的治療膝下(BTK) DCB產品。

中國DCB產品市場仍處於其初步發展階段，具有巨大增長潛力。DCB的市場規模由2015年的人民幣26.9百萬元顯著上升至2019年的人民幣10億元，複合年增長率為150.5%。

隨著治療其他血管疾病的DCB產品，適應症預期將擴大，中國DCB產品市場預期將於2024年進一步攀升至人民幣60億元，2019年至2024年的複合年增長率為41.5%。

且於2030年進一步上升至人民幣143億元，2024年至2030年的複合年增長率為15.5%。

此股係有投資價值，佢營業額增長快，但同時需要投入大量研發成本，令佢2020年出現虧損數字。

所以，此股投資係可以，但不確定性較大，因為未知幾時才會有穏定盈利出現。故投資時，一定要控制注碼，不能大注。

由於佢無穏定盈利支持，故市場氣氛較弱時，佢就好易會有波動。但你只係有一手，照持有係無問題，但你預要持有一個較長時間，才會有理想回報。

Q23004：

我計劃在兩三年內結婚，所以想要較穩定增長/潛力股。 按現時組合有咩建議？

應該等盈富平(around $24左右？）再入貨？定入其他好？

因為始終手頭上得番3萬蚊，而且每月儲到既錢都唔多，$3000左右。 謝謝。

龔成老師︰

由於你2-3年內就會結婚，若你需要動用持股，去支援你結婚開支，由於時間唔長，你最好集中係平穏增長股類，咁會較穏當。

潛力股，就不要持有太多。

策略上，你可以投資「平穏增長股」，你每月$2000做月供。其餘$1000先儲起，用一邊月供一邊儲蓄的策略。

選股上，你可以投資在平穏增長股︰指數基金、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。如果有投資美股，可投資VOO。

由於資金不多，你可以集中指數基金。

餘下$30000和每月儲的$1000，就先留起，去等大跌市出現，才去入平貨。

Q23005：

您好！龔成、本人己53歲，收入8萬現租3房月租$和2女兒同住，現金$200萬，股票70萬，人民幣定存3年80萬

我應買500-550萬樓做7成按揭自住，還是繼續租平D$18000，或用現金投資多5-8年先買樓終老，求意見

如要買，睇中青衣美景30年樓還是買20年居屋呢？

龔成老師︰

其實每個人都有自住需要，長期租屋，會承受租金波動的風險。

作為自住物業，只要係配合你長線生活所需(未來10-20年)，而且又確信"供得起"，其實已經可以置業。

至於青衣美景30年樓還是買20年居屋，你都係從自已生活需要，作做分析。

另外，係置業同時，最理想係可以留有一定資金，投資優質股增值，以免財富組合太偏向物業類，咁就可以。

如果你現時置業，要資金盡用，每月供樓後又無閒錢投資，我建議你用優質股再累積更多資金，才出手置業較好。

Q23006：

好的，8083好彩我只入左8千股@3.2，但已冇左就8成，佢一直向下，唔知有冇机會上返$1。

另外，我想請問阿sir一些長線投資的問題。

我今年39歲，每個月約可以儲1-2萬。除了有約40萬的股票外（1810及27已短炒止賺，目前得返7隻），其他都是活期儲蓄。我想買一些可以收息的股票，可以怎樣做？

現時係咪都先持有現金，待恒指約23000點才入貨？謝謝

龔成老師︰

你先要明白一個重點，我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線，而唔係短期炒賣，去賺差價。

小米(1810)係優質股，你唔應該沽。除非佢地去到異常地貴，或者長線質素出左問題。否則你一直持有，才是最好的增值方法。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時40歲去計，應以增值為主，而唔係去儲收息股。

中國有贊（8083）佢不是無潛力，但風險較高，若你只係小注，都可以守。太大注，就要沽少少去平衡風險。

未來投資策略上，你可以投資「平穏增長股」和「潛力股」。你每月5成儲蓄，即是用$5000-10000做月供。其餘先儲起，用一邊月供一邊儲蓄的策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資知識多寡和了解這些股票程度而定。

現時大市只係合理水平，餘下的另一半現金，我地就等機會，當大市出現較大回調，就加大力度掃貨，然後作長線投資。

Q23007：

請問現時太古地產市盈率31是否太高，但歷史上股價的低位16只有一次，現時應該入市嗎？謝謝你！31是否計錯了

我比較緊長江基建同太古地產

龔成老師︰

太古地產（1972）2020年的市盈率的確係有30倍以上，這是由於佢2020年盈利出現大跌所致。

但大跌原因，並唔係佢業務出左問題。而係損益表中一個叫"公平值"數字，出現倒退。

這個不是實際收入或損失，純粹係一些會計上數字。因此，我地係做好似太古地產這些物業相關行業時，係唔會用市盈率去定平貴，因為當中數字跟實際企業情況，係有些偏差。

2020年太古地產收入係少左，但唔算好嚴重。現價計，算係一個合理水平，可以分注。

長建（1038）都是不錯的企業，有一定規模，資產亦有一定質素，並擁有相當充足的現金，而過往的發展亦很理想，能平穩發展及再投資的回報亦不算差，而開拓新業務亦能平衡當中的風險回報，整體有相當的質素。不過，規模大，國家保護資產，都令這企業增長力有所減弱。

長建有不少歐洲及英國業務，脫歐因素、歐洲經濟較弱難免對其造成影響，反而，脫歐情況明朗化會更有利企業，可說是最壞情況已過，之後將會慢慢向好。

其實長建近年仍不斷進行投資，但由於歐洲業務較弱，令股價並沒有顯現，但只要歐洲情況慢慢好轉，當中的資產價值就會更有效反映。

不過，歐洲的經濟，總不能用「強」去形容，所以長建並不是高增長類，只是最弱時期相信已過，往後會平穩向上。但回勇之路，仍然較長。

另外，由於企業已有一定規模，加上作風穩健，發展的速度不會太快，但平穩增長則無問題，手持的現金相信會逐漸收購其他海外業務。

是收息及平穩增長類，現價是合理的，同樣可以開始分注入貨。

Q23008：

龔成，你好。早前咨詢過你意見。

最近買左層近沙田市中心既樓，$590萬並開始有租金收入，$14500

而家自舊年開始月供股票，003（供$3000）及2800（供$2000）

本有供1211及9988，但實在太貴，今日1211升到呢~~~，每個月買得幾股，供到退休都未夠一手。所以下月打算供66地鐵。

自己以前大洗，儲落唔多，而家收入多左先開始儲返d，另外買左既股票︰

87 $6.64 2500股

6823 $10.48 1000股

1398 $5.00 2000股

1070 $6.50 2000股

1810 $32.7 200股

當中小米每次見佢跌我有衝動想再入，因我覺睇佢長遠

至於其他股票有冇問題？因都係穩陣派，唔敢亦唔識太高風險

而MPF, 都係主力 美股基金，歐股基金，約佔七成。雖然朋友極力推薦大中華，但今年表現真係唔ok

至於我先生，唉。叫佢月供股票當儲錢，叫左幾個月都唔理我

但我手上既投資，可以比d意見嘛

龔成老師︰

比亞迪(1211)現價係貴，你現貨照持有，但月供你最好等回到$180，才再考慮﹐你先轉供地鐵(0066)係可以。

如果你想供翻新能車相關股份，你可以用GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

當然，GX中國電車（2845）都係潛力股，風險度都接近比亞迪(1211)和阿里(9988)。由於你係投資取態較穏陣架人，平穏性較高的地鐵(0066)，可能會較合適。

另外，我建議你月供用盈富(2800)做主力，供$3000。而煤氣(0003)才$2000。

你現時持股，都算有質素。小米(1810)現價都略貴，要回多1.2成，才算合理區頂。而TCL電子（1070）質素唔差，但負債比較高，風險度係存在，不宜太大注。

至於MPF，係一個長線計劃，其實加入中國地區MPF，都係可以。因為中國未來10-20年，相信都係全球其中一個最大經濟體。而且多一個不同地區，可以加大你組合分散風險能力。

Q23009：

月供股票係咪即每月買一手咁？

龔成老師：

簡單來說，月供股票就是你每月將現金，買入某一隻或多隻股票，慢慢咁樣儲貨。坊間不少銀行都有提供月供股票服務，你先開證券戶口，然後登記做月供股票。

形式就是每月投入相同的金額，買入同一隻或多隻股票，並持續進行。

例如，每月以相同金額$10,000 買入股票A，假設第一個月股價為$25，就能買入400股；第二個月升至$35，就能買入286 股；第三個月跌回$30，就能買入333股。

總結這三個月，投入了的資金為$30,000，累積股票為1019股，平均買入價為$29.4。

由於月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣。

要注意的是，由於每月持續投入資金，因此一定要選優質股，長線投資，同時要以儲股票的概念進行，最少持續供3 年以上，之後持有5年以上。

月供最重要的一點，是「選股」，如果你無選股能力，就投資ETF。

Q23010：

你好 我想投資美股，入以下6款股票 但係全部都係ETF, 有冇問題？

VOO - 23%

VO - 13%

VB - 12.5%

VEU - 14%

BND - 28.5%

VCSH - 9%

謝謝

龔成老師︰

全部係ETF，唔係一個問題，只要唔好當中令到個別行業，出現過度集中風險(個別行業，佔比不要高於組合30%)，咁就可以。

你上述ETF，其實都有投資值。但我地進行投資選項時，都會因應人生階段。

假設你係年青至中年人士，你就應先做好增值部份，VOO / VO / VB / VEU就會較適合你。但建議以之為組合時，用VOO作為主力，個平衡性會較高。

若你係將近退休人士，應以穏定現金流為主。

你可以考慮Vanguard Total Bond Market ETF (BND)和Vanguard Short-Term Corporate Bond ETF (VCSH)這些收息債券基金。

但留意BND和VCSH並不保本，係有賺息蝕價的可能。