Q28461：
成哥, 而家住緊300尺左右單位，租金10500，出年完死約, 黎緊都考慮要買樓
由2019年至今都有買股票，買入成本總數係37萬左右，而家跌到26萬
人工收入30000， 儲到10000， 另加其他投資每月收入20000， 月儲共30000左右
按之前計畫，去到出年2023年中至尾，股票連現金應該有7-80萬
想買280-400尺單位5-600萬做9成按
問題
-
睇番手頭上既股票，平均輸多，你會唔會用呢個角度去衡量自己手上既貨平貴，同上下望空間？
-
呢一年，我每月既儲蓄應該繼續買股票定保持現金好？
-
手上既貨有冇需要調整？ 阿里巴巴38% / 協鑫科技 23% / 理想汽車 14% / 建滔積層板 13% / 信義玻璃 6%
-
因為買第一層樓，除左考慮自住都想考慮埋財富增值。自己鐘意呢幾個區。
-
上水 - 成長地方，近朋友，生活買野方便，環境無自由行既話適服，但遠
-
馬鞍山 - 環境最鐘意，但遠，價錢有D勉強？
-
屯門 - 樓價平，生活買野好方便，環境ok，但樓齡舊，近樓稍遠
-
大圍 - 位置好 ，交通方便，有新大型商場落成，買野方便，物業增值能力稍強？
-
沙田 - 好似第一城同河畔花園呢D樓價平，都算方便，但樓齡高 成哥可以比D意見比我嗎？ 除左呢幾區，其他區都ok
-
有人話第一城跌咁多價，係因為樓齡長，將來轉手做唔到30年按揭，你覺得呢個問題重唔重要？ 黎緊大機會提高上限嗎 多謝成哥抽時間睇，另外 你覺得我做9成按適唔適合？
龔成老師︰
- 這是其中一個衡量的指標，因爲大市能夠反映市場的氣氛，當大市大幅度下調的時候，代表市場處於恐慌的情緒，這為長線投資者製造一個機會。
但要留意的是，你手上的股票的走勢未必一定跟大市走，又或者下調的幅度可能好少，所以，就算大市大幅度下調，都不代表你手上的企業一定到達便宜的價錢。
所以，大市只係一個參考平貴度水平，真正平貴度都要參考翻個別股票情況。
2）如果你一年後會置業，相關資金應以現金或定期持有比較適合，股市始終有波動。
3）理想汽車(2015)，阿里（9988），信義玻璃（0868）都是潛力股，不確定性高；
其中阿里（9988）因爲監管的因素，中短期都會偏弱。同時，阿里佔組合的比例達到38%，明顯過多是，個別股票不應該超過組合的15%，建議在反彈的時候適量減持，維持組合的平衡性。
建滔積層板（1888），协鑫科技（3800）質素一般，其中3800更是佔超過2成，不建議持有太多，長遠要適量減持，維持組合的增長力。
4）你所講的地區都是潛力升值的地區，政府要發展「北部都會區」計劃，必然會為新界帶來發展，其中大圍，沙田發展相對較好。
但發展需要時間，有發展，不代表物業就一定會升值，物業的質素是重點，你買樓自住，要符合「供得起」+「物業滿足10-20年需求的目的」。
買入物業最重要都是睇翻該物業的質素，呎價，預期租金回報率，特別是利用「呎價，預期租金回報率」去比較同區同類單位，以確定該物業的平貴水平。
另外，你再要審視其升值潛力，未來地區上、交通上、生活等等的配套發展，才去下一個結論，咁會較好。
5）如果能夠通過壓力測試，當然能夠借多些資金有好處，但你要預自己都有足夠的供款能力，否則，「供不起」銀行就會收樓。
另外，30/40年樓齡的物業，如果本身係有質素(如位置、附近發展、配套等)，而又保養得好，都依然有平穏升值能力。如果係大型藍籌屋苑，升值能力就會更佳。
但當佢樓齡再高，就有機會面對潛在維修成本，而且做按揭都會較難。這時候，物業價值就有機會出現倒退，你要留意。第一城屬於大型屋苑，保值能力會好少少。
提高上限指做多過30年？呢樣好睇個別銀行的按揭批核政策，但一般30年已經盡。
Q28462：
Sir, 想問有些股票(FOS, MSFT, GOEV, SLG, IONM, PYPL)早幾日升時賺幾十美股，因為想股價高多1,2蚊先賣，結果賣唔出，導到超過15%跌幅，我該如何部署？
- 忍痛賣？(仍有4個月生活費)
- 繼續等機回升到有得賺？ 龔成老師︰
首先，你現時最大問題，不是持股質素，而係你對投資的認知。
我地投資一定係長線，你見全世界最成功的投資人巴菲特，都只會做長線投資，唔會短炒。
因為中短期股價，可以因為好多因素影響，有些因素甚至跟企業無關，所以無得計。但長線企業價值，必然會反映在股價上，只要長線持有優質股，就自然會有理想回報。
所以，如果你真係想賺錢，你首先要放棄好多散戶都做緊架短炒模式，改用長線投資。建議你睇我寫架《80後千萬富翁》、《財務自由行》和《股票勝經》，認真了解下投資是一件什麼的一回事。
至於持股與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。
MSFT, GOEV, SLG, PYPL都有投資價值，可以守。
Canoo Inc（GOEV）係一家汽車製造公司，現時規模唔算大，但就有增長力。
佢從事電動汽車的設計和開發，設計了一個模組化平台，專門用於提供車輛內部空間，並適用於支持消費者和企業的各種車輛應用。
呢間公司亦從事多功能運輸工具（MPDV）的開發，其MPDV產品組合包括MPDV1、MPDV2和MPDV 3。
由於未算有好強的優勢，加上仍處燒銀紙狀態，因此，是較高風險的類別，投資價值只是一般，如果睇好，小注好了，長線是可以等，等企業成長。
Fos SpA (FOS)和Assure Holdings Corp (IONM)我無特別研究，初步睇佢財務數據，算係一般。
Q28463：
你好啊龔成老師,. 因為我睇你既書本講到控制自己支出
但邱吉爾有句名言係：當你入不敷支的時候，增加你的收入，不需要改變你的支出。
請問你點睇哩句啊
龔成老師︰
其實我對佢而句名言，無太大印象。
係我地分析時，必須考慮時代背景，點解會說而翻話。邱吉爾好多名言，都係來自二戰時期。當時英國需要投入大量資金和資源，去加大軍備生產。如果這翻話是那時候說，都可以理解。
但我地投資，就不同。因為要做財富增值，大前提是有閒錢，而好多人儲錢方法，就係洗完有剩先去儲，最終造成極低儲蓄效果，令財富值值極慢。
因此，我會建議讀者想做好增值，但應先將投資的資金，從收入上扣起，有剩才去消費。用這個模式，才會有明顯效果。
Q28464：
我而家有
3110
建行
領展
005 (好多年前 $7x買，死唔肯放)
SPHD
VOO
KO
除左hsbc ，其餘都係9月先開始逐手逐手咁買
同埋請問你有無用IB，想請教點樣通知佢地 想用 收股代息？因為我試過去，佢地話唔會係公司同客人處理，只可打電話，是嗎
龔成老師︰
小心，一隻股票如果長線質素變差，就算佢而一刻是賺定蝕，都要減持，唔好死唔肯放。因為質素轉差，就算你守，都只會愈守愈跌。唔係守，就一定返到家鄉。
匯控(0005)雖然近年質素弱左，但都有長線投資價值，不過主要係收息，增長力唔會明顯。
你現時持股，都係有長線投資價值，組合偏向平穏增長和收息，適合中年人士。
至於IB，我無用過，你要問客服。
Q28465：
老師你竟然會覆我，我係你上年初階班既學生黎
我見巴菲特上一季既投資呢隻股(ALLY)既比重都幾高下，如果我睇岩的話，增加左234.47% 係佢投資組合上，黎緊我都會用價值投資法估算佢。
好開心龔Sir你真係覆我呀
龔成老師︰
好，但記住每個人架風險承受力、投資取態、年紀、取得資訊能力(巴菲特佢可以得到信息和分析力，始終同我地唔同)都不同。
所以，係配置時候，唔好只著重抄某個投資人。一定要因應自己情況，和對相關股份的認知能力，去作出理性決定。
Q28466：
老師有無美國醫療股推薦
龔成老師︰
美國有很多醫療股，由醫療服務、疫苗、設備建造都有，當中UnitedHealth(UNH)、輝瑞公司 (PFE)等都是一些可考慮選擇。
不過，如果你本身對美股醫療股認知不多，但又睇好這個行業，建議你買行業ETF會較好。
SPDR健康護理指數基金 (XLV)，投資目標是美國的醫療類股份。
前十大持股包括，UnitedHealth(UNH)、Johnson & Johnson(JNJ)、Pfizer(PFE)等，都係有質素的股票。
此ETF有長線投資價值，可以用月供或分注模式，去慢慢儲貨，並長線持有。
Q28467：
2899有7手，對我來說都幾多。8.xx 同9.xx入，但呢個星期跌左好多，所以想問下。
龔成老師︰
任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。
因此，你要長線建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。
特別係銀行業，佢營運模式較特別，風險會比一般行業為高。必需堅守30%這個準則，如果可控制在20%以內，會更好。
紫金(2899)投資價值唔算好高，最好係佔組合10%以內。如果真係太多，建議減持少少。(跟你買入價和股票質素無關，而係平衡風險架問題)
若果真係唔想沽，就唔好加注，用新資金投資其他股票，去令佢比重回落。
Q28468：
最近日元、澳元、加拿大、英鎊匯率跌到幾多最好才入？
龔成老師︰
在投資的角度，外匯不是最好的投資項目，因為說到尾，這些都只是一些貨幣，即是「政府借據」，貨幣中期會以週期的模式運作，但長期來說，都是貶值收場，因為貨幣只有「交易價值」，並無真正的財富價值。
而我地進行財富增值時，應該集中將資金投放在真正的資產，如物業、車位、優質股等。
如果你係有實際用途，你就分幾注咁慢慢入，去平衡價格波動的風險。
Q28469：
龔sir,想請問：
我不買股票的（因我一買股票都輸），
除左搵兼職外，
有其他方法增加收入嗎
龔成老師：
第一，可以做兼職。第二，可以試下做小生意，第三，你可以利用空閒時間學下野，提高自己的技能與價值，希望能長遠提高收入。最後，投資是理財其中一部分，點都要學習的。
Q28470：
老師，你好！長遠投資，想入手0388, 939 or 0960! 那一個比較好，現在是入貨好時機嗎？
龔成老師：
388、939可優先考慮，兩股現時都可分注，有長期的投資值博率，但一定要同時留有現金，你預388較為波動，939收息就較理想。