Q41101：
龔成老師，你好
我今年50歲，剛退休
持有現金：90萬
定期及債券合共：20萬
股票：80萬
以下每隻佔整個組合 6-10% 不等
中石化（0386)
偉易達（0303）
佐丹奴（0709）
創科實業（0669）
港鐵（0066）
領展（0823）
盈富（2800）
Vanguard S&P 500 ETF (VOO)
巴郡（BRK.B）
蘋果（AAPL）
微軟（MSFT）
麥當勞（MCD）
可樂（KO）
物業：
除了自己住緊的單位外，另外有一層舊樓，約值480萬，已供滿
現正放售
MPF：
50萬左右
問題 1）
現持有的港股、美股合共13隻，
想加入，比亞廸 1211 及 小米 1810
是否應該賣出部份股票，等個組合唔好咁雜亂？要賣的話，賣呢兩隻合適嗎：偉易達（0303）
佐丹奴（0709）
或者有沒有其他股票建議我買入，是比較適合我呢個年紀的呢？
問題 2）
之前曾經聽老師建議其他讀者，買一半股票，另一半等個市跌，才大手入貨。所以我現在，股票現金，比例是 47% 股票： 53% 現金 。
物業出售之後，比例會變成 ：12% 股票 ： 88% 現金
物業出售之後的資金，應該如何投資？
問題 3）
我剛退休，但MPF 好似要60歲才可取出，請問是否正確？
謝謝解答
龔成老師：
1）現時你持有的股票，大多是有質素的，同時，根據你初步比你資料，股票應該無出現集中情況，所以，大方向上可以持有。
由於你退休，風險承受能力會比過往減少，因此，你在建立投資組合時，潛力股如1211、1810未必最適合，反而增加收息股類別，會較好。
如果你擔心組合太散，可以投資一些高息股息基金，例如GX恒生高股息率（3110），是一個投資收息股的基金，追蹤恆生高股息率指數之表現。這指數投資一些在香港上市，大型的企業，加上要有一定的派息的上市公司。
基金有50隻成份股，以下是基金部分持股：
中國海洋石油（0883）、中國神華（1088）、中國宏橋（1378）、中石油（0857）、中煤能源（1898）、電訊盈科（0008）等。這基金雖然收息組合，但增長力不強。
另外，由於基金持股集中在中國企業，投資者不能只持有這基金，最好視為收息股的其中一員，如果投資者低風險，宜同時持有其他的低風險、收息工具。現時算是合理區較下部，可以分注投資，長線持有。
另外，收息股如：港燈（2638）、深高速（0548）、香港電訊（6823）、工行（1398）、置富（0778）等都可以，你可以了解下，並從中選股。
2）你賣出物業後，應該投資一些低風險，收息工具。
始終這刻退休，風險不宜太高，同時，你應該好好運用資金，投資一些有現金流的工具，幫你每月增加現金流收入。
你可以將資金分成5部分。
第一，建立一個收息股的組合
第二，投資債券，你可以選擇A評級的債券，年期較長都可以，但利息卻不高。你可以到銀行問問。
第三，投資年金，你可以睇睇，這是適合你的產品，零風險，可以有穩定回報。
第四，你亦可投資銀行低風險類的產品，你可自行到銀行了解下，總之是「低風險，持續現金流」的。
第五，持有現金，除了可做定期外，現金亦可以為你的後盾，以備不時之選。同時，若投資市場大跌，你可以在這時買到更多的收息股，股息率會進一步上升。
你平衡地分配在上述的項目上，對你來說是最好平衡風險，同時有穩定的現金流。
3）根據《強制性公積金計劃條例》，強積金計劃成員必須於年滿65歲後，方可提取由強制性供款及可扣稅供款累積的強積金。
除非計劃成員必須年滿60歲並已終止所有受僱及自僱工作，並作出法定聲明指無意再次受僱或自僱。計劃成員可以選擇一筆過或以分期的方式提取強積金。
Q41102：
龔Sir 0493現在前景有希望嗎？
龔成老師：
國美零售（0493）質素持續向下，基本上已無投資價值。
其實近10年，受大環境、網購、自身品牌轉差等情況影響，質素已大減，自從10多年前創辦人黃光裕因涉及賄賂及挪用資金被捕後，企業一直轉弱。到數年前，創辦人黃光裕刑滿釋放，市場對當時對這企業有期望，但面對大環境不利，以及內部管理問題，業務持續轉差。
近年不但有分店結業，更持續多年出現虧損，加上企業有一定負債，在融資成本持續不輕的情況下，企業往後面對的困境十分大。
國美主要業務是在中國經營及管理電器及電子消費品零售門店網絡。過往曾經是中國領先的家用電器及消費電子產品連鎖零售商，但10年多年前企業業務轉差，再加上大環境不利，令業務持續向下。
簡單來說，企業質素已大不如前，雖然股價近年下跌不少，但都不建議投資。
Q41103：
老師, 想請教以下問題想問你意見,多謝你嘅時間
1）月供$10000 當儲錢一路放在地鐵 （0066）, 但過了5年好像停濟不前 （平均買入價是34.528現在徘徊$24-25）, 當然可以收息, 現在考慮想將此轉向另外更有潛力的月供股票, 可以比地鐵有多少少增長但不是高風險的股票, 有什麼選擇呢？ 我45歲 謝謝
2）點分辦一隻股票應該以供股形式還是直接買入好呢？
3）我好睇喜歡小米, 但我不相信自己眼光, 之前就算30蚊, 照買, 結果等咗幾年, 終於收成期, 汽車開始有市場, 但我好有陰影, 就算知道隻股票幾有潛力, 都怕買入, 又驚一買入又爆跌要無限等待, 它是否一隻供股嘅好選擇？支金不多所以我要小心選擇, 到底我應該將支金分幾細去放入不同嘅籃子呢？
4）以前未看過你的書, 跟你開始調整投資心態, 謝謝您, 以前很介意股票波動, 但現在每次見到無論升/跌都會常常諗起你嘅說話, 要等待企業長遠增長, 特別介意短期波動, 不再為少少波動抓狂, 看似小事但是真的感謝嘅分享令我這個根深蒂固嘅無知得以改變/轉化🙇🏻♀️🙏🏻, 我終於看到沉睡嘅銀行戶口有返少少起色, 看到銀行戶口有第一個100萬, 雖然不是現今也 知是遲了一點但有心不怕遲, 令我更有動力繼續努力理財&儲錢, 因為過去嘅無知銀行還有一些無知時買入嘅股票, 看到其他人問你意見應否留下之前跌破價嘅股票...所以我也鼓起勇氣抱着可能畀你鬧嘅心態希望你給我點意見, 哪一隻可以狠心離開哪一隻可以繼續等待, 萬分感激🙏🏻會繼續向你學習🙏🏻🙏🏻
正常嗰啲有
小米, 比阿迪, 六福, 商湯, 港鐵 會計做等待長遠成績
石沉大海的有：
757 陽光能源 - $0.615 到現在 0.08
909 明源雲 - $ 51.3到現在 3.9
1177 中國生物製藥 - $9.98 到現在3.31 - （看到你之前分析應該可以繼續持有慢慢等待）
1316 耐世特汽車系統- $14.04 到現在 5.4
2381蜆殼電業 -$ 0.145 到現在0.099
6123 圓通國際快遞- $ 7.35 到現在1.15
8292 盛良物流- $1.062 到現在 0.112
感激指教同你嘅用心教導和解答
龔成老師︰
1) 港鐵(0066)依然有長線投資價值，但增長力唔會有以前咁強。你可以持有，但如果已有一定貨(如已佔組合15%以上)，建議轉向月供其他平穏增長股。
平穩增值股︰
指數基金由於是一個組合，因此在平衡風險方面較好，例如美股追蹤標普500指數的（VOO）、追蹤富時全球股市指數（VT）、追蹤港股的盈富（2800）。
另外再加其他個股：美股如巴郡（BRK.B）、蘋果公司（AAPL）、迪士尼（DIS）、Costco好市多（COST）、麥當勞（MCD）、可樂（KO）、港股如中銀（2388）、港鐵（0066）、港交所（0388）、長建（1038）等，你可以了解下，並從中選股。
2) 任何方法，先決條件就係隻股票要有長線投資價值。
而月供定直接買，係睇你有無"估值"能力。
如有，就應自己因應平貴入貨，長線增值效果會較理想。相反，你無估值能力，即係唔識判斷隻股票平貴，就應用月供或分注，去平衡買貴貨風險。
3) 先講組合平衡性︰
任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。
因此，你要建立一個平衡的投資組合，當中有不同的類別、不同的行業，這是最好的平衡風險方法。個別地區不要高於組合70%，相同行業不可佔組合多於30%，而單一企業不要高過15%。
特別係銀行業，佢營運模式較特別，風險會比一般行業為高。必需堅守30%這個準則，如果可控制在20%以內，會更好。
但盈富(2800)、VOO這類指數基金，則不受企業和行業限制，因為它是一個包含一籃子不同行業的優質股組合。因此，盈富(2800)、VOO就算在組合中佔較大比重，都唔會造成(企業和行業)過度集中性風險。
至於點解你投資會怕又輸錢，係因為你以為自己已經好清楚隻股票，同投資而件事。
但事實上，如果你真係了解一間企業，知佢潛力。同時，又掌握到估值技巧，係一個合理，甚至平架水平去儲貨，其實就算面對佢中短期股價下跌，都唔應該會擔心。
反而，你會思考，係唔係一個平價儲貨的好機會。
所以，問題重點係你對投資知識架不足。
小米（1810）以手機、智能硬件，以及物聯網為平台的公司，小米專注於互聯網直接銷售產品，近年發展電動車。
雖然發展電動車，投入了較多資金，令風險比過高左，現時的發展情況不差，如果長遠成功，股價可以倍升。
隨著新產品系列推出，小米賺錢能力提高，同時佔據了一定的市場，在中國安卓類手機4,000至5,000元價位，小米出貨量排名第一。
另外有一點值得留意，小米最新的全球及中國大陸MIUI月活用戶數持續增長，達到約6億和1.5億，均創歷史新高，而這部分會慢慢產生更多的將來收入，所以前景又不用睇得太差。
考慮到小米過往的發展，其產品性價比不差，以及研發能力強，佢電動車長遠發展值得期待的。
這股可長線，現價係唔平，預佢股價短期會較為波動。
至於是否入，你可以睇自己持貨量。如果無貨，可以入少少。但有貨，最好等佢有明顯回調。或者長線用月供儲貨，都係可以。
我出左最新小米(1810)架分析影片，你都可以睇下︰
https://www.youtube.com/watch?v=UTXHpJEPNS4
4) 其實，投資係一個長期架規劃，只要你有足夠知識，(中短期或有波動)長線回報一定唔會差。
5) 至於你現有持股，陽光能源(0757)、盛良物流(8292)無明顯投資價值，建議沽出。
其餘持股，雖則有長線投資價值，但除左小米(1810)、比阿迪(1211)、六福(0590)、港鐵(0066)外，其餘不是質素中等，就是風險很高類別，不宜持有太多。
未來時間，建議你先集中上述平穩增值股。到你再有更多知識，才加少少潛力股，會較為穏當。
Q41104：
龔Sir你好，跟咗你專頁一段時間，喺投資方面有少少收穫，謝謝你，現在儲夠錢可以俾到首期自住(一成)，想請教下我應該繼續用來投資？定係買樓好？現在港股係咪牛市初期？
龔成老師︰
現時港股算係合理區中下部，有一定投資值搏率。不過，部分科技股近期上升較多，會在合理區較上部，甚至接近貴，要留意風險。
只要整體中國及香港經濟，慢慢好轉，港股在大方向，仍會向上的。
不過，我地永遠都係生活第一，投資第二。
所以，你現有資金用於置業(自住)，還是投資，就睇你有無自住迫切性。
若果你係想買樓來投資，現時價值只係中等，投資優質股長線會更有利。
樓市方面，中國及香港經濟未完全回勇，相信樓市難以大升，但未必會大跌，相信會平穩。
中國政府在2024年9月，推出了多項支持經濟及樓市政策，雖然不會令經濟快速好轉，但有穩定作用，當中也發放了訊息，如果有必要，會再推出支持經濟政策。所以在大方向上，經濟會開始穩定，慢慢向好，但全面回勇就要時間。
同時，中國政府在政策上支持樓市，相信中國樓市不會大跌，而這因素，也會間接影響香港的樓市，令香港樓不會大跌。
另外是高息因素，高息對樓市會不利，這點令2022年-2023年香港樓價大跌原因（因為當時加息很急），到2024年下半年，美國開始進入減息週期，這點會利好香港樓市，因為供樓成本減少。
不過，2025年美國政府換屆，由於新政府推關稅等措施，這點有機會推高美國通賬，而高通賬就會影響美國減息的時間表，有機會推遲減息，維持高息在一段時間，這因素將會令香港樓市增加了不確定性。
至於內地資金買香港樓，相信香港樓的吸引力，未必及過往，因此內地人買香港樓雖然會存有一些需求，但不會太多，也不會大幅推高樓價。
而香港政府推出的吸引人才計劃，在近年的確吸引一些人來香港，因此令租金得到支持，令近年出現一個現象「租金上升，樓價下跌」，引致租金回報率拉高。
在投資價值方面，過往香港樓市的租金回報率不高，一般只有2%、3%，投資價值不大，加上近幾年按揭利率高，加上長遠樓價難以倍升，令之前香港樓的投資價值，並不高。
到現時，由於租金回報率有上升情況，香港樓的投資價值，由之前較低吸引力，到現時投資價值為中等，但樓市不會象過往般倍升。
相信樓市在長遠計，因供求關係，較難大跌，不過，也不會有大升的情況出現。樓市始終有一定的需求，令樓價較難大跌。
不過，近年移民的確令需求略為減少，加上政府加大力度找地起樓，所以現時，供求已到達平衡狀態（過往由於供不應求，令樓價倍升）。
長遠計，樓價會平穩，不是倍升，不會好似過往般倍升，而是平穩，同時，由於需求大，要大跌也不易。
因此，香港樓作為自住的價值仍在，現時的樓價，已由過往的貴，回落合理水平，中短期雖然會因經濟及利率因素而波動，但相信不會大跌，但也未有條件大升，以穩定為主。長遠來說，暫時睇未必會大跌，最多只會平穩加少少向上。
香港樓的投資價值，算是中等。而自住則可以考慮，現時樓價合理，最重要是考慮自己的負擔能力。
Q41105：
呀Sir，隔左一年，又向你請教同分享自己一D反思
(現時31歲，50萬現金左右，收入41K，但2月辭左職，打算幾個月後再搵工)
現有：
2800 盈富 5275股@20.18
0012 恆基 2884股@23.92
1810 小米 3836股@12.92
9988 阿里巴巴 255股@150.85
1177 中生製藥 9000股@$5.49
006 港鐵 500@41.76
175 吉利 1000股@$19.50
1448 福壽園 2000股@$7.65
3718 北控城市資源 8000股@$2.06
6993 藍月亮 500@$17.28
＝> 股票現值：47萬 (未實現損益：+8萬)
2800, 0012, 1810 由9/2020 開始月供，到9/2024暫停，原因係上年置業計劃未變，阿Sir你當時建議留多D現金。現時置業方面想法有改變，打算2025年尾會租屋先，之後睇市況2027或2028先置業
雖然最近小米升左好多，令股票組合由蝕變賺，不過因為其它弱左既股票長期拉低左，所以都唔算賺左好多。我對現時局面既反省係：
1. 自己有係前兩年股市低迷時，堅持月供，即使金額不多，但冇好似其它朋友咁離場，等到小米倍升
2. 有耐心等低價先買入真係好重要。自己係2020年10月最初接觸股票時，心急想入市(當時因疫情大市跌緊，心諗應該價格應該夠低)，點知原來可以低處未算低，結果唔少股票既買入價都偏高，令自己既處境被動
3. 因貪心同無知，高位入手左3718, 6993，未有知識同能力去判斷企業質素
不過我覺得呢幾年係股市既體驗係好寶貴，令我第一身認知到股票價格可以起伏到超出想像，貪心同耐心帶黎日後既不同結果，同自己能力、心力既不足(判斷企業質素、止蝕價)。黎緊會溫返之前上你堂既Notes，同睇《巴菲特寫給股東的信
最後有小小問題想請教阿Sir：
1. 大市宜家升返D，我可以用咩指標去判斷1448, 3718, 6993既合理賣出價？特別係3718，大市升佢反而跌
2. 現時我收入暫時停左，同時置業計劃有轉變，而積蓄諗住做住定期for日後首期用。針對我現時既股票組合或積蓄，阿Sir你有冇咩建議或睇法？謝謝！
多謝阿Sir一直係FB鼓勵大
龔成老師︰
北控城市資源（3718）、藍月亮(6993)質素算是中等，長線不宜持有太多。
其實，無一個人可以一開始投資就百發百中，就算股神巴菲特到現在，都會有時做錯投資決定。
但最重要，是否有吸收經驗和教訓，而令自己變得更好，未來投資勝算更高。而從你的反省中，大概你已做到了。
1) 記住，賣出只會係佢地好貴(即用估值去決定)，或者長線核心質素轉差(即用質素去決定)才會做。而3隻股票，未見有而個情況，加上你持股唔係多，可以再觀察。
2) 現時你手上持股，可以保留。未來時間，可以用以下股票作目標。至於月供、分注定直接買，就睇你自己估值能力和當時價位。
另外，長線加少少美股，去平衡地區性風險。但唔洗加得太急，因為美股唔平，長線慢慢做就得。
平穩增值股，指數基金由於是一個組合，因此在平衡風險方面較好，例如美股追蹤標普500指數的（VOO）、追蹤富時全球股市指數（VT）、追蹤港股的盈富（2800）。
另外再加其他個股：美股如巴郡（BRK.B）、蘋果公司（AAPL）、迪士尼（DIS）、Costco好市多（COST）、麥當勞（MCD）、可樂（KO）、港股如中銀（2388）、港鐵（0066）、港交所（0388）、長建（1038）等，你可以了解下，並從中選股。
如果想增長力高少少，可考慮潛力股，例如指數基金，美股可投資納指基金（QQQ），或在港上市追納指基金（2834）、港股則可考慮安碩恒生科技（3067）、中國電車基金（2845）。另外再加：美股如微軟（MSFT）、Visa（V）、ASML Holding（ASML）、Tesla（TSLA）、Amazon（AMZN）、港股如騰訊（0700）、比亞迪（1211）、小米（1810）等，你可以了解下，並從中選股，但佢地波動性和風險會較高，要自己平衡。
如果你現時無太多投資經驗和知識，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。
若你有一定投資知識﹐潛力股比重可以相應調高，佔組合約3-5成，視乎你投資知識多寡和了解這些股票程度而定。
Q41106：
多謝阿Sir指導
作為一個新手，我堅持聽你講，雖然有時候都係升一半就放咗一啲
事後睇返當然可惜，不過都叫有聽你講賺咗個本其他就唔理
呢個係我而家嘅狀況，完美醫療可能佔嘅比率比較高，所以想問吓我應該點樣調整？
因為我未係好知道應該將啲錢分散喺邊個類型嘅股票，手頭上仲有二三十萬左右
所以我諗緊入金沙同領展會唔會比較好？
感謝阿Sir耐心解答
龔成老師︰
其實唔識定平貴，或者較保守架投資者，"升一倍、沽一半"而個做法，其實係有利。
你現時組合，有2個大問題。
1) 係潛力股佔比重太多，長線要慢慢換入去平穩增值股，令組合風險唔會過高。
平穩增值股，指數基金由於是一個組合，因此在平衡風險方面較好，例如美股追蹤標普500指數的（VOO）、追蹤富時全球股市指數（VT）、追蹤港股的盈富（2800）。
另外再加其他個股：美股如巴郡（BRK.B）、蘋果公司（AAPL）、迪士尼（DIS）、Costco好市多（COST）、麥當勞（MCD）、可樂（KO）、港股如中銀（2388）、港鐵（0066）、港交所（0388）、長建（1038）等，你可以了解下，並從中選股。
2) 你現時組合明顯偏重晒係港股，建議你未來加入一些美股(但美股現價唔平，可以慢慢做)，令整個組合變得更平衡。
但要留意，個別地區不建議超過組合的7成，如果不懂選股的話，可以考慮加入(VOO)，作用類似盈富（2800）。
Vanguard S&P 500 ETF（VOO）就是追蹤美股的ETF，追蹤指數是標普500指數，當中都是全球有實力的公司，有長線投資價值。
由於美股波動，不建議一次過大手買入，最好的方法慢慢分注，或以類似月供模式進行，長線持有，這是一個最好的投資策略。
以下是介紹VOO影片，有需要可以睇翻︰
https://www.youtube.com/watch?v=RnYZQlSG8qA
Q41107：
老師 請問推介邊隻黃金美股月供呢？
龔成老師︰
首先，黃金是貴金屬，有「終極貨幣」之稱，是人類自古以來的貨幣，因此，有持有價值，而現時我地的現金，一定長期貶值，所以黃金長期會向上。
不過，黃金沒有現金流，持有無法創造出經濟價值，其主要作用是對沖黑天鵝事件。
所以，你可以投資黃金，但不用佔財富比例太多，我一般建議係佔財富組合2-5%左右就足夠，而且持有的應該為實金。
如果你唔想儲實金，可以考慮SPDR黃金ETF(2840)，為交易所買賣基金，投資目標為反映ＬＢＭＡ黃金價格。
Q41108：
感謝老師詳細的回覆。
對於老師的分析和提議，我也需要一點時間消化一下，不過我就好肯定當初買入這些股票也是跟大部份新手一樣，聽朋友話會升便去買，甚至連自己買了甚麼也不知道。若不是看到老師的回覆，我也不知道7226是開槓桿的。
根據老師的提議「將當中潛力股，轉移部份至平穏增長股，去將組合風險調整至較合理水平」，以我的理解，請問是否我要從我的持倉中，賣掉部份股價應該不會有起色的（例如：2013，3868，6060，1725及7226）呢D輸咗九成的股票，然後將賣出所得的錢加入新資金，以月供方式購入你所推介的平穏增長股？說實在，我而家因為輸得太甘，搞到完全沒有勇氣再去買賣股票，暫時需要一步一步去調整一下個心態先得。
另外，老師說到「長線建議"慢慢"加入一些美股，去加強地區平衡性。」，如果我對美股完全不認識的話，請問港股及美股的持股比例是8:2可以嗎？（老師的美股課程是有點興趣，但無奈時間上配合不到，希望老師有機會開星期六的班）
最後，關於老師港股課程的小小意見，作為新手的我，頭五課的在堂上講解的內容尚算明白，但最後三課真係教得太趕和非常複雜（雖然已經11點才落堂）。好了，係時候要重新花點時間去睇番D NOTES先，多謝你呀！加油！
龔成老師︰
「將當中潛力股，轉移部份至平穏增長股，去將組合風險調整至較合理水平」，係將部份潛力股，慢慢分注去轉成平穏增長股。(唔洗用月供，你可以邊沽，邊買入)
風險較高架潛力股，好似1772,1801,2013,6060,1725就轉多少少。而開槓桿架7226，係長線轉走晒。
因為轉移目的，唔係佢地無質素，或者輸左大錢。而係持有佢地太多，會令你成個組合風險過高，影響長遠穏定性。
至於港股及美股的持股比例是8:2，係可以。
如果唔識點選美股，可先用VOO，佢類似2800，係指數ETF。但現時美股唔平，而部份架調整可以長線慢慢進行，不用急。
以下是有關VOO的Youtube影片，你都可以睇下︰
https://www.youtube.com/watch?v=RnYZQlSG8qA
至於課程，我嘗試再調整下。因為以往早期課程不會超時，但中間不斷有新知識出現，而依D知識都係要大家識，所以就長左。但舊有知識，由於需要維持成個知識系統完整性，所以不能減太多。
不過，我都會嘗試從你架意見，去思考下，謝謝。
Q41109：
你好龔Sir，我之前有月供小米1810，我個均價係16蚊左右，最近升得咁勁！
而家繼續供就拉高個均價，係咪應該停供，等佢回落返少少先再繼續呢？
煩請龔Sir指點
龔成老師︰
小米（1810）以手機、智能硬件，以及物聯網為平台的公司，小米專注於互聯網直接銷售產品，近年發展電動車。
雖然發展電動車，投入了較多資金，令風險比過高左，現時的發展情況不差，如果長遠成功，股價可以倍升。
隨著新產品系列推出，小米賺錢能力提高，同時佔據了一定的市場，在中國安卓類手機4,000至5,000元價位，小米出貨量排名第一。
另外有一點值得留意，小米最新的全球及中國大陸MIUI月活用戶數持續增長，達到約6億和1.5億，均創歷史新高，而這部分會慢慢產生更多的將來收入，所以前景又不用睇得太差。
考慮到小米過往的發展，其產品性價比不差，以及研發能力強，佢電動車長遠發展值得期待的。
這股可長線，現價係唔平，預佢股價短期會較為波動。
至於是照月供，你可以睇下自己持股比重，如果高於組合15%，可以停一停。當然，如果你唔太識判斷平貴，一直長線不停去供，會係最安全做法。
我出左最新小米(1810)架分析影片，你都可以睇下︰
https://www.youtube.com/watch?v=UTXHpJEPNS4
Q41110：
老師 仲想深入問多少少
點樣分辦牛2 牛3 現在算是牛2末段嗎 是否每段牛市都會經歷3個階段
小米 目標價可以上到70什至破百嗎 這一年內
快手目標價睇好80嗎
百度目標價可以突破130嗎 52週高位嗎
恒指你覺得會突破25000點嗎
龔成老師︰
其實去到牛3，好多野會變得狂熱。不過，我唔建議你太著重牛熊階段。反而，你係要識點幫企業估值，知佢平貴，去自行判斷買賣時間。
至於1年，只係一個好短架時間，其實好難估。
我地投資重點，係間企業有無長線投資價值。而點去判斷，就係分析企業業務、財務數據、行業狀況等資料。
而唔係用"52週高位"而類因素，去做投資決定。
你所講架3間公司，都有長線投資價值。
至於恆指，現時尚在合理區中下部，有一定上升空間。但幾期能否破25000，無人知。
如果中國及香港慢慢好轉，恆指大方向會向上。