Q29871：
想問KO現價
龔成老師︰
可口可樂公司(KO)是一家飲料公司。該公司擁有、授權和銷售非酒精飲料品牌，業務分散於歐洲、中東和非洲；拉美; 北美; 亞太等地區；
公司的品牌飲料產品通過其獨立裝瓶合作夥伴、分銷商、批發商和零售商網絡以及其裝瓶和分銷業務向200多個國家和地區的消費者提供。
此股有質素，算是平穩增值股，有一定質素，但現價唔平，最好用分注或月供去慢慢儲貨。
Q29872：
明白，老師點睇小米？打算將太古轉成小米，因為長遠較看好領展
龔成老師︰
其實太古(1972)和領展(0823)都有質素，但增長潛力會領展高少少。
若你是較年青，想太古(1972)轉成小米(1810)都可以。
不過，小米(1810)雖有長線投資價值，但風險度會明顯比1972高。另外，佢中短期業績都肯定會較弱，相信要長線才會有機會慢慢回勇，你要明白這些風險。
Q29873：
老師，我31歲，想你介紹有無咩潛力股
龔成老師︰
以下都是一些有質素的潛力股。
潛力股︰安碩恒生科技(3067)、阿里（9988）、騰訊（0700）、舜宇光學（2382）、小米（1810）、中生製藥（1177）、ＧＸ中國電車基金（2845）、三星FANG ETF（2814）、安碩納指一百（2834）。如果有投資美股，可投資QQQ。但佢地波動性和風險會較高，你要自己平衡。
如果你現時無太多投資經驗和知識，潛力股這類風險較高的股票。以你31歲計，建議最多去到組合一半好了。
若你對這些股票無太多認識，最好先集中係3067(追蹤恆生科技股指數)或QQQ(追蹤納指)這類指數ETF上。因為佢地係一籃子優質股，較具放散風險能力。
Q29874：
多謝龔sir 覆得好快
2020年開始睇你個page學月供同分注買入，希望可以盡快儲到100萬報喜俾你
想問下你意見，現在我同老公都係30歲，加埋月入53000左右，有一個小朋友3歲，有股票現值大概20萬 (6萬盈富，5萬銀河，1萬比亞迪，2萬VOO，2萬TSLA，1萬QQQ，仲有啲3067，823，NVDA，PRNT) ，現金10萬
現定居澳門同我家人住，每月俾5000幫手供樓當交租，老公本身係香港有物業(屯門私樓 十幾年前2百幾萬入，現值450萬，月供緊7500，租左出去 1萬左右)
因為小朋友大個想一家3口搬出去，但要租屋住，每月12000左右，因為唔睇好澳門未來樓市同覺得每月月供2萬幾會有壓力，所以無諗住澳門買樓，想儲下錢可能10年後移民同埋做小朋友讀書基金
你覺得澳門租樓淨係賣左屯門層樓係澳門買好？我依家每個月買下TSLA, QQQ, VOO，美股仲有冇咩推介？
另外，我有4500股永利股票，公司$4.57派嘅，依家$9.4我想賣晒佢，長遠你覺得永利點？要留一半嗎？多謝龔sir!!!
龔成老師︰
首先，物業部份其實未來香港和澳門樓市，你都唔好預佢會大升，大致都只會係平穏增長。因此，我覺得一動不如一靜，係澳門租樓會較好。(除非香港個物業質素好一般)
以你們30歲，現時持有股票是適合。
但留意個別股票和行業，不要高於組合15%和30%，以免造成過度集中風險。你銀娛(0027)就有少少超標，長線記得保持15%會較穏當。
除了月供TSLA, QQQ, VOO外(Tesla其實風險都高，我可以小注買，但唔好比佢佔你組合太重比例)，我建議你都加入一些港股，去平衡地區性風險。若你都係好想集中供美股，咁你可以考慮加埋巴郡（BRK.B）。
如果你現時無太多投資經驗和知識，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。
若你有一定投資知識﹐潛力股比重可以相應調高，佔組合約3-5成，視乎你投資知識多寡和了解這些股票程度而定。
至於永利澳門（1128），佢增長力不算強，但相信都有平穩增長力，相信長遠派息不差。
雖然疫情略有反覆，但全球疫情最壞的情況，相信已過，中國相信會慢慢放鬆防疫政策，因此，業務情況慢慢向好，但全面回勇始終需要時間。
永利投資價值仍在，不過就不是高增長股，等全球疫情過去及經濟旅遊等正常，相信有平穩增長的能力，同時有一定的派息，長線持有係可以。
但考慮到你澳門博彩股佔組合比重都唔少，你想沽出部份獲利或換碼至其他行業，其實都可以。等你100萬的好消息!!!
Q29875：
老師，2888前景如何，有貨可以繼續持有嗎？
龔成老師：
渣打集團（2888）質素只是中等，不算強。
雖然未到劣質，但質素不高，但本地銀行股中，賺錢能力算是較弱。加上銀行業近年的環境不及過往，賺錢能力不及以前咁好，相信佢之後，都只是好基本增長，不要對股價有太多期望。
投資價值只是一般，如果貨不多可持有。如果貨多，建議部分可轉其他銀行股。
Q29876：
龔成老師，近期大市升好多
但係對我來講（唔知啱唔啱）
個市升，其實係一件壞事
因為我要用一個更高嘅價錢去買一個
我心儀既股票
個市返而跌（好似2022年咁）
對於我嚟講，就係一個天大嘅好消息
因為我可以用一個較平嘅價錢，
去買入我心儀嘅股票
之前我睇到一本書
佢話任何嘅投資
只要你咁買入價係好嘅話
基本上已經成咗八成
只不過係賺多啲賺少嘅問題
唔知我啲歌心態/思想啱吾啱
希望老師指導
龔成老師：
你的想法都正確的，我地以價值投資的角度，會希望以較平的價格去買貨，所以市跌會較好，因為可以用較少的現金去得到資產。但同一時間要留意，如果股價上升有實質支持，例如經濟好令盈利向上，企業能賺更多錢，自然值一個較高的估值，這樣，就算股價升也不一定是壞事。
Q29877：
2638港燈：想問政府會考慮引入競爭，會不會令股價受壓？
龔成老師：
會有少少波動，但要睇下可行性是否高。因為在十幾年前，政府都提議引入競爭，但經過一輸研究，最後都是保持原狀。
Q29878：
Ar sir 依家股市會唔會唔回調 一直升上去 咁點上車
龔成老師：
短期無人知會點走的，但現時全球疫情減，中國防疫放鬆，整個大方向都正面，當然，升左咁多都有可能波動，但最重要是大方向。建議你用分注的模式，買優質股，不要持有100%現金等。
Q29879：
龔老師, 2382 $94.2有貨. 近期跌, 請問這個價可守? Thanks
另外, 請問合理價和合理區底一般是相差20%？
龔成老師︰
我想先糾正你一個錯誤的投資觀念，我地投資一定係長線(以年計，而唔係去睇幾日架變化)，你見全世界最成功的投資人巴菲特，都只會做長線投資，唔會短炒。
因為中短期股價，可以因為好多因素影響，有些因素甚至跟企業無關，所以無得計。但長線企業價值，必然會反映在股價上，只要長線持有優質股，就自然會有理想回報。
舜宇光學科技（2382）有一定的質素，現價合理。
過往手機市場高增長，令佢鏡頭業務受惠不少，但近年手機增速開始減慢，你預佢增長力會變得較平穏。
在長遠，無論是手機鏡頭，又或是各種鏡頭方面的應用，只會愈來愈廣泛，前景正面，不過，中短期可能會有少少波動。
這股可以長線投資，分注或月供較好，你的買入價錢合理，可以守。
至於合理價和合理區底差距，係無一定的標準。因為合理區係一個區間，例如$5-10為之合理。但這個區間會因股票性質而不同，如一些潛力股，因為變化大，所以個合理區會較闊(這個概念較複雜，要上過堂先會明。)，所以無一個特定百分比去參考。
Q29880：
老師，請問1382，709边隻比較好？ 边隻高息？謝謝你！
龔成老師：
佐丹奴國際（0709）會略好，佢整體質素中等，業務不算差，但增長力不強。
佢主要從事經營零售及分銷佐丹奴牌子便服與配襯用品。
業務分為六個子分部營運，計有中國大陸、香港及澳門、台灣、新加坡、澳洲及其他巿場。各根據不同品牌之觀點，零售及分銷分部細分為Ｇｉｏｒｄａｎｏ＆ Ｇｉｏｒｄａｎｏ Ｊｕｎｉｏｒ、Ｇｉｏｒｄａｎｏ Ｌａｄｉｅｓ、Ｃｏｎｃｅｐｔｓ Ｏｎｅ（前名為Ｇｉｏｒｄａｎｏ Ｃｏｎｃｅｐｔｓ）、ＢＳＸ及其他。
長遠不算差，都有投資價值，只要控制注碼就得。
不過，這股增長力不強，主力是收息。