日本城母公司國際家居零售(1373)日前公佈全年業績，收入按年升8%至25億元，盈利按年增26.8%至1.5億元，毛利率由去年的46%微升至今年的46.6%，末股息派0.11元，全年派0.165元，較去年增15%。收入升、毛利率升、純利升、派息都升，真正的全面向好，在今年全球經濟咁困難之時，更顯得難能可貴。

比起其他疫情股，國際家居零售的定位係蝕底些少，始終只有家居用品，冇港視(1137)咁勁的電子平台，市民搶食物儲糧時，阿信屋(0759)及永旺(0984)等公司更直接受惠，但其實在財務穩健性上，日本城可以KO全部對手。港視雖是升值能力最強，令人最有憧憬的公司，但由轉形至電商後幾年，才首次錄得盈利，按盈喜所講，上半年有不少於9000萬元的盈利，但現時市值近70億，日後定必要說服市場有增長動力先得；阿信屋轉虧為盈，全年賺1200萬，但原來都有770萬係賣物業得來；至於永旺，日前通告話上半年虧損大幅減少至8000萬元，身為百貨業，青冰想不通點解在疫情中你仲係蝕錢，不過股價就急彈兩日，但今年仍累跌42%。

國際家居零售在2013年9月上市，招股價係2.81元，這七個財政年度加埋，共派了0.812元股息，以全年派息計，最多只係持平，從未試過減派息。2014年度賺1.44億元，之後5年都做唔返呢個數，直至今年終於有突破，賺1.5億元。但你又睇吓，今年咁靚數，但股價都未算有大突破，如果你上市後持有至今，收埋息，都係一成回報多啲。

經常有戰友問青冰，有乜收息股好呀，大概都會答你香港電訊(6823)啦，但總會有人追問，Reits唔好咩？領展(0823)跌咗咁多好吸引喎。這個可算係香港投資者的普遍心態，認為收租股穩陣，但青冰在去年及今年初都講過，股息率係去年的股息現在的價，你見到的股息率好吸引，只係反映現價跌了，扯高了息率，但現時零售市道有幾差，大家也明白，減租是大勢所趨，隨後的股息可否維持這水平，要自己計數計值博率吧。

國際家居零售上市以來，最殘係2016年，當時的股息率高達10厘，但這幾年業務平穩發展，派息跟住上，已經甚少出現這些筍價，不過今年出現過一日嘅，以3月23日收市價計，當時的股息率係9.2%，當日全港股票都跌到反艇，要撈貨應該未數到佢，不過管理層都好識貨，今年唯一的回購，就在3月24日，接近撈個全年低位呀。現價股息率係7.2%，算係近年的中位數，要再炒上，除了要靠好息之徒幫手，或正式推出自家口罩，才有催化劑，不過現價買佢，應該比揸匯豐(0005)博佢下年派息，來得心安吧。

-- Fb個人專頁 http://www.fb.com/chingbing888