Q38411：

1113同12, 哪一個較好？

謝謝

龔成老師：

兩隻都不差，雖然短期都會因地產市道較弱有影響，但慢慢會好轉。

現價都合理，都可考慮。

恒基地產（0012）會較平衡。

恒基近年的表現較一般，主要受香港地產市道、租務市場，以及外圍加息因素影響，雖然企業的增長力比過往年代的確有減少，但企業的質素仍在。但預佢長遠不是高增長類。

其實，企業仍持有好多有價值資產，例如恆基用$500億投得中環海濱商業地，從長遠計中環獨特性強，長遠始終有一定質素。加上佢是全港最多農地的發展商，都是長遠有價值的資產。

香港地產行業，最好賺的年代已經過去。恆基整體的質素仍在，但不是高增長類，只是收息及平穩增長型。現水平合理，有收息及平穩增長的作用。

Q38412：

龔sir, 548業績是否較差？

後續前景,走勢睇法如何呢？

龔成老師：

對呀，業績弱，不過，這股近年都上升不少，所以當出了一些壞消息，回落也較多，以長期本質來說，這股無問題的，仍是不差的收息股，但短期都會因行業情況較一般受影響，不過中長期無問題。

深圳高速公路股份（0548）公布，截至６月３０日止中期盈利約７﹒７億元（人民幣．下同），跌１６﹒７％，每股盈利３１﹒２分，不派中期股息。

該集團指，營業收入約３７﹒６億元，同比減少８﹒９２％，主因路費收入、特許經營安排下的建造服務收入及工程委託建設服務收入同比有所減少。至於扣除非經常性損益╱虧損的純利６﹒７億元，跌１６﹒３％，而純利下跌因所持參股公司股權公允價值變動及計提的資產減值損失增加所致。

Q38413：

龔sir 可否分享一下PDD🙏

龔成老師：

這股公佈業績差過預期，最大問題是管理層預測之後的情況不太好，相信接下來中短期，業績都會較一般，中國經濟及市場競爭加大，都是不利因素。

以長來說，其實仍有質素，始終本身業務發展得幾好，並不是無優勢，不過，始終擔心估值因，股價變化較大，因為近年這股的估值都有少少高，原因是市場預期有理想增長，但現時增加只是一般，股價也回到合理位置。

拼多多本質不差的，佢將娛樂與分享的理念融入電商運營中，由用戶發起邀請，與他人等拼單成功後，能以更低的價格買到所有商品，同時也通過拼單了解消費者。

通過機器算法進行精準推薦商品，這個商業模式不差，長遠其實有發展，只是行業的賺錢能力，存有不確定性，因此，投資是可以，但不建議太多。

Q38414：

Hi 龔先生，我快將五十，但這麽多年因為幫父母供完一層居屋，有兩個小朋友其中一個讀緊大學；2018年後先買自己第一層同開始儲錢，另約儲到200萬股票，60萬現金，

咁問題來了，我發現依兩年儲蓄停咗喺度，好似到咗樽頸位咁，交稅金額非常大，同屋企突然好多額外的開支，見到銀行儲錢依幾個月不停一跌，好氣餒呀，應該點做好？

龔成老師︰

睇翻你個背景，其實你本身的生活負擔都唔輕，你仍然有現時的資產水平，其實已經做得幾唔錯。

人生的理財其實可以話分幾個階段，當剛出來社會工作的時候，由於負擔少，儲錢特別容易。

當人到中年（好似你宜家咁），負擔會開始大，儲蓄的比例會減少，這其實好正常。

不過，如果你想進一步優化現有財務狀況，建議你先做記帳。記低每日所有大大小小架開支，令到自己更加清楚開支架狀況，從而刪走一些不必要的部份，盡量令到自己每月空間資金得以提升。

另外，如果可以就做一些兼職或者網上小生意，去提升收入水平。

當每月再開始有一定資金剩低，你就可以重新開始累積優質股，去提升財富。但係提升財富同時，建議你都先預留一定的應急錢（最少6-12月的生活費），再進行投資，咁會更加穏當。

最後，係保持學習。你要去努力增進投資知識，來提升你財富增值效果。你要多讀投資相關書本、年報，新聞和報讀相關課程。

書本上，你可以睇我寫的新作《圖解股票小百科》以及《80後千萬富翁》、《財務自由行》，都適合初學者。

我YOUTUBE CHANNEL都會不時分享一些投資技巧和知識，你都可以睇下。

http://www.youtube.com/@user-rw4st4yg5v

另外，本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資、評估平貴，在投資上已掌握了一定的知識。

Q38415：

其實強積金

跌市應唔應該轉為保本

龔成老師︰

強積金的配置並不複雜，首先要注意，強積金是一個超長線投資，因此不宜做中短期炒賣，不用以預測投資市場的走勢去將強積金轉來轉去，除非你很確定，現時的投資市場明顯平，或明顯貴，否則在大部分情況，強積金不用轉來轉去

其實，你只要按你的年齡階段，去進行分配就得，年輕時較進取，到了中年就以平穩作配置，到退休前5-10年基金配置就要趨向保守，為退休做準備。因此，你只要按年齡做好配置，並且因年齡漸增，慢慢將強積金轉為較保守類別就得。

另外，在股票配置的部分，你可以考慮環球股票，又或以中國+美國作為核心，因為這兩在往後10年，都是全球兩個最大的經濟體，你同時持有可以。

其實強積金，著重配置、平衡，不著重炒賣。要考慮長期配置的模式。

Q38416：

老師, 想問下, 我如何分析自己投資組合

現時想還22萬港幣等值的日圓, 當中那一些股票質素較差可以賣出, 以還款

如何從賺蝕和質素找出平衡

即是有質素但暫時仍蝕錢 vs 質素較差但暫時賺少少

現在淨值68.5萬

股票總值91萬

即是孖了22/23萬港幣

現在想減低孖展比率

最好股票：總資產總值比100%以下

龔成老師︰

分析，主要從佢以下幾點︰

1) 適唔適合你(年紀、投資經驗/取態等)

2) 是否優質股(用課堂架技巧)

3) 組合平衡性(個別地區，不要高於組合70%。而個別企業和行業，不要佔組合15%和30%以上，銀行業更加不要高於組合20%，否則會有過度集中性風險。(盈富和VOO這些指數ETF，由於係一籃子組合，故不受企業和行業限制。))

至於減持方面，而一刻架賺蝕唔係決定因素，最重要係睇佢質素。

你手上架股票，都係有長線投資價值(除左0708)。不過，好多都係潛力股，建議你未來加大平穏增長股比例，並以之作為重心，咁你長線個組合發展會健康D。

平穩增值股，指數基金由於是一個組合，因此在平衡風險方面較好，例如美股追蹤標普500指數的（VOO）、追蹤富時全球股市指數（VT）、追蹤港股的盈富（2800）。

另外再加其他個股：美股如巴郡（BRK.B）、蘋果公司（AAPL）、迪士尼（DIS）、Costco好市多（COST）、麥當勞（MCD）、可樂（KO）、港股如中銀（2388）、港鐵（0066）、港交所（0388）、長建（1038）等，你可以了解下，並從中選股。

最後，係唔好做孖展，風險太高。

Q38417：

老師早晨，我有d 野諗唔明

如果我個倉有$600k 股票（本金$580k) 收到$36k 股息，再投資返入股票，咁我總投資應該係$616k?

而回報有$636k/580k? 9.6%?

股息& 股票既利潤我應該計入收入嗎？ Or 只計股息呢？

龔成老師︰

唔係，我會用本金580K計，因為股價升幅和股息收益，都是你盈利部份。

你用股息再投資，情況有少少似"以股代息"，所以應該用翻580K計會客觀D。

至於投資回報，我唔會當收入，因為股息我都會用來再投資。到你真係沽出隻股票，先至結算總收益。

Q38418：

龔sir, 請問阿里巴巴(09988) 現持有10手，平均價為167，應該點部署好 （應加注還是減持），有無可能升回呢個價？

龔成老師︰

我覺得仍有機會上得翻而個數，但要大環境明顯復甦，即係未必短時間可以出現，同時這企業近年的重組計劃失敗左，相信要更長時間回勇。

反而這刻，要睇你持貨比例，會否過多。

阿里（9988）係業務層面，擁有優勢，不少業務處於壟斷狀態，同時增長理想。加上正不斷發展延伸業務，這都會成為企業增長的潛力，預期增長會持續，這是阿里最大的賣點。

以企業的長期發展計，這股的確優質，但股價都有一定的波動。

始終之前面對內地監管收緊，因此風險度增加左，不過，相信最差的時期已過，同時見到中國政策開始講話重視平台經濟，相信正慢慢好轉。

其實，就算之前政策影響佢賺錢能力，佢的整體優質度仍在，內地不是不想佢賺錢，只是想規管佢。佢已建立好完善的業務，因此本身是無得輸，只是賺多賺少問題，現時監管多左，點都會影響賺錢能力。

對於這類優質、有發展，但存有不確定因素的股票，分注投資是較好的方法，算是平衡了風險與增長的考慮。這股可以長線投資的。

如果你持貨唔係太多，可以守。

Q38419：

成哥你好，我想問問我持貨左3年既港股應唔應該放手好?

原本1,300,000到而家既600,000, 心態上磨蝕得好犀利，亦都鬧緊自己唔諗清楚就買股

買入價

388 ->262.8

700 ->366.8

1810 ->18.9

1833 -> 11.7

2013 -> 1.63

8473->0.395

可能賣晒會舒服，但我知道只係一時之氣。所以請想教你意見

8473我買得最多，當時入左1百萬博佢上主板, 好明顯錯晒，當時唔識股票亂咁入GEM

我諗左睇左好耐，好似真係唔會有咩轉機咁

龔成老師︰

投資切忌唔理性，無論是贏錢的時候，還是輸錢的時候。

心急賣出股票，只會令你雪上加霜，對累積財富無幫助。

你細心思考：

「怎樣做，才會令你長遠財富最有利？保守現有股，還是轉其他股？」

我幫你理性分析

其實你最主要問題，係出左係8473度，令你虧損咁深。我自己一般唔會建議投資GEM，因為不確定性太高。

你其餘架股票，其實都有長線投資價值。買入價唔算貴，不過組合就太集中左係潛力股度，長線要加平穏增長股去平衡。

由於過往幾年，港股因爲疫情、加息、戰事等一連串不利因素，表現都較弱。潛力股而類股票，係而D情況會跌得更多，令你處於更不利架位置。

現時疫情雖然過去，但因爲中港經濟復蘇緩慢，所以你預中短期港股表現依然疲弱。

不過，經濟總有高低，現時面對的投資環境是我多年來少見，因此，投資者更應該理性面對。

你持有的股票中，其實都有質素，買入價錢不算貴，因此，可以守。

但彌明生活百貨（8473）業務不過不失，發展能力中等，不是高增長的類別。

這股始終規模不大，加上近年的盈利有下跌情況，存有風險，因此不建議太大注。

另外，政治相關因素，都會令這股波動，要明白股價風險，政治因素是好難預測的。

你持有的比例偏大，因此，建議你在市場氣氛好轉的時候，慢慢減持，換碼至其他優質股。

最後，長遠可以考慮加入美股，令到組合更爲平衡。如果不懂選股，可以考慮追蹤標普500指數的ETF(VOO)。

以下是一些具質素的平穩增值股，你可以參考下︰

平穩增值股，指數基金由於是一個組合，因此在平衡風險方面較好，例如美股追蹤標普500指數的（VOO）、追蹤富時全球股市指數（VT）、追蹤港股的盈富（2800）。

另外再加其他個股：美股如巴郡（BRK.B）、蘋果公司（AAPL）、迪士尼（DIS）、Costco好市多（COST）、麥當勞（MCD）、可樂（KO）、港股如中銀（2388）、港鐵（0066）、港交所（0388）、長建（1038）等，你可以了解下，並從中選股。

Q38420：

老師，請問美股 PLTR 睇法，謝謝

龔成老師：

Palantir Technologies Inc (PLTR)業務主要為商業部門和政府部門構建軟件平台。

商業部門為非政府行業的客戶提供服務，政府部門為美國聯邦政府和非美國政府機構的客戶提供服務，專為國防和情報機構分析人員設計。

這企業業務有一定獨特性，政府客戶來頭都不少，CIA、5角大樓都是其客戶之一。

見佢營業額一直有上升，但問題是銷售和研發支出，增幅都唔少，令集團依然處於虧損狀態。而何時轉虧為盈，而個就無人知。

此股都有投資價值，但不確定性偏高，只宜小注。