Q23591:
龔老師,你好!想向你請教一啲意見。
我同另一半啱啱簽約買咗樓,選擇建築期付款。2022年尾就要準備好首期同造按揭。
所以我哋而家努力盡量儲多啲首期(大概要有120萬)。現有大約現金28萬同15萬股票。我哋兩人每月可以儲到5萬蚊。直到出年11月應該可以儲多70萬。
而家希望可以用呢筆儲蓄一路做啲投資買啲股票,增值返多少都好,希望到時首期可以再鬆動啲。
但又好擔心會輸咗啲儲蓄,所以希望問問你意見,贊唔贊成我用啲儲蓄去買股票呢?如果可以買,應該買邊一類型嘅股票會穩陣啲?例如收息股?
謝謝!
龔成老師︰
就算再穏健股票,中短期走勢都係會有波動,而且當中因素未必與企業本質有關,所以係好難估。
你尚有一年就要用這筆錢,時間太短,其實不宜投資。如果你唔想這筆資金白白放係度,你可以做定期存款。
如果你想進取少少,你可以買一些較稳健的收息股,佢地波動性較細(但都有風險)。但最多只可佔你這筆資金,大約3-4成。
目標是5%、6%的股息率的收息股,例如港燈(2638)、深高速(0548)、香港電訊(6823)、工行(1398)、恆生(0011)、置富(0778)、陽光(0435)。收息基金(3110),都可以。
另外,你原有持股,唔好等到用個刻先沽貨,要係半年前慢慢沽出,以減低價格波動對你造成之影響。
最後,由於你係用建築期付款,首期資金上要預鬆動D。因為銀行會再進行估值,若萬一估值低於你本身合約價,可能你要補錢上會。
Q23592:
老師你好 小妹今年28歲 已婚 丈夫同我都有穩定收入 共月入約9萬 剛買了一層自住樓 已用了大部分積蓄比首期 每月月供約2.5萬
現只剩約30萬現金及4隻股票 (騰訊共100股 $450買入)(美團共100股$233 買入)(國泰航空共3000股$6.95買入)(新秀麗共600股$16.72買入)
扣除家用 供樓 及日常開支 每月可儲約3萬 想一部分作長線投資 一部分可以短線投資 可以承受比較大風險 亦希望有更大資本增值 請問有咩股票或者投資推薦?
龔成老師︰
我地投資一定係長線,你見全世界最成功的投資人巴菲特,都只會做長線投資。所以,你就算可以承受較高風險都好,我都唔會建議你短炒。
其實中短期股價,可以因為好多因素影響,有些因素甚至跟企業無關,所以無得計,好難玩。但長線企業價值,必然會反映在股價上,只要長線持有優質股,就自然會有理想回報。
當我地進行人生財富累積時,會運用「先增值,後現金流」方法。年輕人應著重於增值類資產,而較年長的,就應著重保守類別。因年輕人財富系統未成形,同時負擔較少,可以承受較高風險,所以應以增長為先。
例如初期投資較有潛力股票,令財富增值較快,到一定金額後,可轉較平穩增值的股票。最後有相當財富時,才換成收息股去為自已創造穏定現金流。
以你現時28歲去計,是財富增值的黃金時期。除了盡力儲蓄、投資、學投資知識外。也要把握這個黃金時間,做好財富增值部份。
由於你財富組合中,已經有物業類,故你現時目標,應以優質股為主,去令你組合更平衡和多元化。
策略上,你可以投資「平穏增長股」和「潛力股」。你每月5成儲蓄,即是用$15000做月供。其餘先儲起,用一邊月供一邊儲蓄的策略。
如果你現時無太多投資經驗和知識,潛力股這類風險較高的股票,你就不要持有過多,最多維持2-3成好了,甚至先集中係平穏增長股類。
若你有一定投資知識﹐潛力股比重可以相應調高,佔組合約3-5成,視乎你投資知識多寡和了解這些股票程度而定。
大市現處於合理水平,那30萬資金,你可以再用多10萬,以"分注"形式慢慢入貨。餘下20萬和每月儲蓄,就等大跌市機會出現,才大力度掃貨,並長線投資。
至於現有持股,騰訊(0700)、美團(3690)和新秀麗(1910)可長線持有。但美團(3690)不確定性較高,長線要控制注碼,不宜佔組合太大比重。
國泰(0293)質素只是一般。
其中一個風險,是油價,睇翻佢過往多年,油價對佢成本影響好大,令佢盈利十分波動,就算佢利用對沖,都唔係好成功,反而試過因對沖而蝕大錢。
另外,航空業對經濟週期較敏感,收入不穩,同時唔算係一個好賺錢的行業,因此這股的質素只是一般。
就算佢之前重組,得到新資金,只是比佢「捱過這一關」,並不是賺錢能力方面有改善。長線計,建議你沽出換至其他優質股﹐會對你較有利。
Q23593:
你好,之前睇你本50值搏倍升股買咗6869,而家升咗超過50%,想問現價應否賣出獲利,還是繼續持有?謝謝
龔成老師:
長飛光纖光纜(6869)質素都有,但又未到好高質。
佢長遠的增長力仍在,因為全球光纖光纜市場,仍會保持向上,智能手機、互聯網、大數據等科技,成為了行業的推動力。
長飛光纖之前受惠三家國有電訊營運商發展網絡基礎,所以生意算是不差,但這亦令這公司出現風險。
整體上,質素有,但增長與賺錢能力就不算好強。我會建議你減部分,餘下就長線。
Q23594:
老師,多謝你詳細分析和寶貴的意見。
現月供組合,明白地産類有集中風險,我打算12恒地供至年低,明年1月調整組合將12轉供270粵海和778置富。
現金待大跌市分注用50%買盈富2800,35%買收息股6823,3110,15%買潜力股3067或1830(有約6厘股息),這樣可以嗎?
龔成老師︰
月供方面的調整,係可以。
至於現金分配在3個水桶的比例,係正確。不過你唔洗咁快定死自己買入目標,因為個別股票和大市變動幅度,唔一定係同比例。
你可以到大跌市出時,再因應各個股價下跌情況,同當時你組合持股比重(以免出現過度集中問題),再去決定增持邊D股票。
Q23595:
龔老師,現持有以下︰
恒基 2手 平均33.5
領展 4手 平均59.4
置富 4手 平均8
小米 4手 平均26.25
阿里巴巴 5手 平均220
香港電訊 3手 平均10.97
全部都蝕緊錢,但好多都高息 所以唔緊要。
但阿里最慘重,想換一手銀娛,但又唔想放棄阿里,應該點做好?
龔成老師︰
你唔好用買入價或帳面賺蝕,作為判斷一隻股票優劣或者是否長線持有的指標。你應著眼佢本身有無質素,如果有,中短期價格波動,令到出現帳面虧損,係無問題,照可以長線持有。
但如果係無質素,就算而一刻是賺定蝕,你都要將佢沽出。重點分析的地方,係企業質素,而非股價上。
你現時持有股票,都係有質素。
阿里(9988)近期受大市氣氛和政策風險所影響,令到股價有較大回調。雖然監管令估值上都有少少調整,但核心質素無大變﹐依然有長線投資價值。
而銀娛(0027)現價合理,可以現價入首注。不過澳門續賭牌的問題,令佢不確定性高左,暫時此股不宜太大注。
另外,你現時組合有一個較大問題,就係太集中地產類股份(0012, 0823, 0778)。
個別企業和行業,不要佔組合15%和30%以上,銀行業更加不要高於組合20%,否則會有過度集中性風險。(盈富由於係一籃子組合,故不受此限。)
由於這些股票有質素,你唔沽都可以。但未來再有新資金時,就暫時唔好投資地產類別,等組合平重回復平衡,才再考慮加注。
Q23596:
老師想請問下, 我閱讀緊"財務自由行", 當中有D關於計算上市公司的股價,有關"價格"vs"價值"\
當中有D地方未能理解, 請問課堂上會詳細教嗎?
本書我睇左一半….半明半唔明
龔Sir, 對於#1448 (福壽園)以中國殯葬業務為主.你有沒有什麼建議?
現時價位應是合理買入價嗎?謝謝
龔成老師︰
"價格"就指你係股票機見到的價錢,而"價值"就係股票佢真正內在價值。2者好多時不會有落差,為投資者創造入貨或出貨機會。
"價格"要理解,相信唔難。
但"價值",又即是我地成人講的"企業價值",估算過程就比較複雜。估算方法會在我股票班,用數小時詳細講解,裡面會講3種估值方法,有難有易,但同學都用到的。
簡單來說,你要考慮企業的生意、盈利、現金流、資產、負債等財務數據,同時要比較行業,考慮這企業的經營情況,之後的環境又會如何。這都是計算的基礎。
例如,我地會考慮佢有多少生意,有多少盈利、現金流,有多少資產,從而計算該業務值多少錢,同時會推算將來的盈利情況,去推算這企業長遠的價值。
福壽園(1448)有質素,不過都會擔心監管風險。
佢係中國最大的殯儀企業,有一定的規模,而針對的是高端市場,服務有一定的質素,擁品牌及知名度,有相當的賺錢能力,財務穩健負債少,因此企業本質不錯。
由於行業處增長的市場,而新競爭者要入行不易,因此對原有企業有利,故福壽園是優質的企業。
佢憑著本身的優勢,能取得比同業更好的回報,而福壽園管理層表明會持續擴展,策略上會透過併購同業及買墓園去擴充。
由於福壽園的模式成功,因此只要投入資金去發展,複製過往的成功,已經能取得理想的再投資回報率,長期來說此股有一定的增長潛力。
不過,由於佢賺錢能力強,而從事殯儀業,都會擔心佢受到監管,這是潛在風險,因此都要控制注碼。
至於企當估值方面,現價算是合理區中上部,無貨已可以首注。
但由於此股波動性較大,若你係投資經驗較淺,或者較年長,此股就不宜持有太多,以免組合風險過高。
Q23597:
老師,想問下,融資產品,保證利率3.5%的,買得過?
龔成老師︰
保證利率計,其實唔係好吸引。因為一般收息股,現時都有5-6%,雖然會有價格波動,但長線相信好大機會會高於這個回報。
而且,當進入加息週期,貸款利率和保單回報進一步收窄,令回報減少,都係你要考慮的問題。
我唔係話保費融資一定唔好,只係你這類退休人士,投資應以穏健為主。
這類有槓桿的產品,我就不太建議。
我建議你都係集中翻係收息股、年金、A級債券、無槓桿成份的定息產品等,會比較好。
Q23598:
剛剛在看《財務自由行》,我本身有一份正職,由於太多空餘時間,所以想同朋友創一番事業,最近都想揾一啲加盟店試下做生意,請問你覺得可行嗎?
龔成老師︰
有空餘時間,去創業增加收入來源,係可以。但要分析清楚這個生意,到底有無得做。
首先,如果你地本身對咖啡無乜深入認識的話,以加盟店型式經營,都會係一個方法。
近年多左人對咖啡產生興趣,故有一定市場。但你要了解清楚,你這個加盟品牌,係走什麼路線。
之後,再去定開店地點。因為咖啡店都分好多種,有些賣高性價比、有些賣高質素、有些走休閒文青路線、有些主力做外賣,你個品牌到底係邊一種。
你要了解清楚,選擇一個合適市場位置,計畫好全盤計劃,以免出現品牌和市場錯配的情況。
Q23599:
謝謝你介紹1211, 之前以散戶心態入貨1211, 現時賺了3萬, 慢慢cover其他蝕的數目, 等跌到你之前說的價後才入手及長線持有。
另外想問一問太古地產, 看了你介紹而入, 怎知早前新聞指地產商有責任提供住所後, 地產股跌, 其實太古地產仍值得持有嗎?(貨很少)
醫渡科技(2158)家人持有900股,高位…$68.7, 最近跌至歷史低, 請教一下應該等業務轉好, 還是忍痛放手呢?謝謝
龔成老師︰
你只要放棄左以往散戶賺差價心態,去長線投資一些優質股,回報就會自然慢慢好起來。
關於地產業,之前有消息要香港地產發展產,要做更多利好社會的事,但暫時未知具體政策,只是消息,消息真假都未知。
記住,我地分析時,要分析佢的「長遠價值」有無改變,有危有機,但要小心分析。
如果最終無乜大動作,無對企業有核心性影響,現時股價就無野要擔心,但如果最終有核心性影響,優質度減,投資價值就減,如果之前月供可能要,甚至要減持,但仍要睇策發展。
留意,並不是睇股價,而是睇有無具體政策對企業有核心性的影響。
太古地產(1972)暫時未見質素有明顯變差,你照長線持有係可以。
醫渡科技(2158)有潛力的。可長線。
提供基於大數據和人工智能(AI)技術的醫療解決方案。集團主要向醫療行業的主要參與者(如醫院、製藥、生物技術及醫療設備公司、研究機構、保險公司、醫生和患者以及監管機構及政策制定者)提供服務和合作。
根據大行報告,於2019年,集團收入在中國所有醫療大數據解決方案提供商中排名第一,在中國醫療大數據解決方案市場中的市場份額為5.0%。
睇翻大行對佢2020-23年預測,收入和毛利增長分別為73%和83%,增長力唔錯。
佢平台有一定擴張性,長遠受惠更多醫療保健客戶使用平台。不過公司客戶過度集中,以及依賴公共部門。
但佢依然係在燒銀紙狀態,係一個扣分架地方。
整體算係有質素,但要注意風險,投資時唔建議大注。若果900股佔你家人組合比重較高,我建議沽少少,去平衡風險,畢竟此股不確定性都大。
如果只係佔小部份,你可以守住先,再觀察。
Q23600:
老師,我女朋友家人好有錢,搞到我覺得自己係佢地面前,無乜位置,靠投資可否追貼佢地?
龔成老師︰
其實致富,有好多個方法,成為專家係一個方向。但成為投資專家,都係一個可行做法。
所以,只要你努力學習,財富增長上不一定輸給專業人士。
但你要明白這條路不是一時三刻可以行到,你要時間去增值和磨鍊,才會成為投資方面的高手。
唔好因為想快,就去做短炒,只會令你得不償失。
其實致富之路不只2種,你可以睇我本《80後千萬富翁》,當中有詳細解釋,你可以研究下,之後再作決定。
選「適合」自己的路好重的。
若你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網,當然,會將發問者的身份,以及有關個人資料的部分刪去。
另外,我所給予的各種意見,只是供大家參考,當中無任何銷售及推介,不涉及任何利益,其實大家應該要有獨立分析的能力,我只是給予一些方向及純參考模式。
由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。