Q49431：
龔sir, 百度$104有貨，可守嗎？
龔成老師：
百度（9888）其實有質素，有獨特性，長線仍有增長力，但短期可能較一般，如果你貨不過多，可守。
佢係全球最大的中文搜索引擎「百度」的營運商，係內地用家搜尋資訊主要對口，用戶規模突破10億，百度App日活潑用戶超過2億，多個指標都處中國第一。
業務上，佢擁有好強大互聯網基礎的領先AI公司。自2010年起一直投資AI以提升搜索及變現能力，並使用核心AI技術引擎「百度大腦」開發新AI業務。
百度核心業務（唔包括愛奇藝）由AI驅動，為其貢獻超過70%的總收入，主要提供基於搜索、信息流及其他在線營銷服務，以及來自AI新領域的產品及服務。
並廣泛使用AI技術開發創新營銷服務（例如動態廣告），為各搜索用戶推薦最適合的營銷客戶產品。
現時佢坐擁不少資訊和客戶群，就可以利用佢地去發展很多不同業務，可以話係一個好大的優勢。佢收入不差，長遠有發展，但由於本身有相當規模，因此，未必是高速增長型。
長線有增長力，但未必是高增長。
Q49432：
Sir 現價981還是700比較值得入貨？
龔成老師：
好睇你投資目標及風險度。
如果想穩陣D就0700，想潛力高D（風險都高D）就0981。
騰訊（0700）如果用近幾年計，佢業務正好轉中，佢過往受中國政策規管影響，令企業之前的賺錢能力略減，以及企業估值都會略減，不過，政策影響又未到核心性，無令到企業無法賺錢，只是賺錢減少。
同時，見中國政府之後在政策上開始有放鬆，相信中國政府明白騰訊這類企業對經濟有一定的重要性，同時之前規管較嚴，開始調整翻。相信行業最差的時期有已過，之後會慢慢好轉。
這企業長遠仍有質素，有發展力的。佢最有價值的，就是「平台」，這亦是現世代好有發展的資產。
佢業務模式係提供平台，如通訊平台、交易平台、入門網站、遊戲平台等，而收入來源則是其廷伸的服務，如增值服務、網絡廣告、電子商務交易等。
過往的業績理想，又身處長遠有增長的行業，加上擁有重要的資產，即龐大的客戶群，將來發展各業務都有相當的優勢，這都是騰訊值錢的地方。現價合理區中下，分注可以。
Q49433：
老師，多講回覆，但我沒有美股戶口😢😢
如果只可以買港股長楂，你會建議我入手邊幾隻呢？我可以擺三至五年都得
龔成老師︰
如果你無美股戶口，買唔倒個股，但買指數都仲有其他方法，例如用3195。
恒生標普五百（3195），投資目標為追蹤標普500指數之表現的基金。
標普500指數，當中都是全球有實力的公司，有長線投資價值。
由於美股波動，不建議一次過大手買入，最好的方法慢慢分注，或以類似月供模式進行，長線持有，這是一個最好的投資策略。
另外，如果你有美股戶口，建議買（VOO），與（3195）原理一樣，不過管理費較低。但如果你無美股戶口，只有港股戶，就買（3195）都得。
如果港股的話，你可以考慮以下，若你不會選股，集中2800。
用分注，去慢慢儲貨，唔好一次過入晒。
平穩增長股︰
盈富（2800）、中銀（2388）、港鐵（0066）、港交所（0388）、長建（1038）等，你可以自己了解下，再決定是否從中選股。
Q49434：
啊sir, 這是我戶口，變左同一年前一樣 冇輸冇贏 感覺好多野都做得好差 可唔可以批下個倉
龔成老師︰
其實近一年，港股都係係合理區中間浮動，回報無大變都正常。
如果你係年青至中年人士，你個持股係可以。
另外，要睇長期回報（例如5年），而不是1年。
如果要優化組合：
第一，我會建議你港股+美股，美股比例可高過港股，但美股現水平唔平，買入要分注。
第二，你好集中半導體股，長線要加入其他行業去平衡。
第三，港股要小心選股，同時要留意每一隻風險，去決定投資金額，港股你預短期一般，但長遠不是完全無發展，但酉要耐心，用一年作視點會錯的。
Q49435：
成老師你好！兩年後嘅我仲未買到樓🤣 不過我諗緊另外一個方案，想請教下咁樣做係咪一個更好嘅方法
因為兩年前我揀唔到想買嘅盤，所以一路喺出面租緊樓，但租租下都覺得就咁交租金其實都幾浪費錢，不過因為我租金都相對平，而我首期亦都拎唔到好多出去，我喺度諗如果都係問銀行借錢買樓，我係咪應該儲多20年錢，然後呢20年入邊我可能一路做美債五厘，將啲錢滾存，到時候再買返樓？
一嚟我而家現金流會彈性啲，二來唔使俾錢銀行賺，變相加多咗成本，三來如果我之後再買嘅樓，假設個升幅唔係爭好遠，其實我係賺通脹帶嚟金錢嘅購買力？
反正層樓對我嚟講只不過係退休嘅時候唔使交租，同埋可以用嚟做按揭，我呢個方法會唔會係一個更好嘅做法？感謝你解答🫡🫡
龔成老師︰
你到退休先至買自住物業，唔係唔得，但要明白有些風險存在︰
-
租金波動性︰有機會令你現金流流失比預期快
-
未來樓價不確定性︰20年很長，若將來樓價大升，你會失算
-
租約不確定性︰有機會你要經常搬屋，造成不便和額外成本
-
按揭︰如果到時你未能一筆過支付物業全數費用，你到那個年紀，很難再承造較長時間按揭
雖然，無人知20年後世界會變成點。
但我會偏向有能力時，盡量鎖定可控的範疇。
例如先買自住物業，到時就算唔能夠住到百年歸老，也有一個物業在手，可以將來用黎"樓換樓"(當然，前提係這個物業表現至少可以跟大市同步)，去平衡左這4個風險。
你這個問題，無一個100%最正確做法。
但你可以先用我回覆參考下，再思考下最終方向。
Q49436：
美股總值 買少於 6萬美元 就可以免遺產稅嗎？
龔成老師︰
是，一般非美國居民外國人（包括大部分香港居民），具有約US$60,000的基本豁免額。
參考連結︰
https://www.irs.gov/individuals/international-taxpayers/some-nonresidents-with-us-assets-must-file-estate-tax-returns
Q49437：
老師你好,我第1次發問,希望你能提供一下方向
21年睇到你的FB,意識到投資重要性,都早點財務自由,開始買入港股, 一直用恆生(方便,但手續費高),唔會經常MON住, 長線投資
01211 有500股 HKD82入
01810 有2200股 平均HKD16.8
02800(月供) 有7263股 平均HKD19.3
09880 有200股 HKD85入
00002 有243股 平均HKD76.8
以上組合是否合適? 要調整嗎?
想轉收息股及投資美股,所以近日開左IB Account, 扣除開支/家用,每月約HKD9000-HKD10000可投資, 諗住以下組合月供,但有點迷茫,會不會太散:
VOO 美股 ETF HKD3000 / NVDA 美股 HKD1000
0941 中國移動 HKD2000
2388 中銀香港 HKD1500
3110 高息 ETF HKD1000
2840 黃金 ETF HKD1000
2800 盈富基金 HKD1000
謝謝
龔成老師︰
- 當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。
例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。
如果你係年青至中年人士，現時持股係可以。
但長線，最好慢慢加些美股，去平衡地區性風險。
- 若你係年青至中年人士，用這個組合都可以。
不過，會相略為少少保守。
因為當有0941和3110都係收息股，增長力唔高。
若你係偏年青，建議將佢地轉為增長力較高股票‧相反，你係中年的話，這個組合可以。
- 另外，每月儲蓄唔好盡用，點都留少少現金，去等可能出現的大跌市機會。
Q49438：
1810跌左 點算好
龔成老師：
小米（1810）你預佢短期仍會較一般，成本上升令盈利跌，業績短期仍弱，加上品牌轉弱及之前汽車多事故，要建立品牌不是短期，要比時間佢，再加上成本上升令賺錢能力受壓，都是不利因素。
但佢長遠發展仍是正常，不過可能要比多少少間佢。你見佢過往造車，3年時間可以由零開始成功，反映企業發展強，現時面對較弱的環境，但可以好轉。
如果用較長遠眼光分析，其實小米近年的業務發展唔算差，無論手機、ＩｏＴ、智能車，各類業務部分，都有相當的增長，除了反映不同類別的業務都發展理想外，相信小米的品牌及產品性價比高等因素，能帶動整間企業發展。只是在近半年，業務有點轉弱，只核心質素仍在。
不過，你預佢股價上落大d，如果明白風險，而你貨不是過多，可持有的。
Q49439：
最近有邊隻收息股在合理價格適合買入呢？
龔成老師：
以下都可以留意，或可以建立一個組合。
高息基金（3110）、恆生高息基金（3466）、港燈（2638）、深高速（0548）、香港電訊（6823）、工行（1398）、置富（0778）等都可以，你可以了解下，並從中選股。
由於收息股股價都會有上落，因此要控制每一隻佔股票組合的比例，不要超過15%，而3110、3466由於是一個組合，比例可比個股高。
3110、3466可以視為收息股的組合中其中一員。這基金可投資的，現價合理，可分注。佢是投資香港大型，派息較高的上市公司。
這是不差的收息組合，但增長力不強。
Q49440：
阿Sir！隻商湯還有得玩？😎
龔成老師：
比D時間佢，已經成功轉虧為盈，生意有增長，不過始終業務波動，估值難，市場要見到更多業務實質增長情況，才有機會令股價上升。商湯集團（0020）業務都有發展，但要留意政治風險。同時業務都有一定的風險。
佢係一家專注於計算機視覺軟件的人工智能軟件公司。根據報告，佢為亞洲最大的人工智能軟件公司，市場份額為中國最大的計算機視覺軟件提供商。
軟件平台的客戶數量合計已超過2400家，同時還賦能了超過4.5億部手機及200多款手機應用程序。集團並擁有8,000多項人工智能專利及專利申請。
佢專有的人工智能基礎設施SenseCore，佢已開發超過22,000個用於不同應用的商用人工智能模型，涉及多個垂直行業，已於智慧商業、智慧城市、智慧生活及智能汽車領域取得市場領先地位，服務商業空間管理、住宅物業管理、城市管理、製造、基礎設施、交通、移動設備及應用、醫療及汽車。
長遠來說，佢的技術應用將會更多，有發展力。
不過，美國已對佢進行打壓，相信之後仍會面對一定的政治風險，這對投資者來說都是一個較大的不確定因素。
因此，這股都有長線投資價值，但由於政治風險，因此不建議投資太多。