Q38461：

老師現在還適合買美國債券嗎？thx

龔成老師：

可以，因為當美國進入減息週期，市場的要求回報率會減，會利好債券的價格。

不過要留意，由於市場都預期開始減息，如果最後減息的力度不如預期，或減得不太多，就會對債價不利。

Q38462：

龔Sir, 謝謝你的詳細回覆，基本上我也按你的方法做第一和第二步，巳踢出很多公司，因財務數據不合格，第三步就比較複雜，因為對企業的認識不足，如何進一步去認識不同的企業？

龔成老師：

你可以多睇書，去學習怎樣分析一間企業，以及當中的財務數據。

你重讀初班，絕對有助你打好這方面的基礎。

如果想進一步學習研究企業，進階班將會令你更上一層樓！

Q38463：

阿sir，我想講多謝，你既課程好值，內容真係可以用一世，我之前都有上過其他類別課程，但唔會可以課堂前後有咁多時間俾學生問問題，我地上3個鐘堂，但你就頭尾留守4-5個鐘

第8堂最後你又竟然留email俾大家，我係完全估唔到的，其他課程都唔會咁做，但你會繼續照顧學生，就好似之前你派功課俾舊生一樣。

進階班見~

龔成老師：

我相信知識是用來分享的，有時對我來講，花多1、2個鐘其實無乜野，但對學生來講，就可以影響好巨大。

因此，盡力而為啦！記得多溫書、睇年報、用課堂的「企業評估表」！

Q38464：

阿sir, 開始理解你的書話人生是可以創造的意思。我越來越睇會到，我會努力的！

龔成老師：

對，一般人安於現狀，認命，不認為自己能做大事，最後只會作為有限。

我2012年出版《80後百萬富翁》，當時身家$100萬，在書的最後我寫住「會同讀者一起在千萬富翁俱樂部相見」。其實這句說話，是同時寫給我自己睇的，因為當時我正以$1000萬為目標。

之後我不斷努力，到了近年，身家過千萬，將會出版《80後千萬富翁》，有好多野，我地相信自己就可以做到。

我從來唔信命運，我只相信自己，人生絕對可以憑努力創造！你都要加油！加油！

Q38465：

成哥 好多謝你！令我唔洗五年就儲到一百萬！我知道其實唔多，但係第一次見到自己銀行有七位數字真係好感動

我睇過你好多書又上過你既股票班，你教既選股技巧固然受用，但我最佩服既係你既學習精神同埋對資產個種追求，真係非常多謝你！

令我到依家只相信價值投資，睇股票全部睇長線，眼光放遠左好多！

以前好多人同我講係香港唔好諗買樓，但我會學習你既思維，同自己講我一定會做到，只要肯堅持，我覺得總會成功

我都會再set目標比自己，希望黎緊既五年，資產可以滾存到三百萬以上！

龔成老師：

我自己當年擁有第一個$100萬！都好開心的！呢個係你知識與努力的成果！恭喜你！

第一個是最難，但有左第一個，第二、三個就會好快。

你保持進步！堅持目標，我等你在5年內同我講，你已經擁有$300萬！加油！

Q38466：

老師~有問題想請教！現持有10手700平均買入價$300左右，你認為放一半定或繼續持有呢？近期升左，其實自己又唔係好想放住！

龔成老師：

要睇你持有騰訊（0700）佔組合的%，以及現金%情況。我地最重要是建立一個平衡的組合。

首先，如果你想獲利，賣部分是可以的，例如賣3-5手，總之，點都有貨是長線的，成為你投資組合的一部分。

如果你現時持有騰訊的比例太高，那可以賣少少。如果你現時現金少，可以賣少少。

相反，如果這股佔你組合比例唔過多，同時現金足，其實不用賣出。

Q38467：

龔sir，上堂講過：增長率大過折現率冇得計。

增長率如何計算？

增長率要用平均數嗎？

水桶1 預期高增長是不適合用現金折流模式對嗎？

龔成老師：

要用「二段或更多段的折現模式」，即是頭一個年期，如10年，就比佢高增長，之後就會進入中低增長時期，後段由於會去到無限大，所以增長率要細過折現率。

最後將兩個數目相加。

水桶1都可以用現金流折現模式，不過你在推算增長率時，要較小心。而現金流折現模式由於敏感度較高，因此好易出錯，所以建議你只作為輔助，不能成為整個估值的核心。

Q38468：

老師，港鐵有時會蝕錢？點解？港鐵賣樓，樓價無跌理應唔會大蝕，車務又唔係主要賺錢

龔成老師：

港鐵（0066）其中一個影響佢盈利的因素，除了賣樓，是「物業重估」，即是佢持有一些物業。

舉例講，如商場，每年都要重估價值，假設價值由$600億跌到$500億，就會出現$100億的虧損，這是一個會計數目，但就要反映在損益表當中，所以你見佢虧損。

Q38469：

現在的士牌

可以考慮入市嗎？

龔成老師：

的士牌，現時的投資值博率，算是中等。

這刻價格的確便宜，由於經濟差的因素，因此短期都會弱，如果經濟好轉，相信牌價都會上升。

不過，近年競爭大左，除的士外也有其他選擇，加上政府有可能引入國內的叫車平台，都是潛在的不確定因素。

因此，現時牌價較低的原因，部分是反映了上述不利因素。整體來說，投資值博率為中等，要睇你是否承受上述所講的風險。

Q38470：

你好師父， 港鐵現價值得入嗎？ 不過似乎息率不高， 未來仍受本港地產弱影響？

龔成老師：

港鐵（0066）有一定的獨特性，不過，近年的增長力略減。佢是全港唯一的鐵路營運商，加上政府會比佢地產方面的優勢，因此可長線投資。其中有4個因素影響這股的盈利能力及股價。

第一，香港車務營運收入，近年港鐵加價的能力比過往弱左，分析近年一些調整票價條款，例如會加入賣樓收益作為影響加價的其中一個因素，令港鐵在這方面的賺錢能力，比過往年代略減。

第二，港鐵其中一個收入來源，就是租金收入，雖然短期一般，但中長期都會慢慢好轉的，整體市道長遠也會好轉，因此長遠這部分仍有價值。

第三，地產因素，長遠仍是一個有價值的部分。

第四，維修成本。近年港鐵的事故增加，與鐵路老化有關，因此這方面的維修成本將會不斷增加，影響了賺錢能力。

長遠來說，只要香港市道，以及地產市道好轉，就會自然對這企業有利。港鐵始終有一定的獨特性，因此整體的質素仍在，但增長力不及過往年代，只是收息及平穩增長型的股票，現時股價合理區底部。