Q23651：

想請教下1762呢隻係咪都冇機會反彈? 都持有貨 高位入

龔成老師︰

萬咖壹聯（1762）不過不失。

佢幫助企業與中國智能手機用戶建立聯繫，向尋求移動廣告、網絡視頻產品分發及遊戲聯運服務的行業客戶提供安卓內容分發服務。

集團專有的平台，設有數據挖掘、數據分析及場景分析等技術，以定位於智能手機用戶，並通過智能手機製造商自帶移動應用程序及用戶界面發佈行業客戶的個性化、實時及基於場景的內容。

不過，業務就較為波動，過往雖然有增長，但近年的中期業績出現生意與盈利下跌的情況。業務波動。

這類股有危有機，可能有潛力，但只能小注投資。

若你持貨不多，可以守。但如果你持貨佔組合比重較多的話，你最好沽少少，去平衡風險。

Q23652：

龔sir，想問下，擔心股市稍後崩盤。如果入左全部收息股，想問下，崩盤時係米照樣持貨等回升?

可以在課堂上講下點樣面對股災嗎？謝謝!

另外，股災時，收息股係米比其他板塊跌得少啲?

又有冇邊個板塊響加息收水時抗跌力強一些?

謝謝。

龔成老師︰

課堂第四堂的買賣時機，會講股災時的投資策略。

但記住，我地投資一定唔好去估走勢。無人知幾時會股災，股災通常係無預警下出現，個個都話股災，其實好多時都無事。

至於你持貨，不論是收息股，定潛力股，只要係有質素，照長線持有就可以。

但你要清楚，收息股的作用，係提供穏定現金流，去支援退休或財務自由人士的生活。因此，佢股價升跌係唔重要，重點係其派息穏定性。

收息股一般對大市敏感度無咁大，故大市大跌，佢跌幅都會較細。以港燈(2638)為例，佢收入主要係香港島電費。就算大市崩盤與否，都唔會好影響市民用電量，因此個盈利唔會太波動，故股價變動都會較少。

如果你要考慮加息抗跌力較強的股票，你可以選一些和加息相關系數無咁高架企業，如公用股、銀行股(會受惠於加息)等。

但你要記住，我地投資係長線，要睇遠D。著眼點唔好只放係加息影響，佢唔應該佔你投資一隻股票的考量太多。

反而你要睇清楚，佢本身質素，行業發展和財務數據等，這些才是你重點要了解的部份。

Q23653：

你好 龔成老師。請問海底撈的便宜位是多少呢？

剛剛看到你的文章，你說海底撈的預測市盈率大約是60倍，這是怎樣計算的？

謝謝指教

龔成老師︰

海底撈（6862）正本質是不差的，長遠仍會正面，不過中短期會弱。

第一，管理層有講過，之前市場對佢地公司過度樂觀，估值偏高。第二，管理層話公司面對中國的市道，其實業務不是一直都好的。

加上這股之前貴，相信中短期股價仍一般。

不過以長遠來說，這股仍有質素的，佢以「海底撈」品牌經營火鍋店及外賣業務，火鍋菜單由鍋底、醬汁蘸料以及在鍋底烹飪的食材三個主要部分組成，可點單鍋、鴛鴦或四宮格鍋底組合，餐廳提供多種調料及食材，以及供應小吃、酒和飲品。

在中國有好多分店，以及外國都有。

有規模，有品牌，整體正面。相信長遠仍有發展的。

不過，這股市場之前比佢好高估值，就算近期回落，最多只能稱為合理區中上部，一定未平。如果有貨可長線，但無貨暫時只建議小注，股價始終波動。

你去到平宜部，要有好明顯的下跌，才有機會到。

至於預測市盈率，現時大約50倍左右。計算方法，其實係參考坊間很多大行和數據，再推敲佢未來盈利數字，再去調整市盈率。

如果你見到現時市盈率，係比預測市盈率為高，代表坊間預期佢盈利會進一步提升，令到佢未來市盈率會出現回調。

Q23654：

老師你好｜以下是我的存倉 ， 因是新手也不懂選股，希望老師能給些意見

13 @ 500 股 ipo 約$40 左右

688 @ 5000 $17.84

873 @2000 $18.1

880@ 5000 $8

941@ 7000 $45

981@ 2000 $27.4

1398@10000 $4.3

2018 @2000 $41.6

6608@1000 ipo $31

9633 @2000 $40.8

9888 @50 ipo

9923 @ 1200 $47

另有現金 40 萬 ， 考慮 27， 2018 ，1810，9988等等。

希望老師能推介那幾本書 ，等我可以學習一下。感謝老師！！

龔成老師︰

你現時持有股票，好散亂，最好你長線保持10隻以內，否則好難定期審視佢地質素。

另外，我見你好多都係之前較熱炒股票，相信你都係較受市場氣氛影響的投資者，見人入，你又入。

整體而言，你持有股票都係有投資價值，可以保留。但當中中移動(0941)和工行(1398)只係收息股，若你係年青至中年人士，這類增長力較弱的股票，就不要持有太多。

澳博(0880)由於疫情和賭牌問題，你預佢中短期一定會較弱。

百融雲（6608）和移卡（9923）有投資價值，但不確定性好高，長線不宜佔組合太大比重。

你想投資的4隻股票，都有質素。但銀娛(0027)因賭牌問題，不確定性高左，暫時不宜持有太多。

瑞聲科技（2018）、小米(1810)和阿里(9988)係科技股，而你手上0981, 6608, 9888, 9923都係科技類，加起來有機會出現行業過度集中問題。

個別企業和行業，不要佔組合15%和30%以上，銀行業更加不要高於組合20%，否則會有過度集中性風險。(盈富由於係一籃子組合，故不受此限。)

在創建組合初期，組合金額較少，出現超標都係可以接受。但長線你要參照這指標，去維持組合的平衡性，才算理想。

由於你已經有一定持貨，現持大市又未到平宜，最好留有3-5成現金，等大跌市才出手。因此，你可以因應情況，再加注少少，餘下資金就等大市回調，才再出手。

投資學習方面，除了睇書，你還需要多睇年報，新聞和上相關課程。

你可以先睇我寫架"80後百萬富翁"、"財務自由行"和"股票勝經"，都適合初學者。

另外，本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資、評估平貴，在投資上已掌握了一定的知識。

Q23655：

你好呀，我今日買左你本50優質潛力股，我認同你所講要長線投資。 我之前大慨用左30萬左右買左1919同316。我知道唔應該集中同一板塊。

之前跌市，我斬左1919，蝕左4萬蚊左右，之後幾淨低既錢買左316。 意思即係我用哂100%既錢買左4手316。 但到宜家都未回本，仲坐緊。

我宜家淨返26萬。 你認為我應該點樣操作好？

係唔係賣左3手316， 用一半錢分注優質股，淨低既錢再留跌市再入貨？ 感謝

我和先生34歲，每月有4萬儲蓄。

龔成老師︰

我地投資增值，除左講求選股要優質外，都要留意個組合平衡性。唔單只唔好集中單一行業，更加唔好訓身一隻股票上，咁係好危險。

個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

當我地計算時，會以長期組合的比例去進行計算。

東方海外國際（0316）質素都有，但賺錢能力不算好強，增長力都不算好強。

航運股對經濟週期較敏感，之後經濟好轉對佢都有利，不過股價已反映。預佢之後平穩增長，但現價偏貴。

你現時持貨太多，可以慢慢分段減持部份，餘下1-2手長線持有。其餘資金，去分散投資其他優質股會較好。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你34歲，應以增值為主，建議你用「平穏增長股」 + 「潛力股」作組合，去創造一個增值平台。

現在你每月先用5成儲蓄，即$20000做月供。其餘先儲起，用一邊月供一邊儲蓄的策略。

由於「潛力股」係需要一定經驗和有一定波動性，如果你經驗較淺，可以先小注，大約佔組合3成左右。若你係有一定經驗，你可以投資到約5成比重。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

Q23656：

你好， 我宜家30幾歲，0投資經驗，可以每個月拿3-5千出黎。想睇下點樣開始。

另外，想問嘉里物流 00636，$25入，無接受要約，等派特別股息。但長黎黎計，呢個有潛質嗎？

龔成老師︰

你3X歲，應以增值為主，建議你用「平穏增長股」 + 「潛力股」作組合，去創造一個增值平台。

現在你每月先用5成儲蓄，即$2500做月供。其餘先儲起，用一邊月供一邊儲蓄的策略。

嘉里物流（0636）這股不差的，順豐入股後長遠發展更正面。

佢本身由嘉里建設（0683）分拆上市，係亞洲的物流服務供應商，主要從事綜合物流及國際貨運業務，亞洲、澳洲、歐洲及南北美洲的35個國家及地區設有逾400個業務點。

業務以第三方物流服務供應商身份為世界各地的製造商、零售商及其他客戶提供綜合物流服務，包括主要在亞洲提供廣泛的物流服務，如倉儲及增值服務、陸運及配送、退貨管理及各種配套服務。

另外，亦有從事國際貨運：提供的國際貨運服務絕大部份位於亞洲區內以及亞歐大陸之間，涉及空運、海運及跨境陸運服務。

這股長遠都有發展的，有長線投資，故你不接受要約，係一個較理想做法。

Q23657：

謝謝你回覆！如果基金一路向下，定投無論月還是年，依然是虧損

龔成老師︰

首先，你要睇翻這些投資，本身係唔係有長線投資價值。

你可以從企業本質、行業發展、財務狀況等，去作出判斷。

如果係有質素，中短期價格波動，就唔需要太在意。因為中短期價值，係會受好多野影響。有些因素，甚至係同企業本質無關，所以好難估。

但企業的質素，長線必然會在股價中反映出來。所以，只要你持有的是優質股或基金，照長線持有係無問題。

另外，你要睇下本身你買入價，係唔係貴左，所以令你一直虧損。如果係，你再投資前，就要先學好估值，或者用月供/分注模式進行，以減少買貴貨風險。

Q23658：

老師 想請教一下，最近物價騰貴，為何年港政府的債券ibond4246反而每天下跌ge？

龔成老師：

第一，佢以政府公布的指數作準，有時市民感受與指數，會有不同，要睇公式的運算。

第二，由於債券未到期，因此市場會考慮之前預期的通賬，以及最新預期的通賬，去進行比較。

第三，市場有時會因資金流向，以及其他投資其具的回報率等因素，去影響價格。不過，暫時未見到價格，最近都只是小小調整。

Q23659：

師傅， 多年月供了12 恆基， 現時國茦將行新界大建設。12 號農地多， 你認為對佢是好還是壞影響？

龔成老師：

之前有消息要香港地產發展產，要做更多利好社會的事，但暫時未知具體政策，只是消息，消息真假都未知。

記住，我地分析時，要分析佢的「長遠價值」有無改變，有危有機，但要小心分析。

如果最終無乜大動作，無對企業有核心性影響，現時股價就無野要擔心，但如果最終有核心性影響，優質度減，投資價值就減，如果之前月供可能要，甚至要減持，但仍要睇策發展。

留意，並不是睇股價，而是睇有無具體政策對企業有核心性的影響。

你現時持有股票，都係有質素，只要唔係注碼過多，或者組合太集中係地產業(個別行業不要佔組合30%以上)，你係可以不用減持。

我暫時相信，不用太擔心，現時市場只是將情況過份放大。

Q23660：

請問時代天使同埋銀河娛樂你點睇？

龔成老師：

時代天使科技（6699）有質素，長遠仍有發展力。

佢係內地隱形矯齒解決方案提供商時，根據報告，市場份額4成。

這企業透過時代天使隱形矯治系統在整個隱形矯治過程中助力牙科醫生，其由關聯的三部分組成：數字化輔助案例評估支持及矯治方案設計服務；隱形矯治器指用於治療錯頜畸形的可移動、透明塑料材質牙套；雲服務平台iOrtho使牙科醫生可在整個治療過程中進行下達訂單。

佢目前銷售四種隱形矯治器，包括時代天使標準版、時代天使冠軍版、時代天使兒童版以及COMFOS。作為隱形矯治系統的核心，集團自研技術及數據平台，即masterForce、masterControl及masterEngine。

佢通過持有第二類醫療器械經營備案憑證的全資附屬公司向醫院及牙科診所直接銷售大部分服務及產品。客戶包括公立醫院、私營牙科診所及分銷商。

企業發展正面，過往的生意及盈利都有理想增長，不過，現時估值都唔平，要注意如果市場估值出現修正，股價可以出現下跌。

整體來說，企業發展正面，但現價就唔平，這刻投資值博率不高。

銀娛（0027）質素比過往減左，但不是劣質，不過，賺錢能力就比過往減少左。

現時賭牌進行初步的諮詢，仍有好多變數，銀娛在澳門有正面的貢獻，從資產質素、澳門發展、就業等角度，佢都做得不差，賭牌好有機會得到，不過，政治因素就是不確定，這點好難準確分析影響是否大。

初步分析，佢得到賭牌會過半，但政治是一些不能預測因素。

要留意，現時賭牌的條款，要求加入政府人員，這無可避免地影響了企業長遠的賺能力，優質度及估值都會略減。

另外，全球疫情反覆，都對佢有不利影響，不過，相信這只是中短期，以長遠的角度分析，疫情因素影響不算大。

但由於仍有未知數，加上之前虧損，因此將企業估值調低左。

這股投資價值仍在，但由於優質度減左，以及有不確定性，因此，值得佔股票組合的比例，都會略減。