Q36821：

龔成老師您好，本人現年39歲，月薪扣除mpf後68k。扣除供樓、家庭開支、家用連日常消費後等每月尚餘23k-25k 儲蓄。

現和另一半共同持有物業一層和有約一百萬現金做定期。

現金是打算睇定樓市情況和息口走勢，再決定買入多一層收租。我並沒有持有任何股票，而家想開始以月供股票方式作長線投資，開始為退休作準備。

初步每月希望撥出3k-5k買入股票。請問您可否提供股票組合建議和分怖？

我本人比較懶惰，買左一隻股票就唔會點郁佢，所以股票嘅穩定性同長遠發展性係我比較關心的。

另外，想知道你點睇年金。因為冇咩免稅額，所以每年交稅都幾甘。但了解過年金要5-10年後先可以拎出黎，回報又唔算好吸引。

感謝抽時間回覆！

龔成老師︰

其實做長線投資，主要係買入前分析好，之後每年再審視下佢架質素，咁就可以。而唔係好似坊間短炒咁，要無時無刻睇住個市。

你現時目標係分別再購入一個收租物業，同時累積優質股為退休準備，而個方法係可以。

不過，我自己預期未來樓市唔會再好似以前咁大升(不過都應該唔會大跌)，以現時價格水平，買來自住係可以，但收租值博率就唔係好高，你要自己衡量。

股市策略上，你可以投資「平穏增長股」和「潛力股」。

不過，考慮到你追求較穏定性高架股票，你可以先集中「平穏增長股」，畢竟「潛力股」增長潛力高，但風險都高。

你每月5成儲蓄做月供(你睇翻自己最終想儲錢買收租屋，定係集中股市，去決定而部份架金額)，其餘先儲起，用一邊月供一邊儲蓄的策略。

選股上，你可以考慮一些平穩增值股，指數基金由於是一個組合，因此在平衡風險方面較好，例如美股追蹤標普500指數的（VOO）、追蹤富時全球股市指數（VT）、追蹤港股的盈富（2800）。

另外再加其他個股：美股如巴郡（BRK.B）、蘋果公司（AAPL）、迪士尼（DIS）、Costco好市多（COST）、麥當勞（MCD）、可樂（KO）、港股如中銀（2388）、港鐵（0066）、港交所（0388）、長建（1038）等，你可以了解下，並從中選股。

如果想增長力高少少，可考慮潛力股，例如指數基金，美股可投資納指基金（QQQ），或在港上市追納指基金（2834）、港股則可考慮安碩恒生科技（3067）、中國電車基金（2845）。另外再加：美股如微軟（MSFT）、Visa（V）、ASML Holding（ASML）、Tesla（TSLA）、Amazon（AMZN）、港股如騰訊（0700）、比亞迪（1211）、小米（1810）等，你可以了解下，並從中選股，但佢地波動性和風險會較高，要自己平衡。

現時大市大致算在合理區中下部(港股)和上部(美股)，你現有100萬資金可以先投入30-40萬，用"分注"形式，慢慢買貨。餘下資金和每月所儲到的資金，就等大市出現一定程度的下跌，才慢慢加注，然後長線投資。

至於年金，增長力弱，比較適合退休人士，而非你這個年紀。

Q36822：

有些人話(0005)$70會上到

阿sir 叫我守住先HSBC

龔成老師︰

唔好諗得太複雜，首先0005係收息股，主要係收息，增長力不高。

如果你係近/已退休人士，佢係適合。相反，你如果係年青至中年，就不宜持有太多。

另外，銀行業本身風險高，建議你個股和行業，分別不要佔組合15%和20%以上。

此股係有長線投資價值，至於是否持有，而持有又要否減少少，就睇上面因素。

我地持有一隻股票，唔係單睇個股價變化，而係要分析佢長線價值，同埋是否適合自己。

Q36823：

請問#3988、#941、做長期收息合唔合適？

thank you!

龔成老師：

兩隻都適合，同時現價合理。

中行（3988）由於內地經濟無過往年代咁強，股價增長力不強，不過，作為收息股，仍是不差的。

近年中國的經濟及內房負債問題，令到市場擔心，內銀的壞賬問題，並影響之後的派息。

其實，內銀的壞賬問題也不是今天的事，股價在估值方面，已經反映了相關因素，同時由於中行規模大，以及過往壞賬控制算是不過不失。

以長期及整體的角度分析，中行本身質素不差，有一定的規模，在全球都有網絡，本身不會無質素的。

不過，這股增長力不算強，只是一隻收息股，現價投資可以，因為在合理價區較下部，但不要對股價有太大期望。

現時市盈率3倍，股息率8%，已經有一定的投資價值，同時低市盈率，已經反映了一定程度的壞賬問題。而最新的財務數據，也未有嚴重惡化的程度。

因此，有投資價值，分注投資可以，買入後收息。

中移動（0941）有質素，5G對佢有正面影響，長遠發展仍正面，值得長線持有，作為收息及平穩增長。

過往中國的電訊企業每月每戶平均收費不算高，而5G業務的ARPU則去較高水平，在5G用戶持續增長的前提下，帶動業績理想。

過往幾年的股價弱，但情況開始好轉，其中一個原因與支本開支有關，因為電訊業要投入巨額資本開支，影響現金流及派息，這令過往幾年股價表現都較弱，但到了近一年，中移動的資本開支有減少情況，反映投資最高峰時期已過，令企業現金流得以提高。

整體來說，這股有質素，有長線投資價值，如果本身有貨，可持有，是不差的收息及平穩增長類股。現時合理水平，都可分注投資。

Q36824：

請問0005 HSBC 現時值得入手嗎?

如果月供會唔會風險冇咁大? 因為佢而家股價響高位係咪應該等佢回落先買?

龔成老師：

匯控（0005）最差時期已經過去，業務正好轉。

你現價分注投資，可以。

至於月供，無問題的，最重要是控制金額，當你月供投入資金已到一定數量，就最好停。

銀行業的賺錢能力比過往減左，因此不能視為增長股，但當經濟好轉，始終都會有錢賺，因此都有投資價值。

相信長遠是收息股，但股價增長就未必太強。

這股都有投資價值的，但都不能持貨過多。現水平仍合理，有長線投資價值。

Q36825：

DCF估值後，是否用市值比較？還有什麼數字比較知道自己是否計算正確？

龔成老師：

對，用市值比較，例如你計完DCF價值後，企業價值為$100億，如果市值是$50億，就算是平。但要留意，「市值」是全部股數的價值，如果佢又有A股、又有H股，就要兩邊加才是總數。

留意，DCF方法誤差可以好大，因此，如果經驗不多，就不要太相信自己的答案，只能當參考下。

Q36826：

你好, 龔成老師，剛剛睇到你在facebook 的post , 我是舊生基礎班

想問一下如何計算？恒生指數幾多點算係便宜區？

我見到已經係連續三個月個市盈率都係低於10 ，或10左右, 現在算是便宜區嗎？

因為股價都上升了不少, 明白股價上升都可以繼續算係便宜區

但本人經驗尚淺, 未敢肯定，所以想問一問, 本人一直都有分注入 。

（1810）小米 平均價$14, 最近價格升了不少, 還算是便宜區嗎？

謝謝老師解答

龔成老師︰

恒生指數大概在10倍市盈率以下就算是初步便宜。

所以，所以恒生指數大概處於合理區的中下部。

小米（1810）以手機、智能硬件，以及物聯網為平台的公司，小米專注於互聯網直接銷售產品，近年發展電動車。

雖然發展電動車，投入了較多資金，令風險比過高左，但如果成功，股價可以倍升，不過如果失敗，股價會進一步弱。

隨著新產品系列推出，小米賺錢能力提高，同時佔據了一定的市場，在中國安卓類手機4,000至5,000元價位，小米出貨量排名第一。

另外有一點值得留意，小米最新的全球及中國大陸MIUI月活用戶數持續增長，達到約6億和1.5億，均創歷史新高，而這部分會慢慢產生更多的將來收入，所以前景又不用睇得太差。

由於生產電動車令投入了資金多左，在市場未見到產品前，一定會認為風險高左。但當有具體產品出現，加上原本手機等業務開始好轉，現金流好轉，風險度就會減少，令估值有一定的重估。

考慮到小米過往的發展，其產品性價比不差，以及研發能力強，其實電動車值得期待的。

這股可長線，現價依然合理區，分注可以，不過都要控制注碼，預佢股價仍波動。

Q36827：

老師你好，我係位單親媽媽

想自己開ig做鑽石生意 但係而家既環境唔敢做

你有無意見？

龔成老師︰

現時大環境經濟弱，奢侈品生意的確會較難做。當然難做，同無得做，係完全2回事。

成件事最重要，都係睇你自己有無而方面架專業，同埋生意經驗。

如果你自問有能力打理倒，同埋資金方面又充裕(講緊唔只生意上，仲要預留至少1年架生活開支)，咁都可以一試。

總括而言，係睇翻自己有無而方面架能力，同埋資金去決定。

Q36828：

halo 龔成sir ,我睇左你page 一段時間，但我未曾投資過股票，我如有2萬蚊現金，可另變更大嗎

因我欠下7位數字外債，生意上好多朋友仔幫過我，我好想快d由負資產變返正常人，sir可教下我嗎，感激

龔成老師︰

首先，你要明白我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線，而唔係短期炒賣，去賺差價。由於係長線計劃，你唔好預期佢對你短期財務上，會有任何幫助。

如果你負債息口係高，建議你先處理好再投資，因為高息成本會大大蠶食你投資回報。

我明白你急於清還貸款，但投資並唔係坊間咁，短炒去賺錢。雖然有人係得，但只係極少數。我見架大部份短炒投資者，都係輸錢收場。

所以，你唔好因為而家架財務狀況，走去短炒(我見過唔少咁架case)，只會令你更加進退失據。

因此，你這刻應該合理地對負債，從收入、支出、重組好還債計劃去著手。

至於投資方面，如果你無經驗，你可以睇我寫架《圖解股票小百科》、《80後千萬富翁》和《財務自由行》，都適合初學者。

我Youtube Channel都會不時分享一些投資技巧和知識，你都可以睇下。

https://www.youtube.com/@user-rw4st4yg5v

等你真係對投資有一定了解，再去進行會較好。

Q36829：

成哥, 一直有留意你嘅動態, 想請教你財務上嘅問題

背景

七年前 購入價值400萬嘅單位（ 現在價值大概340左右） 當年九成按揭加按保 , 現在按揭貸款還剩大概300萬

現在想重新再做按揭撇甩按揭保險 做5成 將個單位租出

以現時沽價340 / 2 = 借170 萬

供款餘額300-170 =130 （ 即係我要補回大概130 萬）

手持200萬 現金, 如果攞去投資 而現時內銀收息股7% -8%, 扣除稅率， 一年有140,000 左右

我是否值得200拿130去重新再做按揭 只是為了合法地租個單位出去！ 現在那麼高息 我有應否等到低息才重新再做按揭比較划算呢？

龔成老師︰

首先，如果你真係要放租，記得係合法去放租，唔好博無人發現，因為咁係好危險。因為近年以我收到的個案，見到有嚴左，所以要更加留意這方面的風險。

現時租金回報率，其實唔算好高，甚至連定期都唔到。所以，你做決定可以從機會成本去考慮，相信做定期或者長線投資優質股會較好。

如果唔放租會變成空置，咁你睇下有無可能用來自住。

整體大方向，現時定期或優質股，相信會對你較有利。

Q36830：

你好，請問你覺得值得投資日本股市嗎？謝謝解答

龔成老師︰

日本股市都有投資價值，但我自己睇好未來10年，中美會係全球最大經濟體，所以會集中係2地架股票。

如果你本身都認識，同時睇好日本股票，你都可以投資。如果唔識選股，可以用ETF。

ＧＸ日本全球領導（3150），基金之投資目標為追蹤ＦａｃｔＳｅｔ日本全球領導指數之表現。

主要成份股有：

TOYOTA MOTOR

MITSUBISHI

MITSUI & CO LTD

HITACHI LTD

RECRUIT HOLDINGS CO LTD

FAST RETAILING CO LTD

NINTENDO

都是有實力的企業，都有長線投資價值。

整體來說，如果你想投資日本相關企業，可考慮這基金，但由於近年日本股市上升不少，因此不建議這刻投資太多，宜分注，同時控制總投資金額。