Q29521：
阿sir你好，我在手機應用程式截了阿里健康的狀務狀況表，其中的負債高於股東權益，可否說是支不抵債，財務狀況不太健康？
最近在看阿sir你的著作年報勝經，剛看完資產負債表那部分，想嘗試做分析
龔成老師︰
要睇是否資不抵債，是利用總負債跟總資產比較。
總負債和股東權益，只係表達翻佢長線償債能力的一個指標。而且，有時資不抵債，但只要企業定期還到錢，都唔會倒閉(當然這個狀態不理想)。
阿里健康（0241）的財務情況是及格的。
《年報勝經》内容比較深，如果覺得難，可以從《80後千萬富翁》、《財務自由行》和《股票勝經》入手。
Q29522：
老師, 我剛完成雅生活的企業評估表，可以幫我評核一下嗎？謝謝你！
（舊生附上資料，無法網上公開）
問題：
我計算的合理股價範圍會唔會太廣？
找不到集團還有甚麼負面因素
龔成老師︰
我大致睇左你個功課，主要留意翻以下幾點︰
- 初步指標︰其實是指而家這一刻，佢PE是否在5至20倍。如是，就合格。
5至20倍，代表佢唔會太貴。而不可少於5倍，是因為太低PE，怕佢有一些潛在風險，故市場給予較弱PE值。
-
擁其他企業没有的特質︰佢相比大部份物管股，佢物業類較分散，唔係只集中住宅，或者只非常依賴母企。
-
威脅︰主要唔係疫情問題，反而係內房增長慢左，會令佢長線生意增長慢左(主要住宅類)。
-
合理市盈率︰雅生活(3319)上市唔算耐，所以你用佢PE計是不適合。這種情況，我會建議參考相近同業。但問題是，其他同業都係上市不久。
這個時候，我地只能用經驗和當企業/行業認知，去進行估算，我覺得大約合理PE係10-15倍左右。
(你每股盈利係可以，但PE要調整翻去計出最終估值)
- 最近佢換左核數師，會有少少負面，要睇埋佢新一期年報，先知有無明顯問題。
雅生活(3319)的營運模式是靠收取管理費作爲主要的收入來源，產品相對簡單。
物業管理過往因爲内房的監管因素，物管沒有受惠於國策，雖然現時最壞的時間已經過去，但相關企業回勇仍然需要時間。
集團最大的負面影響是政策的因素，政策會令到内房整個行業增長放緩，市場對企業的增長看法負面。
Q29523：
龔sir，想問吓8069點睇？
龔成老師︰
縱橫遊控股(8069)以「縱橫遊」品牌於香港從事設計、開發及銷售旅行團、銷售自由行產品、提供旅遊配套產品及服務等。當中，以日本旅行團為主。
此股市值不高，過往營業額都好波動，再加上佢多年來都係虧損，狀況不太理想。
雖然防疫政策開始慢慢鬆翻，對佢有利，但如果從本質分析，業務質素唔算高，唔太建議你入市。
Q29524：
如果想加強投資知識可以睇邊本書？
龔成老師：
《股票勝經》，相信好適合你。
另外，【投資倍升股課程】適合初學者的，因為整個課程的設計都是針對初中階投資者的，課堂頭3堂都是初階的內容，只要你課後好好溫習，能跟到之後的內容。
每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資時機、配置、評估平貴，在投資上已掌握了一定的知識。
Q29525：
Hi 老師請問現價2800、175、2333、2007、386、778、2382現價可入及加注嗎？
龔成老師︰
你所講架股票，現價都合理，可以按你持股比重，去決定是否加注，但留意以下股票。
長城汽車（2333）業務不過不失，質素都有D，但不算好強，不宜持有太多。
另外，你的組合有兩隻車股，要注意同一行業避免超過組合比例的30%，以免風險過於集中。
碧桂園（2007）質素中等，佢負債好高，故有一定風險。如果投資，要控制好注碼。
中石化(0386)和置富(0778)是收息股，增長力不明顯。如你是年青至中年人士，這些收息股小注好了。
Q29526：
本人，33歲，每個月可以儲到3千至5千，想買1手02007，碧桂園，可以長揸嗎？＆太大資金未能儲到，可以給意見嗎
龔成老師︰
内房，相信行業最差的時期已經過去，碧桂園（2007）正慢慢好轉。
但佢始終負債高，質素只係中等，有一定風險。如果投資，都要控制好注碼。買一手的話，問題不大。但每月去儲，就不建議。
如果你本身有比較大的經濟負擔，要儲到比較大的資金的確不是一件容易的事。
但如果本身無咩負擔，但儲不到錢就要重新檢視一下自己的開支結構。
要分清「需要」和「想要」，盡量只買必須品；不使用信用卡；用「收入」-「儲蓄」的模式消費。
如果依然好難儲蓄，就要考慮增加收入，如果你月入只有1萬元的話，想有大的儲蓄不是一件容易的事，解決的方法就是要增加收入。
你可以按照自己的興趣或者專長，發展其他有可能的副業。
33歲，仍然是一個可以嘗試的年紀，加油，只要肯嘗試，凡事皆有可能！
Q29527：
1128-$5入，請問有冇機會升返上$25或以上價位。
龔成老師：
有難度，因為當時除左經濟好旅客多外，仲要配合炒作。這股你可持有，但要較多利好因素，要時間，要有機會上$25。
Q29528：
多謝回覆，咁買10萬債券基金，少試牛刀，你掂睇？收息股喺股市波動嘅時候，一樣都會帳面價值下降
我梗係不会借貸來買債券基金啦
龔成老師︰
如果只係佔你本金好少，而你又了解當中風險，係可以。
但始終是加息週期，債券基金風險唔細。以你退休人士計，應該是買債券較好(而唔係債基)，你要明白這點。
其實你最重要是「了解」投資產品，再選適合自己的。
Q29529：
龔成老師，你好！想問問00139近期不斷52週高，我持有378000股平均價係0.17，想問下我應該繼續持有，定止蝕？謝謝
龔成老師︰
首先，我地分析一隻股票平貴度，唔會用52週新高這些方法去判斷。而是會用企業質素，行業發展、財務數據等去衡量。
中達集團控股（0139）過往投機味重，曾被散戶熱炒過，是散戶最愛的其中一隻股票，我最怕就是這類股，絕大部分的股價只會向下。
從業務基本面分析，業務不穩，營業額大上大落，久不久出現虧損，加上過往曾多次合股供股等不利小股東的動作，不建議投資。
你可以一次過沽，或者分段咁去慢慢沽貨，平衡價格波動風險。
Q29530：
- 旦1833, 經營現金流五年負數, Roe 負數, 條數好似吾靚
我知是高風險股
Sir 你真糸好勤力, 厲害
- LM加息週期答案
龔成老師︰
- 無錯，因為佢未賺到錢，所以條數唔靚，但此股投資係睇將來，唔係而一刻。
平安好醫生（1833）最近有監管出台，令估值下跌，其實佢行業有潛力，但監管影響賺錢能力，這點較可惜。中央要加強監管互聯網醫療，相信有可能影響賺錢能力，估值略減，但未算對企業造成核心不利影響。
佢係中國領先的一站式醫療健康系統平台，透過「移動醫療+AI」，為每個家庭提供一位家庭醫生，為每個人提供一份電子健康檔案、一個健康管理計畫。
平安好醫生係中國互聯網醫療健康市場的先行者，以平均月活躍客戶，以及在線諮詢量計，是中國最大規模的互聯網醫療健康平台。
企業的業務有潛力，本身有優勢，大環境的配合，都成了這企業的機遇，前景正面，不過財務數據未算好理想。
雖然長遠的企業價值向上，但股價在中短期，可以十分波動，因為市場以「前景」作估值，故此變化必然很大。好難得出平貴的準確數，只能估估下，作參考。
因此，低風險者未必適合投資，若投資者考慮這股，亦不能大注投資，買入後就耐心長線持有，等待這企業改變整個行業的情況，現價算合理區中下部，但好波動，分注投資可以，但唔建議金額太大注，一定要明白風險，以及控制注碼。
- 息口走勢有週期性，但我唔會用這個作為長線投資的主要考量。
債券持有目的，主要係創造被造現金流，增長力係不明顯，除非你已退休，否則不建議持有。
至於reits/收息股，都係同樣以創造被造現金流為目標，故不適合未接近退休人士。
在加息週期，這些投資項目價格係會受壓。但我地分析，應集中在長期發展上，而非這些中短期因素。