Q22991：
原來有2，3，唔見有可能要訂。不過唔緊要，由邊本開始?
我都分散一筆過及月供，不過你講過一筆過要睇價，月供無所謂平均成本法
至於㨂股票要㨂優質股，從所入手好，好似你講過睇年報…
龔成老師︰
書本在三聯、商務、誠品都有得賣。由於部分書在一些書店已斷，所以若你見唔到，問下職員就得（又或向職員訂都可以）。
你可以先睇《80後百萬富翁》、《股票勝經》、《財務自由行》，這幾本會較適合初學者。之後，再慢慢其他幾本。
係入市方面，如果你無太多投資知識和經驗，對企業估值，點去定平貴未必會太了解。你應先利用月供模式去儲貨，可以減低買貴貨風險。
若你想直接買貨，都唔好一次過入晒。先要等到合理區，之後再按平貴程度，分注入市(可參考股票勝經P.316-317的金字塔式買入法)。若在略貴水平，不要去入貨。
至於選優質股，你要從佢長線質素、行業發展、財務數據等表現，去多方面分析。這部份係要經驗和技巧，初學者未必咁快掌握到。
你可以試下睇企業年報、公司網站、財經新聞等，去試下慢慢了解一間企業狀況。
《選股勝經》和《年報勝經》會教多少少有關選股技巧，但就會相對我見你睇個3本深少少。
如果你想學會一個較完整的企業評估和估值，你可以上我初階班。
Q22992：
龔成。 留意到你提到灣仔星街一帶的樓盤，想請問下你對這一段樓盤升值潛力的看法. 因留意到這幾年，即使其他區域的樓價在升的同時
星街一帶的樓盤的升幅都不明顯或者有些樓盤還下跌， 所以想請教一下。例如星街的永星苑的studio單位，如果以600萬買入 （銀行估價差不多600萬）
是否可以期望還有繼續升值的潛力？一般持有多久可以考慮放盤？樓價會不會也像股票一樣合理價的範圍，可以計算？謝謝。
龔成老師：
我對這區是正面的，因為位置近金鐘，同時市區樓供樓有限，一定有相當的價值。
當區樓升幅唔明顯，主要是過往升左好多，以及部分樓樓較舊。
永星苑不差的，但你唔好預佢是大升類，只是平穩增長類，但要提翻，香港樓現時自住價值仍在，但投資價值就唔算高，始終租金回報率較低。你唔好太著重「持有多久可以考慮放盤」，心態應該集中長線。
所有物業都可以估值的，會考慮長遠的租金及升值能力。
Q22993：
老師，想請教一下若聯署局䯠禳年尾收水，理應對股市有負面，長遠對債券有正面影響?
老師，另外想請教一下，3888hk現時因遊戲業務拖累，以及因金山雲管理層不考慮回購即是次是短期的拖累嗎，或是也有影響金山軟件的核心，因遊戲也佔金山軟件49%
龔成老師：
在一般的情況，當聯署局加息，即是無風險利率向上，這樣，市場對債券的要求回報率就會上升，令債券的價格下跌。
金山軟件（3888）業績弱，相信中短期會較一般，要耐心少少守。佢主要從事遊戲研發及提供網絡遊戲、手機遊戲及休閒遊戲服務；提供雲存儲及雲計算服務；設計、研發及銷售推廣辦公軟件產品及服務。
業務有質素，長遠發展力不差，不過擔心股價較為大上大落，現價合理區頂位，唔建議大注投資。
初步睇，企業仍有長線投資價值，但如果你持貨太多，宜減少少，餘下要耐心，企業業務未必會太快好轉。
Q22994：
成哥 點睇3888同1177
最近兩隻都回落了
有潛質長線投資？
謝謝
龔成老師：
金山軟件（3888）主要從事遊戲研發及提供網絡遊戲、手機遊戲及休閒遊戲服務；提供雲存儲及雲計算服務；設計、研發及銷售推廣辦公軟件產品及服務。
業務有質素，長遠發展力不差，不過擔心股價較為大上大落，現價合理區頂位，唔建議大注投資。
這股前景正面的。
中生製藥（1177）是潛力股，人口老化令佢長遠有唔錯的增長，無論是政府投入的行業資源，又或是人民生活質素令可控制資金上升，都令人們更在醫療方面投入更多。
佢已建立一套完整的商業系統，有多個已賺錢的藥品類別，同時毛利高，可以不斷將錢投資在新藥裡，這模式運作很好。
但這類藥物企業，難免有一點風險，因此要久不久檢視，中短問題不用理會，但如果有一些核心性的問題，就要再全面分析。
就這刻來說，這股可以一直持有，因為商業模式理想，高回報，不斷再投資令股東利益快速增長。加上睇翻佢的業績，保持增長，這令企業價值有實際的上升，令股價得以支持。
現價合理區中上部，有貨可持有，分注或月供可以，這股可以長線持有的。
Q22995：
請問龔sir， 2318平保還值得持有或加注嗎？
謝謝
龔成老師：
可以，但就要睇你現時的持貨%，以及現金情況。
中國平安（2318）有質素的，佢有規模，有品牌，近年的發展都不差，不過，股價有時會有少少波動，這主要受投資市場表現影響。
這股有長線投資價值，是平穩增長型，分注投資都可以，留意，同一股不能佔組合比例太過多。
Q22996：
你好 老師
想請問吉利汽車（00175）既前景如何？我較早前$23.10買入，適吾適合長揸？麻煩曬你
龔成老師：
你可長線。
吉利(0175)本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。
長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。
另外，佢早前杭州灣新工廠正式發布純電動新品牌新車「極氪（ＺＥＥＫＲ）００１」，宣布吉利進軍高端電動車。
這些動作不單有利佢有中國發展，同時長遠，可能加快了海外發展速度。因此，這股長遠仍是正面的。
現時價位在合理區中上部至頂，股價波動，有貨可長線。如果現價入貨，小注都得。
Q22997：
阿sir，我想學習下你嘅分析方向，你係基於乜嘢因素而覺得當佢股價回落到180左右開始合理頂？因為當刻個市盈率都超過80。
龔成老師：
潛力股的企業估值會較複雜，唔能夠只睇這刻的市盈率，往往要睇多幾年之後的數據，市盈率、市銷率、EV/EBITDA，同時全部不能單以近期數據分析，要用預估，所以我一般會在計算後，打個折。
Q22998：
多謝回覆，你意思係咪其實我理想組合嗰到都應該調整下，按我嘅分類科技+安碩加埋先應該30%?
如果咁樣配搭係咪會更好：
科技 (700, 1810, 9988) —— 20%
安碩 (3067) —— 10%
醫療 (1833) —— 5%
平穩 (11, 12, 66, 388, 823, 883) —— 30%
盈富 (2800) —— 35%
Thank you very much
又或者：平穩 25% 盈富 40%
龔成老師︰
你這樣年輕，投資上可以較進取，你現時新的組合，係無問題。
除了恆指(0011)只係收息股，另外中海油(0883)質素較中等、平安好醫生(1833- 暫時佔5%係最盡)不確定性高外，建議你3隻長線都不要大注外，其他照按你計劃進行，無大問題。
總之緊記，個別企業和行業，不要佔組合15%和30以上，銀行業更加不要高於組合20%，否則會有過度集中性風險。
在創建組合初期，組合金額較少，出現超標都係可以接受。但長線你要參照這指標，去維持組合的平衡性，才算理想。
現市大市只在合理區，現金佔比重大約3-5成。餘下資金，就等大跌市出現，才加大力度掃貨。
另外，小米(1810)現價只係合理區頂至略貴，入貨時只宜先小注。其他股票都在合理區，已可分注儲貨。
Q22999：
阿sir, 9923前景如何？
龔成老師︰
移卡（9923）是有風險，有潛力的類別。
首先，佢的業務為一站式支付服務，包括基於應用程序的支付服務及傳統支付服務，並支持逾500款發卡機構的移動應用程序，以支付為基礎的科技平台。
其中包括微信支付、支付寶或雲閃付，涵蓋了中國大多數的電子錢包。
另外，佢業務亦有科技賦能商業服務，即是提供商戶ＳａａＳ產品（包括實時庫存管理、消費者關係管理、智能訂單管理及全方位僱員管理）、營銷服務（包括量身定製的精準營銷及客戶忠誠度計劃電子工具），以及金融科技服務（包括助貸服務、委託貸款及保險轉介服務）等增值服務。
佢係2019年才出現輕微盈利，過往都在虧損狀態。而且佢市值有成近140億，以2020年盈利只有逾4億，點都係有點貴。
睇翻佢的財務數據，增長快速，但業務變數大，行業有不確定性，估值上比較難，這一定會令股價上落大，這刻仍唔平，投資值博率只是一般。
你預佢有潛力，同時有風險，如果控制注碼，都可以小注投資。
Q23000：
我早兩日想將2628換3067。但最終冇做到。
如果我買晒1177，可以嗎？
龔成老師︰
任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。
因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。
特別係銀行業，佢營運模式較特別，風險會比一般行業為高。必需堅守30%這個準則，如果可控制在20%以內，會更好。
中生(1177)現價只係合理區中上部，未係大注時候。而且，我唔建議單一企業咁重注，咁做係好危險。
至於中國人壽(2628)質素和增長力係中等，若你係幫你小朋友儲貨，長線其實用安碩恒生科技(3067)會較好。
最理想係加入埋平穩型指數基金，並以之為主力，咁成個平衡性就好好多。
若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。
另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。
由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。