Q27841：

我係初班同學，相問水桶1,2,3，主要用什麼因素去分辨?

龔成老師︰

三個水桶代表三類型的股票。

水桶一是潛力股；水桶二是平穩增值股；水桶三是收息股。

你可以按照自己的人生階段，風險承受能力選擇適合自己的股票。

而分辨它們可以從派息比率，政策等著手。增長類的股票因爲要發展，所以一般保留盈利會較多；收息類的股票偏向不發展，保留盈餘就比較少，主要的派息都會回饋股東。

因此，派息率越低，潛力度就越高。一般潛力股的派息比率少於30%，收息股就高於70%，平穩增值股介乎兩者中間。

但有部份有少少增長力的收息股，派息比率會係近50%。

Q27842：

老師，你好。本人快到60歲。有已供用的自用物業。現在大約$5m退休金。一半已用了買收息股，另一半想買年金。想問問老師買年金是否合適？謝謝老師。

龔成老師︰

我地投資選項，係會因應唔同人生階段而轉變。你已接近退休之年，所以應以收息作為重點。

你現時配置係正確的，但可以再留意多幾點。

1. 除了投入收息資產外，都要保留一定現金，以作不時之需。

2. 可以再加入一些債券(A級)、定息產品，令組合更多元化。

3. 要留意翻，你收息股組合是優質，和有無過度集中問題。(個別企業和行業，不要高於組合15%和30%)

Q27843：

你好，龔成老師，本人35歲，睇左你既文章一段時間，最近想試下開始投資，用月供既型式去買美股指數型ETF。但係有幾個地方唔明想請教，希望得到你既指點，謝謝你

1. 而家用富途，但係美股好似無碎股單，係咪變相唔可以每個月用相同既金額去投資？咁會唔會好大影響？
2. 打算月供$2000一個月買SPLG，每次買得幾股，會唔會因為太少錢，放幾年後都無太大作用？ 龔成老師︰

1. 我無用富途，唔係好知佢運作。而月供，唔係自己買碎股。一般會有一個月供服務，係你每月固定投入相同金額，之後金融機構會自動係指定日期去入貨。

若富途無月供服務，你可以每月自行定一個日子，去完整地一手手咁買，都有平衡價格的效果。

2. SPDR Portfolio S&P 500 ETF(SPLG)本基金所追蹤之指數為S&P 500 Index，有長線月供價值。

資金少，唔代表無作用。財富從來都是一點一點地累積，好似雪球咁愈滾愈大。

現時大市未到平宜區，每月月供之餘，記得留少少錢，等大跌市時可以有資金入平貨。

月供方法，是一個有效方法，幫助初學者在知識不多情況下，進行有限度的財富增值。但長線財富增值要做得好，必需再加強投資知識，提升選股分析和估值能力。令你可以因應市況平貴，自行制定入市策略。

因此，我建議你要多讀投資相關書本、年報，新聞和報讀相關課程。書本上，你可以睇我寫架《80後千萬富翁》、《財務自由行》和《股票勝經》，都適合初學者。

另外，本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資、評估平貴，在投資上已掌握了一定的知識。

Q27844：

龔SIR，你好。本人沒有投資知識，看完你的著作後有了入門投資的想法。有以下問題想請教你！

背景：

36歲已婚暫時無子女，月入$25K，可動用資金有20萬，另外每月可儲蓄$10K，想動用當中的$6000投資月供股票。

想問我應該先分配可動用資金20萬來投資；還是先留住20萬，用每月儲蓄的$6000做月供股票？

我想做一個 平穩增長+潛力股 的組合:

$2000 盈富基金 (2800) <--平穩增長

$2000 VOO <--平穩增長

$2000 潛力股 (騰訊或港交所, 有無其他建議??)

另外亦想試一個 平穩增長+潛力股+收息股 (做防守) 的組合:

$1500 盈富基金 (2800) <--平穩增長

$1500 VOO <--平穩增長

$1000 中銀香港 (2388) <--收息股

$2000 潛力股 (騰訊或港交所, 有無其他建議??)

想問這個組合適合我嗎？還是有其他投資組合或比例分配可建議？

謝謝！

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時36歲去計，應以增值為主，你可以投資「平穏增長股」和「潛力股」。你每月可用$6000做月供。其餘$4000先儲起，用一邊月供一邊儲蓄的策略。

月供選股上，按你計劃配置就可以(2個計劃都得，視乎你是否特別睇好中銀香港2388)。

潛力股，你可以選安碩恒生科技(3067)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、ＧＸ中國電車基金（2845）、三星FANG ETF（2814）、安碩納指一百（2834）。如果有投資美股，可投資QQQ。但佢地波動性和風險會較高，你要自己平衡。

大市現處於合理區中下部，那20萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

但你要明白，月供方法雖然能幫助初學者在知識不多情況下，進行有限度的財富增值。但如果你想財富增值能力進一步提升，就必需加強投資知識，提升選股分析和估值能力。令你可以做到因應市況平貴，自行制定入市策略。

因此，我建議你要多讀投資相關書本、年報，新聞和報讀相關課程。書本上，你可以睇我寫架《80後千萬富翁》、《財務自由行》和《股票勝經》，都適合初學者。

另外，本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資、評估平貴，在投資上已掌握了一定的知識。

Q27845：

老師，近日好多股票不論是傳統股或科技股都大跌，真的非常便宜，如商湯(020), 醫思(2138), 工行(1398), 領展(0823), 中電(002) 及煤氣 (003)等，好似越買越跌，早陣子已

停止再入市了，這些本應是有潛質的股票，但真係唔知方向，我暫停入市做法對嗎？雖然科技股只佔我的投資組合低於3成，但本身有2手騰訊都是$600以上入的，是否應再買入呢

龔成老師︰

你要記住，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

現時全球的股市受到疫情，中美關係，美國加息等因素影響，中短期較弱，大市較爲波動。

現時無論是科技股還是傳統的企業都處於合理區中間或較下的位置，這是長線投資者入市的好機會，但仍然要睇翻企業的質素以及本身的財富分配情況。

商湯集團（0020），香港醫思醫療集團(2138)都是潛力股，但商湯要注意政策上的風險；醫思醫療集團不確定性高，業務有小小風險，所以兩者投資都要控制注碼。

領展(0823)，煤氣 (003)都是平穩增值股，有質素，但煤氣質素較之前弱，有貨可以持有，但不建議太多。

中電(002) 及工行(1398)是理想的收息股，可以長期持有。

如果你現時已經有一定比例的股票，持有現金未嘗不可。但如果你持貨的比例偏小，可以趁機「小注」或「分注」。

我地加注與否，要看投資值博率以及你本身的組合分佈。如果科技股已經佔組合差不多3成(或個股佔15%以上)，接近組合比例上限，不建議加注。

騰訊（0700）有潛力，但因爲政策的監管，中短期間會較弱，你的買入價錢偏貴，但騰訊有質素，持貨可以守，但暫時不建議加注。

投資知識和回報是成正比的，你有時間可以睇我寫架《80後千萬富翁》、《財務自由行》和《股票勝經》，都適合初學者。

Q27846：

阿sir，1）想問之前虛擬貨幣爆破，算唔算泡沫爆破？

2） 如果2800 以人民幣計算，想問會有咩影響

龔成老師︰

都算係，因為上年不少加密資幣和NFT價格，都比元宇宙推到好高。

當突然出現一系列負面因素(如TERRA穏定幣UST脫鈎、令多個平台相繼出現流動性問題)，都助推這些泡沫爆破。

其實加密經濟就算發展至今，好多野都仲係好新，甚至未有一個明確發展的大方向。

雖然，我覺得長線加密經濟、NFT、元宇宙等技術，係有發展潛力。但現時很多不確定性，投資時記得控制好風險和注碼。緊記，投資決策永遠係考慮"風險"為先。

2）會多左大陸資金投資，不過，這基金原理是追蹤恆指，因此，最終仍是睇成份股的表現。

Q27847：

龔老師您好！收到銀行通知 有關00709佐丹奴的收購邀約，想請問你意見。收購人為周大福。"茲通知 佐丹奴國際(股份代號:00709)自願性有條件現金收購，每股收購價:HKD1.88

，截止辦理日期:2022年8月31日。"

謝謝您

龔成老師︰

這是收購人周大福主動向佐丹奴(0709)發出收購邀約，你作爲佐丹奴(0709)的小股東，公司被收購，會發信邀約屬於正常的事。

不過這並不是你一個人的決定，要睇翻大部分股東的意願。你係可以唔接受收購要約，最後就睇大圍意願。

佐丹奴國際（0709）整體質素中等，業務不算差，但增長力不強，因此都不算好。

佢主要從事經營零售及分銷佐丹奴牌子便服與配襯用品。

中短期相信偏弱，增長力不強，主力是收息。

Q27848：

老師，點睇2007碧桂園？值博率高嗎？

龔成老師︰

因為政策監管，加上内房高負債的問題，内房，物業管理類別股中短期會較弱，質素中等。

碧桂園（2007）質素中等，本身有品牌，有規模。但高負債，故有一定風險。

現時股價合理，你投資不是不可，但要明白，由於佢負債較多，令佢估值不會太高，但這並不代表平。你投資可以，不過只宜小注（同時，你一定要明白當中的風險）。

Q27849：

成哥，我想問00916龍源電力你有咩睇法，我見到你過往有介紹過，但已經係2018年既事

龔成老師︰

我介紹龍源（0916）的時候(詳情可看《50值博倍升股》)，它當時還沒有被市場發現，果時投資，值博率高，現時市場已經發現此股，值博率就減少，但仍然有質素。

龍源電力（0916）有質素，這股有長線投資的價值。

佢係中國發展風力發電業務，收入大部分來自銷售風電場及火電廠所發的電力，而有關電力銷售主要倚賴淨售電量及上網電價。

旗下客戶為風電場及火電廠連網的各地方電網公司。

過往業務發展不差，生意與盈利保持增長，不過股價就有少少波動，現價仍算合理。但就要留意股價上落風險。這股可長線。

Q27850：

龔成老師 你好。我剛剛看到你講 困難的片 我正正就是在困難中

我本身是做mpf 剛剛有promotion offer, 不過是做orso 既範疇

我想你應該知道orso基本上fade out中 而我而家既mpf工作可以話非常安定

我既兩難係 升職加薪跳過去一條快沉既船 定繼續留在這裏再等機會？

我不年輕 所以會怕 怕新地方適應不了 怕business 萎縮炒人 但不跳過去又怕冇機會 好似有錢都唔去執甘 會唔會好蠢

好多人叫我take左offer先 之後再搵 好似輪迴甘 好可怕

我好痛苦 唔知點算好 為錢而過去係米短視? 如果我係李加誠 巴菲特 佢地會點？ 佢地一定會走 因為佢地唔怕

你一直講睇公司要有前景 我一直問究竟睇前景定現在重要？ fyi 新offer加我21%人工 重賞之下 必有勇夫 我究竟要呀要做呢個勇夫? 定愚夫?

好難 可以救救我嗎？謝謝你

龔成老師︰

你將問題嚴重同複雜化了，放輕鬆心情，會容易找到答案。

有關選擇的問題，其實無一定的答案，你唔好以對錯來解讀就會比較容易，只要你問問自己的内心。

首先，有機會升職又或者嘗試不同的範疇，這是對自己的肯定，有offer是好事。

你不應該因爲覺得自己年紀大就放棄嘗試，適應不了。如果生意萎縮，爲何現時要請你？所以，我唔建議因為年紀，就去放棄一個機會。

不過，我地行動前，都要從長線去考慮。你自己身在市場，你一定比我更清楚ORSO市場狀況，係相對MPF淡好多，但唔代表無晒市場需求。

從長線發展分析，我覺得保留係MPF範疇，未來發展空間和機會，相信會較多。

但現時你有一個升職OFFER，你可以因應自己財務(會唔會好等錢洗)和事業發展狀況(轉左去ORSO，係唔係反手就做唔翻MPF架工 / 或者學多樣野，再你升上更高位置會有幫助等)，去作最終考量。

選擇工作的時候，應該綜合多個因素去選擇，不要但看一點(例如錢)，不要同別人比較，如果是李加誠，巴菲特，他們還需要搵工嗎，所以，目前你要專注自己的問題，認真思考自己真正想要什麼。