Q41001：
老師，我投資太心急要如何改善？Thx
龔成老師：
第一，不要經常睇股價，手機的睇股價APP，甚至可以刪去。
第二，設定投資策略。
我20年前都是投資好心急的，一時衡動買貨賣貨，做錯決定，之後我明白問題所在，用左個方法。
就是「設定策略」，每次在買股票前，我都會寫一份報告比自己睇，寫該股的質素、我打算買入的金額、投資策略等，這方法可以防止我一時衡動的問題！
同時也可以確保，我真正了解自己所買入的股票。
自從用了這方法，我由當年輸錢較多，變成賺錢較多！
Q41002：
9911，2168，1610前景如何成老師
龔成老師︰
赤子城科技（9911）主要從事開發一系列移動應用程式、健身應用程式、遊戲應用程式等。
佢長遠不是無發展，但同時面對一定風險。
業務上，係有吸引力的，但就仍未算好穩定，盈利上落較大，但長遠增長力是有的，加上業務規模細，發展力強，不過風險都會有。質素中等。
現價合理區，因為監管等風險，這股不宜持有太多，但不是劣質的。
京東物流（2618）都有質素的。
京東物流係中國領先的技術驅動的供應鏈解決方案及物流服務商。通過科技賦能提供全方位的覆蓋各個業務領域的供應鏈解決方案和優質物流服務，從倉儲到配送，從製造端到終端客戶，涵蓋普通和特殊物品。
企業有質素，長遠發展相信正面。但股價波動，要控制注碼。
中糧家佳康（1610）主要從事飼料生產及生豬養殖、生產及銷售生鮮豬肉及肉製品（以「家佳康」和「萬威客」品牌出售）等。
佢亦於家佳康專賣店及透過大型電商營運商銷售部分產品。
整體質素中等，唔算差，但又唔算好好，佢會受肉價的上落影響，影響左盈利，令佢盈利上落大，有試過出現虧損。因此，佢會比較被動。
現價算是合理，但質素未算好高。長遠發展都有，但預佢中短期波動，這類股又唔太值得持有好多。
Q41003：
請問3918，有14500股平均價是8.9未來應如何是好，還有200新濠，20000股，平均價7.05
只有呢兩隻在組合中一直沒有氣色，應去或留
可以幫忙解答一吓嗎？謝謝你
（附上組合相片）
龔成老師︰
首先你要明白一個概念，我地持有一隻股票與否，關鍵位是企業質素、前景，不要被買入價影響。
因為買入價已經係一個沉沒成本，你唔可當佢係一個神聖價位，因為已經無參考價值。未來持有與否，係應該睇翻企業本身。
如果企業質素轉差，就要賣出。如果企業某些核心優勢減少左，就有機會減持，因此，我地要分析企業的核心因素，一些長期的賺錢能力，有無改變。
金界控股（3918）經過疫情後，業務有一定的影響，同時回勇的力度較慢。
金界過往的旅客都較多是中國旅客，因此當中國經濟與旅遊業有點弱，都會對這企業有影響，雖然整體質素不算核心地改變，但都有少少減弱情況。加上這企業始終是新興市場，投資者要明白新興市場的風險，小心控制注碼。
集團主要業務為管理及經營柬埔寨首都金邊持牌賭場，獲柬埔寨政府發出賭場牌照授權經營該賭場，於2065年屆滿，至2035年有獨家經營權。
金界於1995年開始經營博彩業務，可利用賭場牌照全年在指定範圍內24小時經營賭場業務，且並無賭場所在位置、賭場規模、賭場經營地區、賭桌數目及博彩種類的限制。
賭場業務於陸上酒店娛樂城ＮａｇａＷｏｒｌｄ，鄰近金邊Ｓｉｓｏｗａｔｈ碼頭的河畔地區，提供博彩、娛樂及康樂設施。加上持續發展酒店群、娛樂場所及公寓等。
但要留意，始終位於新興市場，股價較為波動。
現時企業身處的柬埔寨市場旅遊業，正慢慢復蘇，但面對中國經濟情況，回勇力度較慢，同時投資者要明白，企業在新興市場，風險較高，這股只宜小注投資。
新濠國際發展（0200）業務都不差。
佢業務主要分為以下兩方面：
（１）消閒及娛樂業務：主要包括提供餐飲及相關服務。
（２）物業及其他投資業務：主要包括投資物業、可供出售投資、應收聯營公司款項及相關分類銀行結餘，其收取股息收入、利息收入及物業租金收入。
佢投資價值仍在，不過就不是高增長股，澳門發展最高增長年期過去，之後是平穩增長模式，相信新濠國際有平穩增長的能力，現價合理，分注投資，長線持有，可以。
長遠來說，澳門賭業股仍是有質素的類別，不過，增長力已不及過往年代。
資價值仍在，不過就不是高增長股，相信有平穩增長的能力，現價合理，長線持有，可以。
至於組合，你持有潛力股為主，就算當你係年青人，又有一定投資經驗，整體風險都係高。建議減持部份，換去平穏增長股，會對你較有利。
平穩增值股，指數基金由於是一個組合，因此在平衡風險方面較好，例如美股追蹤標普500指數的（VOO）、追蹤富時全球股市指數（VT）、追蹤港股的盈富（2800）。
另外再加其他個股：美股如巴郡（BRK.B）、蘋果公司（AAPL）、迪士尼（DIS）、Costco好市多（COST）、麥當勞（MCD）、可樂（KO）、港股如中銀（2388）、港鐵（0066）、港交所（0388）、長建（1038）等，你可以了解下，並從中選股。
Q41004：
老師，上網聽人講澳門賭股好難返生，因為的確環境上轉變左，例如中國政策，打貪呢啲都好大影響，佢話澳門賭場最由始至終最重要嘅收益係貴賓廳，
而家因為打貪各方面嘅原因中國內地嘅資金好難流動，走唔到，而呢啲原因好似唔係平時我地所講優質股短期既壞消息，影響等等，
因為打貪呢啲正常係唔會變，反而你話科網嗰啲監管係有機會放鬆，請問老師點睇？謝謝你，感激不盡！
龔成老師︰
其實打貪係有影響，不過最重要係整體經濟唔好，而澳門博彩主要客戶來自中國，所以難免會弱。
不過，長線中國經濟唔會一路差，始終會復常。所以，現在反而有一定值搏率。
當然，不確定性同樣存在(例如政策、復常時間、消費者取態等)。
總括而言，博彩業唔係無晒投資價值，但的確比以往弱左，不宜太進取。
Q41005：
老師，盈富基金現時可以沽嗎？16元買
龔成老師：
如果你持貨多，可以減部分，留部分。如果持貨適量，而你本身都不是短線，建議全部長線，現時盈富在合理水平，未貴，可以耐心等更大的收成。
Q41006：
老師你好～
本人38歲，太太35歲～兩名小孩分別八歲和三歲～
夫妻人工收入大約85000
不用供樓～現有大約80萬現金20萬股票（包括8手小米，1手新鴻基地產，盈富基金3手，建設銀行7手）現在想留40萬現金備用，40萬買入股票，希望小朋友升中的時候更有能力供他去外國讀書～想問下老師我應該點樣利用現在嘅資金？
龔成老師︰
小朋友由於可投資時間長，策略上十分簡單。你可以儲盈富(2800)，佢係包括幾十間質素不錯上市公司股票的組合，有一定增長力。
若你想增長力較高，可以儲安碩恒生科技(3067)。但此股波動性會較大，要睇翻你自已風險承受能力。
基本上，以你小朋友年紀計，持有以上股票都係可以，但你明白當中風險。
另外，你可以考慮埋美股指數ETF，令組合分散風險能力更高。VOO和QQQ，前者追蹤標普500，算平穏增長型，類似盈富。QQQ追蹤納斯達克100指數，風險會較高，風險度近似3067。
你可以將這$40萬分注買入上述股票儲貨，現時恆指處於合理區，可以分注慢慢儲貨；美股現時較貴，可以先買第一注，等有明顯回調才正式買入。
Q41007：
咁有無咩有質素的股票可以入？
Qqq Voo 衣家係米好高位 可以入手嗎
龔成老師︰
現時美股處於合理區較上部，甚至頂部；港股處於合理區，港股的值博率會較高。
如果不懂選股的話，可以考慮追蹤恆指的ETF盈富（2800）或追蹤恆生科技指數之表現。
而恆生科技指數(好似3067)，是追蹤一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。
不過，這科技類ETF上落較大，投資的時候要分注和控制注碼。
美股（VOO)和（QQQ)都是有長線投資價值的選擇，但現時美股處於較高的位置，你仍然可以投資，但就建議在此刻大手買入；可以先買第一注，等回調的時候再正式買入。
Q41008：
你出咁多本邊，想買一，兩本睇下先邊本推介
另外，我最近有興趣認購證，之前未試過
想問問認購證同牛證係咪同一樣野？謝謝
龔成老師︰
你可首先睇：
《圖解股票小百科》
《圖解美股小百科》
《80後千萬富翁》
《財務自由行》
之後再睇其他。
窩輪是一種期權合約，投資者買入認購證（call輪）又或者認沽證（put輪）之後，就擁有喺指定時間內以指定價格買入或者賣出相關資產既權利。
窩輪同牛熊證一樣，都是在合約的指定時間內交易，但不同之處在於，牛熊證設有「強制收回機制」，即使未到到期日，一旦相關資產價格到達回收價，都要即時結算，停止交易，就算之後相關資產價格再變動都無用，即俗稱的「冇仇報」。
而窩輪就無「強制收回機制」，就算正股價格大幅變動，不論是否到達行使價，投資者都可以選擇在到期日或之前交易與否。
不過，我唔建議你用牛熊證或者輪作為工具，因為投資唔係估走勢，而係買入企業。買入一間優質的公司，長線持有等佢成長，以達至財富增值效益。
其實我20年前，都是短炒者，技術分析者，用左幾年，輸足幾年，之後長線投資，就開始不斷賺錢。
其實我當時，用左幾年時間去學分析技術，我當時不斷睇書、上堂學短炒，但最後都是輸，可能是我能力不足吧。
但我之後做銀行同證券行，見大部分輸錢的客，都是偏向短炒的。
當然，你問我有無人贏錢，是有的。但就我觀察，長線投資贏錢的人，比短炒的較多。
另外，如果你分析全球真正賺錢的投資者、經金經理，佢地都無人短炒，都是長線投資的，巴菲特都是反對短炒的，佢都唔用技術分析。
因此，我相信長線投資，是真正助我地贏錢的方法。
Q41009：
請問可否分析AI科技股
龔成老師︰
其實AI有好多相關企業，分布係不同的範疇。不過，具體講係好複雜，因為唔同架企業，係AI架業務和應用程度都所不同。
[部份可考慮AI企業，不過留意近期佢地都升左唔少，只宜分注慢慢儲貨。]
上游設計晶片相關︰NVIDIA(NVDA)、AMD、博通(AVGO)
中游生產晶片相關︰ASML、台積電(TSM)、中芯(0981)
下游提供或受惠於AI應用︰META、Microsoft、Google、AMZN、PLTR、9988、1810、1211。
你可以因應自己認知和想法，去到決定投資邊樣企業。
如果你無太多想法，純粹睇好AI發展，可以分注咁儲佢架ETF。但始終AI發展潛力係有，但不確定性都高，所以不能過於進取。
[部份AI相關ETF]
(i) Global X Robotics & Artificial Intelligence ETF(BOTZ)主要投資於可能從機器人技術和人工智能 (AI)利用中受益的公司，包括那些涉及工業機器人和自動化、非工業機器人和自動駕駛汽車。
前十大持股包括NVIDIA(NVDA)、直覺外科(ISRG)、KEYENCE CORP(6861.JP)、ABB LTD(ABBN)等大型企業。
此股有一定投資價值，但不確定性高，市場對AI未來發展其實未有具體的想法，所以有少少係"估願景"。
另外，要留意多一點，就是此ETF前5大股票佔去整個組合4成半。所以，這5間公司表現，好直接影響到ETF的升跌。
總括而言，你投資係可以，但不宜過份進取。
(ii) iShares未來人工智慧與科技ETF(ARTY)，基金是追蹤Morningstar Global Artificial Intelligence Select Index。
前十大持股包括NVIDIA、AVGO、META、AMD、Google等大型企業。
此股有一定投資價值，但不確定性高。投資係可以，建議用分注去慢慢儲貨，同時控制注碼。
Q41010：
龔成老師，您好。
我約兩年前報讀過老師的股票班，但由於自己之前蝕到入肉沒有本錢，所以即使上完股票班後，也沒有再買過股票，直頭連投資戶口也不敢去看。
最近，我之前買落的小米（1810）終於回到家鄉，而且近日更創歷史新高，才令我鼓起勇氣去看一看戶口的情況，果然確實慘不忍睹，多隻股票也蝕了八成甚至九成。我想，是時候要處理和面對這些股票了，只是如果現在賣掉的話，我同Total Loss無乜分別，所以想請教一下你對我的持倉有甚麼看法？
1299（買入價$102）
1772（買入價$84）
1801（買入價$100.4）
1810（買入價$33.4）
2013（買入價$27.45）
2800（買入價$26.62）
3868（買入價$5.84）
6060（買入價$60.9）
6690（買入價$31.9）
1725 （買入價$39）
7226 （買入價$39）
相信老師睇到以上的持倉，都明白到我的慘況，全部都係2021年初買落的蟹貨。老實講，我對股票及投資方面的領悟力唔高，我究竟同呢堆股票鬥長命，等回到家鄉的一天，還是長痛不如短痛，賣出並騰出資金好呢？
另外，我想幫兩個小朋友這些年來的利是錢用來投資，本金大約每人12萬，目的是想他們將來可以利用這筆錢去進修、創業、實現夢想等等。由於是小朋友的錢，我不想做高風險的投資，但求他們成年後取回這筆錢時，可以比起放進兒童銀行戶口多一些。請問老師除了做存款定期外，還有甚麼好建議呢？
期待老師的回覆，希望老師事事順利、持倉股票股價步步高陞！
龔成老師︰
其實股票班當中核心，就係教大家"選優質股"和"估值"，去幫大家避開絕大部份輸錢的可能性(買錯劣質股、組合配置出問題、或者買貴左而輸錢)。
所以，建議你用翻課堂學到的知識，去嘗試了解翻，到底是出了什麼問題引致大幅虧損。
如果已經唔記得課堂教架野，可以睇翻NOTES。若果都無印象，建議你認正去再上多次堂。因為現時大市雖然升左唔少，其實都仲係合理區中下部，係一個唔錯架部署機會。
至於你組合，持股唔係無投資價值。不過，主要問題係買得太貴(估值出錯)，同埋組合本身持股主要係潛力股，令到組合風險過高(組合配置出問題)。
因為潛力股當發展理想，固然係有好高增長力。但當發展不似預期，或者大環境轉弱，佢可以睇得好勁。
另外，唔好開槓桿(即係買7226而類股票)，風險好高，會倍大回報之餘，都會倍大左你架損失。
因此，未來時間你要從這2點，去調整自己組合和加強知識。
現時你要做的事情，除了要加強自己知識之外，就是調整組合。
將當中潛力股，轉移部份至平穏增長股，去將組合風險調整至較合理水平。另外，長線建議"慢慢"加入一些美股，去加強地區平衡性。
以下是一些具質素的平穏增長股，你可以參考下︰
指數基金由於是一個組合，因此在平衡風險方面較好，例如美股追蹤標普500指數的（VOO）、追蹤富時全球股市指數（VT）、追蹤港股的盈富（2800）。
另外再加其他個股：美股如巴郡（BRK.B）、蘋果公司（AAPL）、迪士尼（DIS）、Costco好市多（COST）、麥當勞（MCD）、可樂（KO）、港股如中銀（2388）、港鐵（0066）、港交所（0388）、長建（1038）等，你可以了解下，並從中選股。
至於小朋友，由於可投資時間長，策略上十分簡單。你可以儲盈富(2800)，佢係包括數十間質素不錯上市公司股票的組合，有一定增長力。
若你想增長力較高，可以儲安碩恒生科技(3067)。但此股波動性會較大，要睇翻你自已風險承受能力。
另外，你可以考慮埋美股指數ETF，令組合分散風險能力更高。VOO和QQQ，前者追蹤標普500，算平穏增長型，類似盈富。QQQ追蹤納斯達克100指數，風險會較高，風險度近似3067。
操作上，建議你用月供模式儲貨。每月大約用一半儲蓄，去做月供，餘下一半就先儲起，去等大跌市機會。如果你覺得太複雜，可以每月全部儲蓄都做月供，都係可以。
記住，就算強如股神巴菲特，都會做錯投資決定。最重要係吸收教訓和盡早出作調整，唔好比佢一錯再錯，咁長線表現自己會慢慢轉好。
加油!!!