Q39011：

龔成老師，你好啊！之前買了港交所，266元入貨，個市最近升之餘，是否可以選擇繼續持有呢？謝謝

龔成老師：

港交所（0388）有質素，獨市生意，加上香港的金融中心角色，這企業有長線投資價值。多年來的生意與盈利都有理想增長，派息不差。

大方向上，你可長線，只要貨不過多就無問題。

當然，如果你貨多，可考慮賣部分，留部分。

但要留意，由於這股的盈利會受股市成交影響，因此股價都會有影響。

近年的成交弱，令這股近年股價較一般。到最近，港股成交好轉，這股股價向上。所以，你會見到佢股價十分波動。

投資者分析港股較長的年期，都會發現，成交有一段時間會較多，又有一段時間會較少，同樣，公司上市會睇市況，當市況較旺時上市公司數目較多，市況靜時上市公司數目較少，投資者一定要明白週期性的特點。

所以，你要平常心面對短期股價，長線持有。

Q39012：

成哥你好

我隻769仲仍然一直坐艇…

平均價1.4

你點睇依隻會有機會升嗎

仲有0003都好似無升覆

龔成老師：

每間企業的業務情況不同的。

中國稀土（0769）質素一般般。

炒作多過實際，過往賺錢能力不高，業務波動，間中出現虧損，投資價值唔算高。

你不要再加注，有機會反彈減持部分。

至於煤氣（0003）雖然增長慢左，但仍有質素，只要貨不過多，可以長線。

煤氣（0003）增長力比過往減少左，但不是無質素的。

雖然近年業務較一般，但煤氣近年在中國的投資，仍是保持進行的，數年前，煤氣在中國於擁有的項目有500個，到現時，大約700個。

每年都有幾十億，這些投資不會好快就見到收成，但這企業就仍是發展中的，但要時間才能將當中的價值顯現出來。

Q39013：

早晨，sir

我前日3.71重倉買咗1055南航

唸住受惠黃金周，而且出現黃金交叉，再且我有做功課，南航C919開始商業營運，點解買咗兩日都未升過，系咁跌，我是米應該放棄？

龔成老師：

第一，每隻股票有自己的業務情況，不一定跟大市的。

第二，你不要因短期表現，就影響投資決定，你最重要睇「企業業務」，而不是短期股價。

中國南方航空股份（1055）算中等質素。

中國開始放鬆防疫，會對這股有利，基本面慢慢向好，但都要留意，航空企業的賺錢能力唔強，加上都有風險，因為好受油價、對沖等因素影響，1055長遠仍會面對這情況。

雖然本身都有一些業務上的質素，但企業長期價值增長有限，行業有風險。因此投資價值只是中等，現價合理，但只建議分注小注投資，不建議太過大注。

如果你持貨不多，可持有，但之後的發展，仍要睇中國經濟，自身業務情況。

Q39014：

龔老師，今日鼓起勇氣想向你求助，因近幾年入左好多隻股票，總值大約$3百幾萬依家已經蝕咗$百幾萬，大部分都蝕咗好多已經唔知可以放棄邊啲幾隻好

老師可唔可以幫忙分析下，邊啲可以繼續持有，邊啲要賣出？心灰意冷的忠粉上

龔成老師︰

你可以比我睇下，等我比D建議你。

你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

現時大市受通脹、加息、戰事、中國房產、疫情等因素影響，中短期會較弱，但只要企業有質素，長線一定會回歸合理值。

所以，重點唔係而一刻佢賺定蝕，而係佢地仲有無長線投資價值。

Q39015：

請問除了建行，有無另一啲收息也不錯？🙏

謝謝老師

龔成老師︰

以下是有一些具質素的收息股，現價合理可分注。

目標是5%以上股息率的收息股，例如高息基金（3110）、港燈（2638）、深高速（0548）、香港電訊（6823）、工行（1398）、置富（0778）等都可以，你可以了解下，並從中選股。由於收息股股價都會有上落，因此要控制每一隻佔股票組合的比例，不能超15%，最好在10%以下，而3110由於是一個組合，比例可比個股高。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、偉易達（0303）（記住，股價略波動，不能太過大注）。

Q39016：

龔sir:請問國內點名提到刺激消費，未有實際的成效前，一眾消費股即漲幾十%，是否反應過度？不宜追？還是可以入定？

九毛九、海底撈、李寧、安踏、蒙牛，哪一個較好？

11月基金公司粉飾廚窗、明年一月正好是農歷新年，大市應平穩繼續向上？接下來哪個板塊最值得關注投資？

龔成老師︰

股市一向比實體經濟，行先6-18個月。

其實好多政策，唔可以分開睇，因為D因素係環環相扣。現時推出的政策係利好，但能否全面滲透至各個經濟層面，係一定要時間驗證。

而消費股升咁多，主要係市場睇好政策發展，所以提前升。故現時股價，有少少係反映對政策的預期。若果最終發展不似預期，係會有較大回調。

不過，暫時所見，我覺得都係偏正面。

雖然不少消費股近日大升，但大體上都在合理區內，因為以往股價跌到比較低賤。

至於質素上，5隻都有，但安踏(2020)和蒙牛(2319)會相對較好。前者較具規模和品牌，後者較具民生性。

而粉飾廚窗、新年而D短期因素，我係唔會考慮。只會從企業、行業、財務狀況等，去作出投資判斷。

Q39017：

阿sir你好, 我未報股票班，平時都好懶無睇年報仔細分析。

只係簡單睇下PE, 同埋HSI高低去買入藍籌儲貨

港股投資尚可，MPF回報好好, 因為我會高位轉保守基金lock profit再低位all in買港股ETF

近年想買美股但吾識玩…覺得佢吾係一手一手買上落好大，經常股票app news都上落10%, 請問買美股要點玩？

目前美股只打算係Nas同埋SPI跌好多先再買,Nvidia呢d從來吾敢入手

真心求教

龔成老師︰

其實港股美股都係一樣，我地投資只會睇長線質素，從企業、行業、財務狀況等，去作出投資判斷。

你現時用架模式，雖然好似賺到錢，但難保之後會出現問題。因為只純睇PE，係無可能判斷到佢質素，同埋"真正"平貴度。而恆指高低，唔定等同於個股股價的高低。所以你而套模式，係好危險。

我建議你真係相做好投資，要了解翻到底乜野係價值投資。

建議你要多讀投資相關書本、年報，新聞和報讀相關課程。書本上，你可以睇我寫架《圖解股票小百科》、《80後千萬富翁》和《財務自由行》，都適合初學者。

我Youtube Channel都會不時分享一些投資技巧和知識，你都可以睇下。

https://www.youtube.com/@user-rw4st4yg5v

如果你想入手美股，建議先從指數ETF入手，例如追蹤S&P500架VOO。用分注模式去慢慢儲貨，平衡風險。

到你投資知識有所提升，先考慮個股，同埋自行定平貴下去入市。

Q39018：

呀sir，如果依加30歲買名牌老屋苑美孚新村，樓齡已經高達50年，我當日後到50歲，樓換樓，層樓既價值會唔會有太影響？市場對樓齡看法又如何？

龔成老師︰

如果樓齡較高，係出售的時候，價值係會有所影響。

主要係因為新的買家較難承造長期按揭，所以投資價值會扣左分。

不過，美孚新村係藍籌屋苑，受影響幅度會較一般物業為低。不過，如果而度真係唔適合你長線生活，建議盡早安排換樓計劃，會較為有利。

Q39019：

想問如果在强積金戶口

每月多加1千至2千 作自願性供款？ 比起作為月供股票之用 ？ 賺息及作投資？

長遠來說 那種對退休有保障？

龔成老師︰

MPF其實係買基金，基金係會有管理費，長線會蠶食你投資回報。

所以，從長線投資角度，我會偏向建議買股票，例如指數ETF，整體成本會低D。

而且，MPF會限制你應用，令到資金彈性弱左。

Q39020：

想仔細地再問下意見

我有一物業 係已放租, 政府每年都收我10000幾物業税

我之前上過你既股票班, 正打算買d收息股先(因為我從未買過)

我有諗過買年金 主要係想用黎扣税 因為我每年要交個幾月人工既税, 如果年金純係為儲蓄, 我每個月都會儲錢

唔知我既情況 有冇需要買年金呢

龔成老師︰

其實收息股和年金是否適合你，主要睇你年紀。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

若果你係接近/已到退休之年，收息股和年金係適合你，因為佢地主要係用來創造被動現金流，去支援你退休生活。

另外，你可以考慮在被動收入組合中，加入一些債券(A級)、定息產品，去令佢更多元化。同時間，保留一定現金，以備不時之需，咁就可以。

但相反如果你係較年青或者只係中年，這些選項就過於保守，長線對你財富增值會不利。