Q39131：

龔sir, 你好, 之前一直都以內銀收息股為主, 定期為副的儲蓄方式, 在黃金周前突然想清倉, 所以在港股大升前已全面清倉套現, 後來眼見股市大升就後悔, 但唔敢再入, 驚高追, 但有日日都睇住個市, 心情十分複雜, 昨天港股大幅回調, 更不敢入市, 因為未知前景, 今日個市又好詭異, 內心也很猶豫不安.

我的情況是澳門人37歲已婚, 手上約有190萬港幣現金，有買醫療保險，沒打算生育, 兩人都是普通專業人士, 二人平均月入約6萬, 不用供樓也不用租樓, 沒有養車, 每月支出能控制高低.

現想請教下︰我太太較為進取希望再進入股市獲利高於定期, 但我個人係想過簡單平靜的生活, 想每個月的一半以上工資都存定期, 這樣雖然增速慢, 但勝在夠穩定, 心情也不會受股市升跌影響, 你認為這樣好嗎？

龔成老師︰

好多人會經常買入賣出，但這是錯的方法！我地應該建立一個長期的財富組合，雖然都有機會賣出，但不是短期的。

其實你年紀算偏年青，我都建議你先以增值為主。所以，之前你用架"內銀收息股為主, 定期為副的儲蓄方式"，就過於保守。

不過，我都明白你架想法。其實你同你太太的投資策略，無話邊個係絕對正確或者錯。

我建議取一個平衡點，以"平穏增長股 + 收息股 + 定期"去創建一個穏定增長架組合。

"收息股"雖然增值能力不高，但勝在業務和派息穏定。股價都有波動，但長線計唔會太高。

而"平穏增長股"有若干增長力，同時會有一定派息，不過股價會比收息股波動。

如果你地決定進取少少，咁就用"平穏增長股"為主，再輔以"收息股 + 定期"。相反，你地決定穏陣D，咁就用"收息股 + 定期"為主，再加少少"平穏增長股"。

希望而個計劃，可以平衡到你地2人架需要。

入市策略上，我建議用月供，去平衡買貴貨問題。(因為睇你架操作，好明顯你架投資知識好有限。)

現在你每月先用5成儲蓄做月供。其餘先儲起，用一邊月供一邊儲蓄的策略。

現時大市大致算在合理區中下部(港股)和上部(美股)，你現有190萬資金可以先投入50萬，用"分注"形式，慢慢買貨。餘下資金和每月所儲到的資金，就等大市出現一定程度的下跌，才大力度掃貨，然後長線投資。

記住，唔好見個市有D波動，就行沽貨或者調整月供金額，因為咁係會嚴重影響你架長線表現。我地只會係企業核心質素變差，或者去到貴，先至會調整。

以下是一些相關優質股，你可以參考下︰

平穩增值股，指數基金由於是一個組合，因此在平衡風險方面較好，例如美股追蹤標普500指數的（VOO）、追蹤富時全球股市指數（VT）、追蹤港股的盈富（2800）。

另外再加其他個股：美股如巴郡（BRK.B）、蘋果公司（AAPL）、迪士尼（DIS）、Costco好市多（COST）、麥當勞（MCD）、可樂（KO）、港股如中銀（2388）、港鐵（0066）、港交所（0388）、長建（1038）等，你可以了解下，並從中選股。

你可以建立一個收息股的組合，目標是5%以上股息率的收息股，例如高息基金（3110）、港燈（2638）、深高速（0548）、香港電訊（6823）、工行（1398）、置富（0778）等都可以，你可以了解下，並從中選股。由於收息股股價都會有上落，因此要控制每一隻佔股票組合的比例，不能超15%，最好在10%以下，而3110由於是一個組合，比例可比個股高。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、偉易達（0303）（記住，股價略波動，不能太過大注）。

最後，我唔肯定你地長線有無置業需要，如果有都緊記盡早規劃。

Q39132：

老師你好！我準備退休，我現在組合有686、836、435、1359、1830、這個組合可以嗎

龔成老師︰

如果你準備退休，除左0435之外，其餘都係唔算太合適。

華潤電力（0836）有質素的，不過業務波動，所以都要控制好注碼。

中國信達（1359）質素只是一般，收息係可以，但只宜小注。

完美醫療(1830)雖然有質素，但風險度略高，唔適合你年紀。

北京能源國際（0686）過往盈利好波動，有時出現虧損，加上核數師意見出現「保留意見」，對盤數有少少疑問，因此，不太建議投資這股。

總括而言，我建議你集中翻係我上次建議你架收息股度(0435都可以)。至於1359和0836，長線只宜持有少少。1830和0686建議長線要沽出換碼。

Q39133：

多謝回覆，我在賣出的計劃也有調整過。希望你能幫我看看想賣出的目標價是否合適？

另外，在10月5日發給你的未來投資方案，新加了巴郡（BRK.B）。賣出的計劃再發給你看

（20241005）賣出計劃：

2601 600股 $55

2601 800股 $60

2601 800股 $65

2601 800股 $68

2800 1500股 $26

2800 3000股 $28

2800 3000股 $29

388 100股 $450

388 200股 $500

388 300股 $550

2318 500股 $80

2318 1000股 $85

2318 1000股 $90

9988 500股 $200

144 2000股 $18

144 2000股 $19

144 3000股 $20

144 4000股 $22

144 4000股 $23

3067 1000股 $15

3067 1000股 $16

3067 1000股 $17

66 500股 $46

66 500股 $47

66 500股 $48

麻煩晒

龔成老師︰

雖然以現時狀態計，賣出都算合理，係開始有唔平架水平。

但係我原則上，唔太建議你現時咁快設定好個賣出價。

近年經濟開始有少少復甦跡象，而且政策今年內都變得好快。所以，佢地架賺錢能力有機會會變(可能好左，或差左)，最好係到時再升多D，去到大市都唔平架時候，去再作判斷。

因為今日貴架水平，過幾年去到將來經濟全面向好，或者企業賺錢能力有所提升，就有機會由貴變合理，變相你就早沽左。

Q39134：

老師，你好，我最近有開始留意樓市資訊, 因為將來有自住需要, 想盡快買到樓

睇啱一個一房，半新樓單位, 282呎250萬

本身人工唔高, 如果借7成，首期俾大概75萬, 每月供款少啲，可以負擔到

但假如現時買樓, 差不多要賣走大部分股票, 咁我係咪應該儲多, 一两年資金，再考慮買樓, 會比較好？

謝謝

龔成老師︰

買樓自住其實只要符合兩個原則：「供得起」+「物業滿足未來10-20年的住屋需求」。

現時香港的樓價已經從高位回落不少，處於合理區的中間左右，如果你想買樓自住，只要符合以上的兩個原則就可以。

港股現時處於合理區的較低位置，樓市處於合理區的中間。如果以投資值博率而言，港股會較高。

我建議你，睇下自己置業有無迫切性。如果無，你可以累積下資金先。因為要沽清股票，始終唔係咁理想。當然，如果有迫切性，而又附合上述2個條件，都可以進行置業。

另外，如果你係諗住之後細屋換大屋，仲要考慮少少而個細物業架投資價值。因為唔夠300呎，本身投資價值就已經低少少。到時你換樓時，有機會細物業務增長不及大市，變相令換屋資金增加。

Q39135：

大師267，2628算同類型嗎？

邊隻較值博？

大牛市下，2628有可觀回報嗎？

龔成老師︰

業務不同的，但如果你以增長力去分，2者都係屬於平穏增長股。但嚴格來講，業務性質係好唔同。

中信股份（0267）係綜合企業，有多項業務：

（１）金融業分部提供銀行、信託、資產管理、證券和保險等服務。

（２）製造業分部從事生產和銷售特殊鋼、重型機械及鋁輪轂等。

（３）資源能業源分部從事原油、煤炭和鐵礦石在內的資源及能源產品的開採、加工及貿易等業務。

（４）工程承包分部為基礎設施、房地產和工業項目等提供承包和設計服務。

（５）房地產業在中國內地主要從事綜合體和商業地產項目的開發和管理以及城市更新和發展業務。

雖然業務多，但不算做得好好，每項業務的發展力都不強，整體質素只是一般。

現時股價有合理區中下部，投資價值不是無，但這股增長力始終一般。收息可以，但對股價唔好有太大期望。

中國人壽（2628）近年表現較弱，從業務上，並不是完全負面的，但增長的確有減慢情況。

要等中國經濟及資產質素較正常，企業財務數據才會較好（當然，近期股價好轉，也是市場預期業務開始好轉）。

另外，這企業除了保險業務外，也會受投資市場情況影響，中人壽會將浮存金進行投資，因此當中國類資產質素轉弱，都會對這企業的資產質素造成影響。相反，當投資市場好轉，這股也會好轉。

現價算係合理區，但由於短期股價仍波動，因此投資者都要明白這方面的風險，投資金額不宜太多。這企業長線都有發展力的。

如果以質素而言，中國人壽（2628）會較好，但此股較受經濟周期影響，因此，不建議佔投資比例過多。

Q39136：

老師，其實我之前上股票班後，有開始留意六福，而且我係近期一輪升勢後放了1/3股票，想吸納番D實力股，例如中移動和六福，見六福利息又高，想入番D、但點知係睇到有7月報導指六福「同店銷售」係各個地區都分別下跌3x%，但睇番你5小時前的報導所顯示數據又唔差我窩，毛利和收益都唔錯。

以下有兩個問題想問：

1/ 「同店銷售」是什麼意思？

2/ 既然銷售額下跌，為何收益仍然增加？係咪財務報告未包括7月份數據？

另外，我本身認識一位退休既六福廠長，佢話六福既生意差左好多；但另一邊廂，我朋友老公係二線城市開六福分店。這個現象令人有點難理解。

P.S.嗰位退休廠長以前有一點股份，但退休後，佢自己唔買六福，反而走去買電訊盈科熟悉😅。

龔成老師︰

1) 同店銷售，是指同一間自營店於同一時期架銷售額比較(數據不包括品牌店及內地電子商務業務的銷售額)

2) 由於六福係用3月做結算，所以7月份數據唔會包係最近架2023/24年報。而這年報期內，同店銷售大體上係向上。

3) 至於生意差，係預期中架事，因為大環境弱和消費力因素，對佢係有好大影響。

其實現時中國的消費力，仍然有點弱，所以整體都弱，回勇要時間，但我地不能只睇這刻，最重要睇長期，經濟會慢慢好轉的，耐心一點就得。至於你見到有分店，有時不同地區，有不同的機遇，同時有時做長線投資，反而會把握當刻市況差租平等因素，去發展。

Q39137：

龔sir 您好，因看您的書知道您之前鑽研了好多技術分析，但最後覺得沒用。

但會不會有部分技術分析都會中的，比如好似前一兩星期成交量極大然後大升，這種是否代表很有支持，至少一定會升幾日？想問問您會否結合小小技術分析去操作的？🙏😀

比如見咁大成交時會加些注碼 然後等量回落後減一部分，（當然本身持有的仍是長線持有不亂動）這些操作賺到幾天的話也好像很不錯😁定還是這樣是不合適的？

想知道成交量是不是一個很有參考價值的指標？

龔成老師：

其實技術分析，不一定完全錯，只是較多盲點。

首先講原理，技術分析原理是統計學，利用一些數，例如過往股價及成交量等資料，去推算將來的情況。

不過，由於股市是一個持續變化的市場，每次情況都可以不同，所以，利用統計學去推論，就會出現盲點。再加上巴菲特等最賺錢的投資者，都不相信技術分析，所以你都要思考這一點。

例港股如早前的大成交及股價大升，可以推算到有資金持續買入，不過，有些技術分析會利用這個因素，再推論之後的走勢，例如會升多數天，但是否準確？其實好難講。

成交量可以幫助我地了解「狀態」，但去到「估之後的股價走勢」，這點我就有保留了。

其實，你可以用一個好簡單的方法去思考，每一種投資方法，都有正確與失敗的時間，而你不能只睇這一次，要睇長期。你可以了解一下全球最賺錢、回報最高、最強的投資者、基金經理，佢地用甚麼方法（強烈建議你花時間去了解下），你就有答案了。

Q39138：

呀sir, 見你去緊旅行，突然諗到一個問題，關於人生需求與快樂。如果打算日後老左返內地生活，考慮到需要開車，咁其實依加年輕30歲，系咪應該早啲考車牌？

但係我又諗深一層，而家考完車牌都冇即時需要，都係要等到退休。但係如果年紀大咗去考車，又好難去上到手。

龔成老師：

要考慮成本等問題，如果你考完後，5年內都無用，不如不要考。

你這刻30歲的想法，到你40歲、50歲，60歲，想法會不同的，所以，可以到較有需要先考慮。至於你這刻30歲，計劃一個60歲未知是否一定發生的事，其實無乜用。

如果你擔心年齡太大未學得識，可以在50歲先考，這年齡仍學到好多野。

Q39139：

老師, google 可上返190? MSFT 今年可上返 450? PG 可上180嗎?

龔成老師：

短期股價無得預測的，美股近年上升了好多，現時水平有點高，是否能再上，就要睇經濟，只要美國經濟不太差，同時又減息，就有機會再上。

但你要明白這刻因素好難準確預測的。至於中長期，3間都是優質企業，可長線持有的。

Q39140：

Sir，本人今年25歲，想請教你有關供樓嘅事。

本人和家人幸運抽中居屋（啟德啟欣苑及啟悅苑 ）

啟欣苑：301呎，買入價$2,370,200，預計2025年3月落成，俾咗首期，還需要給$2,251,690。

啟悅苑：386呎，買入價$3,828,600，預計2026年1月落成，俾左首期，還需要給$3,428,600。

現有現金$70萬，股票$180萬，家庭月入$10萬，月儲$4萬。

現在正計劃應供多少年期及每個月供多少先最好，懇請sir給一些意見。

1. 以現時息口，請問應該將供款年期拉長定將年期拉短盡快供完節省利息？

2. 本人打算啟欣苑作短暫居住，計劃盡快供完，5年後於綠表市場未補地價賣出，再換大間小小的私樓作日後組織家庭，所以打算將年期縮短至10年內供完，至於啟悅苑就留給家人長住，所以打算將年期拉長至20年供，請問對於這個安排你有冇咩建議？

3. 初步計劃先會投放$100萬到啟欣苑，餘下的$120萬做10年期供款，月供$12.5K左右。之後再投放$100萬到啟悅苑，餘下的$240萬做20年期供款，月供$14.5K左右。請問對於這個安排你有冇咩建議？

4. 請問做按揭應該找中介公司還是銀行去做比較好？

龔成老師︰

1) 現時整體息口不高，加上你年青，我建議供長D年期，將更多資金空出來進行財富增值，長線對你會較有利(當然，大前提係你都會同時提升自己投資知識，去提高長線架投資能力。)。

2) 建議同第一點一樣，都係建議拉長年期。除非你自問投資能力弱，或者自己係好保守。

3) 建議同第一,二點一樣

4) 你可以直接去銀行，找幾間就得，可以找一些大型的。