Q39581：

龔sir, 早晨

很對不起，又麻煩你

我之前有問過關於兩份基金的問題

1. 現在真的希望你可以教我如何找到關於每隻基金的資料？eg Zi jpmorgan Asia goth

2. 想問基金單要等到24年之後才到期可以取回錢，但係是否很大機會到時蝕到連本金都輸埋呢？

我真係很後悔現在蝕左很多錢，現在又冇野可以做到，因為如果現在取消張單，只係可以取回小部分的錢

希望你可以教我怎樣處理現在的困境，感激不盡🙇‍♀️🙇‍♀️

龔成老師︰

1) 在網上輸入基金名，進入佢"官網"，你就可以睇到資料。

例如打"Zi jpmorgan Asia goth"，就會找到以下網頁。

https://am.jpmorgan.com/hk/en/asset-management/per/products/jpmorgan-asia-growth-acc-usd-hk0000038148#/overview

你可以分析以下的要點：

> 基金投資地區、資產類別，是否自己睇好

> 風險度是否適合自己

> 基金經理團隊的實力

> 收費及條款（限制某年期不能賣出）

> 比較，能否跑贏大市（例如投資美國股票的基金，就比較美股標普500指數，過往5年、10年的表現）

不過，正如上次意見 >>> "你仲有3年就退休，本身就唔應該再持有咁多而類"增長型"基金。我會建議你分段減持，將佢地慢慢換成收息資產，去為退休準備。"

2) 我明白你好想至少追翻個本，但投資我地一定學識客觀。由於市場現時不確定性仲有好多，無人答到你1年後個基金成績會變成點。

最重要，係你現時人生階段，唔適合用D咁博架投資。因為輸左，你係無時間和本錢去追翻D損失，所以你重心係要換走高風險屬性架資產，換成較穏定的收息股，會對你較穏當。

所以，如果你要到2025年先可以"無費用"下贖回基金，我建議你到時分段咁慢慢沽，去平衡價格波動風險。之後，換成收息股、年金、A級債券(但唔係債券基金)等資產，對你會最有利。

你現時情況，由於距離退休年期不遠。所以，你要明白，現時要做係如何有效守好固有本金，而唔係追翻之前架損失。如果你係堅持去追，繼續放係高增長股度博佢而1,2年反彈，唔係話唔得。但你要明白係有機會更加得不償失，令到你退休生活不確定性更大，你要十分清楚明白這一點。

Q39582：

Is MSCI better than VOO. Please comment on MSCI, thanks.

龔成老師：

MSCI Inc（明晟）有質素。佢係最大、最賺錢的業務是指數業務，為資產管理公司和資產所有者提供基准。

此外，它還誇耀自己擁有超過1萬億美元與MSCI指數掛鉤的ETF資產。MSCI分析部門為資產管理公司和資產所有者提供投資組合管理和風險管理分析軟件。

MSCI的所有其他部門在2021年被細分為ESG、氣候和私人資產部門。在ESG和氣候方面，MSCI為投資行業提供ESG數據。在私人資產方面，MSCI為投資者和房地產經理提供房地產報告、市場數據、基准分析和分析。

生意與盈利都不差，不過股價上落大，現時仍在合理區較上部，投資只能小注，買入後可長線。

至於Vanguard S&P 500 ETF（VOO）就是追蹤美股的ETF，追蹤指數是標普500指數，當中都是全球有實力的公司，有長線投資價值。

以風險平衡度來說，VOO有約500隻股票，會較好。

由於美股波動，VOO也不建議一次過大手買入，最好的方法慢慢分注，或以類似月供模式進行，長線持有，這是一個最好的投資策略。

Q39583：

美國大選後

1）美股會持續上升？

Voo & telsa 值得入 或適合小注入？

2）港股方向不會大升？

Thx

龔成老師：

1）無人能預測到短期走勢，市場認為特朗普會利好美國經濟，但股市在佢當選後已上左好多，所以，之後有可能較波動，同時，現時的估值已有點高，反而要留意風險。

VOO可以考慮，但都要分注買入。

至於特斯拉Tesla, Inc.（TSLA）長遠有發展，但股價上落大，要注意這方面的風險。

所以，如果風承受能力不高，就不建議投資這股。

就算投資，也不建議太大注。

佢成立於2003年，總部位於加州，是一家垂直整合的可持續能源公司，以及製造與銷售電動車。

Tesla銷售用於發電的太陽能電池板和太陽能屋頂，以及用於住宅和商業地產（包括公用事業）固定存儲的電池。特斯拉擁有多款車型，包括豪華、中型轎車和SUV汽車。

Tesla是全球最大的電動車製造商，全球電動車銷量第一位，以現時這企業擁有的技術與優勢，領導地位將會持續。企業過往發展速度十分快，憑藉其主打車型「Model S」、「Model X」、「 Model 3」、「Model Y」，帶領Tesla發展成為電動車王者。

佢有一定的質素及潛力，但不是無風險的，第一，電動車始終是較新興行業，業務始終有不確定性，第二，Tesla估值有時會偏貴，第三，Tesla過往股價甚為波動。

因此，這企業不是不可投資，但投資者要注意風險，最簡單的方法，就是投資時小心控制注碼，最好以小注分注的模式進行，同時，要控制好總投資金額。如果有貨，可長線持有，如果無貨，現價可分注，你預現價是合理區頂部，要留意股價上落大。

2）因為美國有機會再打貿易戰，所以會令港股波動。

但是否一定不利，就未必。因為睇翻之前特朗普在任的4年，港股雖然波動，但大致是向上的。

Q39584：

老師，請問應該在熊市不同階段按比例分段入貨，還是需要捕捉熊三，才大規模入貨？

龔成老師：

如果是有質素有發展的企業，只要無核心性質素轉弱，在熊市可以分注買入，但就要同時留現金，如果到了熊三，就會較大手買入，及動用之前留的現金，不過，無人知幾時先會出現熊三的。

Q39585：

謝謝你教導同意見，明白到係要做分注，並不是溝貨。2866真係溝貨，搞到咁，唉。同時我會等機會沽出270同2866……

至於美股我未試過，要再研究下

其實我手上仲有一百萬現金，你覺得可以繼續買股票定係可以試其他投資？謝謝

龔成老師︰

0270和2866唔係無資素，只係0270個核心質素比以往弱左，長線持有係可以，但不能太多，你現時5%係極限(故不一定要再減持)。

至於2866，同樣都可長線，但因為佔比太多。保守D，你可以減少少。或者唔好再入佢，等將來新資金投入其他股票架時候，去令佢比重慢慢降低翻。

至於美股，你唔識就先用指數ETF-VOO。由於美股現時唔平，所以唔洗急入，慢慢小注小注咁儲就得。

至於手上資金，建議你分3部份︰

1) 先保留至少半年開支，作應急錢。

2) 你睇翻持股和現金比重，現時市況建議保留2-3成現金(不計應急錢)，去等機會。

3) 餘下現金，就可以分注入平穏增長股。

平穩增值股，指數基金由於是一個組合，因此在平衡風險方面較好，例如美股追蹤標普500指數的（VOO）、追蹤富時全球股市指數（VT）、追蹤港股的盈富（2800）。

另外再加其他個股：美股如巴郡（BRK.B）、蘋果公司（AAPL）、迪士尼（DIS）、Costco好市多（COST）、麥當勞（MCD）、可樂（KO）、港股如中銀（2388）、港鐵（0066）、港交所（0388）、長建（1038）等，你可以了解下，並從中選股。

Q39586：

你好，龔sir, 又嚟請教你

早幾年因為拎晒啲錢去買樓，所以只保留了買落嘅少數港股，亦停了月供

因為當時買入價比較高，一路蝕緊錢，所以我就一路都冇拎出來

手上有700，2800，領展，2388等，成本價約20萬左右。

呢兩年我開始儲返少少資金, 早排有定期買少少Voo,比特幣，都係諗住長期持有

現在嘅情況每月只有2000至4000左右可以放落去月供

老師覺得我手上嗰啲港股我仲好唔好定期買入D拉低平均數？Voo，比特幣越嚟越貴，仲值得繼續投入長期持有嗎？謝謝你解答

另外你嗰啲書我而家開始叫我小朋友睇，希望慢慢滲透佢哋投資嘅概念

龔成老師︰

小朋友早點有理財概念係好事，因為時間值永遠都係投資中最重要。

可以，由於你手上的股票，都係有長線投資價值，所以你可以慢慢加注，只要個股和個別行業，唔好高過組合15%和30%就得。

不過，我對溝貨而件事，我不太肯你是否真正理解。因為溝貨唔係為拉低成本價，而係一套預定策略。建議你睇翻以下影片，會對你有幫助。

https://www.youtube.com/watch?v=5yu9jrvfGX4

至於VOO，現時唔平，長期持有係可以，但加注就唔好太進取。

至於BTC，本身價值其實好難計算。不過，就肯定不確定性好大，同好波動。如果你係睇好，最多都係小注，一個輸左都唔會明顯影響組合架水平，同時以數倍回報作為目標。

加密貨幣，有沒有真正的價值，如何定義真正的價值，合理價是多少，根本無真正的計算方法。

這些人為創造的貨幣，因為關注度由很少變得大，價格會大升，但這背後是否有真正的支持，根本無從計算。只能說，投資這些貨幣，投機味好重，可能大賺，亦可能蝕到一文不值，因為，當中價值，根本好難量度。

但這不代表佢無價值，佢可能好勁。

部分加密貨幣的長遠價值，取決於「有多少人用」，即是說，背後可能有「交易價值」，如果長遠好多人用，的確可能有高價值。

如果分析到佢長遠的交易大，大家都持續關注，就有價值，就值得投資。

另外，投資者可以從這些貨幣和其智能合約平台，長遠是否有功能上的價值去分析（部分可能有的，但就要仔細分析），這就會產生「功能價值」。

我並沒有支持或反對投資加密貨幣，只能說，加密貨幣風險高，可能大賺，可能大蝕，因此不建議大額投資。

如果有興趣，可以用以下的心態投資，首先，預期可能會大跌，心態上只用「閒錢」投資，就算不幸大跌都無影響，但要求回報一定是倍計，博加密貨幣有多倍計的升幅，絕不要升少少就賣。

Q39587：

你好，雖然有看你的書籍，但是也想查詢一下具體的建議行動。

本人現時有500,000現金，持有一個物業，但是處於負資產，收回來的租金也不夠供樓，產生負現金流。於工作每月可以儲兩萬元，希望可以15年後每月有六萬元被動收入，但是不懂得如何在資本增值及收息股的比例作出平衡，請問有什麼建議呢？

龔成老師︰

若你希望退休後，每月有6萬蚊現金流，以股息率6%計，你需要本金1200萬。因此，我地要以這1200萬作為目標，透過一些有增長力的股票，去累積這筆資金。

到你退休時，再將這些有增長力股票，換成為收息資產(如收息股、年金、債券等)，去創造你需要的6萬蚊現金流。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

因此，你在選擇應該投資那一類股票時，會係因應你人生階段、投資經驗和風險承受能力，去做決定。

假設你係年青至中年人士，你可以用「平穏增長股」 + 「潛力股」的組合。如果你係偏年青，比例大約可以去到各一半。

但由於「潛力股」有一定波動性，較適宜年青和有投資經驗人士。若你投資取態較保守、經驗較淺或者較接近中年，「潛力股」比重就要相對下調。

現在你每月先用5成儲蓄，即$10000做月供。其餘先儲起，用一邊月供一邊儲蓄的策略。

月供方面，你可以考慮一些平穩增值股，指數基金由於是一個組合，因此在平衡風險方面較好，例如美股追蹤標普500指數的（VOO）、追蹤富時全球股市指數（VT）、追蹤港股的盈富（2800）。

另外再加其他個股：美股如巴郡（BRK.B）、蘋果公司（AAPL）、迪士尼（DIS）、Costco好市多（COST）、麥當勞（MCD）、可樂（KO）、港股如中銀（2388）、港鐵（0066）、港交所（0388）、長建（1038）等，你可以了解下，並從中選股。

如果想增長力高少少，可考慮潛力股，例如指數基金，美股可投資納指基金（QQQ），或在港上市追納指基金（2834）、港股則可考慮安碩恒生科技（3067）、中國電車基金（2845）。另外再加：美股如微軟（MSFT）、Visa（V）、ASML Holding（ASML）、Tesla（TSLA）、Amazon（AMZN）、港股如騰訊（0700）、比亞迪（1211）、小米（1810）等，你可以了解下，並從中選股，但佢地波動性和風險會較高，要自己平衡。

現時大市大致算在合理區中下部(港股)和上部(美股)，你現有50萬資金可以先投入一半，用"分注"形式，慢慢買貨。餘下一半和每月所儲到的資金，就等大市出現一定程度的下跌，才大力度掃貨，然後長線投資。

我假設投資回報有10%（連股息再投資），你每月投資$20000 + 本金$50萬，15年後大約會增值至970萬。

故你只要在將來加大月供(例如未來加人工後上調供款)，相信很大機會達至你的財務目標。

至於物業，我預未來香港係平穏發展，唔大升，唔大跌。一般如果物業長線負現金流、投資升值能力不高、或者不適合長線轉為自住物業，我都會偏向建議沽出。（當然，如果你只有一層物業，就未必雖然賣出），而賣出前的分析點，是該物業長期負現金流，同時升值能力不強。

但考慮到你負資產中，有點尷尬。建議先持有，將因為上述因素，決定長線是否沽出。

Q39588：

龔sir你好，請問你有冇聽過智能化交易，類似用AI幫你操作交易，佢可以預測市況，自動調整策略，我之前join左d WhatsApp group佢地介紹, 但唔知信唔信得過。

另外希望龔sir可以比d意見，本人係銀行工作，月入約50K, 有mortgage 500萬，現大約3.6%，供款大約22000-23000，另手持現金200萬，現全放落mortgage link account, 黎緊本人想將mortgage account轉返落公司員工plan, 現時大概做1.2%，然後打算將果200萬分散買高息股票，如939，1988，1898同941，平均股息都有7%以上，咁樣每個月淨供款就只需幾千元，請問龔sir覺得咁樣投資好唔好。

呢幾年都有玩港股，但都係輸多，對港股心淡。想問下龔sir覺得美債買唔買得過

龔成老師︰

首先，最近我都收到好多WhatsApp 群組的騙案，你講既這類WhatsApp group雖然唔肯定是否存在詐騙成分。但我個人建議還是不要加入，因爲騙徒的手法可以層出不窮，防不勝防。

至於，AI的確可以令到我地喺生活上更爲便利，不過如果預測市況，制定投資策略就需要謹慎。

市場有時是非理性的，好難透過工具完全預測，AI可以幫助你喺分析企業上更爲全面及有效率，但做投資決定就需要自己做。

簡單來說，我對這類AI幫你操作交易，有保留。

明白你希望透過增加每月的現金流來減少每月的供樓開支，但這樣的做法會犧牲了財富增值的機會。

你再做新決定前，一定先了找出過往出問題地方，否則只會愈行愈錯。

過去幾年，大市受疫情、通脹、加息、戰事、中國房產、疫情等因素影響，一定弱。咁到底係你投資方法出問題，定只係跟大市一齊回調，你要攪清楚。

我唔知你年紀，但估計你跟退休之年尚有一定隔離。而個時候，作為長線財富規劃，我建議應先做好增值(投資具增長力股票，而非收息股或債券)，去倍大財富。等到退休時有一定本錢，再換成收息資產，支援退休生活。

除非你自己投資取態好保守、或者年紀較大，否則唔建議現階段投資收息股。

你先思考清楚這部份，才進行下一步部署。

至於你提收息股，1898質素較一般，唔建議持有太多。

若你都係決定用收息股，想保守D。你可以建立一個收息股的組合，目標是5%以上股息率的收息股，例如高息基金（3110）、港燈（2638）、深高速（0548）、香港電訊（6823）、工行（1398）、置富（0778）等都可以，你可以了解下，並從中選股。由於收息股股價都會有上落，因此要控制每一隻佔股票組合的比例，不能超15%，最好在10%以下，而3110由於是一個組合，比例可比個股高。

雖然港股這幾年表現的確比較弱，但從長遠的財富配置而言，我相信中美在未來10-20年都仍會是領先全球的大國，美股港股在財富分配上都應該持有。

投資策略上，建議你長遠建立一個平衡的組合，有港股，有美股，唔還太偏重一個地區。現時比起美股，港股的投資值博率會較高，所以港股比重可以多少少。

手上現金可以分注入市，同時要持有適量的現金等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

Q39589：

龔SIR你好

一直都有留意你的專頁，我今年30歲, 2018年左右剛出來工作月供一些股票，希望可以增值財富。現持有:

1038長江基建 1000股(平均$69入)

9988 阿里巴巴200股 (平均$262入)

388港交所100股 (平均$437入)

003煤氣2500股 (平均$15.6入)

823領展 428股(平均$76入)

不巧這幾年港股每況愈下，想請教老師該如何部署? 眼看股價下跌超過50%， 心裡不斷質疑自己。一方面現時超過一半資產只敢做定期或持有現金，但另一方面卻不希望錯過累積財富的黃金時間。

請老師指教，謝謝。

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

現時大市受通脹、加息、戰事、中國房產、疫情等因素影響，中短期會較弱，但只要企業有質素，長線一定會回歸合理值。

你手上架持股，都係具有長線投資價值。

但當中煤氣(0003)增長力減左，因此都要控制持貨比例，不建議持貨太多，但如果貨不過多，都可以持有，但相信回勇要較長時間。

而阿里(9988)近幾年受政策影響，令到佢核心業務有明顯變化，所以你預要去翻你買入價，可能要較長時間(但佢依然有長線投資價值)。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時30歲去計，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

"一半資產只敢做定期或持有現金"，對你年紀而言，過份保守。

策略上，你長線可以投資「平穏增長股」和「潛力股」。你每月5成儲蓄做月供，其餘先儲起，用一邊月供一邊儲蓄的策略。

選股上，你可以考慮一些平穩增值股，指數基金由於是一個組合，因此在平衡風險方面較好，例如美股追蹤標普500指數的（VOO）、追蹤富時全球股市指數（VT）、追蹤港股的盈富（2800）。

另外再加其他個股：美股如巴郡（BRK.B）、蘋果公司（AAPL）、迪士尼（DIS）、Costco好市多（COST）、麥當勞（MCD）、可樂（KO）、港股如中銀（2388）、港鐵（0066）、港交所（0388）、長建（1038）等，你可以了解下，並從中選股。

如果想增長力高少少，可考慮潛力股，例如指數基金，美股可投資納指基金（QQQ），或在港上市追納指基金（2834）、港股則可考慮安碩恒生科技（3067）、中國電車基金（2845）。另外再加：美股如微軟（MSFT）、Visa（V）、ASML Holding（ASML）、Tesla（TSLA）、Amazon（AMZN）、港股如騰訊（0700）、比亞迪（1211）、小米（1810）等，你可以了解下，並從中選股，但佢地波動性和風險會較高，要自己平衡。

如果你現時無太多投資經驗和知識，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資知識﹐潛力股比重可以相應調高，佔組合約3-5成，視乎你投資知識多寡和了解這些股票程度而定。

另外，手上資金可以再加少少上述股票(建議同時加少少美股，平衡地區性風險)，分注咁慢慢入就可以。餘下的另一半儲蓄和餘下資金，我地就等機會，當大市出現較大回調，就加大力度掃貨，然後作長線投資。

最後，緊記提升自己投資知識。因為長線投資回報，係必然同你架知識水平成正比。

我建議你要多讀投資相關書本、年報，新聞和報讀相關課程。書本上，你可以睇我寫架《圖解股票小百科》、《圖解美股小百科》、《80後千萬富翁》和《財務自由行》，都適合初學者。

我Youtube Channel都會不時分享一些投資技巧和知識，你都可以睇下。

https://www.youtube.com/@user-rw4st4yg5v

另外，本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資、評估平貴，在投資上已掌握了一定的知識。

Q39590：

你好👋想請教美股-Nvdia我有一筆錢6位數。想買優質股中長線。呢隻見暫時同行冇咩對手。下星期三20號前可以買入？謝謝

龔成老師：

企業有質素，有發展，因此，這股本身無問題。

但就會擔心平貴度，始現水平不便宜，如果行業發展力減少，股價有機會出現較大下調，所以，暫時只建議你小注，同時不能集中在這股。

英偉達公司NVIDIA (NVDA)有質素。是《38全球倍升股》的其中一隻，長遠發展正面，有長線投資的價值。

佢是一家人工智能計算公司，其業務部門包括GeForce圖形處理單元（GPU）、GeForce NOW遊戲流媒體服務和相關基礎設施，和其相關的處理方案。

其業務可應用層面，都相當廣泛，投資係可以，當然，回翻少少先買會更有投資值博率，至於現價，算是合理區頂，現價只宜小小注，等跌再加，但股價波動，或者用月供儲貨，會比較好。