Q38221：

成哥 其實散戶會唔會買Voo/qqq就算？

長線 voo/qqq就穩贏🤔

龔成老師：

如果散戶無選股能力，或不想花時間選股，可以簡單利用VOO、QQQ，作投資組合，這是簡單的方法。

不過，如果想有高少少回報，個股會比組合好（當然，如果選股不當，則會較差）。

另外，沒有投資是穩賺的，納指在2000年大升後，2001年開始下跌，跌了8成，之後要用15年時間，才去翻2000年的高位。

Q38222：

龔Sir，持有兩年幾的內銀股終於到價了

可以賣出嗎？

龔成老師：

如果你打算長線收息，其實可持有，內銀增長力不強，但長期收息無問題。

除非你持貨多，才考慮減部分，否則，大方向其實可持有。

Q38223：

龔sir, 709值得持有收息嗎？

龔成老師：

佐丹奴國際（0709）整體質素中等，業務不算差，但未必是高增長，是平穩增長類。

這企業是國際服裝零售商，擁有眾多自有、加盟及授權經營之品牌，業務地區有中國大陸、香港及澳門、台灣、新加坡、澳洲及其他巿場。

品牌有：Giordano 及 Giordano Junior、Giordano Ladies、BSX等，約2000間，當中有約約4成為加盟店。

佐丹奴國際現時整體質素中等，業務不算差，但未必是高增長，是平穩增長類，投資者可以視為收息及基本增長。

現價合理，有投資的價值，只要貨不過多就無問題。如果原本已有貨的投資者，只要貨不過多，可視為長期收息去持有。

Q38224：

老師，閒錢存美元好唔好

龔成老師：

其實無所謂，因為港幣同美元有聯匯，所以其實是同類貨幣。

Q38225：

你好老師，想問下8391，我已經揸咗呢隻2年，買入數量都多，平均價係$0.768，明明前幾日開始升，

而且成交量都多，但股價都唔係升太多，再加上上星期四五停牌話配股，而且睇份財報見佢都有利好消息，例如發展東南亞國家，但點解股價仍然咁低？有直搏率嗎？

期待你回覆

龔成老師︰

基石科技控股(8391)過往主要於香港提供商業印刷及財經印刷服務，集團近年開始轉型，於2020年8月收購電動車充電業務，開始在香港進行銷售電動車充電系統。

這佢這段時間，銷售電動車充電系統部份，營業都有增長。現時電動車充電系統，主要是建設在政府物業。

但集團規模始終係細，而且充電系統未算得上係好獨特技術，故未來市場出現競爭者機會好大。而集團該部份增長係唔錯，但長線是否維持到、面對新競爭，它能否優勢，都係一個問號。

另外，你要留意，佢充電系統營業額有增長，但問題是，這部份比印刷虧損幅度更大。也是為集團虧損擴大的原因。

由於印刷長線發展較負面、而充電系統發展時間好短，不確定性高，加上在虧損狀態、集團規模細、負債比率偏高等因素加總下，投資價值不高。

Q38226：

龔 sir, 請問 82318 和 601318 中國平安有甚麼分別？

龔成老師︰

2隻都係平安保險︰

82318 - 香港上市，於港交所用人民幣交易

601318 - 內地上市，於上海交易所用人民幣交易

Q38227：

你好成兄。自從兩年前結婚後沒有再碰股票，最近一年開始每月購入美股QQQ,MS. AMAZ, APPLE, NVDA, TSM等等，當中Nvda(50%)和NVDU (15%)佔倉比率較高。

因為年尾會有小朋友，到時要考慮請工人，亦要添置第二部家庭車，所以最近幾個月都冇再溝貨。

現時月入約 78k

家庭開資約30-40k，每月能儲三萬蚊左右

但亦擔心未來公司會減薪，或裁員。

喺而家呢一個市況, 我應該繼續堅持月供，定係先儲多少現金，到牛市時才重手出擊？

我的目標依然無變，希望退休前能儲到一筆資金，可以給予子女們，外國升學。

龔成老師︰

投資講求「攻守兼備」，喺你大力進攻之前，一定要有足夠的備用現金用於防守。

如果你擔心工作變化，可以預留半年到一年的生活開支(甚至更多)，基本上就可以對沖相關不確定性。

做好防守，接住就考慮進攻，月供係一個長線計劃，透過平均格價買入法，去拉平衡你個成本。如果你隨意去變動，好易破壞左個效果，影響長線回報。

如果你係初學者，未識定平貴，我建議你一直不理價格照供，唔好估個市走向。除非你自問有充足投資經驗，你才可以考慮在大市明顯貴時，調整供款，甚至停供。

無人能知道牛市何時來臨，如果等到明顯架牛市來再出手，你有接貴貨的可能。

你持有的都是有質素的股票，因此，可以長線投資。

不過，個股和個別行業長線不要高於組合15%和30%。現時你NVDA和科技股，明顯係超標。

你可以用長線新資金，去慢慢拉平衡，或者分段減持調整都得。但最重要一點，係唔好開槓桿，佢倍大你回報同時，都倍大緊你個風險，故NVDU建議你要慢慢清空佢。

詳細NVDA未來展望，可以睇YT影片︰

https://www.youtube.com/watch?v=CKI2zA7LaV0

總括而言，你先用應急資金，去守好基本生活。之後，再用月供去進攻。同時要提升投資知識，令自己長線可以判斷平貴，去自己決定入市時機，將回報做到最大化。

Q38228：

老師 賭股一路跌到低位 。但睇返就算covid時股價都高於現在 。但當時收入基本好低 反而股價高 。現時有收入 股價跌到最低 。

長線仲有冇投資價值 因為我買入是想長遠 。但又怕一路跌會變成不是一隻有前景的股 。謝謝

龔成老師︰

由於中港的經濟仍然未完全復蘇，因此，就算企業已經有收入，市場都會擔心是否能夠維持，一衆賭股的表現都較弱。

賭業始終是毛利較高的行業，因此，有長線的投資價值。不過，增長力有機會不及過往年代。

相信佢地業務情況會慢慢向好，但全面回勇始終需要時間，只要你的買入價錢合理，長遠可以守，要耐心。同時，要控制注碼。

Q38229：

1830幾多算便宜

龔成老師：

你預回多10%初步平，完美醫療（1830）長遠有發展的，但佢的生意都會受經濟、市道等因素影響，都有少少敏感。整體來說，本身有一定的質素。現價在合理區底部，不過由於管理層及企業本身的業務風險，這股不建議持貨太多。

佢會因為經濟、市場競爭等因素，令佢中短期業務未必好強。

長遠仍有發展力的，佢的野心唔細，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展力都有。

這股有長線投資價值。

所以，如果無貨可分注，或者你先小注，等跌慢慢分注，然後等跌多d先正式分注投資。但這股又不建議持貨太多，因此都要控制翻注碼。

如果本身有貨，就長線持有。

Q38230：

港股已有2318, 為何仍弄一個82318既？😅

龔成老師：

可以用人民幣交易。。。因為之前為左想活化香港股票市場，港交所鼓勵部分上市公司，另外出一個號碼，比人用人民幣買賣，方便國內投資者