Q26411：
阿SIR, 我睇左你的youtube 片介紹和考慮自己年齡後, 想由5月開始月供以下股票, 請問也算合適配置嗎? 每隻月供1千.
A. For 囡囡的 (月供10年): QQQ, 盈富 (2800)
B. For 自己的, 長期持有, 65歲後繼續收息:
月供5年: 恆生銀行 (11), V Tech (303)
月供10年: 中電 (2)
現持有:
1手藥明生物 (2269), 入手價 45.2, 等49.7 入1手.
2手騰訊 (700), 入手價 602.5 及 346, 等320 or 311 入1手.
諗緊再入2隻股票. 想係有環保概念同能源有關. 好想入比亞迪, 但現價貴. 仍研究中.
Thank you very much!
龔成老師︰
你小朋友的月供組合，係可以。進取點，可以用QQQ做主力。想穏陣D，就2800做主力。
至於你本人，我相信係年青至中年年紀，其實你應該先做好增值部份，到退休前幾年，才慢慢將佢地轉成收息類資產。
因此，你現時唔好用恆生銀行 (0011), V Tech (0303)、中電 (0002)這些收息股做月供目標(除非你好保守)，應以「平穏增長股」和「潛力股」作主力。
你每月5成儲蓄做月供。其餘先儲起，用一邊月供一邊儲蓄的策略。
由於你現時無太多投資經驗和知識，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。
到你有一定投資知識﹐潛力股比重可以相應調高，佔組合約3-5成，視乎你當時投資知識多寡和了解這些股票程度而定。
餘下的另一半現金，我地就等機會，當大市出現較大回調，就加大力度掃貨，然後作長線投資。
你持有股票，都係合適。但藥明(2269)不確定性高，不要大注。騰訊 (0700)已有一定貨，暫時都唔好加佢住，除非去到好平。
至於比亞迪(1211)現價偏貴，你可以考慮好小注月供，去儲住貨先都得。
而環保概念，你可以集中睇一些"碳中和"相關電力股，國家未來政策重心，會由化石能源，轉至可再生能源。你可以留意相關股份，將會受惠。
例如信義光能(0968)、中國電力(2380)、華潤電力(0836)、福萊特玻璃（6865）、金風科技(2208)等。但現價唔平，要注意估值，同時要預係較長線持有，才會有理想回報。
另外，我上年12月13日出左過相關架POST(只後有重POST，但唔記得幾時)，你都可以睇翻。
Q26412：
老師，想請教1183送紅股輪集資7億多，行使價4.47，一年期。另2送1紅股後股價拆細，是否可以假設拆細後股價一年內一定要高過4.47行使價，否則沒有股東行使？
龔成老師︰
二送一其實只是財技，對本質並無實則影響，當二送一後，持有股數會增加，股價會自然調整。
而送的2023年認股證，係會做慣常反攤薄調整，所以到時認購價係會下調。
如果到時股價係低於認購價，個認股證真理論上唔會有人行使。
記住，認股權證一種具具槓桿特性的衍生工具，回報高風險亦高，在正常的情況下不建議使用(送就當然唔同)。
澳能建設（1183）以過往的業務來睇，只是中等，業務發展不算強，整體不差但又未算好好，現價合理。
如果你唔想換正股，你都可以係市場上沽出認股證獲利。
Q26413：
老師你好，我是上年報讀左基本上班的同學，我最近再溫番你教既野，我覺得自己都明白7-8成，做所有MC都岩，但好似唔係好用到d 知識出黎。
或者咁樣問，我想請教你，你一星期會點樣用d時間，即係每日會花幾多時間睇年報啊、review自己個profolio、開選股器去篩選心儀股票、etc
因為我兒家都唔係好知自己點樣plan 幾多時間做基本分析
同埋想問多題：
理財創富思維既書我睇左好多
想請問有無一d投資工具既書介紹？
多謝老師您百忙之中抽空答題目
同埋想問埋兒家有咩etf抵買，現26歲，有100萬cash
龔成老師︰
Review自己個profolio，唔洗成日做，半年至1年去審視一次就可以。
我每日一般會用幾小時，去睇年報和企業相關資料。一方面去找投資機會，另一方面去磨鍊自己分析技巧。
你作為初學者，一定要多練習，才可以知D知識點去運用。
除了我的書，以下這些書，都會講有關實戰技巧。
《巴菲特給股東的信》
《勝券在握》
《智慧型股票投資人》
《非常潛力股》
《彼得林區的選股戰略》
你現時26歲，應以增值為主。你可以考慮用平穏增長型ETF和潛力型ETF(3067, QQQ)，去進行配置，大重大約各一半。
現時大市在合理區中下部，你可以慢慢分注去儲貨。同時留有一定資金，等大跌市機會。
Q26414：
阿sir 吉利汽車點睇，算唔算係優質股？
點解早前跌得咁犀利不是長遠發展嗎電動車？
同埋中國有贊，如果仍然持有嘅話係唔係早走早着？
龔成老師︰
吉利（0175）本身的質素不差，但佢近年的增業務增長有減慢情況，同時佢被剔出富時指數，相信中短期會弱，但長遠又不是完全無質素。
擁有一定的銷售網絡及品牌，不錯的市場策略及定位。
長遠來講，佢的品牌與發展在中國仍理想，過往吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。
另外，佢早前杭州灣新工廠正式發布純電動新品牌新車，宣布吉利進軍高端電動車。反映長遠的發展力仍在。
由於業務增長減左，相信回勇要時間，但企業不是無質素，考慮到現時業務發展及股價，大約在合理區中間至中下，分注都可，但不建議太大注。
中國有贊（8083）業務波動，是較高風險的股票。集團主要於中國從事經營電商業務及支付服務業務，業務分類如下：
（１）電子商貿：透過電商品牌「有贊」提供各種有關虛擬批發及零售之線上及線下解決方案及服務，如「有
贊微商城」
以有「有贊零售」等ＳａａＳ軟體產品及人才服務、面向開發者的「有贊雲」ＰａａＳ雲服務、面向品牌商的「有贊推廣」與「有贊分銷」、以及面向消費者的「有贊精選」與「有贊微小店」。
（２）第三方支付服務。
（３）一鳴神州：提供第三方支付系統解決方案及銷售綜合智能銷售點裝置。
（４）一般貿易。
近年業務發展快速，生意增長力，不過，之前估值極高，加上炒作，令股價上落大，業務變化較，整體有好大的不確定性。加上佢過往在核數師報告出現過「保留意見」，盤數可能有古怪，雖然已是數年前的事，但都會扣分。
佢風險較高，投資值博率不高。你持貨好少的話，可以守。但如果有一定數量，最好沽少少去平衡風險。
Q26415：
龔老師你好，我追隨左你FB一段時間了，好多謝你無私為大衆解答疑難。以下有一些問題想請老師指教，謝謝！
1）請問點睇267,941,3988及16？這些股是否長線穩健收息股？
2）現持有2342 當時作價3.17，前景如可？應否沽出？
3）請教若市脹率>1是否代表股價不平宜？
先謝謝你的解難
龔成老師︰
- 上述4隻都係有長線投資價值股票，但增長力唔高，主要係收下息。若你係中年至退休人士，這些股票都適合。
中信股份（0267）質素相對較一般，不建議持有太多。
- 京信通信（2342）主要從事研究、開發、製造及銷售無線電訊網絡優化系統設備、提供相關工程服務，以及提供電信服務及相關增值服務。
現時5G的發展，都會對佢有利，但這股規模唔算好大，因此又未算最強之列。但由於規模細，當企業發展時，潛力較可較大。
質素都算有的，但就不算好強，整體上都有投資的價值。不過睇翻佢最近的業績，又唔算好勁。
你持有係可以，但此股唔值得太大比重，投資時要注意注碼。你現時出現較大虧損，主要係你買入價太貴，未來投資要分析好平貴度，才好投資。
- 唔一定，因為市帳率只係其中一個參考指標，而且唔係所有企業都適用。
要計企業的價值，過程比較複雜，我好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。
簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。
例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。
如果要深入計算，基本上要好仔細的研究企業，要分析好多財務數據用比率，先至有較完整的答案。
Q26416：
我早幾日剛剛買咗10000股1810 @11.96.如果有前景，我唔介意長揸。
我係買入企業價值和前景，最緊要我唔係借錢買，我有工作，我真心希望呢啲係優質股，日後可以幫我累積財富。
我依家持有1177， 1810, 9988及3067。老師，請問👌🏻嗎？
龔成老師︰
小米(1810)早前業績較弱，相信中短期會較一般，其中一個原因是晶片等供應因素，但長遠會慢慢解決的。暫時未見對核心有明顯影響。
長遠仍是有潛力的，佢的產品性價比高，相信在全球好多個國家都會有市場，佢長遠只會進一步增長。
同時，佢建立的平台是佢長遠的增長動力，先賣手機，再利用手機的平台延伸銷售小米家電。長遠正面的。這股可長線，現價合理區較低位，分注可以。
此股有長線投資價值，但你預佢股價仍波動。
同時，一隻股票再優質，都唔好重注，最多佔組合15%好了。
其實現時你持有股票，都係有長線投資價值。佢地全部都係潛力股，佢地雖然有增長潛力，不過，同時風險都較高，不宜持有過多。
若你係年青至中年人士，潛力股可佔約5成，餘下應用以下平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。
未來時間，你就要加大翻平穏增長股部份，令組合更平衡。現貨可以不沽，但都唔好加注，等個組合慢慢平衡翻先。
Q26417：
你好 龔sir, 本人持有以下股票:
阿里巴巴9988, $142@100
金沙1928, $33.850@1600
匯豐0005, $48@2800
中廣核電力1816, $4.457@24000
藍月亮6993, $11.66@4000
新特能源1799, $19.146@400
全部股票都係虧損，請問以上股票前景和適合繼續持有嗎？
另外最近經濟環境氛圍向下，有沒有平穩增長+有派息的股票推介？
龔成老師︰
你唔好用買入價或帳面賺蝕，作為判斷一隻股票優劣的標準。你應著眼佢本身有無質素，如果有，中短期價格波動，令到出現帳面虧損，係無問題，照可以長線持有。
但如果係無質素，就算而一刻是賺定蝕，你都要將佢沽出。重點分析的地方，係企業質素，而非股價上。
你現時持有股票，都係有長線投資價值。但阿里(9988)受政策風險影響，新特能源(1799)不確定性高，2隻都不宜持有太多。
若你係年青至中年人士，上述股票都適合你長線持有。如果你係中年至退休，可以慢慢加入一些平穩增長和收息股，以組合更平穏。以下是一些有質素股票，收息股類，現價合理，你可以參考下。
同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。
另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，不能太過大注）。
Q26418：
龔sir，巴菲特話就算有幾低估，如果買左roe5%既股票，長期只會獲得複式5%回報。
但如果佢息率是穩定長期10%，那只股息再投都已經有10%複式回報。
應該怎樣理解這句話？是巴菲特說錯了？
龔成老師︰
我地股票投資回報，主要來自資產增值和股息。
ROE可視為資產增值指標，而股息率則評估是股息多少的方法。因此，如果資產增值只有5%，當然比不上10%股息的股票。
但這只是一個簡單的解說，因為長線你還要考慮股息再投資回報率，企業未來發展、本身佢財務狀況、股價平貴度等。所以你唔好單純睇這2個指標，就去買一隻股票。
Q26419：
多謝回覆，咁我應該慢慢賣出?怎樣慢慢賣出?
例如我700 大約460價買入
應該如何慢慢賣出?
幾多賣為之正確?
龔成老師︰
將佢地分成多份，每2,3個就將一份，換成收息股。
你預最少沽出8成，到你退休時，更加應該已經沽清全部。
Q26420：
老師，我52歲，以下係本人持股
新時代能源當日係聽姐夫講上市就買，買完之前跌到無眼睇到而家。
至於瑞聲係之後聽人講number買零知識
全部都未開始睇
2、5、6、13、166、2018
等老師你教我
老師，請教咩影響日元💴跌到咁低
超期待老師
指點想幫自己建構一個長遠穩健收息組合
龔成老師︰
你要記住，唔好聽人講或者聽消息，就去買一隻股票。要你自己真係研究過，最少知佢做乜生意、點賺錢、點解有市場優勢，才好考慮。
以你52歲年紀，投資應較保守。
你持有的組合，大致上有質素的股票，可以守。但和黃醫藥（0013）不確定性高，不宜持有太多。
新時代能源(0166)質素不太好，建議你長線換碼至其他優質股會較好。
書本上，你一定要試下自己睇，去慢慢學。你可以睇左《80後千萬富翁》、《財務自由行》和《股票勝經》先，打好個基礎。
如果你自問理解力唔高，我建議你最好來上堂，咁會最有效率。
日元要跌，背後原因好複雜。簡單咁講，主要受強美元政策(加息)所影響。
其實以你年紀，都仲有財富增長空間，但要較保守。除左收息股，你都可以加D平稳增長股，去提升少少增長力。
現在你每月先用5成儲蓄做月供。其餘先儲起，用一邊月供一邊儲蓄的策略。餘下一半，就等大跌市去入平貨。
同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。
另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，不能太過大注）。