Q23581：
你好老師，想問下美股富途控股宜家狀態如何？我原本平均價位$123買入50股，但之前有壞消息出，跌到無一半，我應該溝定分段放？
謝謝老師
龔成老師：
富途（FUTU）因監管等因素，中短期會較弱，股價較難大升，要耐心等監管穩定翻，企業適應新的規模，盈利先向上，同時股價先穩定。
在長遠，這股有增長力的，但要上翻去你買入價，相信不是中短期事。
佢係一家在線經紀公司，提供一站式在線投資服務，騰訊（0700）為股東。該公司通過網上平台提供服務，其中包括香港、中國大陸，以及美國股市的市場數據、交易服務和新聞源。
現時要睇佢，有無得處理得好D，有無方法做翻好，先有機會回勇。
如果持貨多，建議你減持，始終監管是一個較難分析的風險因素。
Q23582：
老師, 手頭上只有幾萬現金, 呢幾日個市跌,請問現在全買入領展適用嗎? 還是買盈富? 目的主要希望平穩收息, 升時可賺股價, 謝謝!
龔成老師︰
如果以派息率計，領展近4.5%，而且都有一定的增值能力。
不過，我唔建議過份集中單一隻股，如果佢出問題，對你組合會有好大影響。所以，如果你無貨，可以2隻都入少少。
盈富(2800)係一隻包含60間優質企業的組合，雖然股息率無領展咁多，但就比領展更有效分散風險效果。
現價都在合理區，如果無貨可以先入一注。之後等佢地再有明顯回調，才慢慢再加注。
Q23583：
老師你好。本人25歲，手持少量Microsoft和Apple股票，每月有7千-8千元可買股票。
有三個問題希望老師能指點迷津
1）看好科技股，原想月供Microsoft，但眼見最近股市很浮動，不知還該入市還是等。
2）手上的股票請問應該賣一點嗎？
3）希望創造一個每年收益＞10％投資組合，知道投資不該只集中於一個行業，請問年輕人適合投資高消費品（例如名牌）或地產市場嗎？
請問可以給點建議嗎？
龔成老師︰
- 其實月供，就係透過長時間定額供款，以達至平衡價格波動目的。所以，個市或者個股價浮動，其實無問題。
最重要係你月供架股票，有長線投資價值，咁就可以。
Microsoft係有質素，值得月供。不過，佢APPLE同時科技股，你要留意自己成個投資組合，會唔會有過度集中的情況。
任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。
因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。
特別係銀行業，佢營運模式較特別，風險會比一般行業為高。必需堅守30%這個準則，如果可控制在20%以內，會更好。
- 我不太清楚你現有持股是什麼，但若果你係因為市況波動，而打算沽貨，我就唔建議。
因為就算再優質的股票，都會有中短期波動。持有與否，最重要係睇佢有無質素。只要係有質素，我地係唔會因為佢中短期架波動，而沽出佢。
- 高消費品（例如名牌）或地產市場係可以，但唔好只係睇個市場，最重要係睇個企業本身。如果佢係有質素和競爭力，自然會受惠於市場。相反，佢係劣質股，個市場再好，都未必關佢事。
投資策略上，你可以投資「平穏增長股」和「潛力股」。你每月5成儲蓄，即是用$4000做月供。其餘先儲起，用一邊月供一邊儲蓄的策略。
如果你現時無太多投資經驗和知識，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。
若你有一定投資知識﹐潛力股比重可以相應調高，佔組合約3-5成，視乎你投資知識多寡和了解這些股票程度而定。
餘下的另一半現金，我地就等機會，當大市出現較大回調，就加大力度掃貨，然後作長線投資。
Q23584：
老師你好，今次真係去到一個地步好懷疑自己睇法，好想問下你意見。我買1086好孩子，本於價值投資。成本價現在$1.9有27000股。早在4月開始買，
經歷過高位$2.5但冇放，到而家跌到如此低，想問你應否止蝕離場。
買的原因真的在於價值，因為長遠要解決人口老化，一定有政策支持；另外佢做汽車坐椅，安全用品是必需品, PE只有6，在你推介的5-20內應該算平；
每股收益都是正數，點解會跌成咁？我應該持有，放一半定離場？希望老師幫幫我
龔成老師︰
市盈率5-20倍，只係一個較籠統的指標。個別行業和企業，市盈率係需要因應佢地發展情況、質素、競爭能力等，去再作調整，唔可以一概而論市盈率6倍就係平。
好孩子（1086）係中國的國際兒童耐用品公司，主要從事嬰兒推車、兒童汽車安全座、嬰兒床、自行車、三輪車及其他兒童耐用品的設計、研發、生產、營銷及銷售業務。
過往業務不過不失，雖然都有生意，而且盈利係正數，但增長力唔強。到近期的業績有轉弱情況，相信對經濟較為敏感，中短期都會較弱。
現價合理的，但就唔好睇得太好，整體投資價值中等。
此股唔係無質素，不過投資價值唔算最高，若你持貨不多，可以守。相反，你持貨係較多的話，可以見有反彈就沽少少，去平衡風險。
Q23585：
多謝你呀 最近個市咁跌真係有d擔心 因為最近買左既股票 都有跌冇升
美團入左一手 240入
阿里 都入左一手 160入
我依家心態要保持正面，加油！
龔成老師︰
早前中央不少新政策出台，都令市場的不確定性增加，所以市況都較弱。
但我地投資唔應該過份著眼中短期波動，應集中分析企業長線發展狀況，如果係無受影響，質素依然存在的話，只要照長線持有就可以了。
美團點評（3690）有潛力的，過往一直虧損，到近2年，才開始出現正現金流，這是一個實質的利好因素，因為之前一直在燒銀紙，現時初步見到成效，不過，估值的方法好虛無，因為現時的市盈率仍過百倍。
如果有利好消息，佢可以上好多，但如果估值修正，股價可大跌。因此，投資係可以，但一定不能大注。
阿里(9988)近期受大市氣氛和政策風險所影響，令到股價有較大回調。雖然估值上都有少少調整，但核心質素無大變﹐依然有長線投資價值。
但由於不確定性係大左，故暫時要控制注碼，唔可以太進取。
你現時2隻股票都只係1手，你照長線持有就可以。
Q23586：
移卡（9923）之前$100真係瘋癲價待$33底背馳先入手，但點知都係Drop到$23
Capital Group $40曾經增持，到最返$28開始不斷減持，股價壓力大
謝謝你，原來現在仍然唔平
會小心注意，可能要揸一段時間
龔成老師︰
面對移卡（9923）這類型的潛力股，我地要較小心。
因為行業變動快，有機會質素係短時間內，會出現較大改變，令股價大上大落。
但不代表這類股票，唔可以投資。但必需要控制注碼，去平衡翻不確定性所帶來的風險。
另外，你唔好再用"底背馳"或者睇圖這些技術學分析方法，這是好錯！巴菲特已經講到明，技術分析沒有作用的。我地只會分析企業的質素，以及企業的價值。
所以，你要了解一隻股票質素和平貴，應該係睇佢企業本質、行業發展、財務狀況等資料，去得出結論。
Q23587：
努力儲$。每個月18k.有何方法增加現金流。買股收息？買派息基金？或有其他？請賜教。
龔成老師︰
當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。
例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。
以你現時40歲去計，可以投資「平穏增長股」和「潛力股」。而收息股或派息基金，這類提供現金流產品，不太適合你年紀。
你每月5成儲蓄做月供。其餘先儲起，用一邊月供一邊儲蓄的策略。
如果你現時無太多投資經驗和知識，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。
若你有一定投資知識﹐潛力股比重可以相應調高，佔組合約3-5成，視乎你投資知識多寡和了解這些股票程度而定。
餘下的另一半現金，我地就等機會，當大市出現較大回調，就加大力度掃貨，然後作長線投資。
Q23588：
你好，我之前睇左你說窮人思維那個post, 我現在的老闆是一個隱影富豪，就是你的書上說的有錢人思維。但老闆是一個上了年紀的先生。
佢同時也有極度的窮人思維。就是一亳子也不想花，但想生意有多多回報那種，我幫他工作真的很累，他口説想發展這樣那樣（因公司停留在20年前的舊模式）
他想開發網上生意一些新的系統。但他拿少少錢投放就割了一忽肉那種。這種是什麼思維？真的想不通
龔成老師︰
若果你相信你老闆，係一個有有錢人思維的資本家。
其實，佢應該好明白，一些投資性支出，重點唔係洗左幾多，而係可以洗左之後，賺多幾多。
如果假設佢思維無變的話，佢唔願意割肉架原因，好大機會係佢睇唔到，這件事對佢生意，有多大的"實際性幫助"。
或者，佢意識唔到，唔開發新系統和營運模式，會對佢盤生意造成多大"風險"。
你可以從這2個方向去想一想，是否因為缺少了這些動機，而令佢欲步不前。
Q23589：
老師你好，我今年37歲，1年前開始儲錢，而家儲起了66,795元，諗住用作投票，但我係新手，對股票/投資市場沒有認識，所以有以下問題:
- 我如何將這批本金分散投資？（例如：月供股票/緊急儲備）
- 我沒有股票戶口，新手喺銀行開股票戶口有什麼要注意？
- 如果我要5年內達資產達到100萬這個目標，除了投資股票，還可以做什麼來增加我的收入？ 龔成老師︰
- 做任何投資前，我地都要先做好防守部份。例如，買入一些保障些保險(如人壽、醫療、危疾等)，將這些風險轉嫁比保險公司。
另外，儲定一筆等同半年開支的應急錢，以備不時之需。
之後，我地再可以因應市況，去制定投資計劃。
我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。
你37歲，應以增值為主，建議你用「平穏增長股」 + 「潛力股」作組合，去創造一個增值平台。
你現時無投資知識和經驗，對企業估值，點去定平貴未必會太了解。所以你先利用月供模式，去做增值，可以減低買貴貨風險，對你而言會較理想。
現在你每月先用5成儲蓄做月供。其餘先儲起，用一邊月供一邊儲蓄的策略。
由於你投資知識不高，因此可較集中在平穩增長類股，甚至先集中在盈富(2800)身上。到你有一定投資知識和經驗，才慢慢增加潛力股類別。
至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。
- 你要先開一個可以月供的股票戶口，在香港係銀行或者證券行開，都係可以。
最重要係留意個收費率，同埋邊個較方便你，咁就可以。
- 假設投資回報有10%（連股息再投資），你每月投資$14000，5年後大約就會增值至100萬。
但要做到這個效果，除了投資每月$14000外，你都要努力增進自己投資方面知識，長線回報才會有效地提高。
書本上，我建議你睇我寫架"80後百萬富翁"、"財務自由行"和"股票勝經"，都適合初學者。
除了你要去多讀投資書本外，最好抽時間去睇下年報，新聞和報讀相關課程，去會對你有幫助。
Q23590：
謝謝龔成回覆，依家每日放工時7:30，其實我係有興趣上你嘅堂，但暫時未能配合.但⋯因近排發生嘅事，心入面其實想休息半年，可以散散心。
報名上你嘅堂，做下運動，參加啲興趣班，想一個人去旅行(但疫情又做唔到），從來都冇乜興趣，因為咁多年都掛住拍拖.除咗結束一段長感情外，
心入面非常不捨，直至咁啱見到你個post講咗段感情嘅野，要改變要強大，個人開始有小小感覺，要醒！這樣吧！你幫我分析下應唔應該休息半年
以下係我嘅財務狀況︰
股票方面我多數都係蝕住走，當中一定係有問題，咁如果有問題就要改.咁我豁出去，你幫我分析一下
月入$16000
儲蓄大約$400000（作為一個80後，非常慚愧，咁多年都冇認真計劃儲錢）
現有股票：
941:1000股（53.8入）
788:10000股（1.5入）
22124美團put200000股（1.11入）
9988:200股（155入）
288:10000股）（6.15入）
睇睇有冇野要走或變，可否休息半年
龔成老師︰
其實要休息，無話可唔可以。而且我見到你休息時計劃，其實都好積極，唔係完全躺平乜都唔做個種。
你純粹係想調整心態，令自己走得更遠，所以我覺得係可以。至於時間長短，唔洗限死自己，隨心就可以。你可以把握這個休息時間，做一些自己以往都唔會，或者無時間做的事﹐相信會對你有益。
至於投資方面，以你80後年紀，其實應先集中做好增值部份。
中移動(0941)和萬洲國際(0288)主要係收息，增長力一般，不宜持有太多。你可以考慮沽少少，換至較有增長力股票。
中國鐵塔(0788)和阿里(9988)，你照持有就可以。
美團put(22124)這類衍生工具好難玩，唔建議你用這類短炒工具去投資，風險好高。你最好每有反彈，就分段沽出。
以下股票，都適合你年紀，你未來可以用佢地，作為投資目標。你現時可以先用多6-8萬，去分注買入一些平穏增長股(現價都合理)。其餘就等上完堂，才去慢慢計劃點樣配置。
課堂上見!