Q38781：

龔sir 您好！我遇到經濟上的困難，所以想找你傾訴一下，睇吓有冇方法可以幫到我，感謝遇上人生黑洞，唔敢同朋友/家人講出自己的困難，無論你回覆與否，都起碼提供了一個空間給我，謝謝！

我現在人到中年，疫情遇上公司結業，由月薪四萬四到最近只能揾到大約二萬（以前過度消費、少儲錢等）

但我的負債有以下：

珠海一個單位，月供七千（還有八年）

媽媽及自己的保險，每年大約十三萬（包括儲蓄、醫療、危疾等）

欠銀行P-loan 十八萬（31 Dec 24要還）

欠家人十三萬

現有資產：

港元$50，000

人民币$50，000

月供股票大概$110，000

月薪$20，000

其實銀行有好多時叫我借錢，但好像沒完沒了，但年底的loan 我是否繼續借，還是買出月供股票，盡量還清？

我已經只是每月一、兩次跟朋友到內地消費，保持朋友圈，亦沒有其他消費了

人生低點，經濟感到壓力，謝謝給我一個空間傾訴一下

龔成老師︰

其實人生總有高山低谷，但最終結果會係點，就好睇個人心態。

首先，我明白你同時間遇到咁多問題，的確係幾令人氣餒。不過，你要知道你現時架問題，唔係不能解決，但要一步步去做。

我地做投資增值，一定只會用閒錢，所以而一刻如果你係有明顯架入不敷支，就應先處理好收支平衡問題。

除了基本開支，你主要支出來自珠海物業、保險、同埋借貸。

借貸︰

> 銀行借貸如果係息口高，建議你先清還。

> 家人部份，睇下可唔可以討論下，等工作再穏定D和人工高少少，才清還，去盡量減輕每月財務壓力。

物業︰

> 如果你係自住，咁你可以保留。但投資的話，我自己本身預期內地樓市唔會再好似以往咁大升，所以投資價值係弱左。再加上你現時要盡力減少開支，建議你考慮下這個物業，是否仲有長線持有的必要。

保險︰

> 保障型保險，我建議你保留。

> 儲蓄型保險，其實增長力好一般。如果你只係供左好短期，建議你考慮唔再供。如果係較長期，你可以考慮提取(部份/全部)保單價值，去幫輕自己財務。

投資︰

> 其實中年，只要你用正確的投資方法，依然可以做到一個理想架回報，去為自己退休做準備。不過，你現先情況，應該先處理好本身財務，至少令自己收支平衡先。

> 投資部份，可能你短期內未必有空閒資金去進行。但唔好因為咁，就停左。你一定要開始學好投資，而唔係等到手頭上有錢先去學。因為要掌握好一個足以令自己長線成功的投資技能，係需要時間。同埋，要多做分析去累積經驗。所以學習方面，建議都盡早去做。

例子︰

> 我當你往後每月可以儲到$5000，當你儲15年，以10%平均年回報計，你係可以增值到200萬。

> 到時再將而200萬，投放翻落去收息資產，以6%股息計，每個月就可以有$10000被動現金流收入。所以，唔好覺得人到中年，就無乜野做到。最重要，係你肯唔肯做，同埋係唔係用"正確"架投資方法去做。

加油!!!

Q38782：

>POP MART vs 小米係咪都係增長型既公司？哩兩間公司係咪都值得長線投資呢？

>美國步入經濟衰退？怕入左美股又大跌，老師點睇？

>睇左老師之前既片，賣咗啲冇增長冇潛力既股，用啲資金入左1500中銀香港作收息股。

等緊啲2406政府債到期再想用黎投資，有冇咩港股推介？

現有

-3000港燈

-4000廖創興

-3000國壽

-1500中銀香港

>關於股息/供股的迷思

其實點解有啲公司要一年派幾次息, 每次派息都要俾券商收手續費, 感覺好唔抵...

我見老師都推介供股(平均成本), 但每次買都要收手續費, 感覺同一年派4次息一樣...

龔成老師︰

小米（1810）以手機、智能硬件，以及物聯網為平台的公司，小米專注於互聯網直接銷售產品，近年發展電動車。

電動車值得期待，但同時都存在風險。

這股可長線，現價約合理區底部，分注可以，不過都要控制注碼，預佢股價仍波動。

泡泡瑪特（9992）整體來說，不過不失，佢算是中國最大且增長最快的潮流玩具公司，但中國政策成爲風險因素，投資的話，就不建議太大注。

息口走勢唔易倒，因為係好多因素加總出黎架一個結果。較為肯定架，就係利率上調空間唔多。但幾時減息、會唔會減完又加翻，或者橫行，都係未知之數。

美股現時處於合理區較上的位置，我地投資唔會用估走勢的形式進行，而是利用策略，只要在合理區域，都可以投資。但由於現水平唔平，故要小注同分注。

至於你架持股方面︰

如果你現時接近退休年紀，買入部分收息股是可以的。相反，如果你較年青，這類收息股就不宜持有太多。

中銀香港（2388）有質素，有平穩增值+收息的能力，但銀行股就不建議佔組合比例太多（20%以下）。

你的組合中，廖創興（0194）、中銀香港（2388）都屬於銀行股，要注意避免佔組合比例太多。

中國人壽（2628）近年表現較弱，從業務上，並不是完全負面的，但增長的確有減慢情況，長線不適宜佔組合太多。

港燈（2638）是不錯的收息股，但由於現時處於高息期，相信中短期都仍然偏弱，要耐心持有。

如果你不想冒太大風險，但又想有增值加收息的效果的話，可以集中投資平穩增值股。

平穩增值股，指數基金由於是一個組合，因此在平衡風險方面較好，例如美股追蹤標普500指數的（VOO）、追蹤富時全球股市指數（VT）、追蹤港股的盈富（2800）。

另外再加其他個股：美股如巴郡（BRK.B）、蘋果公司（AAPL）、迪士尼（DIS）、Costco好市多（COST）、麥當勞（MCD）、可樂（KO）、港股如中銀（2388）、港鐵（0066）、港交所（0388）、長建（1038）等，你可以了解下，並從中選股。

其實企業派息次數和方法，有佢地架考慮，未必只係從我地投資者架角度去諗

至於券商收費這是問題，都無辦法。

如果你真係覺得唔抵，可以試下集中供指數ETF，或者提升自己投資能力，去到自行定平貴度入貨，咁就可以節省更多交易成本。

Q38783：

早 老師 我想問一下883可以入手嗎 我打算長線投資883

龔成老師：

中國海洋石油（0883）都有質素的，但就未到最高質類別，佢對油價較為敏感。

這企業都有質素，長線可以，唯一擔心是近年股價上升了不少，短期可以波動，因此，你買入可以，但最好不要一次過大手買，要控制注碼。

這企業的業務情況，以及股價，都與油價有一定的相關性，投資者要明白這點，近年油價受戰事等因素影響，出現較波動的情況，如果戰事長期持續，甚至進一步擴散，將會令油價進一步向上，或長期在高位維持。相反，如果戰事好轉，局勢轉勢穩定，就會令油價下跌。

投資者要明白一點，要準確預測到戰事、油價走勢，並不容易，所以投資者不能太過主觀。而中海油中短期的股價，也會存有一定的波動性。

雖然佢都有一定的規模，但卻不是最高質素的企業，這是由於佢的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態。沒有價格自主的能力，這令佢地的獨特性有限。這類商品企業，都可投資，但就要明白不是最高質的企業。

質素都有，但未到最高類，因此都有投資價值，但都要控制注碼，現時股價合理區較上部。

Q38784：

老師，Cost PE 甘高仲可以買嗎？

龔成老師：

Costco Wholesale Corporation（COST）現水平的確較高，如果這刻買，只建議小注，等跌再加，或慢慢儲貨。

雖然佢已較高，但又真的有質素，所以等佢大跌又不知幾時先大跌，所以，

Costco（好市多）是一家會員制倉儲式超市，專注於為會員提供優質且性價比高的品牌商品，其經營理念相當簡單，就是盡力降低成本，並將節省的費用回饋會員。

現時業務已遍佈全球多個市場，經營超過850個倉庫，當中包括美國、英國、加拿大、日本、韓國、中國、西班牙等，為會員提供批發購物體驗。此外，在美國、加拿大、英國、韓國、日本等地方提供電子商務服務。

集團在零售行業中，已經具有領導地位，以近年銷售金額計算，集團跟Walmart（WMT）和Amazon（AMZN）並列全球頭3位。

此股算是平穩增長型，適合大部份長線投資者，但投資者應以長線為核心，短期不會見到有收成，長期持有才有望獲得穩步向上的財富增值效果。

由於有質素，所以很多時候都不便宜，現價大致合理較上部，建議用分注或月供模式慢慢儲貨，之後長線持有就可以。

Q38785：

老師, Voo同盈富基金 點決擇？

龔成老師︰

我自己預期未來10-20年，中美都會係全球最大經濟體，所以2隻有長線投資價值。

至於如何選擇，我建議你用一個長線平衡組合配置角度去諗。

個別地區，不要高於組合70%。而個別企業和行業，不要佔組合15%和30%以上，銀行業更加不要高於組合20%，否則會有過度集中性風險。(盈富和VOO這些指數ETF，由於係一籃子組合，故不受企業和行業限制。)

在創建組合初期，組合金額較少，出現超標都係可以接受。但長線你要參照這指標，去維持組合的平衡性，才算理想。

總括而言，建議你2隻都買，唔好偏重單一地區，並以70%作為界線。

Q38786：

我朋友買咗呢幾隻 而家唔知放唔放好2100 2012 2826 2160 輸好多，唔知放唔放好

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

如果企業質素轉差，就要賣出。如果企業某些核心優勢減少左，就有機會減持，因此，我地要分析企業的核心因素，一些長期的賺錢能力，有無改變。

百奧家庭互動（2100）是中國兒童網頁遊戲開發商，開發與運作的虛擬世界為用戶提供在線互動娛樂和學習。

佢收入主要來自出售遊戲相關的虛擬物品及服務、為用戶提供高級功能的會員訂購費、廣告收入，及授權使用集團的專屬卡通形象所得的收入。

本身集團規模唔算好大，加上股價、收入同盈利都好波動。唔係話無投資價值，但要控制注碼，預佢有機會上落較大。如果貨多要減。

ＧＸ中國雲算（2826）和微創心通醫療科技（2160）都有長線投資價值，但佢地係風險較高類別，要控制注碼。

陽光油砂(2012)無明顯投資價值，建議長線換碼至其他優質股。

Q38787：

sir, pls be advised the vnq

龔成老師：

Vanguard Real Estate ETF (VNQ)投資目標是扣除費用後，追蹤MSCI US Investable Market Real Estate 25/50指數。

其投資範疇包括辦公室、酒店和其他房地產類別。當中佔較大比重持股，包括American Tower Corp、Prologis Inc.等。

不過股價就略有波動，同時睇翻過往股價，只是平穩增長，不是大升類，但長線用月供去儲貨係可以。

Q38788：

請問 台積電而家可以入嗎

龔成老師：

台積電（TSM）係一間有質素企業，有長線投資價值，長遠受惠人工智能發展，加上行業發展及產品應用廣泛，前景正面。

台積電在全球半導體業界有領先地位。佢專注生產由客戶所設計的晶片，現時已經是全世界最大的專業積體電路製造服務公司，半導體的應用會愈來愈應泛，加上佢有一定的技術優勢。

近年人工智能成為全球焦點，發展過程需要台積電的技術，近年不少科企為發展人工智能，為台積電帶來可觀的收入。

半導體的應用會愈來愈應泛，加上佢有一定的優勢，前景正面。

要留意，台積電股價較為波動，同時受行業週期因素影響，如果你睇好半導體發展，可以考慮這股。但投資時最好以分注模式進行，同時要長線持有，耐心等企業發展。現時約合理區中上。

Q38789：

最近有什麼潛力股 優質股可以推介下嗎？

龔成老師︰

以下是一些具增長力架優質股，適合年青至中年人士。

平穩增值股，指數基金由於是一個組合，因此在平衡風險方面較好，例如美股追蹤標普500指數的（VOO）、追蹤富時全球股市指數（VT）、追蹤港股的盈富（2800）。

另外再加其他個股：美股如巴郡（BRK.B）、蘋果公司（AAPL）、迪士尼（DIS）、Costco好市多（COST）、麥當勞（MCD）、可樂（KO）、港股如中銀（2388）、港鐵（0066）、港交所（0388）、長建（1038）等，你可以了解下，並從中選股。

如果想增長力高少少，可考慮潛力股，例如指數基金，美股可投資納指基金（QQQ），或在港上市追納指基金（2834）、港股則可考慮安碩恒生科技（3067）、中國電車基金（2845）。另外再加：美股如微軟（MSFT）、Visa（V）、ASML Holding（ASML）、Tesla（TSLA）、Amazon（AMZN）、港股如騰訊（0700）、比亞迪（1211）、小米（1810）等，你可以了解下，並從中選股，但佢地波動性和風險會較高，要自己平衡。

如果你現時無太多投資經驗和知識，潛力股這類風險較高的股票，你就不要持有過多，最多維持2成好了，甚至先集中係平穏增長股類。

若你有一定投資知識﹐潛力股比重可以相應調高，佔組合約4成，視乎你投資知識多寡和了解這些股票程度而定。

Q38790：

老師你好，又打擾你了🤣，美股高位，如果現在開始月供美股，時機上是否不合適？謝謝🙏

龔成老師：

雖然美股在較高位置，但無人知幾時回落，如果企業持續有理想業績，可能不回落。

因此，你可以利用一些投資策略進行。

首先，現時美股有一些板塊較熱，而你就暫時不要投資這類，選一些較傳統類別，例如最入門是Vanguard S&P 500 ETF（VOO）。

VOO就是追蹤美股的ETF，追蹤指數是標普500指數，當中都是全球有實力的公司，有長線投資價值。

第二，由於美股波動，加上現水平不便宜，你可以「控制注碼」去處理。

你不建議一次過大手買入，最好的方法慢慢分注（每次金額不要太過多），或以類似月供模式進行，長線持有，這是一個最好的投資策略。