Q46132：
本身我諗住cut咗佢，然後買一份 純危疾，因為佢呢個保額好細，得39萬
衣家唔cut，喺咪再另外買一份純危疾，補番個保障額？ 保額應該要100萬先夠？
買多一份$50萬純危疾，互補不足？
龔成老師︰
危疾，佢賠償係以一個指定金額計算，同醫療保不同。這筆賠償，無指定用途。
因此，危疾除了可用作抵銷部份醫療開支外，最重要係填補你因長期不能工作，所失去的收入。
由於危疾係一些大病，一般治療至休養，可能講緊係2-3年。所以，你可以用你2年左右年薪，作為基礎標準。
再按你現時和預期將來家庭開支狀況、保單條款等，再進行調整，咁就可以。
至於是否換一份新架危疾，我建議你思考清楚幾點︰
-
買新單，因為你年紀大左，保費會上調。
-
買新單，你架健康狀況會要重新審批，若果你已經有一些健康問題，或會成為"額外加價"，或者"不保障事項"。
-
買危疾，唔好純用保費平貴去衡量，更重要係睇當中保障(保障額、保障疾病、等候期、有否延伸性保障等)。
Q46133：
龔sir
我想請問中電 我$66時入 收左兩次息 而家$64.79成本價 現價$76
你覺得我應唔應該減持一半？
我其實係長擺為主的 無諗過佢呢幾個月可以升到十蚊咁多
我想聽下你既意見其實
換轉係你 你會繼續長持 不賣不買嗎？
我突然有個想法係中電減持一半 當提早收一部分息
再轉入領展繼續長持
領展我本身都有貨
想將一半中電加倉領展
龔成老師︰
你要先攪清楚，你持有佢架原因。
係收息? 定係為左增值?
如果係前者，現時中電(0002)派息相信可維持，故應持有。若為長線增值，佢未必太適合。
當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。
例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。
若果你係未近退休之年，自問又唔係十分保守，中電(0002)未必適合你用來長線部署。
相反，如果你已經近退休之年，就應以收息股為主，故中電(0002)就適合。
領展（0823）雖然增長力比過往年代略減，但整體仍是有質素，是收息及平穩增長型的房託。
不過，香港人的消費模式改變，都會對佢有點影響，例如網購及北上消費。
至於領展核心持有的商場物業，地點都不差的，長遠租金就算增長不及過往年代，也不會太過差。
另外，佢近年不斷收購海外，以及國內業務，以強化物業組合，領展其中一個特色，就是尋找一些有潛力的物業，收購後進行翻身，提高租金及物業估值，雖然這動作會提高風險度，但同時反映，佢不是完全無發展力的。
現價合理區較下部，可分注投資，長線持有，當然，都要控制注碼。
我之前出左跟進分析影片，可以睇翻︰
https://www.youtube.com/watch?v=kUU1jbE0H3k
至於領展(0823)是平穏增長股類，雖然有一定派息，但股價都有一定波動性。近退休人士，不宜持有太多。
你可以因應自己情況，決定是否換碼。
但始終領展質素係弱左，不宜持有太多。
Q46134：
阿sir，請問美股SPYD穩陣嗎？
謝謝您。
龔成老師︰
SPDR® Portfolio S&P 500® High Dividend ETF(SPYD)是專注於標普500中股息率最高的公司。
投資策略，主要是挑選標普500中股息率最高的80隻股票。雖然集中在高股息股，但由於涵蓋多個行業，故都有一定分散風險能力。
持股包括VERIZON COMM(VZ)、AT&T(T)、Edison International（EIX）等。
雖然佢係收息股，但持股部份是較高風險類，故不宜持有過多，特別係退休人士。
其次，香港人買美股收息，會被收取30%股息稅。故進行收息股部署時，較建議集中在港股。
Q46135：
老師，
有事想請教🙏🏻
我手上有啲飾金，因為我見飾金買入賣出價相差都幾大，如果將飾金轉做金粒，咁樣着唔着數？
龔成老師：
你而家轉，或遲D轉，其實都一樣，所以你轉唔轉都無所謂。
因為你買賣差價，你點都要比一次，所以你就算這刻轉，不代表無差價，因此，你就算原有飾金繼續持有，其實都無問題。
Q46136：
老師，搵你訂書可以簽名嗎？
龔成老師：
抱歉無呀，因為貨都是出版社直接寄比你地，所以不經我手，或者日後見到面，例如股票班見面，就可以簽到。
Q46137：
老師，你的股票班，報讀的課程費用可以用政府的進修基金？
龔成老師：
抱歉，【投資倍升股課程】，並未列入政府的進修基金範圍。
其實，我都有同政府傾過，但政府要求佢將課程內容大改，要改到好學術性，先合符要求。
經過研究後，覺得若大改課程變學術性，實能度將會大大減少。學員只能學到一些理論而唔實用的野。
我認為，學員學到最多野，最能實戰應用，這才是最重要。因此，決定保留原有課程。
Q46138：
老師，想了解下量子電腦行業, thanks
龔成老師：
量子電腦行業有潛力，不過，不確定性都好大，算是高風險，高潛力類。
其實佢更被視為下一場科技革命的關鍵，因為能處理傳統超級電腦運算千年也無法解決的複雜問題。
但要解決穩定性問題，因為現有的量子位元極易受環境干擾（雜訊），導致運算錯誤。
另一方面，當前也面對硬體限制，目前的機器仍屬於「雜訊量子系統 (NISQ)」，尚無法維持長時間穩定的運算。
Q46139：
請問小朋友七歲，現有十二萬利是，點分配？
龔成老師：
如果可以承受基本風險，可以將其中一半，買入指數基金，例如VOO、2800，但由於現時股市唔算平，建議用分注模式去買入，不要一次過，買入後，長期持有多年，例如10年或以上。
Q46140：
你好！本人一直有follow你嘅Facebook好幾年，學到好多投資知識，感謝你嘅分享！😊
最近我想開始月供大陸公司在香港上市嘅科技股，主要考慮騰訊控股（0700.HK）同阿里巴巴（9988.HK）呢兩間！想請教你如果只能先選一間嚟月供，應該首選邊間？ 如方便，請給予少少意見謝謝你。
龔成老師：
如果你本身無持有股票，其實最入門，最平衡的做法是投資指數基金，例如VOO、2800，因為這些都是優質股的組合，你長期月供會有不差效果。
當然，如果你月700、9988，都是可以的。
這兩股都是有質素，可長線投資的股票，如果2選1，你預700會穩陣D，而9988增長力就會強少少。
Q46141：
請問VOO and QQQ股價都好高，現時入合適嗎？
龔成老師：
現價雖然不便宜，但只要美國經濟無轉差，企業盈利無大跌，美股要大跌又不易，因此，現價不是不能買貨。
建議月分注小注，或月供模式，總之長期進行就得。
簡單來說，不建議一次過大手買入，最好的方法慢慢分注，或以類似月供模式進行，長線持有，這是一個最好的投資策略。