Q43941：
龔老師你好，我係股壇新手
早前短炒隻雙登，輸唔少
目前雙登係我賣出價左右 我有啲想買番佢
除左雙登 我仲心水周六福, 但我目前得番6萬
諗緊買邊隻好？
龔成老師︰
我建議你先了解何謂真正投資，之後先再投資，對你長線會更有利。
你要明白我地投資股票，就係等同投資在一間企業，希望佢未來自然成長，以達至財富增值的目的。
唔係做短炒，唔係賺佢個差，而係透過企業成長，去達成財富增值目的。
因此，投資係一個長線計劃，講緊未來3-5年，甚至更長時間。所以，你唔好太在意佢短期表現，只要佢有長線投資價值，你一直持有就可以。
中短期可能會有波動，但長線企業價值，一定會反映在股價上。
我20年前，都是短炒者，技術分析者，用左幾年，輸足幾年，之後長線投資，就開始不斷賺錢。
其實我當時，用左幾年時間去學分析技術，我當時不斷睇書、上堂學短炒，但最後都是輸，可能是我能力不足吧。
但我之後做銀行同證券行，見大部分輸錢的客，都是偏向短炒的。
當然，你問我有無人贏錢，是有的。但就我觀察，長線投資贏錢的人，比短炒的較多。
另外，如果你分析全球真正賺錢的投資者、經金經理，佢地都無人短炒，都是長線投資的，巴菲特都是反對短炒的，佢都唔用技術分析。
因此，我相信長線投資，是真正助我地贏錢的方法。
好多人會覺得，長線投資唔賺錢。但其實長線利用複利效應，都可以做到數倍升幅。
可能就咁講，你未入咁明。
以下2個影片，係講長線投資複利效應的威力，因為好多人都低估左長線投資個種巨額回報，所以建議你睇下。另外，股神巴菲特就係用長線投資，透過複利效應，令巴郡股價表現比美股好100倍，所以唔好低估長線投資的重要性。
[複利故事] https://www.youtube.com/watch?v=ZaVTKyodNCg
[巴郡跑贏美股100倍] https://www.youtube.com/watch?v=xm1dx0A2Q5k
Q43942：
龔Sir, 請問你點睇03416？身邊幾個朋友都話佢派息好高
龔成老師：
ＧＸ國指備兌（3416），之投資目標為透過投資於恒生中國企業指數的成份股本證券，及沽出相關指數的認購期權以收取認購期權買方支付的款項（期權金），以產生收入。
由於這ETF運作，並不是無風險，所以，高息是否保持，無人知，同時要明白有價格波動。
由於這ETF成立時間不算長，而這段時間，港股大致是向上的。
但佢始終未經歷過港股下跌週期，未知做成點，所以這個是最大風險（到時派息會否大減？價格會否大跌？無人知）。
我並不是說不能投資這ETF，而是要明白上述的風險，同時在注碼上不宜過多。
Q43943：
你好老師，想多謝你之前建議月供2800，月供左幾年 不過之後聽你建議斷供左，今年放左2次 利潤都有2萬幾 加之前利息有4萬幾
暫時仲有5手未放
呢個回報已經好滿足🙏
今次專成想同你講多謝架
我都聽你意見買左2手1211 不過唔係月供
龔成老師：
太好了！
不過你可以更進一步，我講多少少財富配置概念，
你追求實在的現金，認為要賣出賺到現金，才是賺錢，但我地最重要是講求「財富最大化」。
當一隻股票上升，例如你買入價$10，現價$15，賣出可以賺$5。
但當你套現$15後，你怎樣將這個「$15」再次增值，令你的財富增長，比留在原有股，得到更大的回報？
你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。
你要分析你的投資目標，你想潛力股的比例多少？平穩股的比例多少？組合風險程度如果？
即是你想設計一個怎樣的投資組合？長期、優質、平衡、適合你。
Q43944：
龔sir 想查詢09660會否有上升空間吗？值得长揸吗？
龔成老師：
地平線機器人（9660）從事為乘用車提供汽車解決方案，亦提供非車解決方案，使設備製造商能夠設計及製造具有更高智能水平的設備及器具。
是乘用車高級輔助駕駛「ADAS」和高階自動駕駛「AD」解決方案供應商，擁有專有的軟硬件技術。
企業有長遠發展力的。雖然業務發展快速，但企業仍處於虧損狀態，因此，可理解這股為風險類潛力股，如果睇好，都只建議小注投資，相信佢股價上落會好大，如果風險承受能力不高，就不宜投資這股。
Q43945：
你好，請問0020 值唔值得繼續揸。1.76入的。
龔成老師：
方向上可以長線，但就不建議持貨太多，因為業務都有一定風險。
商湯集團（0020）業務都有發展，但要留意政治風險。同時業務都有一定的風險。
佢係一家專注於計算機視覺軟件的人工智能軟件公司。根據報告，佢為亞洲最大的人工智能軟件公司，市場份額為中國最大的計算機視覺軟件提供商。
軟件平台的客戶數量合計已超過2400家，同時還賦能了超過4.5億部手機及200多款手機應用程序。集團並擁有8,000多項人工智能專利及專利申請。
佢專有的人工智能基礎設施SenseCore，佢已開發超過22,000個用於不同應用的商用人工智能模型，涉及多個垂直行業，已於智慧商業、智慧城市、智慧生活及智能汽車領域取得市場領先地位，服務商業空間管理、住宅物業管理、城市管理、製造、基礎設施、交通、移動設備及應用、醫療及汽車。
長遠來說，佢的技術應用將會更多，有發展力。
Q43946：
1428而家入小小有冇作為，橫行成個幾月，前2日收購公告又冇咩特別
龔成老師：
之前市場熱炒入股及穩定幣因素，現時股價已穩定。要睇有無新發展及新利好因素，如果以長遠角度分析，耀才證券金融（1428）都有基本質素，但不是最高類別，同時市值唔算大。
佢係香港的證券經紀行，除證券、期貨及期權經紀主要業務外，亦提供孖展及首次公開發售融資服務。
近年的業務做得不差，相信有長線投資的價值，不過就不是高增長型，同時，佢業務會較受投資市場週期影響。
現價合理區中上部，由於業務較波動，因此唔建議大注投資。
Q43947：
老師，巴巴有機會升到$200？
龔成老師：
其實近年已反映了業績及人工智能等的利好因素，所以要再上$200，就要有更多新的利好因素帶動，要更多實質業務帶動先得，相信中長期會見到，但短期就真的要睇有無新利好因素。
Q43948：
老師好，啱啱入門股票
想問下2800同0002適唔適合長揸?唸住用黎收息
龔成老師：
兩都適合長線投資，ETF如2800，會較平衡，因為是一個組合，你可考慮。
0002，都是不差的收息股，因此都可以。
其實，如果你目標是收息，可考慮建立一個收息股組合，例如，例如高息基金（3110）、中電（0002）、港燈（2638）、深高速（0548）、香港電訊（6823）、工行（1398）、置富（0778）等都可以，你可以了解下，並從中選股。由於收息股股價都會有上落，因此要控制每一隻佔股票組合的比例，不能超15%，最好在10%以下，而3110由於是一個組合，比例可比個股高。
Q43949：
想問下點睇6168周六福前景？想入少少，但現上升咗過了之前想入價位$35左右，這公司業務做國內黄金飾零售？
另外我都同意老師睇好機械人行業未來發展，如果我想長線投資9880 優必選，是否回返$100以下入手比較好？呢隻股用捕捉市場低位入市(用低位入多點貨)，還是用分注月供方式比較好？
龔成老師：
周六福珠寶（6168）是一間中國珠寶公司，通過集團的線下門店和線上銷售渠道提供各種珠寶產品，主要為黃金珠寶產品及鑽石鑲嵌珠寶。
根據資料，以中國門店數目計，集團於2017年至2024年連續八年維持於中國珠寶市場前五大品牌之列。截至2024年12月31日止年度，以商品交易總額及來自黃金珠寶產品的收入計，集團在中國所有黃金珠寶公司中分別排名第六及第十，市場佔有率分別為6.2%及1%。
集團的業務模式集珠寶產品的開發設計、採購供應、加盟、品牌運營為一體，連接產業價值鏈各環節。客戶主要包括加盟商與電商平台。
截至2024年12月31日，集團的線下銷售網絡門店總數有4,129家，包括加盟店和自營店，遍佈中國31個省份及305個地級市的4,125家門店；及位於海外的四家加盟店，包括泰國的兩家加盟店、老撾的一家加盟店及柬埔寨的一家加盟店。
企業都有質素的，但始終上市前財務數據可信度會減，因此未能完全確定投資價值，但整體相信都可考慮的，但暫時就不建議太大注，小注進行是可以的。
至於優必選（9880），其實這股估值難，反而會集中在企業發展，如果發展力強，你$90或$110，都會有不差回報，相反，如果發展不理想，最後都會大跌。
佢主要從事智能服務機器人及智能服務機器人解決方案的設計、生產、商業化、銷售及營銷以及研發。
的產品在不同程度上配備了感知、交互、分析及處理人類指令及外部環境（如建圖、溫度測量及人臉識別）的智能功能，範圍涵蓋消費級機器人及電器，針對教育、物流及其他行業定制的企業級智能服務機器人及智能服務機器人解決方案。
業務雖然有發展力，但生意波動大，財務數據弱，之前都是虧損，加上市場對這股有時炒作大，令股價上落好大，風險較高。暫時只建議小注投資，同時，一定要明白風險，低風險者不宜。
Q43950：
你好阿SIR，以我認知，派息應把股票持有至除淨日，但最近看到這段文字，請問正確嗎? 因我有隻股票想於除淨日前一日放售。
T+2 交收制度與除淨日的關聯
「例如，港燈（02638.HK）宣布除淨日為6月15日（週五），投資者最遲須於6月13日（週三）收市前買入並持有，即使6月14日（週四）立即賣出，仍符合派息資格。」
龔成老師︰
如果你要收息，就必需除淨日前一個交易日結束時，你依然持有該股！
如果你除淨日前一日放售，你不會收到股息。
至於T+2 交收制度，對一般散戶，可以不理，因為除淨日已考慮了相關因素。
以2638最近的實際派息來說，佢係8月26日除淨。你必需在8月25日收市後，依然持有該股，才會合資格收取9月8日的派息。