Q30961：
成哥 你好, 我是做生意, 每年大概230-300萬, 被動收入21萬每年
有屋 720萬(欠4百萬 ，每月供1.75萬)
有寫字樓（6百萬，欠230萬，每月供1.55萬)
股票250萬
定期220萬
每月還要給家用1.5萬
我想被動收入 10萬/每月, 4 年做到嗎？
龔成老師︰
如果你希望4年後每月有10萬蚊現金流，以股息率6%計，你需要本金2,000萬。
你現時財富組合配置，都算多元化，有物業和股票類。但定期增值能力弱﹐長線建議你將這部份資金配置到優質股上會較理想。
我假設投資回報有10%（連股息再投資），你每月投資$16萬 + 現有470萬資本(股票和定期)，5年後才會大約增值至2,000萬。
至於是否能每月投入16萬，你要自己再想清楚。因為你生意其實不錯，成個財富配置重點，應該集中係生意發展部份。因為一盤生意做得好，增長潛力係會高於優質股。
所以，係資金應用上，可能你先集中於生意部份會較理想。(如果你覺得生意長線會有理想發展的話)
而優質股作用，就是平衡你成個財富組合，令到收益不會過於則重在生意上。
策略上，你可以投資「平穏增長股」和「潛力股」。你每月5成儲蓄做月供。其餘先儲起，用一邊月供一邊儲蓄的策略。
如果你現時無太多投資經驗和知識，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。
若你有一定投資知識﹐潛力股比重可以相應調高，佔組合約3-5成，視乎你投資知識多寡和了解這些股票程度而定。
現時大市只是合理區中下部，你現有220萬定期(到期後)可以先投入80萬，用"分注"形式，慢慢買貨。餘下資金和每月所儲到的資金，就等大市出現回調，才慢慢加注，然後長線投資。
當然，如果你此期間能學好投資知識，令自己可以判斷買入時機，增值效益係可以加快。但如果你投資知識只係一般，就建議先用月供增值，去平衡風險。
Q30962：
Hi 龔sir，我係你股票班學生，有嘢想請教下你
- 你喺書入面每隻股票後面部分會講嘅企業估值，例如「推算2025年企業估值為1000億至2000億，投資者要再進行折現，才能知道當刻的企業價值」，我唔係好明點樣折現，可以
講解一下嗎？或者進階班會講嗎？
-
有咩情況之下，派息比率可以高過100%？
-
我分析過1373國際家居零售作為收息股都唔錯，第一，業務穩定，營業額穩步上升。第二，5年股息有向上趨勢。第三，每股盈利有向上趨勢。
第四，經營活動之現金流量5年都係正數而且有向上趨勢。第五，5年平均派比率80.5%算係高。雖然業務性質一般，但分店廣泛，而且產品持續有需求。唔龔sir你點睇？
- 我做咗個關於1373嘅波特五力分析，想龔sir俾啲意見，請看（附上檔案）。
（學生提供檔案不便公開）
龔成老師︰
1）其實係初班有教，由於現時企業估算，係用2025年，而現時你去買賣架股價係2023年，所以你要去將個價值折算翻做2023年去計。
第四堂教現金流折現法，當中有教過如何將"將來價值"，折算翻做"現值"。
如果唔記得，你要溫翻NOTE。
2）公司用現金派發利息，而不單單以當年盈利。又或者係會計問題，例如折舊這些因素，會令佢盈利變少左(但純粹係會計上)，就有機會出現派息比率高過100%。
3）國際家居零售（1373）係一間於香港、新加坡、馬來西亞西部、中國內地及澳門均擁有業務的家品零售連鎖商，提供超過2萬款家品。
集團的店舖及特許店以「日本城」等品牌經營。
過往財務數據不差，生意盈利保持增長，有長線投資的價值。現價合理區中上部，仍是可投資的。
4）基本上都可以，大致正確。
Q30963：
2388, 1299, 適合長線月供？
如果我想建立組合，又想有點收息。
-
30%, 2388, 1299, 1038，3988
-
20%, 3323，3033，2269
-
50%, 1211, 2826, 2845
龔成老師︰
中銀香港（2388）係本地銀行股裡面，是較有質素的一隻，有長線投資價值。
銀行業雖然無過往咁好賺，但當加息週期令息差拉閱，以及經濟漸漸好轉，對佢都有利。可以視為收息及平穩增長股。長線持有無問題。
友邦保險（1299）不差的，企業有一定的質素，有品牌、有規模，生意雖然做到較大，但仍有增長力，不過就不是高增長，只是平穩增長。
不過盈利就有少少波動，但這都正常，因為保險公司有投資相關收益，所以這亦會令股價略為波動。
前景方面，正面的，佢保持不同市場的發展，利用本身的品牌去加強新市場業務，而長遠的市場仍有增長潛力，長線持有無問題。
你用這2隻作為月供目標，都係可以。
但你的組合就有點點問題。
藥明生物（2269），比亞迪（1211），ＧＸ中國雲算（2826），GX中國電車(2845)，南方恒生科技(3033)，屬於潛力股。
中銀香港（2388），友邦（1299），長建（1038）、中國建材（3323）屬於平穩增值股；
中行(3988)屬於收息股。
我地一般會根據自己的投資經驗，年齡等爲自己組建一個適合自己的財富組合。
以你的年紀，應該以「平穏增長股」 + 「潛力股」作爲組合的核心。
你這個組合大致算做到這個效果，不過（2388）和（3988）屬於同一個系列。另外，(1211)和(2845)則同是新能車股。你都要留意比重，以免風險過於集中。
相反，如果你目標係平穏增長，再加一點股息，咁你個組合就太進取，放得太多係潛力股身上。你要將部份換碼至平穏增長股和收息股，才可以做到預期效果。
Q30964：
老師你好，想問下兩年幾前買左35股SE而家蝕左7成放唔放好
龔成老師：
Sea Ltd(SE)是有風險有潛力類。
佢係一家消費互聯網公司，佢開發了一個包含數字娛樂、電子商務和數字金融服務的集成平台，呢間公司經營Garena、Shopee、SeaMoney三項業務。
佢的數字娛樂業務Garena係一個全球遊戲開發商和發行商，業務遍及東南亞、台灣和拉丁美洲。
Garena提供移動端和電腦端線上遊戲。Shopee為用戶提供了一個由集成付款、物流、配送和其他增值服務支持的購物環境。
SeaMoney是一個數字金融服務提供商。SeaMoney提供電子錢包服務、付款處理、與信用有關的數字金融產品以及其他金融產品。
佢收入正高速增長，不過此刻未有盈利，在加息周期下，股價難免會受壓，這股有潛力的，如果你持貨不多，可以守﹐但你預佢依然會好波動。但如果貨多，減部分會較好。
Q30965：
呀sir,你好。我仲揸住769。請問我可以點做？
龔成老師︰
中國稀土（0769）質素依然係好一般，長線你都係要沽。
Q30966：
老師，股票已佔我資產三分一，所以我先諗債券收息好唔好
龔成老師︰
其實睇你年紀﹐如果你未近退休之年，都係投資有增長力的優質股較好。
若你要投資債券，緊記係A級先好考慮。
Q30967：
龔成老師，因身體問題不能繼續工作，有150萬現金，計過每月有8千蚊就夠，不識投資。有咩方法可以解決。。。謝謝
龔成老師︰
如果你無法工作，在理財上應該保守一點，盡量持有現金(至少有1年開支，同時保留潛在醫療費用)。
另外，可以利用這筆資金，去為自己創造被動現金流，支援日後生活。
你現時每月的生活費用是$8000，一年就是$96000，投資到約6%左右的收息股上，大約需要$160萬，和你現時的資金相約。
你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。
另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。
（你可睇下《50穩健收息股》當中仲有好多）。
你要將資金平衡的配置於這些股上，不要過份集中個別股票或行業。除了可以得到穩健的收息收，同時可有效的分散風險。
同時，都可以考慮A評級的債券，年金，風險類低的產品，甚至只持有現金或作定期。
你可以將$150萬資金，平衡地分配在上述的項目上，對你來說是最好平衡風險，同時有穩定的現金流。
Q30968：
你好龔成，先謝謝你，我幾年前睇你分析，50元入左比亞迪，長線持有。見到個價都好開心，表現非常好～
我想問下2021年買左以下幾隻 ，依家跌左唔少，值唔值得該加注或者賣左換其他呢。
-
1686 新意網 買入價 7.16
-
12 恒基地產 買入價 31.00
-
1810 小米 買入價 29.50
-
823 領展 買入價 62.83
-
1177 中國生物製藥 買入價 7.80
-
2382 舜宇光學 買入價 194.35
-
2800 盈富基金 買入價 23.39
-
1686 新意網 買入價 7.16
-
1448 福壽園 買入價 7.25
另外想問你會唔會有網上課程呀？
謝謝你～～
龔成老師︰
近幾年因爲疫情，加息等一連串不利因素，香港的股市都處於弱勢。
雖然你持有的都是些優質的股票，但因爲外圍環境，走勢都偏弱。
隨住疫情的完結，全球慢慢開放市場，相信股市會慢慢好轉，但因爲仍然存在一些不明朗的因素，所以，投資者要保持耐性。
你整體的組合問題不大，可以長期持有。
不過，你明顯對估值認知不多，很多股票出現買貴貨問題，這也是你帳面出現較大虧損原因。
未來時間，我建議你先用月供或分注去儲貨，以平衡風險。到你學會估值等投資知識後，才自己睇價入市。因為好多人都識選大路優質股，但估值就未必了解，導致買貴貨(而唔係買錯貨)，影響長線回報。
至於網上課程，之前實體股票班試過比人偷拍，之後放左上網賣，最後要搞到報海關先處理到，好煩。所以，網上類的教學，都好擔心有偷拍問題，風險太高。
股票班的內容十分重要，只有實體班，唔會開網上課程。
因為好多課堂內容，都唔想太公開，只想自己學生知，所以暫時都唔會搞。
但因爲曾有好多人咨詢，我同出版社搞過一個網上課程，教「資產配置」的，即是講述各種資產與投資工具的特性、投資價值、在財富組合中的角色，至於股票內容就唔算多。你預只有10%教股票。
如果想學真正的投資，本人還是建議參加股票實體班較好。
Q30969：
想問下邊幾隻股票可以穩定長渣架？
龔成老師︰
當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。
例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。
策略上，可以投資「平穏增長股」和「潛力股」或「收息股」。
收息股︰港燈（2638）、香港電訊（6823）、工行（1398）、恆生（0011）、置富（0778）、陽光（0435）、深高速（0548)。收息基金(3110)，都可以。
Q30970：
龔sir 你好，今次需要指導既係:
(1) 現時美元定期存款利率都有4厘幾息，請問做美元定期有冇咩注意地方?
(2) 港元轉美元(或美轉港元)需要計算匯率同手續費嗎？
(3) 現價9618京東回落左好多，在$147 $155 $177 210分注左少少，價位算唔算靚？
(4) 9618仲算唔算潛力股？ 可以值得加注？
(5) 美國銀行倒閉，點解反而科技股會股多過銀行股？
跌得多過
龔成老師︰
1）首先，要留意匯率的風險。
雖然，港元和美元有聯系匯率挂鈎，但當中仍然會有波動，點都有少少差價。
第二，無論是港元還是美元，本質上都只是「政府的票據」，對財富長遠的增值沒有太大的幫助。
同時，美元高息只是短期，當進入減息期的時候，現時的高息便不能維持。
2）對。
3）京東（9618）業務波動，但長遠不是無質素，發展仍有的，不過股價上落就較大，投資要注意風險。
你的買入價合理，可以長線持有。但緊記控制注碼，唔好過份集中單一股票。
4）一半半，算係水桶1至2。但由於佢不確定都略高，而且股價波動大，故不建議過份進取。
5）其實市場的解讀有時候是很複雜的，一個表面上睇黎利好的消息（例如：業績好），同樣都可以大跌。
所以，不要用直線思維去猜測市場，背後的因素可以好複雜。
如果你真要解釋，有可能是因爲科技公司向銀行借貸發展，好多科技公司盈利都不多，銀行倒閉，導致市場有可能擔心企業的資金鏈問題，而造成股價下調。
當然，如果美國銀行真的出現大規模的倒閉潮的話，影響到的不單單是美國本土這麽簡單，暫時美國政府算係控制住，未出現嚴重影響(但依然係有風險)。
投資總帶有風險，潛力股要適量控制注碼，減低風險。