Q27271：
你好 如領展 得1手 派股4股
長期收股 還是收現金好？
龔成老師：
除非你打算超長線投資，並一直以股代息儲貨，否則，收現金會較簡單。
Q27272：
你好，8422買得過嗎？會升嗎？
龔成老師：
企業年年虧損，業務獨特性不強，暫時未見有明顯上升的動力。不建議投資。
Q27273：
港交所前景如何？？390買左
龔成老師：
港交所（0388）有質素，獨市生意，加上香港的金融中心角色，這企業有長線投資價值。
多年來的生意與盈利都有理想增長，派息不差。
但要留意，由於這股的盈利會受股市成交影響，因此股價都會有影響。你著重長線投資就得，你買入價合理，只要持貨比例適合，就可長線。
Q27274：
請問7226早前合股，有咩睇法？
龔成老師：
不會影響本身的價值，只是一個數字遊戲，因為佢想股價好睇翻D，所以合股。
對我地分析，以及佢的真實價值，完全無影響的。
ＸＬ二南方恒科（7226）產品之投資目標為追踪恒生科技指數每日表現兩倍（２ｘ）的投資業績。
雖然我長遠認為，恆生科技指數正面，但中短期可以較波動，由於這基金有槓杆，就會令價格更加波動，其實有風險。
我會較建議投資無槓杆的恆生科指ETF（3067），始終較好。
Q27275：
老師好，我剛為銀娛估值，佢截至12/2021 EPS為$0.3，現價來說PE 153倍，如果要作股價推算，我們應怎樣掌握這現時偏高的市盈率？
我參考過去每股盈利，綜合大行報告分析，計算有代表性EPS$0.47，假設現價合理，即PE大約100倍，我用5%做PE緩衝，即95-105倍PE，合理股價為$44.6-49.3。不知這樣計算是否合理？
期待老師回覆
老師好，我另外也分析了1928金沙，由於12/2021 仍屬虧損，我參考中銀網站＂三年盈利預測＂平均數USD0.1打咗3折（較為保守），再根據上述銀娛PE95-105打75折（金沙市值約
為銀娛嘅¾）合理區為$15～$20.27，不是這個計算方法有沒有地方需要調整。
謝謝老師
龔成老師︰
其實2020年和2021年時因爲疫情，是特殊的年份，我地在計算估值的時候要將特殊的年份撇除。
銀河娛樂（00027）是優質股，但博彩業依然存在不確定因素，估值會有所調整。投資可以，但就要保守少少，控制整體注碼。不能佔組合過多。
銀河娛樂（00027）的合理區大約在$4X-5X左右，現價合理。
這種的計算的方法可以參考，但畢竟近年受疫情和續牌問題影響，較難為澳門博彩股，好做一個好穏當的估值。
金沙（1928）你的估值水平，都算合理，建議拉闊少少，始終業務因疫情變化大，估值上落都會大。但長線要看續牌等因素點發展，才去再作調整。
Q27276：
成老師，想搵你傾下計請你比啲意見
最近覺得好迷惘 搵唔到人生目標同意義
工作十年 做過幼教、空服，現職文員，我好清楚知道自己唔希望打一世工，我唔想搵定薪嘅薪金，每天為老闆工作
睇完財務自由行 明白可以遵從書中五條路去行 但現實係過往10年嘅工作經驗入邊, 我無一門專業嘅技能令到自己可以發展另一副業 我亦唔夠創新可以諗到一啲新嘅諗法去發展
股票呢條路 我上完基礎班後 都係覺得初階投資者嘅方法比較適合我（平均入市法、唔係好使睇住個市嘅方法）
而物業 同男朋友有層4百幾萬嘅樓 如要因為物業而達至財務自由 相信要一段頗長嘅時間
銷售方面 我自認面皮較薄 沒有太大信心可以行呢條路 有十五十六投身保險行業 但隨著年紀大 可以轉工的本錢真的愈來愈少（失敗了後再找返文職會較困難，因為我工作生涯中
有4/5也不是從事文職工作）雖然我知道呢一個行業可以搵到嘅錢可以好多，但始終唔敢踏出呢一步
我好希望可以盡快搵到自己興趣、可以轉型嘅事業 唔想行一邊打工一邊股樓嘅方法
真係好羨慕一些人可以有一樣自己好鍾意好鍾意嘅事 可以去堅持
我開過很多IG店，小時候賣電話殼賣泳衣賣時裝到最近賣手作零食，發現手作的零食在扣除時間成本、入貨成本等，所賺的有限，難以發展
之前亦想過在竉物美容行業發展，先學習，後開舖，但上堂後發現自己沒興趣，白白浪費了學費
最近突然有健身室創業的念頭 因為我堅持做workout數年 在想會否考個健身教練牌 從兼職教練開始 發展這門生意
知道所有野都係要嘗試先知自己有無興趣同work唔work 但始終時間、金錢也是一個考慮 怕突然興起就去讀最後又浪費金錢…
我每天都努力在想自己的人生應該點規劃，甚至希望了解自己去看「人類圖」，買報告了解自己的人生設定
無一個奮鬥目標日子每天都覺得在浪費人生
多謝你睇曬咁多字
龔成老師︰
人生有迷茫其實是一個好正常的事。
就算你尋找到你想做的事，都難免在挫折同困難中迷惘。
尋找其實是人生一個過程，你咁年輕，嘗試過咁多行業，其實已經比一般人厲害。
創業不是一條容易行的路，當中一定會遇到好多問題，不過過程入面你會更加了解自己。
如果無特別的興趣又或者專長，可以先打工，從打工生涯中吸收經驗。
你做事經常以興趣爲先，但其實真正成功的人不一定先做自己有興趣的事，反而做無興趣但有發展的事，然後再做自己想做的事情。
生意不是你有興趣就一定能夠做大，你要同時了解市場，了解消費者的需求。生意的本質是幫人解決問題。
你嘗試過這麽多行業，有沒有總結經驗。你仔細思考，世界其實是互通的，幼教，空服的經驗或者可以幫你面對你現時的工作環境。
在一項工作中，嘗試做長一點時間，我自己在銀行業都做左10年，只要有足夠的時間，你先可以真正了解到一個行業的特質。
就算是李嘉誠，在成立現時的商業王國之前，都曾經做過打工仔，穿過膠花，並不是一步就到達現時的狀態的。
所以凡事不用太心急，一步步來，在迷茫中摸索，先能夠看清前路。
另外，有些人最終都可能係打份工，無去做創業、建立團隊或者做專家。純粹做投資，去達至財務自由的目標。
最重要，是你找到一個方向，之後盡力向這個方向走，咁就可以。
Q27277：
老師！我有事情想唔通，想請求你明燈指引.事源係我三年前買了一單棟舊樓(樓齡35)單位和家人自住，可惜近呢一年周圍環境變化令我感到好困擾，唔知好冇賣出單位轉租
其他地方。但眼見而家市況一係要蝕賣，一係唔知等到幾時先有人買，真係唔知點算。
那些變化包括
-
鄰居幾近換哂做租客，有三户都有吸煙習慣，之前疫情嚴重期間其中兩户分別都會在半夜醉酒吵鬧打架(最近好返小小)。
-
樓下牆身有滲水情況，仲投訴上嚟唔只我一户(仍在調查中)。
-
我自己裝修師傅手工似乎唔太好，室內已經開始有老化(廁所水喉接駁微裂, 牆身油漆微裂)…
我真係灰左，都唔知處理得邊樣，懇請指點
龔成老師︰
這種狀況的確令人困擾。
如果買入單位之後發現情況有不對是應該要解決。
你目前面對的問題是居住環境和物業本身有問題。
如果現時賣出，的確比較難賣到好的價錢，而且自住樓不建議輕易賣出。
解決的辦法是先放租，自己尋找合適的居住環境，等樓市氣氛轉好，有願意出好的價錢的賣價時再賣都未遲。
但我建議你再客觀審視一次，你個物業價值。因為鄰居係租客，代表有機會不是長線問題。至於其餘都是裝修相關，係可以解決。
所以，到將來是否沽出，你應集中考慮物業其他價值，例如交通/生活配套、附近地區整體發展等，而非只考慮你所提到的3個因素。
Q27278：
老師，可以問吓有關9成按揭的問題嗎？
我個仔是專業人士，月入約7萬，但暫時未夠三成首期買樓，但佢又想買，想問一問，9成按揭的利與弊？你有空才回答！萬分感謝
佢想買大概800萬的物業
在商務書局找到了，我會先睇，再俾仔睇
龔成老師︰
9成按揭的好處，當然是可以充分利用借貸的能力。這樣你就可以空出更多資金，進行其他投資增值。
不過，9成按都有壞處。
首先，銀行批核會較爲嚴格，銀行會根據買家的情況估算還款能力，不過你的兒子是專業人士，應該這方面問題不大。
第二，申請人要有固定收入，並可提供糧單之類紀錄；加上主要收入是來自香港；否則，便屬於不符合資格，無法申請九成按揭。
第三，9成按揭的保費同8成按揭的保費相差好大。
第四，全球進入加息週期，長線利率有機會進一步增加，令你仔仔負擔大左，佢都要考慮這個部份。
9成按揭主要是擔心銀行批核的問題，如果萬一銀行批不足，買家就要準備多些首期又或者最好有擔保人，咁樣銀行會較爲願意做借貸。
Q27279：
龔sir，請問9868是否在美國有上市？現價入貨可以嗎？
龔成老師︰
對，小鵬汽車（9868）在紐約有上市，編號：(XPEV)。
小鵬汽車（9868）有質素。
佢係中國領先的智能電動汽車公司，以領先的軟件、數據及硬件技術為核心，為自動駕駛、智能互連和核心汽車系統帶來創新。
佢於2015年成立，根據數據顯示，可以話係中國唯一一家自主開發包含定位和高精地圖融合、感知算法和傳感器融合及行為規劃、運動規劃和控制的全棧式自動駕駛技術，並在量產汽車上應用該軟件的汽車公司。
佢最新自主研發的自動駕駛系統XPILOT 3.0是目前市場上所售汽車中已採用的最先進的自動駕駛技術之一。
佢於2020年係廣東肇慶工廠開始生產 P7。通過與海馬的承包生產合作在其位於河南省鄭州市的工廠生產G3。肇慶工廠和海馬工廠的年產能分別高達10萬輛及15萬輛。
佢的實體銷售和服務網絡包括約200間門店及數十個服務中心，覆蓋中國幾十個城市。全國共有約200個小鵬品牌超級充電站，覆蓋多個城市。
近年業務增長快述，加上前景正面，這股有長線投資的價值，現價不平，如果無貨，可以先小注，但預佢股價上落會大少少。
Q27280：
龔sir，前排見到你分享止蝕呢個概念，不過你一直分享心理質素嘅重要，如果係優質股，要睇長遠發展如何，而唔好被當刻嘅市場因素左右咗，所以我有啲矛盾…以美圖嚟做例
子，我2.6元買，而家0.9元，我係一直冇理佢由佢，定係我應該止蝕？
龔成老師︰
我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。
美圖公司（1357）業務有風險。算是有危有機類的股票。
佢主要從事提供在線廣告及其他互聯網增值服務；以及開發、製造及銷售智能硬件產品。
業務變化始終大，投資價值一般。業務弱左，政策風險大左，再加上環球股市氣氛不穩定，這類股票首當其衝。
由於佢業務有轉弱情況，因此，建議減持這股，其實你在分析時，最重要了解佢的業務本質，以及業務情況。