華富財經 Quamnet.com Logo
龔成
2022-08-17 09:00:12

【龔成問答信箱】(Q27301-Q27310)

Q27301:

你好,龔老師,本人持股如下,現30歲有小朋友所以風險接受能力中等。希望可以增長比我兩夫婦退休及小朋友將來學費。

港股

3067 $13.8 1000股

1810 $11.4 600股

823 $66.7 100股

3380(停牌)$4.48 5000股

美股

VOO $378.9 6股

NVDA $257 19股

AMD $128 15股

現時除左小米,823, 其他都蝕緊,美股更跌左四成,我本身好睇好半導體行業 錢都吾急用可以放多幾年,請問是否繼續持有?

另外打算黎緊月供

$1000 2388

$1000 6823

$1000 1211 請問好嗎?會吾會科技股比重太多?請問有咩建議? 感謝你

龔成老師︰

你的組合中,内房,物管,因爲政策監管,加上内房本身存在高負債問題,質素只屬於中等。龍光集團(3380)始終負債高,因此不建議持有太多,但現時企業停牌,你可以做的事不多,如果復牌,建議減持小部分,平衡風險。

你持有的美股都有質素,其中AMD和NVDA的風險會較高。現時全球進入加息周期,這類高風險股票會相對波動,但你注碼不多,可以守。

其他股票問題不大,可以持有。

你30歲,應以增值為主,建議你用「平穏增長股」 + 「潛力股」作組合,去創造一個增值平台。

中銀香港(2388)係本地銀行股裡面,是較有質素的一隻,有長線投資價值。

銀行業雖然無過往咁好賺,但當加息週期令息差拉閱,以及經濟漸漸好轉,對佢都有利。可以視為收息及平穩增長股,可以月供。

香港電訊(6823)是業務穩定,有一定的優勢,過往的派息比率達100%,是典型的收息股。你由於年紀尚輕,而且風險承受能力偏高。如果想增長力高小小,可以換馬到其他股票。

比亞迪(1211)係潛力股,業務發展理想,但股價上落會較大,而且現時的估值偏貴,最好等回到$200才月供。若你好想,都小注好了。

又或者可考慮GX中國電車(2845),這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股(002594),以及與中國電動車產業有關的股票。

你的行業比例平均,無特別偏重邊一個行業。

若你想增長力較高,可以儲安碩恒生科技(3067)。但此股波動性會較大,要睇翻你自已風險承受能力。

基本上,以你小朋友年紀計,持有以上股票都係可以,但你明白當中風險。

另外,你可以考慮埋美股指數ETF,令組合分散風險能力更高。VOO和QQQ,前者追蹤標普500,算平穏增長型,類似盈富。QQQ追蹤納斯達克100指數,風險會較高,風險度近似3067。

現時大市只在合理區,資金唔好盡用。最好留有部份,等大跌市出現時,可以用來掃貨。

Q27302:

Hello老師,想問下你覺得通脹買商品好嗎,點睇PDBC呢隻etf

龔成老師︰

我地好少因爲通脹而去買商品,反而可以以ETF的平貴度去制定買賣策略。

Invesco Optimum Yield Diversified Commodity Strategy No K-1 ETF (Fund) 是一種積極管理的交易所交易基金 (ETF)。

旨在通過投資與商品掛鉤的期貨,或一些全球化和交易量大的商品金融工具,以達至其投資目標。

該基金尋求使用旨在超越 DBIQ Optimum Yield Diversified Commodity Index Excess Return表現的投資策略,提供長期資本增值。

現時ETF處於合理區偏上,如果想投資,都可以小注。

但你要明白,一般情況商品會受惠於通漲而價值上升。但現時通漲是由不同因素組成,唔係一個"通漲 = 商品上升"咁簡單。

此ETF你可以投資,但價格唔平和本身商品獨特性唔高,投資價值只係中等,故不要大注。

Q27303:

  1. 呀sir 想問 長期負債/股東資金係咪就係 4.4/17.34?

  2. 購買固定資產係唔係資本開支?仲有其他項目係資本開支嗎?

我見無型資產先係佢主要投資活動既支出,作為一間製藥,研發企業,須要投資落技術上。所以無形資產都係佢既資本開支?

  1. 呢兩個數相減除2 係唔係就係平均應收賬?

呢個數係唔係銷貨收入?

sorry 唔想d 數做錯 麻煩呀sir

龔成老師︰

  1. 如果係中銀個網,就會叫"總負債 / 股東資金比率 (%)"。

簡單咁講,就係將總負債,除以股東權益。

  1. 係,基本上支持佢持續營運的投入,都係資本開支,例如買機器(固定資產)、買技術(無形資產)等。

你可以用search keyword功能,直接在年報中找"資本開支"。如果無,可以係投資現金流中,找出相應項目。

  1. 平均應收帳,係用(年頭+年尾)/2,如果你唔肯定網上個數,最好找年報上數據作參考。

"營業額",係億勝(1061)係銷貨收入。其實佢自己公司營運所得,基本上就會放係營業額。如果你想知佢細目,就年報損益表個營業額左則,會有個附註號碼。

你去翻個個附註,就會見倒具體營收是如何分佈。

Q27304:

龔sir, 你好! 我宜家持30-40萬現金留待明年換樓用, 如果我想投資呢幾隻(002, 2638, 939, 3988)股票收息, 請問這樣可取嗎?

龔成老師:

建議你最好有一半或以上,持有現金(做定期都得)。

部分投資收息股,始終股票價格都會有上落,當你需要資金時,無人知當時股價情況,因此都要考慮這風險。另外,不能太集中在銀行股(可以有,但不能集中),上述的都可以,但就集中在電力及銀行,你最好同時考慮其他類別,組合就會更平衡。

Q27305:

請問龔sir,Unity(u) 適合月供嗎?

龔成老師:

Unity Software Inc (U)是一家創建和操作互動式、實時3D內容的平台。

集團令創作者,可以利用UNITY工具,去創作3D遊戲。現時排名前 1,000 的移動遊戲當中,有超7成是使用 Unity 制作。

透過其技術創作的遊戲,可以部署在不同的領先平台,例如任天堂、Play Station、IOS、Android、Window等。

業務有投資價值,佢過去多年營業額都有增長,但由於集團上市時間唔算長,而且依然未做到收支平衡,故不確定性較高。

最多只宜小注,你可以分注收貨,但總投資金額不能過多。

Q27306:

262 在$0.1有貨,該如何部署

龔成老師:

迪臣發展國際(0262)業務持績向下,業務無獨特性,加上持續出現虧損,這企業你最好賣出。

Q27307:

龔成老師您好,我家孩子現在還在讀書,之前有些衝動沒了解清楚就買了06862(27買入),09959(23.3買入),09988(184買入),

不過這三個現在的價位較之前低了很多,不知您是否方便指點一二?

請問這些股票是否值得繼續持有,孩子後續安排投資組合有什麼需要留意的?謝謝您

龔成老師︰

首先你要明白一個概念,我地持有一隻股票與否,關鍵位是企業質素、前景,不要被買入價影響。因為我地買股票就是買企業。

如果企業質素轉差,就要賣出。如果企業某些核心優勢減少左,就有機會減持,因此,我地要分析企業的核心因素,一些長期的賺錢能力,有無改變。

海底撈(6862)可能最差時期已經過,但要留高,中短期仍波動,之前中央推節約飲食,對佢會不利。佢之前更要關分店。

不過以長遠來說,這股仍有質素的,佢以「海底撈」品牌經營火鍋店及外賣業務,火鍋菜單由鍋底、醬汁蘸料以及在鍋底烹飪的食材三個主要部分組成,可點單鍋、鴛鴦或四宮格鍋底組合,餐廳提供多種調料及食材,以及供應小吃、酒和飲品。

在中國有好多分店,以及外國都有。有規模,有品牌,整體正面。相信長遠仍有發展的。但相信以佢的情況,仍要弱一段時期。現貨不多的話,可以守。

聯易融科技(9959)屬有潛力有風險類別。

佢係一家中國供應鏈金融科技解決方案提供商,佢旗下的雲原生解決方案可優化供應鏈交易的支付週期,實現供應鏈金融全工作流程的數字化。

幫金融機構客戶提供供應鏈金融科技解決方案,提升整個供應鏈金融生態系統中的透明度和連通性。

長遠發展力,有,不過估值好難,只可以話,小注投資無問題。但若佔你組合較大比重,就建議沽少少,換至其他優質股。

阿里(9988)有長線投資價值,但近期受政策風險影響,暫時唔建議持有太多。

若這組合是為小朋友儲錢,這些股票都可以,但風險略高,不宜大注。

其實,小朋友由於可投資時間長,策略上十分簡單。你可以儲盈富(2800),佢係包括數十間質素不錯上市公司股票的組合,有一定增長力。

若你想增長力較高,可以儲安碩恒生科技(3067)。但此股波動性會較大,要睇翻你自已風險承受能力。

基本上,以你小朋友年紀計,持有以上股票都係可以,但你明白當中風險。

操作上,建議你用月供模式儲貨。每月大約用一半儲蓄,去做月供,餘下一半就先儲起,去等大跌市機會。如果你覺得太複雜,可以每月全部儲蓄都做月供,都係可以。

Q27308:

龔成老師,想問一下,如果股票擺喺證券行

而證券行倒閉

我嘅存款保障上限是否500,000?

龔成老師︰

《證券及期貨條例》下的投資者賠償制度設有投資者賠償基金,會為因中介人違責而蒙受損失的投資者提供賠償,每人上限50萬賠償。

若合規銀行或證券行出現破產,你投資證券之損失,可以從<投資者賠償基金>中,獲得最高50萬保障。

當中賠償細節,你可以參考翻<投資者賠償有限公司>網站,會有較詳盡解釋。

其實在一般的情況,就算股票行倒閉,你的貨都無事,因為佢只是中間人,你的貨無影響,除非佢中間有造數,例如每次你買貨,都無同你買。

Q27309:

龔成老師

唔好意思,我想問問

700 我在$360買入500股

9618 我在$266買入500股

請問股價會短期重上嗎?以及我如何部署?

謝賜教

龔成老師︰

首先你要明白一個概念,我地持有一隻股票與否,關鍵位是企業質素、前景,不要被買入價影響。買入價只是一個心理因素,如果企業核心因素未被影響,我地係唔需要理會。

騰訊(0700)有潛力,但因爲政策監管,中短期較弱,但長遠仍然看好,你的買入價不貴,可以守。

京東(9618)業務波動,但長遠不是無質素,發展仍有的,不過股價上落就較大,你的買入價合理,長遠可以守。

我地不會估走勢,不過會用「分注」的形式制定入市策略,長線持有。

你30+歲,應以增值為主,建議你用「平穏增長股」 + 「潛力股」作組合,去創造一個增值平台。

騰訊(0700),京東(9618)都是潛力股,而且都屬於科技行業,我地投資同一行業要控制在30%以下,同一股票在15%以下,避免風險過於集中。

若你有太集中情況,可轉部份至其他行業潛力股,例如港交所(0388)、中生製藥(1177)、GX中國電車基金(2845)、安碩納指一百(2834)、QQQ等。但佢地波動性和風險會較高,你要自己平衡。

但由於潛力股有一定波動性,你投資經驗較淺,暫時不宜持有太多,大約3成好了。到你累積到較多經驗,才慢慢將比重提升至5成。若你已有一定比例,就應加入平穏增長股。

現時大市只在合理區,記住資金唔好盡用。最好留有部份,等大跌市出現時,可以用來掃貨。

Q27310:

龔sir3988

7月6號除淨日,現時已過了

想問如果依家先入貨

係唔係就要直接等下一年7月6號先有息收

係唔係冇太大意思, 定股價會再跌?

龔成老師︰

如果你想買股票收息,要留意3個日子,一是公佈日期,二是除淨日,三是派息日。

以中行(3988)為例,公司2022年3月29日公佈2021年末期的派息,可以收到約港幣0.25元港幣利息。

你要在除淨日之前買入先可以收到股息,中行這期利息的除淨日是7月7日,即是說你要在7月6日買入。

第三,派息日期是8月10日,如果你在7月6日或之前買入,在8月10日就可以收到利息,而不是下年(2023年)的7月6日。

至於下年的利息,你要留意公佈日期,每一年都不一定,但相差的時間不會太遠。

你對派息運作,似乎有點誤解。

「除淨日」那天,股價就會扣除派息部份,例如原來股價$10,派息$1。那麼「除淨日」就會將股價,從$10下調至$9,以反映派息動作。

由於「除淨日」股價會下跌。而下跌比重同收到息係一樣,所以只係左手交右手動作,你唔會在此期間因買/沽貨,出現任何著數。

我地決定是否投資一隻股票,關鍵位係睇企業質素和前景。中短期因素,我地係唔需要太在意,同時不會估股價的走勢。

中行(3988)有投資價值,現價合理。但佢主要係收息,增長力唔明顯,適合將/已退休人士。