Q46381：
早晨龔成老師
請問老師想買的收息股
請指教
龔成老師：
投資收息股，可以作為財富分配的一部分，但不建議將全部資金都投資，因為一定要留有一定的現金作防守，以備不時之需，以及若大市下跌，可以買平貨之用。
你可以建立一個收息股的組合，目標是5%以上股息率的收息股，以下可以參考下，例如高息基金（3110）、恆生高息基金（3466）、港燈（2638）、深高速（0548）、香港電訊（6823）、工行（1398）、置富（0778）等都可以，你可以了解下，並從中選股。
由於收息股股價都會有上落，因此要控制每一隻佔股票組合的比例，不要超過15%，而3110、3466由於是一個組合，比例可比個股高。
3110、3466可以視為收息股的組合中其中一員。這基金可投資的，現價合理，可分注。佢是投資香港大型，派息較高的上市公司。
這是不差的收息組合，但增長力不強。
Q46382：
龔Sir你好，請問可否分享你對1071華電及3069華夏生科ETF的睇法？兩者現價屬合理嗎？謝謝你，祝你身體健康，萬事勝意！
龔成老師：
華電國際電力股份（1071）主要從事發電及供熱業務。所生產的電力全部輸往電廠所在地的電網公司。
運營中及在建的發電機組分布於山東、四川、寧夏、安徽、河南、河北、浙江、內蒙古及廣東省╱自治區等地區。
業務都有基本的增長，但就不是高增長，同時企業都有錢賺。
這股都有質素的，投資收息及平穩增長，現價合理。
華夏恒生生科（3069）主要係追蹤恒生香港上市生物科技指數之表現。
指數包含51隻成份股，當中有「藥品」、「⽣物技術」等公司。較為人熟識的，有藥明生物（2269）、京東健康（6618）、中生（1177）等等。
隨著人口老化和人均收入增加，對優質醫藥的需求只會有增無減。此股都有質素，可作長線投資。但你預佢會較波動，最好用月供模式儲貨，並長線持有會較好。
Q46383：
AI選股得唔得？
龔成老師：
不要只靠AI，一定要配合自己分析能力，否則好大獲，因為我見現時AI，有時會連該股票做乜生意都搞錯左，要小心。
Q46384：
阿sir.戰爭黃金無大升，係咪唔可以再當作避險工具？
龔成老師：
因為金價近年已上升好多，部分更反映了全球戰事風險，所以就算發生，已經無太大上升作用，主要原因是已在高位，但在角色上，仍是避險工具。
不過，我不建議為了估戰事發展，將資金轉來轉去，反而做好長期配置更好，黃金可以佔組合一個較少比例，原因並不是現時有戰事，而是任何時間都要，作為配置一部分。
Q46385：
早晨龔Sir
怎樣睇VEU？
現階段分批入VEU, 每2,3天入少少既型式去吸納下跌中貨合適嗎？
龔成老師：
Vanguard FTSE All World Ex US ETF（VEU），投資目標是追蹤 FTSE All-World ex US Index（富時全世界不含美國指數），旨在反映美國以外已開發市場與新興市場的股票表現。
投資組合極其分散，持有超過 3,000 股票，涵蓋日本、英國、中國、法國、加拿大等 40多個國家。
這基金有投資價值，如果你組合本身有美國股票，可以加上這ETF，整個組合會較平衡，這ETF可以用分注模式長期儲貨。
你可以用你所講的策略，只要慢慢分注就得，計好總投入金額。
Q46386：
老師，隻5號我$123持有，不打算賣收息😊如果100再加倉，可以嗎？
龔成老師：
可以，匯控（0005）有質素，業務有持續好轉情況，是收息及平穩增長類股。
整體來說，匯豐長遠仍是有質素有發展的企業，不過，銀行業的賺錢能力比過往年代減左，因此不能視為高增長股，但當經濟不差時，始終都會有錢賺，因此都有投資價值。
相信長遠是收息股，及有基本增長力，但並不是高增長類。
Q46387：
請問老師，本人現持1211的股份為1700股（平均價為120），1810為3200股（平均價為54）應可以點去部署，感激！
龔成老師：
要睇你持貨佔組合比例，如果不過多，就無問題。
你預兩隻都是有潛力有風險類別，上落會較大，所以要控制好注碼，1810潛力會較高，但風險都會較高。
比亞迪（1211）相信短期仍會面對中國車市較一般的情況，短期股價有機會較波動，不過以長遠角度分析，其實近年企業業務發展理想，研發不斷進行，汽車賣得好好，電池技術發展得很好，出口部分理想，企業長遠發展正面。
現時已經成為中國電動車市場的一哥，同時品牌及銷售網絡理想，長遠仍有發展，不過，股價就有少少波動。
要控制好總投資金額，這股佔整個股票組合，最好在15%以下。
小米（1810）你預佢短期仍會較一般，因為佢之前升太多，加上品牌轉弱及近期汽車多事故，要建立品牌不是短期，要比時間佢。
但佢長遠發展仍是正常，不過可能要比多少少間佢。你見佢過往造車，3年時間可以由零開始成功，反映企業發展強，現時面對較弱的環境，但可以好轉。
如果用較長遠眼光分析，其實小米近年的業務發展唔算差，無論手機、ＩｏＴ、智能車，各類業務部分，都有相當的增長，除了反映不同類別的業務都發展理想外，相信小米的品牌及產品性價比高等因素，能帶動整間企業發展。只是在近半年，業務有點轉弱，只核心質素仍在。
不過，你預佢股價上落大d，如果明白風險，而你貨不是過多，可持有的。
Q46388：
你好，我有理財問題想請教你呀
我而家35歲，做銀行月入4萬，同太太供緊一層樓，月供2萬。
我手上有現金約50萬想投資，想月供2800(佔3成）及3067(佔1成）另外VOO(佔4成）vxus(佔2成），會分注買入，另外呢幾隻股票都會月供，其望15至20年內可以財務自由。請問呢個大方向岩唔岩？
但而家打仗，請問短期內策略上有冇野要改善
龔成老師︰
大方向可以，以你年紀係以增值為主。
如果識選股，自行配置優質股，長線增值效果會最好。
但如果不會選股，按你規模去做，長線慢慢月供儲貨，都係可行做法。
因為ETF具分散風險能力，而月供可以平衡你買貴貨風險，故係可以。
月供係一個長線策略，中短期波動唔洗理，只要核心質素無變差，長線一路供係最穏當做法。我見好多月供架人，自行中途因應市況停供，反而最終嚴重影響左個回報效益。
至於能否做到財務自由，你要睇下自己個目標。
若你希望財務自由後，每月有2萬蚊現金流，以股息率6%計，你需要本金400萬。因此，我地要以這400萬作為目標，透過一些有增長力的股票，去累積這筆資金。
到你足夠本金時，再將這些有增長力股票，換成為收息資產(如收息股、年金、債券等)，去創造你需要的2萬蚊現金流。
Q46389：
龔sir , 我有朋友買咗呢一隻ETF ， 每個月收到大約七至8%嘅利息
我係一個中風嘅投資者
你覺得呢隻基金係唔係適合我哋去投資？
Syfe Income+ Max 簡介
產品名稱：Syfe Income+ Max（收息寶 - Max 組合）
推出時間：2026年2月（香港市場最新推出，底層組合模擬或回測數據由2025年底開始）
目標年化派息率：8%–10% p.a.（每月派息，target monthly payout up to 10% p.a.），但唔保證，受市場波動影響。派息來源主要來自組合產生嘅收入（股息、利息、期權策略），可能包括部分資本（out of capital）。
投資組合組成（大約分配）：
• 55% 股票（equity securities）：聚焦高質素、低波動公司（例如科技、消費股），美國主導。
• 35% 固定收益（fixed income）：債券等，平均信用質素 BBB+，用嚟產生穩定收入。
• 10% 黃金（gold）：作為對沖。
• 整體用 Active ETFs（主動管理 ETF）由大資產管理公司（如 PIMCO、BlackRock 等）發行，加入期權策略（options overlay）嚟提升收入（特別喺波動市場）。
風險評級：中高風險（moderately high risk），Beta 約 0.19
我其實係有一筆200,000嘅港幣，定期係每兩至三個月做一次
我見到呢一個基金，佢好似低風險回報都有六至7%年利率，所以我想考慮將一半100,000嘅錢轉過去
但係因為第一次接觸呢一類型嘅投資
所以想問吓你有冇經驗或者意見
龔成老師︰
- 首先，佢唔係低風險，反而係高風險。
因為固定收益係投資在BBB+債券，即係高息債券(學名︰垃圾債券)。佢地違約風險高，所以才會咁高息。
- 不保證派息，而且佢當中係有用"期權策略"，所以先咁高息。
但而隻基金好新，未經歷過大升大跌架市況，未知到時會唔會出問題。
- 我唔係話佢有問題，或者一定做唔到預期回報。但你要明白，佢係有一定風險(而唔係低風險)。
以下我再講一些基本概念。
基金是一個集體投資的模式，原理是每個小投資者，夾錢比基金，然後就有基金經理去進行投資。
每一個基金都有不同的主題，投資股票、地產、商品、衍生工具等。又會投資不同的地區，環球、中國、美國、新興市場等。
至於基金是否有投資價值，就要睇每一隻個別的情況，有部分不差，但也有部分不好，因此好難話好定唔好，另外要留意，基金一定會有收費，變相令回報細左。
在選擇基金時，第一，要了解該基金投資的項目，是否你自己睇好，例如新興市場？該市場是否你都睇好？又例如投資某國的房地產，你自己是否睇好。
如果是一般的股票基金，你最少要知道佢10大持股，確定這些股票是有質素，才好考慮是否值得投資。另外，要了解主要持有資產的風險度，整個基金的風險度、投資策略，是否與你的投資目標配合。
另外，你可睇佢過往的回報，是否跑贏大市，如果是，才有投資價值。
另一方面，除了傳統的基金外，交易所上市基金（ETF）都是一個選擇。如果兩者的表現差不多，就應該選ETF，因為管理費一般較低，但如果該傳統基金表現較好，或你較睇好，或無ETF作替代，你就應該選該傳統基金。
Q46390：
另外，我想了解下你點睇2318同0001，都是現金流強的企業嗎？你認為值得長線投資嗎？
龔成老師︰
2隻係平穏增長股，現金流和業務都算係穏定，有長線投資價值。
中國平安（2318）之前表現較弱，到近期好轉。
之前影響股價因素，是內房及延伸資產問題，會對平保中短期不利影響。
而現時內房問題開始好轉，起碼中國政府表明要穩內地房產，對這部分資金會利好翻。
因為平保除了有企業本身的保險業務，會將浮存金進行投資，因此當中國類資產質素轉弱，都會對這企業的資產質素造成影響。
如果用較長遠的角度分析，平安不是無質素的，但的確要等中國經濟及資產質素較正常，這股表現才會較好。而這股近2年表現較弱，主要受兩大因素影響，第一，業務，第二，資產質素。
平保這類保險公司，會持續收取客戶的保費，這些浮存金就可以進行投資。但由於近年中國類的資產質素轉差，都影響了平保的資產質素，無論是與內房相關，又或同其他行業相關的。
長遠來說，企業仍是有質素的、有規模、有品牌，因此發展力仍在。這股長線投資價值依然存在，現價算係合理區中間，但由於短期股價仍波動，因此投資者投資，都要明白這方面的風險。
長和（0001）有質素的，是一間綜合企業，有平穩增長能力，但不是高增長。
業務有：港口、地產、零售、基建、能源、電訊、生物科技等，每一做領域都做得不差，現金流穩定及理想，不過，由於業務規模已大，已經不是高增長模式。相信長遠，有基本增長能力。
如果你追求收息及少少增長力，這股可以，現價合理，可分注投資，長線持有。