Q17871：
龔成老師你好, 有啲關於股票既野想問吓你意見
我而家29歲, 月入19k番office工, 對投資冇咩概念, 幾個月前先開始買第一隻股票, 先發現原來自己對呢方面都有興趣
而家日日聽財經黎學睇圖, 同多睇老師你同其他投資人既page, 見到有唔識既野都會自己google黎學
終於由連一手係咩都唔知到到而家知道咩野係10天線20天線RSI EPS同PE
現時擁有有關投資資產如下:
基金BlackRock World Gold 50%+ Health Science 50%: 月供$4000
月供股票2800盈富: 月供$3000
個股:
0005匯豐
1810小米
1137香港電視
1475日清食品
2338濰柴動力
1787山東黃金(短炒用途就放)
想問以下嘅問題:
- 以上投資組合有冇問題? 可以如何加強? 以我年齡係咪最好放左0005佢先?
- 睇你page知道老師你好提倡研究企業本身有冇潛力, 但初接觸年報/財政報告, 其實應該要點睇? 係咪profit同每股盈利每年增長就代表係好?
- 想睇書黎增值自己投資尤其是股票方面既知識, 應該先睇老師你既邊本書好?多謝你解答我問題先！ 龔成老師：
提翻你，技術分析、睇圖，其實是無用的。
我20年前都學左好多技術分析，用左幾年時間去學、去研究，用幾年輸足幾年，其他我決定完全唔用，就開始賺錢。
好後悔浪費左幾年時間去學一d本質係錯的野。
之後，我發現巴菲特同其他賺大錢的基金經理，都好清楚咁講技術分析無用。
1）匯豐（0005）唔太適合你的年齡。
當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。
例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。
至於其他，無乜問題。
2）《年報勝經》有詳細講述的。
你要了解主席與管理層的討論，之後就是睇「損益表」及「資產負債表」，你要在損益表了解佢的生意結構、經營惜況，在資產負債表中了解佢的現金及負債等情況。
你最好睇5年的年報。
3）你可首先睇：
《80後百萬富翁》
《股票勝經》
《財務自由行》
《年報勝經》
之後再睇其他。
Q17872：
成哥 ，我是一個海外醫科生 想趁著暑假買股票學投資 20萬現金 目標三年內100萬
打算持有 1833 9988 788 3918 0012 0066 1177 0354 0823 1810 1928
-
應該持有的股票？
-
佔比幾多？
-
我相信可以承擔高風險的股票投資，可否介紹其他潛力倍升股？多謝老師，祝生活愉快
龔成老師：
1）投資組合唔好太散，否則會好散管理，同錯，當你買入股票後都要持續掌握企業的經營情況。
你可以考慮盈富（2800）、恆基（0012）、港鐵（0066）、小米（1810）、金沙（1928）。
中生製（1177）、平安好醫生（1833）、阿里（9988）你就等跌先考慮。
2）盈富可以佔較多，餘下就按比例持有就得。
阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。
Q17873：
龔老師 想問 我54.8 53.1 38.5 入左00005 見佢近日32-33 應該繼續溝貨嗎？
等我遲d可以更易放走？
龔成老師：
匯控（0005）賺錢能力與增長力的確弱左，但又未去到完全無質素，近期股價受壓，除左佢經營環境影響，佢派息問題都是因素，因為市場一向理解這股是「收息股」。
如果你投資目標是增值，根本不適合持有這股。如果你投資目標是收息，就可以持有。
不過，同一股唔應該佔你組合比例太多，特別是如果該股的質素不是最高級別。
我從股息角度分析這股。
相信長遠是收息股，但股價增長就有限。可以先從佢近年唔派息及財務情況分析。
首先睇翻佢財務數據唔算話特別差，今次要停派息，主要原因係接獲英倫銀行透過審慎監管局發出的書面通知，要求匯豐取消派息。
所以，佢並不是自己好唔得，而去到要唔派息，而是因應翻英國監管局要求，才這樣做，所以，雖然是不好的利息，但不是核心性不利。
停派息對收息股從來都不是好事，但在這全球經濟咁差時候，為集團預留一筆資金備用，對集團和股東都是有利的。
在全球經濟環境影響下，集團中短情況相信都會維持波動，未來再停派息也說不定。但我地投資應該要集中考慮翻佢長線因素，雖然預期匯豐中短期表現會受壓，但長線質素依然存在。
作為收息股係可以，概念上，就是放棄中短期股息，而預期將來慢慢回到正常狀態，只要你投資組合唔好太偏重單一隻匯豐或銀行業就無問題。
但記得，唔好佔比太重就得。同時明白這只是收息股，唔好對股價有太大期望。同時不能持有太多。
Q17874：
老師你好 間吾中有望下你既專頁 不過無實戰經驗 想請教下
宜家27歲 現金有30令零萬 收入一萬中左右 無持有股票投資工具
最近考慮若果入手應該買月供股票還是hold藍籌股好？例如港鐵 ?還是入手最近的小米 阿里巴巴比較好？現在才入手會太晚嗎？
可以建議一下投資分配大概每隻買多少嗎？
望指教 感謝
龔成老師：
你這個年齡，是財富增值的黃金時期，要好好把握，盡你一切的力量去儲蓄、投資、學投資知識。
你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。
如果你無信心，就月供，因為這可以平均買入價，減少風險。
如果你有投資知識，有信心，就可自行買入。
你可以動用$10萬-$15萬去投資，盈富（2800）、港鐵（0066）都可考慮。至於小米（1810）與阿里（9988），只要你控制注碼，都可考慮的。
你可以分配至5-10隻股。
Q17875：
龔成老師你好，本人投資新手，每月可以用8千元月供股票，如下的話，5年後有機會賺90萬嗎？
2800 HK$3000
0003 HK$2000
0027 HK$2000
0099 HK$1000
月供的話要設止賺嗎？
謝謝
龔成老師：
如果想5年有$90萬，你要調整策略。
煤氣（0003）增長力比過往略減，雖然仍是有質素，但你應該考慮較高增長力的股，至於王氏國際（0099），唔值得月供。
月供是長期策略，因此，除非有明顯的上升，及該股到了貴的水平，否則唔會進行止賺。
另外，除了月供，你最好同時每月能儲到現金，最好在$4000以上，現金的作用是等投資機會，當大市有較大回落時，你就可以把握機會買平貨，提高組合的回報。
Q17876：
龔Sir, 請問點睇1988?買來收息可以嗎？
謝謝
龔成老師：
民生銀行（1988）作為收息股，都可以，但要留意，佢下年有可能因業務與壞賬等因素，而出現減派息的情況。
長遠來說，仍是可投資，作收息股的。
Q17877：
龔成老師你好本人現年32歲，月入25000，扣除家用和保險等開支，每月儲到12000。
現時有20多萬儲蓄，之前從無投資經驗，請問可以怎樣增值財富? 謝謝你！
龔成老師：
你要做三樣野，第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。
第二，了解銀行及證券行，去開一個證券戶口，並準備做月供股票。
其實兩者都可以，銀行就較方便，但手續費就較貴，證券行收費就較平。你可以先了解下不同的收費。
第三，將每月的部分資金，去做月供股票，供盈富（2800）。對初階投資者來說，月供股票是一個很好的累積財富方法，因為可避免你一次過在高位買入的風險。
原理如同儲錢，不過就不是儲現金，而是儲股票。計劃要長期進行。
其實你32歲，仍是財富增值的黃金時期，要好好把握，盡你一切的力量去儲蓄、投資、學投資知識。
你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。
如果進行月供，你可以考慮盈富（2800）$4000。
另外再加幾隻（每隻$2000）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。
如果想增長力高少少，可考慮：阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。
至於$20萬，就暫時唔好動用，等你多D經驗先。
現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
Q17878：
老師，我大約三年前看到你的專頁，第一本書是綠色書面的大富翁書，之後再買你的書，你分析好子細，而三年前已經買了比亞迪，帳面賺了六位數字，好開心，多謝你
你的看法，分析，非常中肯，我會繼續留意你的post, 你幫了很多人置富，無論是帳面及思維上
龔sir, 加油！
龔成老師：
太好了！
理財是一個長期過程，要保持進行，同時知識要保持進步。
Q17879：
老師你好，因為睇左你既專頁，亦開始左投資股票，深明如果財富唔做投資，只會眨值，財富永遠唔會有個明顯增長，因為我地父母從來無接觸過仼何投資
宜家6x歲退休，眼見父母d錢咁多年就咁放係銀行，又無做定期，所以好想幫媽咪投資一下，起碼等d錢唔洗眨值，追唔上通脹，唔洗買餐餸都各得好大負擔。
媽咪手上有50萬現金，請問我應該點樣運用呢50萬幫媽咪投資。麻煩你
龔成老師：
你可以將這$50萬，分成「收息股」及「現金」兩部分。一半半都得。
第一部分投資收息股，你可以建立一個收息股組合，你可考慮港燈（2638）、香港電訊（6823）、匯豐（0005）、工行（1398）、置富（0778）、陽光（0435）、深高速（0548）等，大多有5%股息
你平衡的投資這些股，除了可以得到穩健的收息收，同時可有效的分散風險。
另外，持有現金，除了可做定期外，現金亦可以為你的後盾，以備不時之選。同時，若投資市場大跌，你可以在這時買到更多的收息股，股息率會進一步上升。
Q17880：
想問下你意見，本人34歲，老公40，4年前我自己做代理開網店，同時都有正職，兩年前辭職，全職做網店至今，頭兩年生意好好又做啱trend 嘅product 賺左600萬
之後俾6成老公買左層樓收租，租金可以抵銷供樓。但依家市道咁，唔知下年過SSD 啲樓價會點，諗吓如果平手好唔好賣咗佢投資股票？
同時product trend 過左，無咁爆數, 大約有40萬盈利一年，但疫情開始，都冇乜出口單，生意下滑，好彩亦都冇乜成本，因為在家工作，亦都冇員工。到依家主力靠老公打工，一年家庭收入得70萬左右。
加上上年換左樓，所以依家每月供樓兩萬蚊，另加管理費差餉嗰啲。
目前大約有800,000流動資金，所以想睇吓有啲乜嘢投資項目可以做？本身我哋兩公婆都冇投資概念，但有買儲蓄保險，而家我想搵啲增值嘅投資做下，請問有咩意見？
我工人預計呢一兩個月嚟香港，到時會搵返份工幫補吓。
換樓係指原本自住果層，非收租果間
龔成老師：
現時你的物業情況，最好唔好變，香港的物業買賣成本高，你轉來轉去無著重，你現時的財富組合其實無問題，保持就得。
收租樓現時處於「自行運作」的情況，即是自己在慢慢供樓，你不要理佢就得。
不過，之後就唔好再增加物業資產。
現時疫情，可能你生意受影響，但唔好比一些中短期的事情影響了長期的財富計劃。
你有兩個大方向要行，第一，你生意果度，我相信已建立了一定的網絡，你可以想想一些延伸的業務，你過往建立好的生意如同一個「資產」只要好好利用，一定好過你打工，所以你要好好利用。
第二，你地之後應增加股票資產，令財富組合更平衡，留有現金，同時適當入市，你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。