股票引人入勝之處，就是市場氣氛高漲時，估值上調係可以極快，甚至可以是一瞬間，由被低估變勁升，暴升後市場反而覺得估值仍不是太貴，爭相追入，無錯，今次就係講圓通速遞國際(6123)。

跟開青冰的戰友，都知小弟跟得幾足，亦絕不是先知先覺入市的，首次品評係在7月中，原因就係6月底發盈喜，話上半年盈利升十倍，雖然如此，股價都無太大變動，至8月中公司再將盈喜上調至升十四倍，最叻都係見過2.38元，好喇出完業績，半年賺近億元，最高見過2.48元，市值10億元，假設全年賺2億，即係市盈率只有5倍，但都係乏人問津。

市場就係咁架喇，估值平的股，莫講過大升，升一兩成都是拉牛上樹，但阿里巴巴(9988)增持圓通A股12%，就將圓通速遞國際變成地上最強的股份。平心而論，增持的消息，只是對母公司利好，做阿仔的似乎沾不到甚麼油水，但圓通速遞國際在兩日間由兩蚊升至12.30元，圓通A股呢？Sorry，周三漲停昨天已回吐6%。

當股價暴升，要搵理由去解釋係好易的，阿里增持阿媽啦，估值平啦，會注資啦，前景忽然很秀麗，中港散戶忽然對佢趨之若騖，比青冰更看好。平心而論，以昨天收市價計，市值是約35億，推算市盈率約18倍，你話好貴咩，又唔係，如果母公司真的想注資，這個市值才食得起阿媽的國際業務，成為今年的十倍股，都仲有希望，但坦白說現在乜叉都冇，公司又無進一步資料，完全都係炒憧憬，係唔係炒過籠，就讓時間證明吧。

青冰在專頁都講咗，已在這兩天全數食糊，暫時分手，但仍在密切注視其動態，亦感謝戰友的錯愛及抬舉，隻股爆升都不是青冰之功，全靠市場力量，尤其是內地資金，戰友只要留意過去兩天內地財經網站，圓通速遞國際成為熱話，甚至有些老散以為這是H股，較A股折讓太多，炒收窄差價，戰友可能會失笑，但就是這股蠻力，才可以令此股連續兩日打入十大成交，勁過港交所(0388)、內銀內險及一眾藍籌股，嗯，這不禁令青冰想起，上月的壹傳媒(0282)暴升神話，亦是打入十大成交，成交額一度超越美團(3690)，直逼騰訊(0700)，青冰跟圓通速遞國際算係識於微時，衷心希望他不會步壹傳媒後塵，第二日急升就是見頂，在此寄語管理層，搞好個業務，以納入港股通為目標吧。