Q38941：

老師😊最近恆上升，月供股票的金額是維持不變，還是減少？

股價升，月供買入股數變好少🤣有些股票的股價，可能平時的月供金額連1股都買不到，應怎樣處理？又快到月供的日子😊謝謝老師🙏🏻

龔成老師：

如果升太多去到貴的水平，就會停月供。

不過，之前港股估值偏低，就算近期上升，也只是去翻合理水平，未貴，因此，現時月供仍可以。

如果有些股入場金額較大，你可能自行調整月供，例如每3個月先供一次，將每月金額X3，這就較有效率。

Q38942：

多謝回覆，咁如果舜宇光學同中國鐵塔比較，係咪舜宇光學嘅增長力會高啲呢？

我之前其實係$122入左兩手，之後跌嘅時候都無放嘅，因為我買股票唔多，其實主要都係揸現金為主，而依一兩年都係不斷定期賺4、5厘息，見個市比較淡就冇咩點理會，琴日睇新聞同最近美國話減息，咁先開始留意返

手上其實仲有領展，$66 1手仲有啲碎股，因我以股代息，咁領展基本上我都唔打算賣嘅，不過由於我都有買美股O 都係一啲REITs 咁所以自己都應該唔會再入手領展，重心可能會擺返落美股O，始終佢月月有息派

唔知咁部署啱唔啱呢？

龔成老師︰

首先，持有大量的現金對於財富的增值沒有太大的幫助。長遠而言，因爲通脹的關係，現金反而會貶值。所以，長遠應該建立一個平衡的財富組合才是大方向。

定期雖然保本，但同樣對財富的幫助不大。因此，如果本身的年紀不算太大，仍然有增長力的話，不適合持有太多的定期。始終增長力弱，而且隨住香港進入減息周期，定期的回報會慢慢減少。

你上述提到的股票，都係有質素，若你係年青至中年人士，係適合。

舜宇光學科技（2382）有一定的質素，過往手機市場高增長，令到2382佢鏡頭業務受惠不少，但近年手機增速今年減慢，導致股價下調。

不過，隨住AI的發展，有機會會為2382帶來新機。因此，此股長遠有潛力，但存在不確定性，持貨的話，需要耐性。

相比2383，中國鐵塔(0788)的增長力就不強，企業的ROE處於低水平，因此市場給予這企業的估值都不會太高，但此股不是無質素，就潛力度就不算強，有收息及平穩增長的能力。

簡單咁講，0788係平穏D，2382潛力度和風險都會高D。現價計，2者都合理。

至於領展（0823），過去受加息影響，再加上港人北上消費，令到其股價都較爲疲弱。但隨住香港進入減息周期，相信對領展的股價會有支持。

如果你除領展外，仍然持有一些外國的REITS，就要小心個別行業比例過高，一般而言，行業的比例不建議超過組合的3成較爲合適。

長遠建議你建立一個平衡的組合，你想潛力股的比例多少？平穩股的比例多少？組合風險程度如何？即是你想設計一個怎樣的投資組合？長期、優質、平衡、適合你。

另外，你要留意美股收息，係會有30%股息稅要支付比美國政府，變相令你收息打左7折。所以，收息的話用港股較好。

Q38943：

龔sir 你好，請問如果將所有資產放在優質股，而不放在任何物業是否不好？

因為我們有一層自住物業，但最近為了近小朋友返學，我哋搬咗去一個租物業，然後就一路猶豫不定究竟那層物業，應該賣還是租出去，我們只有一個物業。

現在賣並不會蝕，計埋手續費當初供樓利息加埋裝修係打平，只係老公覺得樓市會跌。因為我見上課的圖都是比較平均分配，所以想問下你意見，謝謝你寶貴時間

剛才去買咗5年買樓4步曲本書，睇到第八章大概搵到答案🙏🏼由於本書係幾年前出版，不知道對樓市前景分析是否有變

龔成老師︰

自住物業不建議賣出，尤其是如果你打算在香港長期居住同有家庭，持有自住物業能夠確保你生活穩定。

你的真實問題，是現時的居住物業並不能滿足你的生活需求（要就小朋友返學），所以你租了其他更爲合適的物業。

其實你長線要考慮的是換樓的問題，而是不是完全放棄持有任何物業。因爲物業始終是資產，長遠仍然有增值的能力（雖不是大升）。而且，對於有家庭的人來講，是一個保障，令你免於租金波動的風險。

資產配置是需要平衡的，我一直都强調平衡組合的重要性。如果你持有物業後，資產比較側重於物業（這很正常）。將來只要慢慢加入其他資產(如股票)去平衡翻就可以。

所以，長遠你可以考慮換樓(換一間適合你家庭長住，同時供得起的物業。)。

現時樓價雖然下調中，不過對於換樓人士來講，不一定是壞事，因爲可以「低賣低買」。這也是為什麼不建議你沽出物業原因之一，因為有物業係手，可以平衡到物業市場價格波動風險。

至於我現時對香港的樓市睇法，短期較一般，始終中國及香港經濟未完全回勇，但相信未必大跌，最多少少調整。

現時香港開始進入減息周期，相信對未來樓市有支持。

在投資價值方面，雖然香港進入減息周期，但經濟為完全復蘇，加上長遠樓價難以倍升，令香港樓的投資價值，並不高。

相信樓市在長遠計，因供求關係，較難大跌。不過，相信不會好似以往20年咁，有大升的情況出現。

長遠計，樓價會平穩，不是倍升，不會好似過往般倍升，而是平穩。同時，由於需求大，要大跌也不易。

因此，香港樓作為自住的價值仍在，中短期不會大跌，也不會大升，以穩定為主。長遠來說，暫時睇未必會大跌，最多只會平穩加少少向上。投資價值，就只是一般，未見好吸引的水平，自住則合理，可以考慮，最重要是考慮自己的負擔能力。

Q38944：

你好呀龔成

請問我TESLA當年250買入, 但跌左好耐

終於今天252平返條數, 請問我應該呢個時間放一半keep一半嗎

謝謝你呀

龔成老師︰

特斯拉Tesla, Inc.（TSLA）有質素，增長快，但始終唔平，股價上落大，要注意這方面的風險。

佢有一定的質素及潛力，但不是無風險的，第一，電動車始終是較新興行業，業務始終有不確定性，第二，Tesla估值有時會偏貴，第三，Tesla過往股價甚為波動，第四，上述不少估值都建基於假設，但最終結果未知。

雖然近期升唔少，但當中依然存在不少不確定性。

例如，預期佢現有車款，相信都唔會令業績有重大突破。而新車款、機械人等新產品，由出台，去到令集團收入有明顯貢獻，相信都要一定時間。所以，如果這些發展不似預期，都有機會出現較明顯架調整。

這企業不是不可投資，長線依然係正面。但投資者要注意風險，不宜持貨太多。

你可以睇翻自己持股佔組合比重，若果不多，照持有係可以。

Q38945：

龔sir你好，請問如果打算8年之後移民，現在應該買樓好定租樓好？謝謝

龔成老師︰

如果在未來打算移民，也就是說你在港長遠沒有自住的需要，租樓和買樓雖然都可以，但更偏向於租。

物業是資產，雖然香港現時的物業投資水平只屬於一般，但都從高位回落不少，除非你肯定自己不會回流。否則如果資金充裕，都可以長線如果有理想價位，去持有一層香港的物業會是將來回流的一個選擇。同時間，幫你個財富組合更多樣化。

不過，如果你資金不是太充裕，將來一定不會回港的話，租樓是較好的選擇。雖然租樓有現金支出，但比起供樓，少了利息的支出，可以預留更多的資金在海外置業。

Q38946：

龔SIR想請教一下，我買入了小米幾年，近年有做車及業績唔錯，我對呢間公司有期望的，請問小米會唔會好似比亞迪當年咁樣升到近一百，牛市完結先至回落呢？

今次牛市 有幾會升到去60-80蚊以上嗎？

麻煩你畀啲意見

龔成老師︰

如果要$60，除左大市要再明顯向上，佢業務都要進一步有增長先得，暫時睇，要長期先有機。

小米（1810）以手機、智能硬件，以及物聯網為平台的公司，小米專注於互聯網直接銷售產品，近年發展電動車。

雖然發展電動車，投入了較多資金，令風險比過高左，但如果成功，股價可以倍升，不過如果失敗，股價會進一步弱。

隨著新產品系列推出，小米賺錢能力提高，同時佔據了一定的市場，在中國安卓類手機4,000至5,000元價位，小米出貨量排名第一。

另外有一點值得留意，小米最新的全球及中國大陸MIUI月活用戶數持續增長，達到約6億和1.5億，均創歷史新高，而這部分會慢慢產生更多的將來收入，所以前景又不用睇得太差。

由於生產電動車令投入了資金多左，在市場未見到產品前，一定會認為風險高左。但當有具體產品出現，加上原本手機等業務開始好轉，現金流好轉，風險度就會減少，令估值有一定的重估。

考慮到小米過往的發展，其產品性價比不差，以及研發能力強，其實電動車值得期待的。

這股可長線，現價合理區中上部，分注可以。不過都要控制注碼，預佢股價仍波動。

不過，你唔好直接用比亞迪(1211)個股價，可以去到1,2百蚊作基準，就覺得小米(1810)都可以升到好高。

2者業務和財務結構係唔同，以佢現時業務計，已經係中上。之後發展得好，再升上唔奇，但要去到60-80蚊，甚至100蚊，相信要較長時間和全面向好先有機會。

另外，我Youtube出過佢架分析影片，你都可以睇翻︰

https://www.youtube.com/watch?v=ucYCR23qI8M

Q38947：

我想問一下、對基金呢一個產品有無咩睇法？

請俾D意見

多謝

龔成老師︰

基金是一個集體投資的模式，原理是每個小投資者，夾錢比基金，然後就有基金經理去進行投資。

每一個基金都有不同的主題，投資股票、地產、商品、衍生工具等。又會投資不同的地區，環球、中國、美國、新興市場等。

至於基金是否有投資價值，就要睇每一隻個別的情況，有部分不差，但也有部分不好，因此好難話好定唔好，另外要留意，基金一定會有收費，變相令回報細左。

在選擇基金時，第一，要了解該基金投資的項目，是否你自己睇好，例如新興市場？該市場是否你都睇好？又例如投資某國的房地產，你自己是否睇好。

如果是一般的股票基金，你最少要知道佢10大持股，確定這些股票是有質素，才好考慮是否值得投資。另外，要了解主要持有資產的風險度，整個基金的風險度、投資策略，是否與你的投資目標配合。

另外，你可睇佢過往的回報，是否跑贏大市，如果是，才有投資價值。

另一方面，除了傳統的基金外，交易所上市基金（ETF）都是一個選擇。如果兩者的表現差不多，就應該選ETF，因為管理費一般較低，但如果該傳統基金表現較好，或你較睇好，或無ETF作替代，你就應該選該傳統基金。

Q38948：

老師，316可以繼續持貨嗎

龔成老師：

只要貨不過多，可長線。但如果太多就減部分，佢對全球經濟都敏感的，因此股價都會波動。

東方海外國際（0316）有質素，全球運費在早幾年大升，佢近年賺好多錢，股價都上左好多，而近年運費回落唔少，佢盈利都正常翻。之前派息十分多，不過，往後派息將會減少。

投資者不要預期這股是高增長類，也不是超高息股，可以定義這股為平穩增長類型的股票。

不過，這企業並不是無發展的，這企業業務規模大，於全球約於90個國家或地區設有約440個辦事處，於2023年3月，這企業接收了2018年以來交付的第一艘船，這艘運力達24,188個標準箱的巨型船舶，同時，東方海外表示隨後5年內計劃交付28艘船舶，可見之前由於疫情令發展減慢，而現時各方都回復正常。

Q38949：

龚Sir，请问3067现时还值得加注吗？

龔成老師：

安碩恒生科技（3067），有長線投資價值。加注與否就要睇翻你本身的持貨，貨多就不要加了。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

這基金上落較大，現價大約在合理區較下部，但始終較波動，因此，不建議一次過太大注投資。

Q38950：

龔Sir你好！為何呢排個市甘勁，但有些公用股如1038和006不升反跌,是否因之前已有一定升幅，中国和外資資金用作買落後股和科技股的原故！

龔成老師：

第一，之前已升左（近年升幅明顯好過大市），而現時市場集中找低估值的。第二，最近中央救市，受惠主要是中國經濟，而佢地都是國際業務的。