Q25871：
龔Sir~ 對唔住。搵親你都無好嘢，繼1701(10萬股) 老千股之後認識你，上年買入
2800 @$28.83 3500股
3067 @$18.623 3000股
6690 @$32.729 3000股
呢個星期見跌好多都唔敢入市，
我依家股票全部滿江紅，我想問其實係咪要溝貨先啱？
定係買其他你介紹嘅9988，1177好啲？
唔該晒你解答下我。
龔成老師︰
買入價，你的賺蝕，只是一個心理因素，該企業長遠的發展，才是我地是否值得持有的重點。
而且投資需要長線（5年以上）先見到效果。
盈富基金（2800）和安碩恒生科技（3067）都是指數基金，前者是包括60間質素不錯上市公司股票的組合，後者則是追蹤恆生科技指數（優質潛力科技股）之表現；
海爾智家(6690)業務不差的，有質素，長遠有發展，現價合理中間左右。
我地決定加注與否，要睇幾個因素，記住，並不是「拉低平均買入價」為目的，你要考慮企業的之質素以及現價是否有投資價值率等，
盈富基金（2800）和安碩恒生科技（3067）是一個組合，風險較低，現時處於合理區底部或中間以下位置，分注或月供都可以；如果資金充裕，海爾智家(6690)都可以加一小注。
阿里（9988）因爲政策的因素中短期會較弱；中生（1177）是潛力股，發展正面，兩者現時都有值博率。但由於佢地係潛力股，不宜過份大注。
你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。
你要分析你的投資目標，你想潛力股的比例多少？平穩股的比例多少？組合風險程度如果？即是你想設計一個怎樣的投資組合？長期、優質、平衡、適合你。
Q25872：
-
請問2160是否沒有長遠價值？現時可否加注
-
中國平安派息是用人民幣？今咪要再開戶口
龔成老師︰
1）微創心通醫療科技（2160）有潛力的。企業有一定獨特性，不過估值方面就十分難，因為這刻仍未有似樣的盈利。因此，這股可長線，等佢更大收成，但要留意控制注碼。
我地決定加注與否，要睇幾個因素，記住，並不是「拉低平均買入價」為目的。
第一，要分析這股的質素，如果無質素，就再跌都唔加。
第二，這股的類別，如潛力或增長或收息類等，是否與你的財富組合匹配，比例是否適合。
第三，你要先計算加注後，這股佔你股票組合的比例會否太多，因為同一行業，同一股票。不能佔股票組合的比例太多。
第四，現價是否有投資價值率，要平，或起碼合理，不能貴。
第五，你要在加注後，仍有現金剩。
微創心通醫療科技（2160）有潛力，但同時不確定性高，估值方面比較困難，需要比較長的時間先有收成，如果你風險承受能力低就不建議加注。
2）雖然企業用人民幣派息，但會轉換成港元派發給股東，所以不需要再開一個人民幣戶口。
中國平安（2318）有質素的，佢有規模，有品牌，近年的發展都不差。
不過，近期出現一些不利因素，令股價都比較波動。例如佢背後持有一些企業，出現債務問題再加上疫情的影響都令股價中短期偏弱。
但這股長線投資價值依然存在。現價算係合理區較底位置，分注投資就可以。
Q25873：
Hi 想請問港華智慧能源表達, 未來想將再生能源分析上市
想問如果睇好這方面而投資 港華 但未來會分拆 。咁即是港華裡會冇左再生能源業務和影響投資回報率嗎
感謝回覆
龔成老師︰
唔會，因為相信佢都會持有大部份股權。而且佢分拆業務，可以令企業獲得更多資本發展，是正面。所以整體而言，未必好大影響。
港華智慧能源（1083）正面的，大股東係中華煤氣（0003），有質素。近年增長力略減，但整體仍是好有質素。
佢通過與國有燃氣生產、銷售和儲運企業的合資合作，先後在安徽、廣東、黑龍江等十個省份及直轄市成立了多間控股企業。
其本上，佢已經形成了以終端服務體系為核心，涵蓋燃氣精製、倉儲、輸配、銷售及城市燃氣管網建設等完善的運行體系。
近年佢生意都能保持增長，但就不是高速度，而是平穩增長，而盈利同樣能保持平穩增長，前景正面，但就不是爆升的類型，這股有投資價值，同埋可以長線持有。現價合理。
Q25874：
你好龔sir，我今年大學畢業了！宜家諗翻如果唔係睇到你係FB反覆提醒大家複息嘅力量，我應該唔會咁慳。真係好多謝你一直以嚟俾嘅意見。
請問你可以睇下我宜家嘅組合嗎？
理想組合：
科技 (700, 1810, 9988) —— 20%
安碩 (3067) —— 10%
醫療 (1833) —— 1%
平穩 (11, 12, 66, 388, 823) —— 34%
盈富 (2800) —— 35%
現持有：
700 145@$465.63 (佔27.2%)
1810 600@$17.73 (4%)
9988 200@$272 (9.8%)
3067 1500@$14.34 (6.9%)
1833 100@$89 (0.9%)
11 100@$124 (7%)
12 162@$30.61 (2.6%)
66 423@$44.17 (8.4%)
388 33@$457.67 (6.1%)
823 100@$70 (3.2%)
2800 2297@$25.82 (24%)
市值：207,800.56 (-25.9%)
現金：72,000
-
宜家其實都蝕唔少，但我又唔係太擔心，係我過份安逸嗎？我宜家手持嘅股票偏重新科技股，諗住跟翻個組合調整下。 請問以上嘅理想組合ok嗎？定係其實可以唔使咁多係平穩/盈富？
-
心態問題。3月15大跌我錯過咗。之後係到反省，如果本身有貨，股票係合理區時點決定入唔入貨/等到便宜區？係咪只要有2成現金留住就可以？ (例子：阿里/盈富現價據你所説係合理區底/中下，我有現金可以買，但係應該買定係忍手等到再到便宜區先 (前設：會再跌到便宜區?)？)
感激，仲有一條問題
- 唔計12同1833宜家有10隻股票，我有少少想集中啲，你建議嗎？
龔成老師︰
- 現時組合可以，適合你年紀。到你當來有更多投資知識，可以將潛力股比重，加大至一半。
另外，個別企業和行業，不要佔組合15%和30%以上，銀行業更加不要高於組合20%，否則會有過度集中性風險。(盈富由於係一籃子組合，故不受此限。)
你現時騰訊(0700)有少少超標，在創建組合初期，組合金額較少，出現超標都係可以接受。但長線你要參照這指標，去維持組合的平衡性，才算理想。
- 其實你係睇平貴度，去決定入市策略。好似現時水平，你大約留2-3成現金備用，去等大跌市機會就可以。
至於個別股票，你就要睇你持股水平。好似阿里(9988)已經有近1成，就要等好平宜才再出手。
相反，某股票你係完全無貨，就算未到平宜，係現時水平你都應該先入首注。
- 唔算過份集中，但股票總量開始多。一個100萬以內組合，最好不要多於10隻股票，否則好難定期檢視佢地架質素變化。
Q25875：
老師，我係一個好蠢吸引能力好慢既人，課金我好願意，但我上堂一定唔明
多謝你回覆我
咁我而家輸咁多係咪應該換馬？有邊幾隻值得買？
其實我上年年尾買左
快手 $160
呀里爸爸 $203
應唔應該溝貨
龔成老師︰
唔好放棄，你要明白知識的重要，慢慢學，無知識去投資，一定好危險！
其實我課程唔難，係適合完全新手投資者。
本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資、評估平貴，在投資上已掌握了一定的知識。
你自己個組合，就跟我上次建議，應沽出就沽出(3893)，應減持就減持(1762,1263如太多，就要減)，其餘就持有。
套現出來的資金，就換去優質股身上。以下股票都係有質素，現價合理，你可以用來換碼。
至於快手(1024)和阿里(9988)現時都係不確定性高架股票，你不要持有太多。若佢地只係小注，可以守。
坦白講，如果你自問理解力不高，其實我會建議你上堂會較好。因為我會由淺入深去教，過往有不少話自己理解力較差架讀者，上完堂都話跟到。
就算你跟唔倒，你都可以係課堂休息、下課、或這個INBOX中提問。一定會比你自己睇書，更有效率。
而且，我會教大家有系統地分析企業，這些知識都只會在課堂中教授，所以你可以諗諗。
Q25876：
老師想問下咩叫指數基金？
龔成老師︰
指數基金，就是指追蹤個別指數表現，而創立的ETF。
例如盈富基金(2800)、VOO等都是。盈富其實背後有一藍子恆指成份股作支持，當你買入盈富基金，佢就會係市場買入相對比例的60隻成份股。
安碩恒生科技（3067），這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。
你持有3067，就等同按比例買入科技股指數中的30隻股票。
由於係一籃子股票組合，比起單一股票，風險更能減低。
Q25877：
睇到老師最年有講美股，想問下老師買美股比較建議用卷商 富途戈啲，定BNU銀行比較好（澳門好似得BNU買到美股），
我打算長揸草到啲錢就放入去市場到，卷商我怕佢幾年就冧，但銀行手續費又好貴。
之前問老師嘅港股都有持續月供，但睇到大市咁，真心覺得美股回報率高好多，所以黎緊想分一半投資嘅錢去美股到。
龔成老師︰
其實只要係持牌機構，一般風險都唔大。
因為我對澳門證券商無研究，你可以睇翻佢係唔係有規模、持牌、運作多年等因素，去決定佢可靠性。否則，穏陣點就用銀行。
長遠要建立一個更平衡的投資組合，同時投資港股及美股，能有效減少風險的集中度，因此這是方向。
我相信中國、美國，都是全球兩個長遠最大經濟體，同時投資會有不差的長期回報，美股如不懂，最簡單是投資ETF，如追蹤標普500的VOO，分注或月供，都有不差的長期效果。
現時美股不算便宜，你想分一半錢去美股，咁係可以。
但就算你美股無貨，我都不建議現時一次過大手投資，最好是慢慢分注，平衡自己在財富配置的比例。
相反，也不建議完全不投資港股，因為當中仍有有質素的企業，長遠仍有當中的價值，只是有些企業的增長力，比過往減少左，因此只需平衡配置就得。
Q25878：
睇到嚟緊會通脹，其實有冇話適合投資那些業務較好呢
由於想分散投資，唔想全在股票，如想買宏利的基金單保值好嗎？還是買人民幣做定期好
基金單睇番過往多年回報紀錄約有6-7%
龔成老師︰
唔太建議，因為定期、基金保單唔係理想增值工具，因為佢地本質不是資產。
當然，保障性保險係要買，但增值型保險我就有保留。
如果佢回報係有6-7%，勉強都可以。但你要確保係保證，而且唔會有賺息蝕價的風險。
通漲一般物業、商品、能源類股份會受惠。但記住我地投資，係要用企業長線質素分析，唔好單單因為通漲，就衝去買晒這些股份，咁係好危險。
Q25879：
老師，商湯是亞洲最大的A.I. 公司，但未有盈利，股市大跌佢表現頗穩定，由於沒有盈利，不懂分析，佢會否將來有機會成為AI中的比亞迪，請問你對此股有什麼意見？
龔成老師︰
商湯集團（0020）有質素，但擔心政治風險。
佢係一家專注於計算機視覺軟件的人工智能軟件公司。根據報告，按2020年收入，為亞洲最大的人工智能軟件公司，並以2020年11%的收入市場份額成為中國最大的計算機視覺軟件提供商。
截至2021年6月30日，軟件平台的客戶數量合計已超過2400家，同時還賦能了超過4.5億部手機及200多款手機應用程序。集團並擁有8,000多項人工智能專利及專利申請。
佢專有的人工智能基礎設施SenseCore，截至2021年6月30日，佢已開發超過22,000個用於不同應用的商用人工智能模型，涉及多個垂直行業，已於智慧商業、智慧城市、智慧生活及智能汽車領域取得市場領先地位，服務商業空間管理、住宅物業管理、城市管理、製造、基礎設施、交通、移動設備及應用、醫療及汽車。
長遠來說，佢的技術應用將會更多，有發展力。
不過，美國已對佢進行打壓，相信之後仍會面對一定的政治風險，這對投資者來說都是一個較大的不確定因素。
因此，這股都有長線投資價值，但由於政治風險，因此不建議投資太多。
Q25880：
龔老師你好，謝謝你去年的意見， 為求穩陣起見，我現在也月供了盈富基金
1）我分批買入（$16， $12，$10）了3067作長線投資，請問長線應持多久才最好， 姐姐果現階段還可以繼續入嗎？
2）請老師問現在有什麼股可以趁低吸納買入作長線投資？
3）我仍持有吉利汽車(175)
分別$25 ，$17， $10
打算作長線看， 請問吉利現在仍可以作長線投資嗎？
謝謝老師
龔成老師︰
- 建議一般最少持有3-5年，如果質素無變，都長點都可以。而時算在合理區中下部，可以分注。
但由於你較近退休之年，所以這類潛力股，不宜持有太多，潛力股最多只宜佔組合2成。
- 以下股票，都在合理區中下部，至較底位。佢地都適合你年紀，你可以研究下。
但大市未到平，要留有一定現金，等大跌市機會。
在收息股部分，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。
另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，不能太過大注）。
- 吉利（0175）本身的質素不差，但佢近年的增業務增長有減慢情況，同時佢被剔出富時指數，相信中短期會弱，但長遠又不是完全無質素。
擁有一定的銷售網絡及品牌，不錯的市場策略及定位。
長遠來講，佢的品牌與發展在中國仍理想，過往吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。
另外，佢早前杭州灣新工廠正式發布純電動新品牌新車，宣布吉利進軍高端電動車。反映長遠的發展力仍在。
由於業務增長減左，相信回勇要時間，但企業不是無質素，可長線。
但由於佢都係潛力股，你要計下潛力股總比重，有無超標。如有，就最好沽少少，換去上述股票，令組合更平衡，更適合你年紀。