Q26281：

龔sir你好，這幾隻股現價可買入並長持嗎？如果長期持有應最少持有幾耐？

比亞迪（1211）

-->中國電力（2380）

-->天能動力（0819）

-->信義儲能（8328）

龔成老師︰

比亞迪（1211）係潛力股，業務發展理想，研發不斷進行，汽車賣得好好，電池技術發展得很好，行業前景良好，企業長遠發展正面，現價略貴，月供較好，如果真的無貨又好想買，可等回多少少分注。

又或者可考慮GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。此股現價合理區頂至略貴。無貨可以現時入少少，到有明顯回調才再慢慢加注。

中國電力（2380）業務不差的，近年有發展新能源，帶動業務增長，現價合理頂至略貴，如想投資，等回小小先買入會較爲安全。

天能動力（0819）有質素的，同時業務仍在增長中，不過，增長力由過往的高增長，轉為平穩增長，現價中至中下。

信義儲電（8328）由信義玻璃（0868）分拆上市，這企業長遠發展正面，有潛力，但要留意業務較波動，同時現價略貴，如想投資，小注好了。

長線投資講緊最少3年，5年以上比較合適。建議你根據自已的財政狀況、風險承受能力、年齡、負擔、要求回報等建立一個長期，優質，適合你的組合，對長遠累積資產有幫助。

Q26282：

老師，近期經朋友推介，我經常看你的posts。覺得你真的很有心，很勤力。

我一年多前提早退休，之前工作很忙，希望在退休後可以多享受生活，所以選擇了我認為比較“穩陣”的股票作為投資收息，有些股票是工作時慢慢蓄，

有些是離職後用公積金買的。現在組合大慨情況：

0003 煤氣 90000 股 (@13.2)

0006 電能 16000 股 (@45)

0016 新鴻基1500 股 (@96)

0066 港鐵 20000 股 (@43)

0270 粵海投資 20000 股 (@12)

0388 港交所 1400 股 (@120)

1052 越秀交通 40000 股 (@4.9)

2388 中銀香港 10000 股 (@33)

2823 安碩A50 15000 股 (@11)

3067 安碩HS科技 20000 股 (@15)

但煤氣在今年三月宣布停止派紅股後，除了降低回報，也令股價急跌。這令我很擔心我的投資組合的平穩及派息。

我希望優化組合，提高平均回報至6-7%，但同時不想要化太多時間打理這些投資，希望老師給我點意見。

另外有朋友提議我買收益基金，老師有什麼看法？

現在我除了股票外，也有一些3-5年期的保本保息的保險儲蓄計劃作為退休後收入，年息約2—3%，也是比較低。謝謝老師!

龔成老師：

由於你係已退休人士，投資應以收息為主。

你持有股票，都係有質素。但安碩A50(2823)、安碩HS科技(3067)是潛力型股票，風險較高，不適合你，建議不要持有太多。

港交所(0388)雖然都係潛力股，但同時有一定股息，你可以持有，但不宜佔組合太高比重。

煤氣（0003）取消派紅股，其實對佢無實質影響，因為派紅股只是左手數與右手數的問題，無論對長遠股價，或企業價值，都無影響。

不過，由於過往佢保持相同的股息，在派紅股的情況下，等同於股息增長。今年決定不派紅股，有可能反映管理層認為，企業往後的增長減慢，會對企業有不利。

但最重要，仍是睇翻企業之後的發展。暫時睇，企業仍是有發展的，但增長力減少左。

不過，最重要係煤氣(0003)和港鐵(0066)其實唔係收息股，佢地派息唔高，但有平穏增長力。建議你最少沽出部份，換至真正收息股中。

以下是一些優質收息股，現價都合理，你可以參考下。

可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，不能太過大注）。

你退休所得資金，除了買收息股，你都可以考慮在被動收入組合中，加入一些債券、年金、定息產品，去令佢更多元化。同時間，保留一定現金，以備不時之需。

至於保本保息保險計劃，都可以買少少。而收息基金，一般都有一定收費，其實你直接去買收息股或者債券，會較理想。

Q26283：

老師，本人40歲，我大約係一年前月供股票

每月

2k 領展823

3k 中電2

5k 煤氣3

5k 阿里巴巴9988

而家已經蝕左差不多20%

我應該繼續供還是改供其他還是改一改供的比例？希望可以每年都有8至10%回報，可以嗎？

龔成老師：

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你40歲，應以增值為主，建議你用「平穏增長股」 + 「潛力股」作組合，去創造一個增值平台。

你月供的股票，係有質素。但煤氣(0003)質素弱左，阿里(9988)則受政策風險影響，風險度都高左，這2隻股票都宜月供太多。

而中電(0002)只係收息股，增長力唔明顯。如果你以每年平均8-10%回報為目標，建議你中電月供金額最起碼減半。

你可以將佢地大部份注碼，換至以下有增長力的股票上。月供策略上，現在你每月先用5成儲蓄做月供。其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

Q26284：

龔sir，你好。因為家人不太喜歡月供，比較喜歡分注買入股票，請教一下你的意見

以下的股票分配有問題嗎？

3110、14、823、2800、3067、9988、1810

如果長期持有，估計每年回報率大概能達10% 嗎？

多謝指導

家人還有約10萬現金可作投資用途

龔成老師︰

選股都是有質素，餘下10萬就等有明顯回調才加注。

但你組合都有2個問題︰

1. 未來恒生高股息率（3110）係收息ETF，增長力唔高，對3X歲年紀而言，有少少保守，我一般不建議這年紀持有太多。

2. 任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

特別係銀行業，佢營運模式較特別，風險會比一般行業為高。必需堅守30%這個準則，如果可控制在20%以內，會更好。

你現時房地產股(0823和0014)已超3成，但又唔係超好多，但你要注意，長線盡量保持3成以內。

Q26285：

你好龔成老師，請問你點睇2699呢隻股票

龔成老師︰

新明中國(2699)主要於中國從事住宅及商業物業開發、物業租賃及提供物業管理服務。

此集團規模好細，生意額好少，多年出現虧損。加上核數師多次出明"不表示意見"，代表佢盤數好大機會有問題。

這類企業，我會好有保留。加上財務表現不佳，不建議投資。

Q26286：

龔sir, 想問多小小

⼁00788 你點睇？我係2020年11月買左8000股，以家都蝕左3000$左右，當時睇好5G，但見近來冇咩變動，

是否應該沽出投資落其他到？ 另外Alibaba 09988現時，仲值得入嗎？

龔成老師︰

中國鐵塔（0788）不是無質素，不過，潛力度比過往略減，同時賺錢能力比預期減左，現價合理。

阿里(9988)是優質股，但因爲政策的風險，中短期會較弱，現時有投資值博率，如果無貨，可以小注。

若你想要增長潛力高D，可選阿里(9988)。若平穏增長，可選中國鐵塔（0788）。

另外，我地唔好成個組合，只集中係1,2隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，建立後長期持有，不是買賣賺差價，而是成為你財富組合一部分。

Q26287：

老師你好，最近開始睇你d書 裡面都有提到致富方式 覺得股票較為合適 可暫番住正職又可並得 但係而家個投資組合因為較多之前熱炒戈時買入

而家跌左之外有d睇你回係合理區上又或者質素轉差左 想問下應否賣出

175 2手 平均價 24 質素轉差左

1772 1手 168.6 太高位入左

6865 1手 31.75

1810 12手 18

龔成老師︰

我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

你現時持有股票，都係有長線投資價值，可持有。當中贛鋒鋰業（1772）風險較高，不要持有太多。

另外，你而家太偏重左係潛力股(全部都係)，佢地雖然有增長潛力，同時風險都較高，不宜持有過多。

若你是年青至中年人士，潛力股可佔約5成，餘下應用以下平穏增長股。若你投資經驗較淺或較年長，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

Q26288：

呀sir, 我有少少唔明點解內地降準會利好內銀？以我知識，降準係loosening monetary policy，就如減息一樣，會收窄銀行息差利潤。

內地仍喺減息週期, 但成日聽人講降準利好內銀？

龔成老師︰

降準對金融市場和中國實體經濟是利好信號，無論在實體經濟和心理上，都有正面影響。

佢同減息有點不同，降準可以令銀行有較多本金運用，去估生意，同時刺激經濟。

而減息，作用都類似，但影響範圍一般會較廣。

Q26289：

老師，我想1813合景泰富業績出左未？有望會升返嗎？

龔成老師︰

已經出左，盈利同比少左一半，係市道差，急於套現增加流動性的情況下，這個都預左。

佢負債依然好高，未來一段時間都預期弱，加上風險唔細，不宜持有太多。

Q26290：

老師我係你上年股票班，想問下呢，我係2020年6月買左小米 12.5買既

然後中間keep住有補貨。而家有5000股係手，平均價16

但呢排佢跌到12蚊附近我都未買住。想問下你建唔建議我而家繼續加注?

因為主要係有兩個問題

1. 而家毛利唔算高，而且D人換機愈黎愈慢(睇新聞)
2. 佢電動車業務仲未有第一架車出黎
3. 家電都好似賺得唔算太多 想問下佢投資價值仲多唔多增長空間?

你建議而家補貨定係考慮搵下其他股會比較好?謝謝~

補充下，我有5000股係手，目標想補多1000~2000股~

龔成老師︰

小米(1810)業績較弱，相信中短期會較一般，其中一個原因是晶片等供應因素，但長遠會慢慢解決的。暫時未見對核心有明顯影響。

長遠仍是有潛力的，佢的產品性價比高，相信在全球好多個國家都會有市場，佢長遠只會進一步增長。

同時，佢建立的平台是佢長遠的增長動力，先賣手機，再利用手機的平台延伸銷售小米家電。長遠正面的。這股可長線，現價合理區較低位，分注可以。

但你已有一定股數，可以等佢再回才入。但保守D，你可以現價加少少都得。同時，你預佢股價仍波動。

雖然佢未有電動車出，同時家電、智能家居又唔係好賺錢。但我地要以一個整體去分析，集團本身有一個普及化高的手機，智能家庭都成熟，當再加上智能車，係可以成為一個完整的智能生態圈，發展潛力可以好大。

當然，都要睇佢未來發展成點，但現時狀況計，係有長線投資價值。