Q23411:
老師,我現在持有以下股票:
#66 MTR 早前在$38買左一手,之後見升番又無買,近期又見回返$42.5,算唔算便宜區?
#823 LINK REIT $68 兩手,而家$65.x ,應該再等下先,定係可以分注買D?
#1475 日清 $6.5 兩手,應唔應該keep? 再買? 止蝕?
#1810 xiaomi 10手,$25.8 ,由$32 溝到來$25個幾,而家$22 個幾,但已佔多過15% overall stock, 係唔係唔應該再買?
#1928 金沙 $20.8, 7手,由$25.8 買起,現在macau regulation consultation,佢仲算唔算係會識生金蛋? 但佢成個"渡假村",請咁多人,macau gov't 應該唔會想整死佢......
另外,我仲想請教多兩隻我沒有貨的公司,就係#0012 恆地同期#3319 雅生活服務,#0012 擁有最多農地,但近期四大發展商回應政府過渡性房屋,佢既價格下跌到$25.x ,
之後又rebound 差不多$30,其實而家政策係唔係算未明朗? 但恆地既價值有無減少? 會唔會割地明哲保身? 而家算唔算"恐慌而買入好時機"?
另外,雅生活,國內地產政策,好像推人人有樓住咁,呢個地產相關物業管理,在打擊樓市時,會唔會受到長久性既影響,還值得投資嗎?
麻煩老師,謝謝。
龔成老師︰
港鐵(0066)現價只係合理區中上部,未到平宜。
領展(0823)現價合理區中上部,暫時未到大注時候。若你資金充裕,可以再加小小注,否則等佢回多10%左右,才再出手。
日清(1475)有長線投資價值,但唔會係爆升類,你預佢平穏增長,此股可持有。
小米(1810)係有質素的潛力股,但佢已佔你組合15%以上,就暫時唔好再加注了。
至於金沙(1928),賭牌只是初步的諮詢,仍有好多變數,金沙(1928)在澳門有正面的貢獻,從資產質素、澳門發展、就業等角度,佢都做得不差,賭牌好有機會得到,不過,政治因素就是不確定,這點好難準確分析影響是否大。
初步分析,佢得到賭牌會過半,但政治是一些不能預測因素。
要留意,現時賭牌的條款,要求加入政府人員,這無可避免地影響了企業長遠的賺能力,優質度及估值都會略減。
相信澳門政府都唔會想佢死,此股依然有長線投資價值,不過風險係高左,暫時不宜持有太多,佔組合10%左右,會較為穏當。
而恆地(0012)其實我拍左片,可睇睇。有消息要香港地產發展產,要做更多利好社會的事,但暫時未知具體政策,只是消息,消息真假都未知。
記住,我地分析時,要分析佢的「長遠價值」有無改變,有危有機,但要小心分析。
如果最終無乜大動作,無對企業有核心性影響,現時股價就無野要擔心,但如果最終有核心性影響,優質度減,投資價值就減少。
雅生活服務(3319)不錯的,佢無論在業務本質、規模、品牌、財務數據、前景,都是理想的,反映這企業有一定的質素。
其實暫時睇內地政策,係想穏住樓價,唔好盲升或大跌,令百姓可以用合理和穏定的價格條件下,去置業。
政策方向或會對內房股造成負面影響,但對物管類其實影響不大。而且,內地政策大方向,係鼓勵發展有質素和規模的物業企業,故行業發展依然正面。
雅生活服務(3319)有長線投資價值的,現價合理,不過股價都會有時出現波動,投資宜分注進行。
Q23412:
你好老師!我係你之前股票班既學生黎架!謝謝你之前既教導!我之前主要買入港股,一直持有諗住加大資產量。
我希望可以之後投資一下美股平衡一下風險,想問一問老師建議。如果我每個月可有HKD 12000 月供股票,應投資幾多落美股VOO先做到平衡效果呢?謝謝你!
龔成老師︰
預期未來一段時間,中國和美國會係全球最重要的經濟體系。因此港股和美股,都係有投資價值。
如果你想投資美股VOO,去分散風險,係可以。
若你除了VOO,不會投資其他美股,VOO佔組合3-4成左右,就會有平衡效果。
Q23413:
Sir你好 有樣野想請教你 依家恆大火燒連環船 其實正面及水底牽涉及既公司唔少 比如hsbc都買左好多佢地債券 我想請問 如果我有份儲蓄基金(約60萬)已供完剛回本
係呢個時世是否兌回現金比較好? 我個份係保誠買 佢今年業績一直輸比同行而且虧緊。 求請教
龔成老師︰
其實保誠業績差,會影響2378股價表現,但未必影響到份基金表現。因為基金投資項目,未必跟保誠有關。
你可以衡量基金的投資策略,所投資的資產類別(最少要了解10大持股)、投資策略、風險程度、市場、費用成本、以及過往的表現
(可以睇佢過往5-10年,如果回報係比主要投資市場高,有機會值得繼續投資)。
Q23414:
你好,七成倉位,傳統股多,有新經濟同內房內險,現在先用反向etf 對沖是否已經太遲?
另外想入京東同京東物流
龔成老師︰
我唔建議你用反向ETF,首先我地投資時,唔應該估走勢,因為中短期走勢好難估。我地應該係用企業本質和平貴度,去作行事標準。
而且,恆指在過去數10年反覆向上,所以長遠計持有這類反向ETF,對你"不利",一定多於"有利"。
內險股(例如2318,2628),暫時唔見有重大問題。
而內房股,受政策影響,增長力一定會慢左。如果佢本身負債好高,有機會出現周轉不靈問題,恆大(3333)就是其中例子。
當然,好多內房股都依然有佢長線投資價值,但負債較高的內房,就要小心。同時,政策風險高左,必需要控制注碼。
京東(9618)業務有質素,發展仍是正面,不過現價就唔算平。
佢係一間電子商業銷售平台,佢定位為「以供應鏈為基礎的技術與服務企業」,現時是中國第二大電商,有一定的品牌。同時,根據《財富》按收入統計的全球500強排行榜,集團是中國最大的零售集團。
佢目前業務已涉及零售、數位科技、物流、技術服務、健康、保險、物流地產、雲計算、AI和海外等領域,其中核心業務為:零售、數位科技、物流、技術服務四大板塊。
京東已建立自己營運覆蓋全中國的物流基礎設施,以支持電商業務,打造了線上購物體驗,係2017年、2018年、2019年,活躍用戶數達到了2.9億、3.0億、3.6億。可見已建立了一個巨大的網絡。
佢經營線上零售,以及電商平台業務,線上零售業務方面,從供應商購買產品,然後直接銷售給客戶,並從24,000多家供應商採購商品。
佢的物流基礎設施佈局覆蓋了中國幾乎所有的區縣,包括遍佈89個城市、累計總建築面積約1,690萬平方米的700多個倉庫,包括京東物流技術開放平台所管理的倉庫面積。
從質素上,這股不差的,現價算是合理區中上部,如果買,都可以,但要控制注碼。這股可以長線投資的。
京東物流(2618)都有質素的。
京東物流係中國領先的技術驅動的供應鏈解決方案及物流服務商。通過科技賦能提供全方位的覆蓋各個業務領域的供應鏈解決方案和優質物流服務,從倉儲到配送,從製造端到終端客戶,涵蓋普通和特殊物品。
根據一些調查報告,按總收入計,這企業係中國最大的一體化供應鏈物流服務商。
2018、2019 及 2020 年,京東物流營收分別為人民幣 379 億元、人民幣 498 億元和人民幣 734 億元。
京東物流於 2018、2019 及 2020 年產生的虧損淨額分別為人民幣 28 億元,人民幣 22 億元及人民幣 40 億元,不過,如果扣除一些非現金流的開支,又未算太差。
佢表示,上市集資所得,部分將用於升級和擴展該企業的物流網絡;部分將用於開發與供應鏈解決方案和物流服務相關的先進技術。
企業有優勢的,長遠發展正面,但中短期股價未必有好強的表現,這股都有投資價值,但現階段未必值得大額投資。
Q23415:
你好,龔老師。請問405呢次供股,好定唔好呢?
龔成老師:
越秀地產(0123)出售國際甲級寫字樓廣州越秀金融大廈予越房管理的越秀房產基金(0405),代價約$80億。而越秀房產信託基金則以供股模式進行。
因為內房唔想自己負債太多(近期這方面較多問題),因此,越秀房產信託基金(0405)以股權集資模式,去轉個圈支持翻越秀地產(0123)。
問題當然有少少,因為利用405小股東,去幫123減債。
但由於所買的是有質素的資產,因此又未到好不利,但供股始終市場不太喜歡,股價短期會不利,但長遠又未算對兩間公司有核心性不利。
如果你持貨不過量,都可以供股的。
Q23416:
龔sir,仲有一個問題諗唔到答案,一直以嚟你會鼓勵我地唔好一直冇貨係手, 而剩係等買平貨,但如果以水桶1為例,佢地中間都唔會點派息,
咁合理區上買同而家股票環境差買,係應該真係差好遠?
因為如果我當初一直月供小米,同我一直唔買小米相比,後者係而家儲左一舊錢,直接合理價中下買,其實仲係咪仲好過「慢慢小注,有貨係手」?
因為而家啲股票就算我早一年買左,佢都跌返落嚟,中間一年又冇賺啲複息同股息,所以唔太明水桶1點解要小注小注咁買,唔該老師
龔成老師︰
你的想法,存在一個錯誤的假設。就係假定今天股價,一定比一年前(你開始月供時)為低。
但你回想月供之初,我地其實係無辦法預知今日的價位。如果小米(1810)今天唔係跌左,而係大升。那你今天買入同樣股數小米,成本就比月供或分注高左好多。
當然,我地永遠等到佢平價才買,長線回報一定會比月供或分注好。
但問題是,佢幾時會回到平宜區。特別係有質素的股票(好似小米1810、中生1177),係極少回到平宜區。若此其間股市大升,你就會白白錯失一個良好的增值機會。
因此,我地要做的不是賺到盡。而係在各個不確定性中,取一個平衡點,去提升自己的勝算。
所以,我經常建議讀者,因應不同平貴水平去分段入貨,就係想平衡上述問題。
Q23417:
老師你好,想問一下如果恆大債券今次爆煲,有哪一些行業的股票會受到影響?
最近想入823,3,1038,但因為恆大事件和中央要求香港地產商解決樓價高企問題,驚佢地爆煲牽連甚廣,現在考慮爆煲後才入還是現在入,又或者應該月供還是每月一手呢,
請老師比下意見。
多謝老師一直以來無私的解答
龔成老師︰
恆大(3333)如果出問題,最直接影響到房產類企業、其次是貸款給它發展的金融業、還有一些建築等物業開發相關公司。至於背後會唔會有其他行業受影響,暫時好難講。
至於恆大(3333)事件最終會否爆煲,會不會牽連更多不同企業,這個好難預測。
我地作為投資者,要理性分析,到底在現時大環境轉變下,你打算投資的股票,核心質素有無受影響。如果無,而價格又合理,其實就可以分注投資。
你想入的3隻股票,暫時未見質素有明顯轉差。現價都算合理,其實已經可以開始分注或用月供儲貨。
Q23418:
但我新華有10000股,小米2000股,阿里巴巴400股 ,阿里巴巴依加個位應該加碼嗎?新華要減持嗎?
龔成老師︰
新華(1336)你持貨都幾多,由於佢質素唔係好高,建議沽出部份,換碼至其他優質股。
而阿里(9988)現價合理區中下部,但由於你有一定貨係手,最多加小注好了。
另外,我地唔好成個組合,只集中係2,3 隻股票身上。
最重要是建立一個長期的「財富組合」,要優質,要平衡,要適合你的年齡與風險承受程度,新舊經濟各類股都要有。
同一行業不能高於組合30%,同一股不能高於組合15%。要平衡,建立後長期持有,不是買賣賺差價,而是成為你財富組合一部分。
以下是一些優質股,若你係年青至中年,都係適合。若你投資知識較少,或者年紀較大,最好集中係平穏增長股。若你較年青,多少少潛力股,都係可以。
Q23419:
龔老師,我買了另一隻醫藥股3320@5.56,我在考慮沽了手上全部的3320,然後再購買27銀娛,請問你認為怎樣?謝謝
龔成老師︰
華潤醫藥(3320)唔係完全無投資價值,只係不是最高質之列。
佢主要於中國以「三九」(又稱「999」)、「雙鶴」、「賽科」、「紫竹」、「東阿阿膠」及「天和」等商標從事研發、製造、分銷及零售醫藥與其他營養保健品。
產品組例有化學藥品,例如包括慢性病(如心腦血管疾病及糖尿病)藥品的研發及產銷、輸液治療(主要是大劑量靜脈注射液)、兒科、腎科與生殖健康的治療領域、抗感染與皮膚病用藥,亦製造及銷售少量原料藥。
另外,亦有中藥、生物製劑、營養保健品。
其實業務仍發展中,不過賺錢能力就唔算好強。這股都有長線持有的價值。
如果你3320持貨較多,你沽少少換至銀娛(0027)都可以。但賭牌問題令娛增加左不確定性,雖然長線投資價值係仲存在,但未來賺錢能力,有可能弱左。
由於風險係大左,故銀娛(0027)你可以投資,但暫時都不宜太過大注,畢竟政策風險好難估。
Q23420:
老師,你好~本人43歲, 月入$50,000, 每月可儲$24000, 現時每月月供如下:
1, 2800 $5000
2, 0823 $2000
3, 0270 $1500
4, 1810 $1500
5, 1177 $1500
另有股票共$800,000, 我想計劃55歲儲到1000萬,退休, 請問可行嗎。另想問, 現時與老公同住私人物業,但爸爸想我供一層居屋, 請問居屋有投資價值嗎?
謝謝老師, 會報你下月課程
龔成老師:
上述你所選的月供股票,都是有質素的,你可以進行,長期就得。以你的年齡,這些選股是適合的。
至於55歲$1000萬,現時有12年,我假設你的回報率為10%,$80萬股票能滾存到$250萬,而每月月供$11500,55歲能滾存到$290萬。每月儲現金$12500,12年共儲現金$180萬。
合共為$720萬。
如果要達至目標,可以做以下3點。
第一,月供部分,供多少少潛力股類別,例如加入$3000供恆生科指ETF。
第二,每月儲到的現金,要把握投資機會,當大市下跌時要適度入貨,就能提高財富組合回報。
第三,推遲2年退休,我相信你同時進行這3個動作,就很大機會做到$1000萬這目標。
至於居屋,投資價值不及私樓,自住價值較大,但現時都有投資價值的。
股票班見!