Q25591：

龔成老師你好。本人45歲，只住已供完樓，單身，和媽媽住，月入5萬，持有現金約3佰萬，股票約10萬，有2份儲蓄保險，60歲時價值約150萬，股票都係十幾年前買落，

大部份都仲係蝕，所以咁多年嚟都唔敢再買股票，但知道現金會貶值，但又好無信心，想在60歲退休後維持到一定生活水平，請問我應該如何運用呢畢現金投資股票，

呢個年紀應該買升值能力高嘅股定係收息股好？應如何分布？謝謝你

龔成老師︰

如果你對投資股票沒有信心，證明你認識未夠深入，你可以先借一些理財的書籍學習又或者報讀坊間的課程，等自己打好個底先，千祈不要心急，因爲投資是「先想風險後想回報」。

以你的年紀，理論上可以投資「平穏增長股」 + 「潛力股」，但「潛力股」需要一定經驗和有一定波動性，建議不要太多，最多佔2成左右好了。

至於現時你持有的股票可以檢視一下，質素差的話要賣出，將資金換碼到其他優質股票才有機會增值。

你可以利用月供的形式纍積資產，月供能夠很好地將價格平均，避免一次過高位入貨。

你可以先動用40-70萬分注買入優質股。

至於餘下的現金，就等機會，當大市每出現回調，你就可以慢慢動用現金，去分注入貨，然後長線投資。

另外，"保險"主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

Q25592：

老師你好，我已工作10年, 目前月入4萬，老公月入10萬，但我倆係月光族，從來唔識投資，二人積蓄只有100萬，我想問我應該睇你邊本入門書學好基礎知識？

我知我好遲，但想快啲學下，我同老公都想做投資，幫個女賺啲教育金，謝謝你！

龔成老師︰

如果你倆都是月光族就要好好檢視一下自己的收入支出結構，因爲你們都收入不少，一定是支出方面出了問題才導致這個結果。建議你將支出分開需要和想要，每天記賬，

瞭解自己的錢花在哪裏，加大自己的儲蓄比率，然後進一步改善。

我假設你仍然是年輕人，財富仍有增長力，可以投資一些「平穩增值股」+「潛力股」。

先動用資金的一半，即30-40萬投入股票市場，以分注模式慢慢儲貨(唔係一次過入晒)。

不過，由於你經驗不足，因此這刻不用急著投資，你可以指數基金行先，未來有一定經驗，才加入其他股。

由於你投資知識不高，因此可較集中在平穩增長類股，至於潛力股，只宜小小注(不多於3成)。最好是你先提高投資知識，等到你有一定知識和經驗，才慢慢增加潛力股比例(大約5成)。

至於餘下資金，就等你學會更多投資知識，才再進行配置，咁會較穏當。

你可以先睇我架《80後千萬富翁》、《財務自由行》和《股票勝經》，都適合初學者。

之後，你有時間，可以再睇埋《選股勝經》和《年報勝經》。

如果幫小朋友投資其實都好簡單，小朋友由於可投資時間長，策略上十分簡單。你可以儲盈富(2800)，佢係包括60間質素不錯上市公司股票的組合，有一定增長力。

若你想增長力較高，可以儲安碩恒生科技(3067)。但此股波動性會較大，要睇翻你自已風險承受能力。

基本上，以你小朋友年紀計，持有以上股票都係可以，但你明白當中風險。

另外，你可以考慮埋美股指數ETF，令組合分散風險能力更高。VOO和QQQ，前者追蹤標普500，算平穏增長型，類似盈富。QQQ追蹤納斯達克100指數，風險會較高，風險度近似3067。

Q25593：

老師，健康是重要財富

老師對於呢樣財富有冇咩好心得？

龔成老師：

多做運動、不要有不良習慣、多飲水，需要是好基本，但卻是最重要。同時其中一個關鍵，就是「堅持做」。

Q25594：

啊sir, 請問0001長和and00017新世界， 現在那個股價得值博率同優質d ?thanks!

又點睇1336新華保險 ? 現價合理嗎?

龔成老師︰

長和(0001)和新世界發展（0017），優質股會係長和高少少。

不過，用現價值博率計，就會係新世界發展（0017）現時較高。

新華保險（1336），不過不失。

佢於中國從事人壽保險及資產管理業務。集團之個人壽險產品包括傳統型壽險、分紅型壽險、萬能壽險、投資連結型保險、健康險及意外險。團體保險包括人壽保險、健康險和意外險。

規模唔算好大，發展力都有，但未算強，要主要是見唔到佢好有獨特性，無太大自身的優勢，但整體又唔算差。生意都有穩定的增長。

整體的質素算是中等，投資價值都有，但這股又未算好吸引，現價合理，要留意股價較為波動。

Q25595：

謝謝你講解，會再努力學習投資知識。

我揀左幾隻做月供，希望係個好開始

港股: 2800，0823，0014，3067

美股: 要收税，所以冇選

感謝你的教導

龔成老師︰

這些股票都適合你，但留意翻領展(0823)同希慎(0014)都係地產類股份，故有少少行業集中。

你最好將其中一隻，轉成其他行業股票，咁會較理想。

Q25596：

你好，龔sir，有事想向你求救。本人最近買了港交所平均價$447 1000股，買了後曾經升到接近$500水平冇走，

因為我都係你讀者，都係買優質股票長揸的，但眼見業績後狂跌，我就開始驚喇！又不斷有大行踩到佢好似一文不值咁，宜家我真係唔知點做好，

眼見持有的其他股票都跌了不少，個心更加驚，所以請你幫幫手睇下點樣做，我大約重有1M現金，

現持有騰訊$478買入500股，銀河娛樂$44買入 10000股，龍源電力$16.81買入10000股，吉利18.68 買入5000股

大部分都挨緊價，真係唔知點算好，希望你幫幫我睇下可以點做好

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

你要理性，特別係市況差架時候，一定好多負面新聞。這時就考驗你對這些持股，有多了解。只要你係確認佢長線質素無變差，照持有就可以。

你上述股票，都係有質素﹐雖然跟大市回落不少，但未見長線投資價值有變壞，故可以照持有。

但銀娛(0027)係續牌方面，未算完全明朗，故暫時不要持有太多。

Q25597：

龔sir…778出業績，受疫情影響大，又減租，現在又全民檢測，禁足。

我8蚊持有一注。

如果按照昨日息率計算，假設情況沒有再惡化

0.1987 x 2 / 6%= 6.6

價要到$6.6 才有6%息率，6.6值得加注嗎?

謝謝龔SIR

龔成老師︰

首先，佢中期息和末期息個金額，一般都不同。以2021年，總額應該為HKD0.4483。以6%計，股價應為HKD7.47。

故現價計，已經有6%以上。如果你係HKD8有一注，而家入下一注係可以。

但置富(0778)主要係收息，增長力不高，若你較年長，此股係合適。相反你係偏年青的話，這樣股票不宜持有太多，以免拖低組合增長力。

其實，我地投資最重要睇長線，佢只是疫情影響減租，長遠無問題的。

Q25598：

請問想知每一股股值係咪可以將（市值/發行股數）就ok

同埋睇《股票勝經》講到核數師意見分析，可以係邊度睇到企業既核數師意見，是否經濟通內的損益表等等就睇到？

龔成老師︰

核數師意見分析，你可以係年報。或者BOC或者經濟通網中的"公司資料" > "損益表"內找到。

你這個計法，會計算出現時個股價。

但你所講的估值，我估你係想知佢實際價值，而唔係而一刻係股票機個價。

要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

Q25599：

其實我一直唔明白，如果高位放了，跌左再買入不是賺更多嗎？好多人做波幅都可賺錢呀⋯⋯

龔成老師：

你有一個假設，就是「高位賣出後會跌」。這套理論，是9成散戶都會這樣想的，不過你想想，當年騰訊、港交所幾蚊，如果有人$10買入，升到當年歷史新高$20，大部分散戶都會「賣左先，等跌再賣」，這類散戶，就無法賺到幾十倍的回報。

Q25600：

老師，投資1211是否比美股:LCID前途較好

龔成老師：

以這兩隻去比例，比亞迪（1211）會較穩陣，但Lucid有機會潛力度高（但風險都較高）。

Lucid Group Inc（LCID）是風險類潛力股，但在估值上較難，以及股價上落大，這是最大的風險。

佢是近年增長好快的電動車企業，佢旗下的Air Dream Edition Performance 19"車輪的豪華版車，已經獲得美國認證達520英哩續航力，為美國續航力最長的電動車。

相信這企業有技術上有一定的優勢，因此潛力度有，但由於估值難，這刻只建議小小注投資，買入後可長線。

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。