Q25341：

老師，想問如果VOO 與 VTI 兩者隔月月供作小朋友儲蓄，有無衝突呢？

另外我之前都有儲3067打算長期持有，未算好多，但好似弱，所以想停供，打算轉為voo 或 vti 了

龔成老師︰

隔月月供都可以，但最好當然是每月月供，因爲這是長期纍積的方法，每月月供能夠更好地將講個平均。

Vanguard標普500指數ETF〈VOO〉，是追蹤標普500指數的ETF。

VTI追蹤的指數為CRSP US Total Market Index(CRSP 美國整體市場指數)，涵蓋美國3000多家股票，包含價值型與成長型股票，分布在大中小型公司。10大持股中，包括微軟，蘋果，AMAZON。

2隻都供係可以，VTI風險會高少少。而且2隻都係美國市場，只要注意個別地區市場，唔好超過組合6-7成，咁就無問題。

安碩恒生科技（3067）雖然你已有一定股數，但建議你都照供佢，可以每手隔遠少少才入。目的係平衡地區性風險，令免你供供下，集中晒美國市場。你可以按自己情況，去調整策略。

Q25342：

想請問 1186 , 696

自己初步試過用P/E , EV/EBITDA 都睇過應該唔差

而大方向，1186就貼近國家基建

696係年中報睇到，就係似疫情後時期開始正常D

可以一注?

龔成老師︰

中國鐵建（1186）質素算是中等，不算好強，但都不差。

如果有分析佢多年的業績，會見到佢生意其實都幾穩定，但就無增長力，至於股本回報率處合理水平。但這股最大的問題，就是負債太多，雖然佢現金流好穩定，但太多負債始終會扣分。

而這一點，亦令佢企業價值不會太高的原因。而現價處於合理水平，但發展力不算強。

中國民航信息網絡（0696）係資訊服務及網絡管理解決方案商，目標市場為中國航空客運及旅遊行業。

例如電子旅遊分銷系統、機場旅客處理系統等，過往業務穩定，都有長線投資價值，不過不是高增長類。現價合理區中上部，無貨首注都可以。

Q25343：

龔sir，我之前買左藍光嘉寶2606.hk

其後佢比碧桂園收購左之後 一路都未收到啲錢

想請問下 有咩渠道係可以查詢呢方面嘅問題？

我搵左好耐都無從入手，係點搵幾時先比錢我哋啲小股東

龔成老師︰

如果你係上年，有接受和寄回藍光嘉寶(2606)收購要約，你應該已經收到退款支票。

見佢之前通告，有個查詢電話，你可以打去問下︰(852)39537240。

若你係無寄回接受要約文件，就等同你不接受收購，故股權依然在你手。但由於佢已經不能在港交所交易，你要出貨，就要打去藍光嘉寶度問，有乜野渠道。

Q25344：

龔sir, 請問賭股是否最壞時間已過去？板塊將會迎來價值修復？

龔成老師：

相信是，但起碼要等疫情慢慢過去，同時，仍要等正式有牌先確定（但我相信6大博企，能順利過渡）。但要留意，在現時新條款下，賺錢能力會比過往略減。

Q25345：

龔老師請問您覺得應唔應該買「退稅年金」？

我今年25歲，父母唔過55歲，本人未結婚，好似無咩扣條件；

我今年月入71500$，agent叫我一年供60000，但我岩岩出黎做野，本金/資金唔多。上年月入只有33000，一年儲左約30萬，如果交左60000比佢，

就無左20%既錢 我黎緊都會係71500$/月，穩陣收入，Agent叫我供10 年

就係睇咗老師既書，先的起心肝儲錢

龔成老師︰

「退稅年金」是「延期年金」，只是可享稅務扣除，設有累積期，你可以理解為投資後，慢慢先每月收取本金同利息。

延期年金較適合在職人士，等你係年輕時以分期儲蓄方式累積資金，並係退休時把資金轉化為穩定年金收入，以供退休生活之用，

但年金其實都存在住風險，

第一，斷供問題，由於年金是一項需要累積期的投資產品，所以如何在投資期內斷供或退保，退保的金額相對較低。

第二，回報不穩定，由於年金的投資期長達10年，而該筆資金也要一定的年齡才可以取回。同時，由於年金的回報也包括非保證回報的部分，因此也要考慮當中的不確定性。

你現時只有25歲，好年輕，是財富增值的黃金時期。除了盡力儲蓄、其實可以透過這個黃金時期努力學習投資理財，

「退稅年金」不是最好增值財富的方法，如果你符合退稅的資格可以申請，但如果你其實是想增值，可以先用這20%的錢投資股票，到年老的時候再創造現金流。

我地理財，應該攻守兼備，你可以視乎你的風險度和需要，決定買唔買。我建議如果你理財較差加上享受到退稅優惠，就應該買。但如果你懂理財，懂投資，月供股票可以更幫到你財富增值。

Q25346：

老師多謝之前回。咁請問0003煤氣，0006電能實業，1038長江基建，00778置富那一個作為長遠月供股價較好？

龔成老師︰

4隻都適合月供，以你31歲的年紀，應以增值為主，你可以投資一些「平穏增長股」 + 「潛力股」。煤氣（0003）和長建（1038）是平穩增長，適合你。

而電能(0006)和置富(0778)只係收息股，增長力不高，就不太適合。

另外，我建議你在組合中，加入潛力股來加大組合的增長力。

潛力股可選安碩恒生科技(3067)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）、安碩納指一百（2834）。如果有投資美股，可投資QQQ。

但由於潛力股有一定波動性，如果你投資經驗較淺，暫時不宜持有太多，大約3成好了。到你累積到較多經驗，才慢慢將比重提升至5成。

現時大市處於合理水平，除了月供外，每月都要保留適量現金，當大市出現一定程度的下跌，就可以動用現金去投資，在平宜價加大力度掃貨，然後長線投資。

Q25347：

老師我30歲，想問如何創造被動收入？

每月只在供股票？但被動收入不是收息嗎？

好像老師你一樣，你的被動收入是否都是股票派息？

現時想創造的話應如何計劃？感謝

龔成老師︰

我地會運用「先增值，後現金流」方法創造被動收入。年輕人著重於增值類資產，而較年長的，就應著重保守類別。

因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流 （被動收入）。

月供股票其實就是每月投入相同的金額，買入同一隻或多隻股票，並持續進行，好處是慢慢將貶值的現金換成優質的資產，當然你也可以自行「分注」買入，

但月供可以平均價格，減少價格集中的風險，幫助未能把握買賣時機及企業估值的初學者更好地累積財富。

我的被動收入有好多，股息是其中一種，因爲只要是資產就能夠產生被動收入，例如我寫書、開辦一個網上課程，完成項目後，我已毋須不斷付出，又或只需要簡單跟進，

例如書籍會不斷加印出售、網上課程會不停出售，這些就是「資產項」，能為我帶來持續的現金流（被動收入）。

一般投資者，可以先利用優質股，去累積財富。你可以運用上述「先增值，後現金流」方法創造被動收入，以你現時30歲去計，是財富增值的黃金時期。

策略上，你可以投資「平穏增長股」和「潛力股」。你先用每月5成儲蓄，其餘先儲起，用一邊月供一邊儲蓄的策略。

你現時無太多投資經驗和知識，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資知識﹐潛力股比重可以相應調高，佔組合約3-5成，視乎你投資知識多寡和了解這些股票程度而定。

餘下的另一半現金，我地就等機會，當大市出現較大回調，就加大力度掃貨，然後作長線投資。

Q25348：

你好老師，好想上堂，但無奈工作原因未能夠現場上堂，所以，透過你的Facebook, video ，書本增加知識。

本人持有4000股，現蝕左7成多。晤知算唔算持貨多。

其實有d 掙扎，唔知思想方向正唔正確。 我倉在一通要轉，從來未轉倉亦都唔太清楚轉倉實際運作。其實係米指D股數原封不動轉去别間公司嘅股票戶口 ？

既然而家蝕咗咁多，只有大概三成，倒不如沽左重新再買過。

如果我對轉倉嘅理解正確嘅, 是否我應該轉倉去我銀行股票戶口 ，對而家嘅損失影響較低呢 ？及較合理嘅處理。而非沽出全部？

感激老師嘅意見。

龔成老師︰

你可以在這一個月，處理好在該行的資產，最簡單是「轉倉」，即是將你的資產，轉去其他機構。

你可以去銀行或證券行問下轉倉等事宜，雖然要收費，但都是要做，你可以在這星期問下。

我都上網找到了「一通」的公告，你可以參考下：

由3月1日起，只持現金的客戶，一通會逐一將全數資金退回客戶的銀行戶口，所以客戶毋須提款。

至於持有證券的客戶，請於一通網以經紀交收指示（SI）或投資者戶口交收指示（ISI）轉倉，一通將豁免一通及港交所的提貨收費（但不包括收貨經紀及其港交所的收費）。

若客戶選擇提取股票證書，一通將豁免一通提貨收費，但仍會收取港交所的提貨收費（若客戶戶口內的現金不足支付港交所的提貨收費，一通會沽出客戶證券以支付相關費用），股票證書將會直接郵寄至客戶結單上的地址（如客戶地址有變，請盡快在一通網更新）。

至於你持有小米(1810)，唔係無投資價值。只係你本身買入價唔平，加上現時大環境差，故令佢一跌再跌。

但考慮到此股有長線投資價值，建議你照持有。

如果你整個組合，只係得佢一隻，你就最好沽少少，換至其他行業股票，以免出現過度集中性風險。

Q25349：

老師，我由去年5月開始每月買入一手3067, 但股價持續向下，賬面已有損失，我是否應該耍停止買入，等有回升跡像才開始再每月買入？謝謝

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

如果企業質素轉差，就要賣出。如果企業某些核心優勢減少左，就有機會減持，因此，我地要分析企業的核心因素，一些長期的賺錢能力，有無改變。

過去2年，股市較為疲弱，回調係正常。

月供係應該不論價格升跌﹐都一直去做，這樣才會有平衡價格波動的效果。

現時股價較低，反而你係可以用較低成本，去入貨，所以無必要停。

安碩恒生科技(3067)有質素，可持有。不過你年紀都偏大，長線這類潛力股，不宜持有太多。你要將組合的股票，慢慢分段轉向收息股，為退休準備。

Q25350：

老師你好，想請教一下。

我現在37歲女，依家返左3個月新工，同上一份工隔左1年左右, 係細new CPA firm 做manager, 人工$30k. 入息少過以前，要帶新人及ot 。

以前係銀行/保險做internal office， 好少帶人，最近兩份工都做左1.5年。

保險$20萬，股票$10萬，現金$20萬。

股票有中銀，地鐵，阿里爸爸，盈富基金

請問可以如何安排理財及事業？謝謝

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時37歲去計，應以增值為主。現時持有股票，都係合適。

阿里(9988)現時受政策風險影響，令佢不確定性高左。雖然長線投資價值，係依然存在，但就暫時要保守D，不要持有太多。

"保險"主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

未來時間，你可以用每月空閒資金，去做月供股票，加快增值速度。

你可以投資「平穏增長股」和「潛力股」，你每月5成儲蓄做月供。其餘先儲起，用一邊月供一邊儲蓄的策略。

如果你現時無太多投資經驗和知識，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資知識﹐潛力股比重可以相應調高，佔組合約3-5成，視乎你投資知識多寡和了解這些股票程度而定。

大市現處於合理水平，那20萬資金，你可以多用5-8萬，以"分注"形式慢慢入貨。餘下資金和每月儲蓄，就等大跌市機會出現，才大力度掃貨，並長線投資。

雖然新工作好似比較吃力，就任何轉變，都代表迎來新機會。可能你會係度找到新方向，加油!!!