德琪醫藥(6996)今日掛牌上市，成為本年度第132隻新股，新股狂潮在螞蟻招股前已經洩氣，由隻隻賺錢變為熱爆新股都穿底，螞蟻甩拖後約有十隻新股上市，反應大不如前，不過總算無驚嚇的場面，即使穿底都係輕微穿，除了隻上坤地產(6900)，後螞蟻時期的新股，其他都在水面之上。
今日講一個特別的新股板塊，大部分股份都係大名鼎鼎的，但招股反應又唔算太熱烈，講緊嘅係第二上市的中概股。中概股回流，始於去年11月上市的阿里巴巴(9988)，今年美國多番出招制裁，其一就是威脅將不符合審計規則的中概股踢走，而港交所(0388)就大開方便之門，中概股排住隊回港第二上市。
自阿里巴巴之後，等了超過半年，才有第二及第三隻上市，分別係網易(9999)及京東(9618)，那時新股已經非常熾熱，超購六、七百倍，一開即升五成，都係等閒事，而網易及京東，係重量級中概股，有三十幾萬人認購，但比起同期的生化股及醫療股，唔算得上萬人空巷，加上上市首天只係微升幾巴仙，自然就較失色。隨後的百勝中國(9987)更上市即穿底，間接令往後的第二上市股份反應麻麻，在百勝中國之後的6隻，超購全在10倍之下，華住(1179)及新東方(9901)一手中簽率更是100%。
招股反應一般，另一個原因係有一個天然阻力，就是在美國上市的股價，如果招股反應熱烈，美國那邊的股價也會先行一步，變相令定價都貼近招股價上限，水位空間又細咗。熱爆的新股會穿底，反高潮，而冇乜人抽的第二上市股份，表現亦無想像中咁差，今年上市的9隻第二上市股份，全部都在水面，當中潛水最耐的百勝中國，都在本月重上招股價，現時累積升幅有14%，上市後累升逾三成的都有三隻，分別係京東、華住及再鼎醫藥(9688)，換言之，肯抽又肯坐第二上市的股份，基本上都會贏錢，情況跟熱爆的生化股剛好相反，愈坐只覺愈唔對路，由贏變輸。
由於咁多隻第二上市的股份，來自不同的行業，青冰都諗唔通係甚麼原因令佢哋穩過其他新股，姑且就睇吓下一隻仲頂唔頂得住啦。
--