Q37131：

請問 1929及1928邊隻質素較高？

龔成老師：

兩隻都是有質素，可長線投資的，質素接近。

反而在比較時，要考慮佢地面對的大環境，兩者都是同中國經濟有關，1929受消費力影響，而1928會較受遊客情況影響。

1928面對澳門的發展，而澳門發展最高速時期已過，你預之後會平穩，因此，長遠來說，佢會較為收息及平穩增，而1929就會波動少少而增長力有機會高少少。因此可睇翻你的投資策略。

Q37132：

老師我（澳門學生）有問題請賜教：

好朋友推介一個帶兩地牌近關口四室兩廳，134平方米，售價278萬人民幣（呎價不便宜因帶牌），朋友想與我合資，每人各20萬人民幣就夠首期，值得合資嗎？

貸款：110萬RMB

利率: 3.5%

貸款期：30年

月供：約5000RMB

此單位兩地牌每年可出租約50000RMB,單位現租$4500RMB,若日後改為民宿可能租值更高，是否租可抵供？

本人36，收入穩定冇經濟壓力，資產1/5是股票1/5內地房產，其餘定期。

龔成老師︰

我自己無研究這方面的物業，不過從回報率達3.7%，勉強可以考慮。

不過始終內地物業市場依然波動，你預始終有蝕價風險。

而且，物業類唔係一個細投資，如果你本身本錢不多，我就比較建議投資優質股先會較好。

因為你將來都會買自住屋，到時你物業類佔財富組合比重就會好高，造成不必要風險。

而且，你日後雖然可以改為民宿去提高租值。不過，始終有改建費用，同埋放租物業有機會有真空期，都會影響你整體回報。

另外，合資有機會出現好多日後的問題，要小心，;好景的時候，大家都無問題，但如果面對不景，就可能有不同意見，到時處理較煩，因此這方面要小心，同時預先定好，那些情況有怎樣的處理方法。

建議你先考慮清楚，除非真係好睇好，或者本身資金好充裕，否則這個未必是你最好的投資選擇。

Q37133：

聽了你分析，如果有1筆資金，我分開4段，

在銀行股中位，中低位，低位，再低位，分段買入，是否這樣買就可以安全收息，而又不會令自己一次過買入，會較安全？

因為想每年處於銀行股，除淨後低位買入，除淨前高位放出，賺取差價

龔成老師︰

分注儲貨，能夠平衡買貴貨風險，是一個可行方法。

但你要留意，任何行業都不應太集中。長線計，個別地區，不要高於組合70%。而個別企業和行業，不要佔組合15%和30%以上，銀行業更加不要高於組合20%，否則會有過度集中性風險。(盈富和VOO這些指數ETF，由於係一籃子組合，故不受企業和行業限制。)

如果你目標係收息，可以平衡配置係以下收息股當中。

不過，，收息股主要係創造被動收入，即係收息，增長力唔會明顯。如果你係將/已退休，或者好保守，可用收息股。相反，你係較年青，我就不建議用佢做主力。

以下是一些具質素架收息股，你可以參考下︰

目標是5%以上股息率的收息股，例如高息基金（3110）、港燈（2638）、深高速（0548）、香港電訊（6823）、工行（1398）、置富（0778）等都可以，你可以了解下，並從中選股。由於收息股股價都會有上落，因此要控制每一隻佔股票組合的比例，不能超15%，最好在10%以下，而3110由於是一個組合，比例可比個股高。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、偉易達（0303）（記住，股價略波動，不能太過大注）。

最後，你對除淨派息架運作，似乎有點誤解。

如果你要收到股息，必需在「除淨日」前一天，依然持有股票。「除淨日」，其實就是用來確認那些股東收到這權益的日子。等到「除淨日」當天才買，派息就唔會有你份。

「除淨日」那天，股價就會扣除派息部份，例如原來股價$10，派息$1。那麼「除淨日」就會將股價，從$10下調至$9，以反映派息動作。

而「派息日」，就係這班合資格股東，正式收到股息的日子。

由於「除淨日」股價會下跌。而下跌比重同收到息係一樣，所以只係左手交右手動作，你唔會在此期間(前後)因買/沽貨，出現任何著數。

Q37134：

我朋友買咗呢幾隻 而家唔知放唔放好2100 2012 2826 2160 輸好多，唔知放唔放好

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

如果企業質素轉差，就要賣出。如果企業某些核心優勢減少左，就有機會減持，因此，我地要分析企業的核心因素，一些長期的賺錢能力，有無改變。

百奧家庭互動（2100）是中國兒童網頁遊戲開發商，開發與運作的虛擬世界為用戶提供在線互動娛樂和學習。

佢收入主要來自出售遊戲相關的虛擬物品及服務、為用戶提供高級功能的會員訂購費、廣告收入，及授權使用集團的專屬卡通形象所得的收入。

本身集團規模唔算好大，加上股價、收入同盈利都好波動。唔係話無投資價值，但要控制注碼，預佢有機會上落較大。如果貨多要減。

ＧＸ中國雲算（2826）和微創心通醫療科技（2160）都有長線投資價值，但佢地係風險較高類別，要控制注碼。

陽光油砂(2012)無明顯投資價值，建議長線換碼至其他優質股。

Q37135：

請問阿里巴巴適宜大量投資嗎？

香港嘅

另外好到股近排都升，請問會只係短期現象嗎？

龔成老師︰

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。個別地區不要高於組合70%，相同行業不可佔組合多於30%，而單一企業不要高過15%。

特別係銀行業，佢營運模式較特別，風險會比一般行業為高。必需堅守30%這個準則，如果可控制在20%以內，會更好。

但盈富(2800)、VOO這類指數基金，則不受企業和行業限制，因為它是一個包含一籃子不同行業的優質股組合。因此，盈富(2800)、VOO就算在組合中佔較大比重，都唔會造成(企業和行業)過度集中性風險。

而阿里(9988)本身雖然有質素，但近年監管，佢自己重組失敗等，不確定性都高，更加唔可以過份大注。

至於港股近期大升，只係指數回歸至較合理水平，過往都係一個偏低架位置。

而是否短期現象，我唔會考慮。我只會從長線投資價值，同埋平貴度去判斷是否值得入市。

現時港股係合理區中至中下部，有一定投資價博率，可以分注，但預中短期依然會波動。

Q37136：

老師 唔好意思 理想汽車真係日日都跌

我係咪只有繼續等

龔成老師︰

其實新能車股中，理想(2015)唔算係差，但佢風險高。

不過，始終大環境弱，加上新能車在打減價戰，佢點都會有影響。

加上，市場一般只會對比亞迪(1211)和Tesla(TSLA)較高評價，所以當一切條件都唔理想架情況下，理想(2015)難免有較大調整。

你可以睇翻自己持貨佔組合比重，如果只係一個小架比重，可以守住先，再觀察。

相反，如果佔比重較大，建議減持部份，去平衡風險。

Q37137：

龔老師你好

經過接近六年嘅努力後，小弟嘅財富已經達到100萬，而且在30歲前完成，成功挑戰目標，在此感謝老師嘅指導，由零開始儲起，到而家嘅100萬，得到好大嘅滿足感

而之後嘅目標就係五年後儲到200萬，希望都會成功

龔成老師︰

太好，這都是你努力學習的成果!!!

當你有左而個100萬，由於本金大左，未來增值效果會更明顯。

不過，緊記我地要持續學習，先至可以令自己唔會對市場脫節，同時令投資效益更上一層樓。

加油!!!

Q37138：

龔sir,你好，請問而家保險公司有好多派息基金，儲蓄plan,請問這類投資值得嗎？感謝龔sir

龔成老師︰

其實"保險"主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

Q37139：

龔sir,你好！我想請教你有關投資的士牌。

投資的士牌首期約50萬元，每月可收租約$22000，扣除月供約$16700，每月現金流有大約5千元。

現在的士牌價是約十年前的四成多，處於低位。由於息率高，使牌價很難上升。而且Uber使的士司機收入有影響。又因司機服務態度差，而影響行業形象。

即使面對各不利因素，每月都有5千現金流，好像很不錯，而且下跌空間有限，只要能夠有錢比保險，牌費就可以了，是不是值博率很高呢？請指教

龔成老師︰

的士牌現時在合理區，這都是一個投資工具，但你就唔好預期佢有好大的增長力，已經不及過往的年代。

因為佢面對市場環境已有不少變化，叫車程式會對佢不利，雖然未必會影響到要大幅減租，但都會影響長遠增長。

整體而言，可以投資，但就視為收息的工具，唔好預佢有明顯增長力。

不過，投資價值未算好高，除非你資金較充裕，想分散財富組合架投資風險，否則唔太建議。

Q37140：

多謝回覆，咁到時喺購物節後，例如618、雙11嗰啲日子過後，會唔會對阿里有增益?

同埋，呢排會唔會將精力放返喺銀行股、公用事業股會較有利?

龔成老師：

其實而家已經無太大的作用，第一，增長力不及過往，第二，市場已消化了相關因素。

最好仍是集中分析，企業的長期面。反而佢之前想分柝一些業務上市，如果在6個月內成功，會有利股價。

銀行股、公用股，的確可以留意，業務正好轉中。

但你要記住，我地不是追炒那一個板塊，而是建立一個長遠優質、平衡、適合你的組合，要同時有不同行業，長線。