Q49121：
龔老師 您好！
我是您的忠實粉絲。首先感激您的投資心得分享，承蒙您的著作 使我懂得一些投資的基礎。
希望老師可以幫忙分享一些心得。 我今年50歲，收入支出剛平衡，要養家，無多餘錢。
有一層自住樓黃埔花園2房單位，已供滿。另外有一層也是黃埔花園2房單位放租。已經供滿。租金收入算是主要生活收入來源。
因為坊間傳聞黃埔花園太舊了，再不賣出或換新樓 以後就好難賣得出，否則跑輸市場一大截。
我打聽過 現在黃埔2房單位$700萬，如果我賣出再 同區 換個較新的2房單位收租，租金可能多7%，但要補差價$150萬，即$850萬較新既2房單位（包括裝修和里印費），例如附近的海濱南岸。
如果要拿出$150萬，即是拿出儲蓄的一大半。
這樣 出多$150萬，換新小小的2房單位， 比較 持有舊既黃埔花園2房單位， 是否值得？
表面上看，出$150萬，租金收入好似多了7%，而且樓齡又好似新了些， 這樣想法是否正 ？
還是繼續持有 黃埔花園收租 （因為始終都是藍籌屋苑）？
感謝老師的寶貴意見和時間！
忠實粉絲，蔣先生 敬上
龔成老師：
黃埔花園樓齡超過40年，雖然佢係藍籌屋苑，抗跌力較高。
但長線，都難免會有減值和維修成本大增的情況。
如果你想換另一個較新物業，去作為收租之用，係可以。
但我地財富規劃，唔好只諗單一資產，而係要總體咁去考慮，思考下同一筆資金，長線放係邊度最有利。
首先，我自己預期未來香港樓市，只會係平穏發展，唔大升，同時唔會大跌架格局(唔會好似過去20年咁一直升)。
故投資物業，唔係一個最優先選項。
再加上，你已經有一個自住物業，如果你本身除左物業，無太多其他資產(如優質股、生意之類)，咁我會偏向建議你套現資金，配置落適合自己的優質股之上。
這樣做，會令你財富組合更平衡。就算物業/租務市場好差，你成個財富組合，都不至於出現災難性影響。
當然，如果你對其他工具不認識，買一個較優質物業都可，不過你要明白其實你出現集中風險，同時物業長遠目標是收租及少少升值，不能期望大升。
Q49122：
如果3110、3466只選一隻長期收息，哪一隻抗跌力較高？
龔成老師：
其實兩隻好接近。
因為3110持股及行業相對分散D，可理解在抗跌力方面，會略好。
而3466較多在金融和地產，相對集中風險會高少少。
Q49123：
老我，我隻ORCL蟹貨，點算？
龔成老師：
甲骨文 Oracle Corporation（ORCL）上落較大，雖然企業都有質素，但佢比其他科企，因為負債較高，令企業風險較高，股價也較波動。
這股建議你控制持貨，貨多要減部分，留部分。貨不多可持有。
有一定的規模及質素，不過股價就較波動，因為市場對其資本開支大增擔心，令現金流轉弱，令風險增加。
甲骨文軟件係統有限公司（Oracle Corp）為全球企業提供數據庫技術和企業資源計劃或ERP軟件。企業提供解決全球企業資訊技術問題的產品和服務，企業的雲產品包括各種雲軟體應用程式，包括企業資源規劃軟件、績效管理、供應鏈解決方案等，以及基於雲的基礎設施支援。
成立於1977年，如今，甲骨文擁有136,000名員工，在175個國家/地區擁有430,000個客戶。甲骨文現時希望由人工智能技術的發展，帶動雲相關業務的需求進一步增加。
Q49124：
中信資源有貨，賣唔賣好？
龔成老師：
中信資源（1205）業務一般，這股宜減持，餘下小注貨持有。
佢主要提供重要商品和具策略價值之天然資源，尤其專注於石油業務。集團的主要業務是油、鋁、煤、進出口商品、錳及鐵礦。
生意每年都十分波動，其中一個原因是受國際資源價格影響，因此盈利上落大，有時會出現虧損，投資這股的風險高，因此不建議持貨太多。
Q49125：
請問老師3419是否比3416好？
龔成老師：
如果你的首要目標是長線穩健、不想心情跟隨大市大起大落，那麼 3419 會相對好一些。因為恒指包含了傳統的香港本地地產股、國際金融股（如匯豐）等，在整體大市震盪時，其防守力一般會比純中資股的國指（3416）稍強一些。
如果你追求極致的高息，且非常看好中國經濟與內地大型企業的反彈，那 3416 會更有吸引力。由於國企指數的成分股（如科技、內房內銀）近年波動略高，基金經理往往能捕捉到更高的期權金，這也反映在其長期年化派息率往往略高於 3419。
不過要留意，當指數下時，佢地都會跌，如果最後恆指跌得多過國指，你買3419會跌較多，如果最後國指跌較多，3416會跌較多。
Q49126：
澳門班幾錢？如何報名
龔成老師：
10月將會首次開【澳門美股班】！
日期：2026年10月31，11月7, 14, 21, 28日，12月5, 12, 19日(逢星期六)。時間：1415-1715
地點：澳門南灣區
費用：澳門幣$8800
股票班舊生優惠價：澳門幣$6800
了解及報名：https://www.80shing.com/register.php?id=5
第一堂：投資美股基本功
第二堂：美股新手策略及財富配置
第三堂：環球產品實戰應用
第四堂：美國經濟分析與潛力行業
第五堂：美股最佳買賣時機與估值
第六堂：多種美股選股技巧
第七堂：美股財務數據與年報分析
第八堂：潛力美股與實戰
**附加資料：合共超過240分鐘的溫習影片
Q49127：
老師：請問賣出一些匯豐轉買3110和3466作長線收息可以嗎
龔成老師：
匯豐（0005）有質素，可長線，但如果你貨多，可減部分，留部分。
我地應該建立一個平衡的組合，所以你同時持有不同收息股，可以的，你部分轉3110+3466，可以，這會令組合更加平衡。
Q49128：
我現在將300萬換埋美元，加埋本身150萬買2張長期票面率5%的美債，即每年已確保有22.5萬收入
另外200萬做港元供樓高息定期(我親戚讓比我的)
暫時以嚟都高過3厘，即已足夠預期使費用
剩餘100萬希望買些有增長力+收息股的組合，睇緊941，3110 or 3419及CSPX，請問老師有何建議? 謝!
龔成老師：
如果你重點目標是收息，而不是增值，其實上述的方向都可以。
但如果你想增值，就應該作調整，所以好睇你的投資目標。
我以下用你「目標是收息及少少增值」作方向：
你$300萬及$200萬部分不用有太多改變，又或者，部分轉去買收息型ETF。
至於$100萬，上述幾隻都可以，3110可較多，3419多少就要睇你風險承受能力，至於941無問題，CSPX建議分注買，不要一次過大手，也不要過多，始終現時不便宜。另外，你除了上述幾隻，也可考慮以下收息股：
恆生高息基金（3466）、港燈（2638）、深高速（0548）、香港電訊（6823）、工行（1398）、置富（0778）等都可以，你可以了解下，並從中選股。
Q49129：
謝謝回覆🙏
您是龔成Sir助理嗎
因為股票係小白，怕股價跌，蝕錢所以冇買。
投資組合主要係：房產+實物金+儲蓄保險+現金定存
儲蓄保險買咗兩份，需供5年。已供咗3年
宏利保險公司同恆生銀行買。
保單金額：恆生保險65000美元，每年供13000元
宏利32500美元，每年供6500美元
打算長揸，幾十年後先攞出來都可以，或者將來更改受保人，傳俾將來嘅小朋友（暫時未生，打算5年後）
如果股價跌，派息會受好大影響？長遠睇，港股好？美股好？
呢個保險，中間要提取現金出來嗎，例如20年後，定係幾十年後先或傳俾小朋友？
龔成老師︰
- 我是龔成本人，社交平台回應的都是我。
所以，有時回覆會無咁快，可能要幾日，請耐心等待，我絕大部份問題都會覆。
(小心，最近有不少騙徒扮我或我助理，去拉人入投資群組，這是假的總之記住，我無群組)
我官方whatsapp 只有一個：55457212 （這個是課程報名用，由我助手回覆）。
- 你要明白，人生在世難免要做投資，有時無得避。
你以為唔投資，就唔洗輸。情況就變到你而家咁，集中晒係個別資產。而且，財富組合都唔太理想。
長線，你都有機會因此而輸錢，只係不是輸在股市而已。
- 睇你手上保險，從保費和保障額估計，係一般儲蓄保險。
你可以用佢長線儲錢，去傳承比小朋友。但你要明白，佢地增長力好弱，長線會跑輸優質股。
就算你買指數ETF，長線都極大機會跑贏儲蓄保。
你已供架保險，建議保留，但唔好再加大相關投入。未來要為小朋友預留資金，建議用指數ETF去儲。
但保障型保險(如純人壽、醫療、危疾等)，記得盡早買。
- 指數ETF係一籃子不同行業架組合，具分散風險能力。就算當中個別股票出問題，對成個ETF都唔會有嚴重影響。
例如美股追蹤標普500指數的（VOO）、追蹤富時全球股市指數（VT）、追蹤港股的盈富（2800），都係指數ETF類別。這些ETF有質素，適合一般投資者選擇。
若你未有定平貴能力，可以用月供或者分注模式去儲貨，去平衡買貴貨風險。
如果想知多少少指數ETF係乜，可以睇翻我之前架Youtube影片︰
https://www.youtube.com/watch?v=nBr4tCJ__oY
- "股價跌，派息會受好大影響"??
你概念錯左，價股升跌，唔會影響佢派息。
真正影響派息，係企業架財務狀況和盈利能力。
如果你係想收息，我唔建議只買一隻，而係買幾隻不同行業架收息股去平衡。
就算個別企業/行業出問題，你成個收息股組合，都唔會有災難性影響。
- 至於保險中途要提錢??
這個視乎你需要和規劃，無一定答案。
但記住，這些儲蓄保的保單價值，一旦被提取，就不能重新存回保單內。
你唔好諗住之後有錢，就再存番入保單收息。它不是銀行戶口(運作模式)，而係保單，概念完全不同。
Q49130：
因為女女上學需要，我把自住樓租出，然後自己租屋，但見租回報其實得3.x厘，所以我剛賣出自住樓，想把錢放曬係高息股，大約三年後女女升中先再買樓。
依家大約現金$7M。應該點配置
我買左咁多年股票，都係輸多。唉。所以唸住收下高息算。44歲，年紀唔算細了。如果做多八年退休，我公積金大約有$550萬。
唸住D錢收息可以cover租 。都唔知點。咁多年都唔太識理財 。當然，女女係度，開支都大。一個月都八萬開支
龔成老師︰
這個模式，唔係話唔得。
但你要明白，咁樣某程度係沽空左樓市。即係將來樓價突然大幅向上(雖然暫時條件，唔似會)，咁你將來置業成本就會急升。因為你唔係樓換樓，而係現金換樓。
另外，投資高息股，除左有利息收入。但同時，都會有股價波動風險(尤其3年，唔算長時間)。
你要明白當中風險，咁就可以。
至於資金點配置，我會建議你係"平穏增長股、收息股、定期"之間去分配。前者(是3者之中)最高風險，但增長力較高。定期，當然是風險細，但只有息收。
你自己思考下，點樣你先會覺得最穏當。
如果想保守，就集中收息股 + 定期(尤其係3年後置業本金)
想進取D，就平穏增長股(建議係非置業本金部份)。
以下是一些相關優質股，你可以參考下︰
平穩增值股，指數基金由於是一個組合，因此在平衡風險方面較好，例如美股追蹤標普500指數的（VOO）、追蹤富時全球股市指數（VT）、追蹤港股的盈富（2800）。
另外再加其他個股：美股如巴郡（BRK.B）、蘋果公司（AAPL）、迪士尼（DIS）、Costco好市多（COST）、麥當勞（MCD）、可樂（KO）、港股如中銀（2388）、港鐵（0066）、港交所（0388）、長建（1038）等，你可以自己了解下，並從中選股。
你可以建立一個收息股的組合，目標是5%以上股息率的收息股，例如高息基金（3110）、港燈（2638）、深高速（0548）、香港電訊（6823）、工行（1398）、置富（0778）等都可以，你可以了解下，並從中選股。由於收息股股價都會有上落，因此要控制每一隻佔股票組合的比例，不能超15%，最好在10%以下，而3110由於是一個組合，比例可比個股高。
另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、偉易達（0303）（記住，股價略波動，不能太過大注）。
緊記了解清楚自己取態和經驗，再判斷那個配置最適合自己。
以下是相關股票分享影片，你可以參考下︰
[平穏增長股] https://www.youtube.com/watch?v=5bQc6sWIie8
[收息股] https://www.youtube.com/watch?v=5xmiZGYNptI
[銀行股] https://www.youtube.com/watch?v=EgyCUycKScc