龔成老師你好！多謝你一直分享供股及其他股票訊息，令我呢啲唔識投資嘅人都學下有紀律地投資，令財富慢慢增長。呢幾年我由打工仔走去創業，資產增長唔少，希望老師可以抽時間解答，指點財富配置的方向。
先介紹下目前的財富配置情況：
股票：唔經唔覺供股接近7年，現時手上有6手比亞廸、20手盈富基金、8手港鐵、15手中生製藥，現時價值大約85萬元，現時每月供股大約7000蚊。
其他長線持有股票包括20手建行、16手工行、2手港交所，以及一堆價值不高的股票，現時價值大約38萬。
基金：大約200萬元，現時每月派息共約1萬元，現時帳面價值與買入價大致相約
其他：現金、定期等共有大約300萬
做生意收入不固定，平均大約每月10萬
開支：
每月大約供樓1萬5千蚊，自住樓中，樓價比買入時大約下跌2成。長遠希望換樓，改善居住環境
家用連每月不同洗費／開支：約2萬元
另外有買年金，每年交6萬，醫療保險大約一年7至8萬（10至15年後相關開支會減少，有年期儲蓄plan掛鉤）
想請教一下，供股方面，中生製藥、港鐵是否值得繼續供？現時每月供大約2000元，應否換馬？如果想增加每月供股的金額，大約3000元，騰訊、3067是好選擇嗎？或者有咩推薦股票？
如果再買股票（非月供），現時有咩股票投資價值較高？好多服票都從低位升晒上來，擔心太高位入貨（知道要睇長遠的，但擔心自己唔識睇，買錯股價太高的，有長遠投資價值都要守）
另外，唔同保險經紀時不時推介儲蓄plan，聲稱放25至30年，大約65歲取回時有3－4倍回報，老師覺得呢類財富配置是否合適？
多謝老師抽時間解答！祝你身體健康！
個案重點：
‧股票$120萬
‧基金$200萬
‧現金+定期$300萬
‧做生意收入不穩，平均月入$10萬
‧有一層自住物業，供樓每月$15000
重點目標：
‧長遠希望換樓，改善居住環境
‧股票是否繼續月供
‧儲蓄plan是否買得過
龔成老師分析：
我分開幾部份去同你講︰
<<投資>>
你所講架股票，都係有長線投資價值，但有幾點要留意。
- "一堆價值不高的股票" 你要分析佢地仲有無投資價值，如果無就要沽。唔好因為銀碼細，就唔理。
如果該企業業務長期向下，營業額每年下跌，企業持續虧損，企業無發展，無獨有優勢，就要賣出。不要不理。
- 現時唔少股票從低位升翻好多，但長線計，依然係一個可以分注架水平。如果你自問無足夠"估值"能力，建議維持月供，或者分注去慢慢儲，以平衡買貴資風險。
至於買邊類股票，就睇你年紀。
若你係年青至中年人士，可以投資「平穏增長股」和「潛力股」。
選股上，你可以考慮一些平穩增值股，指數基金由於是一個組合，因此在平衡風險方面較好，例如美股追蹤標普500指數的（VOO）、追蹤富時全球股市指數（VT）、追蹤港股的盈富（2800）。
另外再加其他個股：美股如巴郡（BRK.B）、蘋果公司（AAPL）、Costco好市多（COST）、麥當勞（MCD）、可樂（KO）、港股如中銀（2388）、港鐵（0066）、港交所（0388）、長建（1038）等，你可以了解下，並從中選股。
如果想增長力高少少，可考慮潛力股，例如指數基金，美股可投資納指基金（QQQ），或在港上市追納指基金（2834）、港股則可考慮安碩恒生科技（3067）、中國電車基金（2845）。另外再加：美股如微軟（MSFT）、Visa（V）、ASML Holding（ASML）、Tesla（TSLA）、Amazon（AMZN）、港股如騰訊（0700）、比亞迪（1211）、小米（1810）等，你可以了解下，並從中選股，但佢地波動性和風險會較高，要自己平衡。
但潛力股風險較高，對投資知識要求較嚴格，所以你可以先集中在平穏增長股上，甚至先集中供盈富(2800)和VOO這類指數ETF。到你投資知識有所提升後，才慢慢加入潛力股到組合之中。
-
長線慢慢加入一些美股，去平衡地區性風險。最入門投資指數基金，例如（VOO）。
-
基金，一般都有唔少收費。而且，派息基金其實有點複雜，有好多風險唔係一般投資者可以理解，我唔係話一定唔好，只係你要明白佢都有一定風險，你要小心分析，同時同一隻基金都不宜持有太多。
另外，可以分析該基金投資那些類別，然後比較大市，如果基金無法跑贏大市，反映投資價值不算高。
-
年金、定期之類，係較適合近/已退休人士，或者一D較保守架投資者，你要諗翻自己是否適合。
-
中生製藥(1177)、港鐵(0066)依然可以月供。但1177本質風險較高，如果你貨多，可以轉供另一隻。
<<物業>>
如果你長線有換樓架計劃，你就要睇翻現有物業質素，至少要同大市同步，以免換樓時，因為佢價值貶值得太快，而造成額外成本。
我相信香港樓市，不會大跌，也不大升，相信會平穩或少少向上，因此，只要你現時的物業能做到與大市同步，到你資金足夠時，就可以進行換樓計劃。
另外，如果你預未來2-3年就會換屋，相關資金就不宜作高風險投資(集中收息股、定期之類就好了)。
<<保險>>
保險在理財的計劃中扮演「防守」的角色。
原理就是將你某些不想承受的風險，轉嫁給保險公司。例如人壽保險的原理，是當一個人不幸過世，其家人會因此而失去經濟支柱，
若果想將「失去經濟支柱」這部分的風險轉比保險公司，就要買人壽保險。當家庭失去經濟支柱時，保險公司的賠償就會起作用，購買保險的人就用「保費」作爲代價。
在理財中，我們應該做到「攻守兼備」，保險是防守性產品，有購買的需要。我自己也有買，但買哪些類別，金額多少，就真的很個人化，要視乎你願意承受哪些風險，又有哪些風險想轉嫁給保險公司。
另外，由於保險只是一個防守性產品，因此不用買得過多，「足夠保障」便可。理財是一個配置的過程，當你做好防守後，就應該將資金，留作「進攻」之用，這樣對整個財富最為有利。
儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。
但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。
<<生意>>
如果你本身個生意長線發展係好，其實個回報可以跑贏優質股，所以你手上架資金應該優先留比生意部份。
而投資優質股目的，就會由"增值"，變成"分散風險"。
令到你收入來源唔會過於依賴生意部份，使你整個財富組合變得更穏當、更平衡。
（上述文章只是分析，只供學術性質，並不構成任何投資建議或邀約，投資者在投資前，請自行花時間了解，才決定是否適合自己。）
龔成老師簡介
‧ 暢銷書《圖解美股小百科》、《圖解股票小百科》、《股票勝經》、《選股勝經》、《年報勝經》、《50優質潛力股》、《50穩健收息股》、《50值博倍升股》、《38全球倍升股》、《大富翁致富藍圖》、《5年買樓4部曲》、《80後百萬富翁》、《80後2百萬富翁》、《80後3百萬富翁》、《80後千萬富翁》、《千萬富翁致富學問》、《財務自由行》作者
‧ 《經濟一週》理財真人Show 節目擔任致富教練
‧ 曾接受港澳多個傳媒訪問
‧ 過往於銀行從事投資相關工作多年
‧ 曾在萬多元月薪狀態下，憑股票累積數百萬財富
‧ 現為全職投資者，擁數千萬財富
‧ 於網上分享投資心得，瀏覽量過百萬，為人氣博客，解答網友理財問題逾40,000條
‧ 《經濟一週》、《華富財經》專欄作家
‧ 擁財務學學士學位
‧ 證券業持牌人士
‧ 投資課程導師，香港及澳門學生人數逾5,000 人
‧ Facebook專頁「龔成」粉絲人數超過300,000人
若有問題發問，可在fb專頁「龔成」（www.facebook.com/80shing）inbox。