在港股中，電影相關的股份係普遍難炒，以前港產片時代，那些股都係妖味十足，至現在以國內電影為主體，但你睇阿里影業(1060)個圖就知，都係一大棍之後就拜拜，貓眼娛樂(1896)叫做好啲，做賣戲票的平台業務，似乎好過落手落腳投資電影的阿里影業。
而另一個選擇就係IMAX中國(1970)，每逢有荷里活大片，IMAX影院定必受惠。今年國內生活趨向正常化，按IMAX中國在3月時業績披露的資料，春節假期票房達78億人仔，應該有賴「唐人街探案3」帶動，青冰問過內地朋友，套戲就冇前兩集咁好睇，但累積票房都有四十幾億，而同樣以IMAX格式上映的「哥斯拉大戰金剛」，在3月底開畫，上映十五日就突破十億人仔票房，因此可以預料，首季的收入應該相當唔錯，而首季的營運數字將在四月尾或五月初公佈，戰友可以留意。
過去一年在疫情的影響下，荷里活大片供應唔多，但Fast and Furious 9 就將於5月21日在內地上映，上次第八集係狂收27億人仔的，所以今集個票房仍值得期待，如果美國疫情繼續受控，接種疫苗見成效，電影業將可逐步回復正常，下半年幾套Marvel電影將可如期上畫，餓咗咁耐，影迷應會報復性睇戲，情況就如國內的電影業。
春節時唐人3上畫大收，曾刺激IMAX中國股價一度飆升87%，最後收市都升三成，當日的加權平均價是18.98元，近幾日慢慢爬升，應該係預炒五‧一票房，如能突破當日的蟹貨均價18.98元，上返廿蚊應該唔難，至於能否再上一層樓，就要睇下月Fast and Furious 9的票房表現了。
--