Q39001：

你好，龔sir，講返我小小背景，本人在一家貿易公司任職，幾年前我因為經歷家庭巨變，前妻利用我的信任用我名義借了三十幾萬，加上當時工作亦不順利，可以話係我人生低谷，幸好還有自己家人及身邊貴人支持及協助，令我在精神同身體慢慢康復，走出困境。

當時有幸睇到龔sir嘅Facebook post！

你嘅個人經歷，投資理念及知識，好有正能量，所以當時我買晒龔sir你嘅書嚟睇，跟住喺2023年同埋2024年都分別上咗龔sir嘅基礎班同埋進階班，令自己投資都有一套正確的哲學。

今次想分享俾龔sir你聽就係我經過呢三年, 我已經清還所有債務！

同埋終於儲到人生嘅第一個一百萬，好感激龔sir嘅指引，所有你寫嘅書, Facebook 同YouTube嘅說話令到我得到啟發，覺得人生仲有希望, 亦達成我自己的第一個目標。來緊目標係向千萬資產進發。

係呢度祝龔sir身體健康，資產繼續增值，開多啲新班分享投資心得俾大家

龔成老師︰

聽到你這個消息，我都好開心，這都是你努力和信念成就出來的成果。

其實這個世界好多野，都是心態，你心態正確，就能渡過困難，相信你這段時間，也經歷了好多野，走出困境並不易，現時結果是你努力得來的，你要保持正面心態，要繼續努力！

當我地成功達到首個100萬，本金大左，未來增值效率會有明顯架提高。

只要你保持學習，用正確的投資方法，相信第2,3,4...個一百萬架出現，不會是問題。

加油!!!

Q39002：

龔老師，9698現價買入可以嗎？

還可以嗎 ？

龔成老師：

萬國數據（9698）業務風險較高，如果現價買入，小注好了，你要預佢上落大，如果風險承受能力不強，就不要投資。

佢的業務為開發及營運數據中心，根據佢公司提供的資料，佢係全中國最大的運營商網絡中立數據中心服務提供商，市場份額約2成。

現時主要通過GDS上海、GDS北京及其子公司進行該等業務。GDS北京及GDS上海各自持有經營業務所需的互聯網 數據中心牌照。

佢提供託管和管理服務，包括創新和獨特的託管雲價值主張，機房面積為266,260平方米，有一定的規模。

見佢生意有一定的增長，行業前景正面，只是這股業務本身較波動，又有政策風險，所以不會太急定義佢為平（因為要考慮風險因素），投資價值都有，現價合理區底，但始終業務有不確定風險，而及受中國政策影響，唔建議太大注。

Q39003：

老師好，3年前高位少注買咗3662，依家應唔應該加注？內房物管將來會唔會好轉？

龔成老師：

坦白講，這股質素一般般，雖然行業好轉有機會佢都好轉，但始終每間企業情況不同。如果你本身已有貨，而這股又不值得持貨太多，就不建議你加注了。

Q39004：

老師，請問3383雅居樂點睇呀，我3.03元入咗

857中國石油我4.40入，8.62時我末放，但到今天仲未放，有機會升到8元嗎？謝謝回复！

龔成老師：

雅居樂（3383）對中國樓市有風險，加上佢本身負債較高，相信會對佢有影響。當然，現時中國樓市正好轉，佢也會業務好轉。

不過，始終這股有風險，你最重要是控制持貨比例，貨不多，可持有。

這股都有長線投資價值，現價合理，但負債高始終是風險，唔建議太大注。現價合理，已反映風險。

至於中石油（0857）有質素的，但上$8並不易，因為油價都是一個因素。

雖然中石油都算有質素，但不是最高質類別，因為石油是商品，當中沒有差異性，要將石油賣出，很大程度要跟國際油價及市場，這其處於被動狀態，沒有價格自主的能力。

如果油價向上，都會都向上的，但你要預佢中長期先上到。

Q39005：

Sir 微盟同商湯 邊隻潛力大d?現價值得入手嗎？

龔成老師：

兩隻是高風險的。

如果要選1隻，可考慮商湯集團（0020）

業務都有發展，但要留意政治風險。同時業務都有一定的風險。

佢係一家專注於計算機視覺軟件的人工智能軟件公司。根據報告，佢為亞洲最大的人工智能軟件公司，市場份額為中國最大的計算機視覺軟件提供商。

軟件平台的客戶數量合計已超過2400家，同時還賦能了超過4.5億部手機及200多款手機應用程序。集團並擁有8,000多項人工智能專利及專利申請。

佢專有的人工智能基礎設施SenseCore，佢已開發超過22,000個用於不同應用的商用人工智能模型，涉及多個垂直行業，已於智慧商業、智慧城市、智慧生活及智能汽車領域取得市場領先地位，服務商業空間管理、住宅物業管理、城市管理、製造、基礎設施、交通、移動設備及應用、醫療及汽車。

長遠來說，佢的技術應用將會更多，有發展力。

不過，美國已對佢進行打壓，相信之後仍會面對一定的政治風險，這對投資者來說都是一個較大的不確定因素。

因此，這股都有長線投資價值，但由於政治風險，因此不建議投資太多。

Q39006：

龔sir，非常謝謝你。自從2022年係Facebook看見你的post後，改變了我的投資觀念。從今年1月低位帳面虧120萬，到今天收市帳面賺100萬，我還會耐心等待繼續升，到時再請教您是否應該賣出。

龔成老師：

恭喜！！！

如果你持有的企業，質素只是一般，但近期大升，可考慮賣出。

又或者，如果你該股持貨比例較多，可賣出部分，留部分長線。

其實我地最重要睇企業長遠的發展力，不要止集中睇賺蝕數。

你要思考「怎樣將你長遠財富最大化」。

當然，我相信短期股市會波動的，如果你擔心，就賣少少，餘下長線。

Q39007：

龔Sir 你好阿 想請教下 我較早前係NVDA最高位$137入左15萬 本身都打算長線投資 起碼放3年 覺得佢呢間公司護城河都比較深

現價下跌左一段日子

手頭上現金大慨剩低20萬左右

想請教下應該耐心等候佢升返

還是應該分注溝淡🙏🏼🙏🏼

還是應該先止蝕？🙇🏻

龔成老師：

我地決定加注與否，要睇幾個因素，記住，並不是「拉低平均買入價」為目的。

第一，要分析這股的質素，如果無質素，就再跌都唔加。

第二，這股的類別，如潛力或增長或收息類等，是否與你的財富組合匹配，比例是否適合。

第三，你要先計算加注後，這股佔你股票組合的比例會否太多，因為同一行業，同一股票。不能佔股票組合的比例太多。

第四，現價是否有投資價值率，要平，或起碼合理，不能貴。

第五，你要在加注後，仍有現金剩。

記住，重點不是「拉低平均價」，而是組合比例與配置。

這股有潛力的，但股價十分波動。因此，你可以持貨，但不要加注，也不建議你持有太多，主要是風險管理。

如果貨多，可以減部分，餘下長線，不要理股價，長遠等企業成長。

Q39008：

你好，想問下我依家9成mpf持有港股，呢幾日升好多，想轉一半出嚟，可以揀咩基金比較有潛力？謝謝🙏（本人45歲）

龔成老師：

強積金宜穩陣少少，你集中在港股，的確有風險。

你45歲，仍有平穩增長能力，可考慮3成港股，3成環球股票基金，4成其他資產。

如果你不怕集中在股票，5成港股，5成環球股票基金，都可以。

Q39009：

Sir, 0285現價($34.4) 仍然值得入嗎？另外想每個月買少少QQQ作長線投資, 請問可行嗎？

龔成老師：

可以，但你預短期股價較波動，因此，可以小注先，等跌先再加。

比亞迪電子（0285）這股正面的，佢是比亞迪股份（1211）的子公司，現時業務已涵蓋智能手機、平板電腦、新能源汽車、智能家居、無人機、物聯網、機器人等多元化的市場領域等。

由於母公司比亞迪股份（1211）業務主要為新能源汽車，因此，比亞迪電子（0285）部分業務都會與新能源車有關，當1211增長理想時，都會帶動0285。

比亞迪電子近年發展正面，在部分領域處全球領先位置，每年現金流理想，同時每年投入大量資金作研發，以保持業務發展，以及技術的領先，因此長遠發展正面。

現時股價大約處合理區中間，如果之前有貨，可以長線持有，只要貨不過多就無問題，由於股價波動，現價如果想買入要分注，同時要控制好注碼。

至於Invesco QQQ Trust（QQQ），可以月供，但你都要留意風險，控制注碼。

是追蹤美股納指的ETF，長遠有潛力，是最簡單投資美股潛力股的工具。

美國的納斯達克指數，當中在多間大型的國際非金融上市公司，成份股以市值作基礎，並以一些規則平衡較大市值股份造成的影響。這些企業潛力較高，但風險都會較高。

如Alphabet、亞馬遜、英特爾、Netflix等，都是全球最大型的科技類公司。

長遠有一定的潛力，但要留意，指數較為波動，現價已在合理區較上部，不建議這刻大手投資，最好的方法，就是月供或分注小注投資，長線持有。

Q39010：

我幾年前高價入港交所（$320），中銀($40)同長江基健（$60）， 因為資金有限，宜家心大心細唔知放唔放港交所溝淡其他兩隻。阿Sir你點睇？謝謝🙏

龔成老師：

其實3隻都有長線投資價值，你不用因為「港交所有賺」有賣。

你要思考：賣出港交所轉其他，其他的回報是否一定高過港交所，其實，港交所長遠仍有發展的，而你持有3隻股，其實比2股好，因為可以令組合更平衡。