Q44181：
龔Sir, 我記得你好像2-3年前恆指18000-19000點左右話平，叫大家入市的，相信不少人跟你。
請問現在我們可以開始出貨了嗎？
龔成老師：
早2、3年我經常講，恆指18800以下是便宜區。
現時，恆指去翻合理區水平。
整體上，港股現時未貴，雖然個別科技股近期上升較多，但由於之前估值過低，加上企業有些技術正提高，長遠會提高企業的賺錢能力，因此，又未到明顯貴的水平。
如果你持貨是有質素，有發展的類別，建議繼續持有，耐心等更大成長。
除非你貨多，減部分，留部分，可以。
當然，如果你持股並不是優質股，而近期股價大升，可賣。
Q44182：
龔Sir, 請問3690美團，仲有冇機會升上
龔成老師：
要多點時間。美團（3690）受中國經濟因素影響，以及行業競爭，之前較一般，但長遠仍有發展，不過都要留意短期股價波動。
但有一點留意，雖然企業長遠仍在市場有一定地位，但市場長遠計，都有機會因為競爭比過往年代大左，令企業賺錢能力略減，令企業發展度，有機會比過往減少，所以投資，都要控制注碼。
Q44183：
龔sir, 有問題請教
我家有兩位小朋友今年13歲，幫佢地利是錢同其他零錢儲左約20萬，一向都係做定期，但呢幾個月息低，無再續，想問下有咩適合嘅投資適合？
龔成老師︰
小朋友由於可投資時間長，策略上十分簡單。你可以儲盈富(2800)，佢係包括數十間質素不錯上市公司股票的組合，有一定增長力。
若你想增長力較高，可以儲安碩恒生科技(3067)。但此股波動性會較大，要睇翻你自已風險承受能力。
另外，你可以考慮埋美股指數ETF，令組合分散風險能力更高。VOO和QQQ，前者追蹤標普500，算平穏增長型，類似盈富。QQQ追蹤納斯達克100指數，風險會較高，風險度近似3067。
操作上，現有20萬，同樣可以分開多注，慢慢去幫佢地入貨，咁就可以。
當然，我建議全部資金都集中在股票ETF，你可以同時持有其他工具，或持有現金，建立一個平衡的組合。
Q44184：
sir, 請問有什麼類型的股票是適合長線投資，但不適合月供？可以如何投資此類股票？
龔成老師：
其實，當一間企業適合長線持有，就適合月供。
月供是一種投資策略，作用令投資者「儲貨」，長期累積優質企業，同時又不怕一次過在高位買入，減少風險。
除非是一些中小型企業，銀行或證券行無提供月供，只能一手手買入，就有這個情況。
Q44185：
Sir想請教, 假設樓價550萬，15年後我想買，大約升到多少？條數系點算？
龔成老師：
無人知樓價15年會升跌多少，所以，只能用一些「參考推算」的方法進行。
假設樓價每年升3%，15年後的樓價，就是$550萬X（1+3%）15次坊=$857萬。
當然，這只是參考下。
Q44186：
我怎麼肯定知道真的如何是優質企業？
龔成老師：
優質企業有多個指標，例如財務數據較好，產品受歡迎，業務發展理想等。
同時間，優質企業比對手，往往有一些獨有優勢。當然，企業會改變的，我地投資者，都要持續分析企業，是否保持著一些優勢。
Q44187：
早晨龔老師, 各位早晨...老師#836...適合作長期收息股嗎？🙏
龔成老師：
收息雖然可以，但你預佢股價有少少波動，所以都要控制好注碼。華潤電力（0836）有質素的，企業過往的投資開始見到回報，開始見到成績。
這企業業務有火電，以及有可再生能源，算是中國裡的傳統電力龍頭。火電部分較多；而風電、水電及光伏發電佔比一半以下。近年新能源的比例正不斷提高。
由於佢的多類發電運營模式，加上政府背景，令佢係現時受惠新能源政策，同時見到佢之前的投資，開始有基本收成，業績開始反映。
簡單來說，就是火電不太好賺，而可再生能源技術開始成熟，令供電成本持續下跌，當這企業的可再生能源比例持續增加，就帶動企業賺錢能力向上，相信這情況會持續。
企業表示仍會持續發展可再生能源部分，因此，相信這企業的賺錢能力可進一步提升。
加上企業本身有質素，例如這企業近年可利用小時數數據，不論風電、光電，或火電，都高於同業平均水平，反映企業整體的營運能力不差，企業有優勢。
這股長遠正面的，可長線持有，現價都算合理中間，但股價上落都大，投資都要注意風險，控制注碼。
Q44188：
老師，領展823同置富產業778，那一隻比較可以用嚟收息呢？
龔成老師：
兩隻都是不差收息股，你預778收息較穩陣，而823增長力會比778好。現價都合理，都可長線，不過就不是高增長類。
置富產業信託（0778）作為收息股，不差的。
這是不差的房託，持有在香港多個商場物業，以中產屋苑商場為主，都是較為民生的類別。有收息的價值，但增長力不強。
分析置富的物業類別，最核心如置富第一城、馬鞍山廣場、+WOO嘉湖，都是典到的中產屋苑商場，而其他物業也是類似的定住，商場是較為民生的類別。雖然民生類別未必是高增長類，不過，受經濟週期影響及旅遊因素影響，相對較少。
不過，香港人的消費模式改變，都會對佢有點影響，例如網購及北上消費，不過香港人一向好貪新鮮，因此有部分人北上消費模式並不是長期性的，但當然，也有部分人會成為一個長期消費模式。
綜合來說，這房託作為收息工具，合適的，但就不要對股價有太大期望，現價合理區較下部，可以作為收息組合其中一員，只要控制好總投資金額就得。
Q44189：
Sir 想請教 9939 依家仲有無質素？
龔成老師：
開拓藥業（9939）質素一般般，但不是完全劣質，因為佢近年的虧損收窄中，有機會略為好轉（但不能太大期望）。始終佢業務本身風險高，加上未有明顯突破，所以預佢仍弱。
係中國一家臨床階段新藥開發商，專注於開發及商業化癌症藥物及其他雄激素受體相關（或ＡＲ相關）疾病藥物。
佢而家開發緊5種在研藥物，並係中國、美國及台灣取得開始臨床試驗批准。發展正面的。
例如我講其中一隻：普克魯胺（ＧＴ０９１８）：佢係這公司的核心產品，用於治療ｍＣＲＰＣ（轉移性去勢抵抗性前列腺癌）及ＡＲ＋轉轉移性乳腺癌。
正係中國，以及美國分別進行ｍＣＲＰＣ ＩＩＩ期臨床試驗，以及ｍＣＲＰＣ ＩＩ期臨床試驗。
佢已獲授20項與普克魯胺的化合物、合成方法及用途有關的專利，而翻佢這些專利，預定分別於2030年及2032年到期。
現價好難話平定貴，只可以話，你小注投資都可以，可長線持有慢慢等佢收成。但唔好大注，因為始終有風險。
Q44190：
Hello 龔sir，想請教現時全球市場（包括美國，香港，日本，英國和歐洲）的股票市場，分別是否已經過貴？哪些市場還值得入手？感謝
龔成老師：
一定唔平，已經在合理區較上部，甚至部分股票貴。
但時現未到整體貴的情況，美股有部分科技股，會有點熱炒，但之後股價能否支持，好睇經濟同企業盈利，因為，只要經濟唔好太差，而企業盈利有增長，現水平的股價其實仍有支持，又未到明顯貴的情況。
面對現時情況，最重要做好配置，不要太集中在某類股，同時投資時。你可以選ETF，如2800、VOO，要以慢慢分注模式進行，同時留現金。