Q23571：
Hi, 老師，我呢幾個月都慢慢去入左少少2800
28.1 500股
26.4 1500股
25.18 500股
今日24.7 1000股
已見接近52週低位
請問我應唔應該計續，其他股票暫時有1812 4.98入15000股
本來想參與你股票班，但怕影響返工。因為我做地盤體力勞動工作，見你年頭會有星期六班，如果適合初級者到時我會參與
龔成老師︰
由於你未有太多投資知識，你可以照用盈富(2800)作為投資核心。到你有一定經驗，就可以慢慢加入其他股票，令組合更多元化。
至於你是否加注，就要睇你現有資金比例。現時大市在合理區，資金不宜盡用，應保留3-5成資金係手，等再有明顯回調時，才再加注。
你睇下你手頭上現金比重，若依然係高於一半，可以再入少少。
晨鳴紙業（1812）質素只是中等。相信之後的盈利與派息會減少，正要由於經營環境影響。
加上佢有一定的負債，這會提高了佢的風險。此股都有投資價值，但不值你投資咁大注碼。
建議你沽出部份，換碼至盈富或其他有增長力的優質股，長線會較有利。
另外，你唔好用"52週低位"這種方法，去決定一隻股票平貴。因為佢只係過往股價平均數，完全反映唔到佢本質和行業市場變動。
我地定一隻股票平貴，應該係要透過佢質素、行業發展、財務狀況等，去估算出一個價值。估算具體方法，會係我投資班中教授。
下年年頭個星期六班，係初班，適合初階投資者。
你可以預早留位，只要whatsapp 55457212我同事，打「留位星期六班」就得。我地有具體資料就會 whatsapp。
Q23572：
龔成老師，現在9988 我該再買入嗎？9988還會有上升機會嗎？我本身有唔少。
龔成老師︰
阿里(9988)近期受大市氣氛和政策風險所影響，令到股價有較大回調。雖然估值上都有少少調整，但核心質素無大變﹐依然有長線投資價值。
現價計﹐算係合理區中間。
但你過往已經不斷入左唔少貨，你要睇翻阿里巴巴(9988)現時在你組合中佔比重，如果已經高於15%，就算再平都唔好加注。這股有質素，可長線。
Q23573：
但老師港交所是否仍處於高位？
如果月供組合改成
$3000 盈富
$3000港鐵/領展
$2000 福壽園
$2000 信義玻璃/港交所
係咪好d?
我已經留名股票course，而家仲睇緊百萬富翁2同3學緊，但1賣到斷貨四圍都買唔到
龔成老師︰
港交所(0388)現價合理區頂至略貴，要回1,2成才算合理區。不過月供係一個長線計劃，股價會被拉平均，所以現價開始月供係無問題。
你現時調整過的組合，已經係無問題，你可以用佢長線月供。
至於供邊隻，港鐵(0066)和領展(0823)相比，前者整體質素會高少少。
而信義玻璃(0868)和港交所(0388)，前者在技術上有優勢，相信長遠仍是正面，不過就未必是高增長的類別，潛力度比過往略有減少。
港交所（0388）絕對是優質股，獨市生意，加上香港的金融中心角色，這企業有長線投資價值。
由於你係較年青，考慮到整個配置，我覺得你供較有潛力度的港交所（0388），會比較合適。
當然，4間都有質素，你可以將金額分一半，4間供晒都係可以。
課程方面，你就等我同事再通知你。
至於百萬富翁1，其實三聯、商務、誠品都有得賣。若你見唔到，問下職員就得（又或向職員訂都可以）。
Q23574：
老師，我有看其他作者的股票估值書，都幾深。所以才發現老師花了很多心机在書上，如果我們不珍惜，真的抵打手掌,謝謝老師的書
龔成老師︰
可能大家切入點和受眾可能不同，所以睇起黎會有分別。
我相信每一位老師，係出佢架事書，都一定有花左好多心機的。
所以，唔好浪費老師們的心血，要比心機學習。
Q23575：
老師你好！有d投資問題想請教一下，希望你可以抽時間解答。
我而家36歲已婚有一個小朋友，每月扣除所有支出後只有5000左右可作儲蓄/投資。早兩個月開始買股票希望可以為資產增值下，但好似冇乜起色咁，我而家既持倉係：
3煤氣 1000股@12.72
66港鐵 500股@41.20
778置富 1000股@8.28
823領展 100股@72.85
883中海油 1000股@7.73
2638港燈 1000股@7.96
3988中銀 3000股@2.70
6823香港電信 1000股@10.84
- 想請問老師對我呢個組合有咩意見？會唔會買得太多太雜？
- 我考慮緊賣出883中海油轉為多買一手823領展，值得嗎？
- 我手頭上有10萬現金，好唔好再加注落3煤氣？
- 如果而家入手買1448福壽園/1177中生/1810小米，適合嗎？
- 我考慮緊每月月供股票，請問老師我手上持有緊既有冇邊隻值得我去月供？還是我去供d手頭上冇貨既？（例如：2800盈富/11恒生/又或者老師有冇推介？） 唔好意思好似好多問題咁，多謝老師幫忙解答。
龔成老師︰
- 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。
你36歲，應以增值為主。你持有股票，質素上係無問題。
不過，你要明白我地投資股票，就係等同投資在一間企業，希望佢未來自然成長，以達至財富增值的目的。
因此，投資係一個長線計劃，講緊未來3-5年，甚至更長時間。所以，你唔好太在意佢短期表現，只要佢有長線投資價值，你一直持有就可以。
中短期可能會有波動，但長線企業價值，一定會反映在股價上。
另外，雖然你持股有質素，但中行(3988)、置富(0778)和香港電信(6823)只係收息股，增長力唔高，不適合你年紀，唔好再加注了。
而且，你要留意翻個組合平衡，個別企業和行業，不要佔組合15%和30%以上，銀行業更加不要高於組合20%，否則會有過度集中性風險。(盈富由於係一籃子組合，故不受此限。)
在創建組合初期，組合金額較少，出現超標都係可以接受。但長線你要參照這指標，去維持組合的平衡性，才算理想。
你現時地產類(0778, 0823, 0066-算半隻)，接近超標水平，未來配置時要多加留意。
- 中海油(0883)只係商品類股票，質素一般。你可以考慮換至領展(0823)，畢竟領展長線投資價值較高。
但留意，領展(0823)現價只在合理區中上部。由於你本身有貨，再等佢回多少少才加注，咁會較好。
-
煤氣(0003)現價在合理區中下部，你可以等佢回多少少，才加1注。但要留意組合比重，以免出現過度集中問題。
-
可以，3隻現價都在合理區中上至頂部，你無貨，現價已可入首注。
-
你手頭手港鐵(0066)和領展(0823)都適合你作月供之用，而恒生(0011)都係偏向收息股類，增長力不高，唔太建議。
以你年紀計，其實可以用以下「平穏增長股」 + 「潛力股」作組合，去創造一個月供增值平台。
現在你每月先用5成儲蓄，即$2500做月供。其餘先儲起，用一邊月供一邊儲蓄的策略。
由於「潛力股」係需要一定經驗和有一定波動性，如果你經驗較淺，可以先小注，大約佔組合2-3成左右。若你係有一定經驗，你可以投資到約4-5成比重。
現時大市只是合理區，你現有10萬資金和每月所儲倒的資金，就等大市出現一定程度的回調，才慢慢加大力度入貨，然後長線投資。
Q23576：
6993點搞坐哂艇？
龔成老師：
藍月亮（6993）不是劣質，但最新業績令人失望，由於上市前的數據幾靚，因此，有可能佢上市前執靚盤數，這亦是我對新股/半新股有保留的原因。
佢最新的中期虧損約$4400萬元，去年同期純利約$3億元。虧損主因是市場上，其他平台出現過剩的較低價產品，導致佢定價策略及產品在市場上的價格體系受到干擾。
為統一產品在市場上的定價，佢向其客戶提供若干折扣以穩定產品的市場價格，此類折扣對其於上半年的毛利率產生約9%的負面影響。
相信中短期未必強，但長遠，其實又不算好差，佢成立於1992年，擁有衣物清潔護理、個人清潔護理和家居清潔護理三大系列共73個品種的產品。
佢係中國洗衣液有龍頭地位，加上毛利率高，賺錢能力強。睇翻佢之前的資料，以零售額計算，藍月亮在洗衣液市場、濃縮洗衣液市場及洗手液市場的市佔率均為第一。
整體有質素，不過之前貴，現價算是合理區大約中間，如果你之前持有過多貨，宜減少少，但如果不過多，可守住先，但不要加注，股價上翻去相信要多D時間。
Q23577：
我見1177不停下跌 係咪質素已經改變？
龔成老師：
無變，佢大約$5-$8是合理區，因此股價由貴回翻合理區，是正常的情況。加上中央有少少加強監管行業，令研究新藥成本增加，因此令賺錢能力略減，但長遠來說，佢仍是有質素的。
中生製藥（1177）是潛力股，人口老化令佢長遠有唔錯的增長，無論是政府投入的行業資源，又或是人民生活質素令可控制資金上升，都令人們更在醫療方面投入更多。
佢已建立一套完整的商業系統，有多個已賺錢的藥品類別，同時毛利高，可以不斷將錢投資在新藥裡，這模式運作很好。
但這類藥物企業，難免有一點風險，因此要久不久檢視，中短問題不用理會，但如果有一些核心性的問題，就要再全面分析。
就這刻來說，這股可以一直持有，因為商業模式理想，高回報，不斷再投資令股東利益快速增長。加上睇翻佢的業績，保持增長，這令企業價值有實際的上升，令股價得以支持。
現價合理區中間，有貨可持有，分注或月供可以，這股可以長線持有的。
Q23578：
請問大快活和譚仔比較，哪個質素較高？
龔成老師：
譚仔（2217）潛力會高少少，因為佢打算大力發展海外及內地市場，不過，風險都較高，因為過往香港不少食店發展內地，最後都不成功。
因此，譚仔潛力較高，而大快活（0052）穩健度較強。
Q23579：
老師！我持有：1211、1810、2388、2800、3067
請問依家我呢個組合應該可以繼續加注定，買另一啲既股，700、9988、27 如何？感謝老師！！！
龔成老師︰
阿里(9988)、騰訊(0700)現價合理，你將佢地加入組合係可以。
但由於你潛力股都有一定比重，建議你優先加大平穏增長股部份會較好。以你26歲計，盡量保持潛力股和平穏增長股各一半，會較理想。
至於銀娛(0027)都可以，但由於賭牌問題，令佢不確定性高左，暫時只宜小注。
Q23580：
Hihi 想問如果我想月供 供邊幾隻好？諗住供5000一個月 但諗緊全供2800 但利息低 係咪應該分散供幾隻呢？如果供 供邊幾隻又高息又穩陣呢？謝謝你
龔成老師︰
盈富(2800)雖然股息唔高，但計埋佢增值部份，每年平均都有7-10%，算是不錯。而且佢係一個包含60間優質企業的組合，有助你平衡風險。
所以，你就只持有佢一隻，都無問題。
或者你考慮另一隻高息ETF：GX恒生高股息率（3110），是一個投資收息股的基金，追蹤恆生高股息率指數之表現。
可以視為收息股的組合中其中一員。這基金可投資的，現價合理，可分注。佢是投資香港大型，較穩陣，派息較高的上市公司。
這是不差的收息組合，但增長力不強。
但如果你想供些穏健收息股，可以選擇以下股票。不過如你年輕，最多佔組合4成好了。因為佢地股息係較高，但增長力好弱，持有過多，會拖慢你財富累積進度。
目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。
另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，不能太過大注）。