Q23671：

龔sir想問你對1448意見，現價$6.57 (10月12日收市價) ，我初步估計 合理區中下。

PE範圍約17-26為合理區 (歷史數據)

2020/12 EPS~0.3266

合理價格5.55-8.49

2021/12 我保守預EPS有10%增長

EPS~0.35926

合理價格6.11-9.34

我預約$50000買1448 分2注

現價先買3000股

低過$6會再買第2注

龔sir你會點睇？謝謝

龔成老師︰

首先，你PE範圍最好用"中位數"﹐我見你數字相信係用左"最低位"。而且，係要用中間幾年，唔係一頭一尾。

我地去找一個合理PE值，唔會只係單單用歷史數據，佢只係比我地作為一個基礎參考。你要再睇翻，到底這個PE值能否反映佢發展情況。

由於近年中國政府，對行業有不少新指引，主要方向都係控制價值，避免殯儀業相關產品和服務，出現定價過高情況。相信未來，殯儀業盈利會回到較合理水平。

因此，個市盈率都要打折，用15-20倍會較為穏當。

雖然集團有一定發展潛力，但受政策不確定影響，預期增長會減慢，故每股盈利用2020年作基準，再加這5年的年均增長率(約16%)去作計算。

相信會係保守之餘，也不失其代表性，EPS約為HKD0.3740。

合理價值︰HKD5.61 - 7.48

另外，你注碼上最好分3-4注，現價1注。之後每跌10-15%再加1注，咁會較理想。

Q23672：

Sir 想問下50$買左復星医药2196

而家輸左很多，应該走 止蝕嗎？

Thanks yr advice

龔成老師︰

你唔好用買入價或帳面賺蝕，作為判斷一隻股票優劣的標準。你應著眼佢本身有無質素，如果有，中短期價格波動，令到出現帳面虧損，係無問題，照可以長線持有。

但如果係無質素，就算而一刻是賺定蝕，你都要將佢沽出。重點分析的地方，係企業質素，而非股價上。

復星醫藥（2196）本質不差的，佢係一間總部設於上海的中國醫藥健康公司，業務包括製藥、醫療服務以及診斷產品與醫療器械。

同埋睇翻佢的資料，佢的研發持續專注於心血管系統、中樞神經系統、血液系統、代謝及消化系統、抗感染、抗腫瘤等治療領域。其實都有一定的業務優勢。

過往數據顯示，佢業保持發展，生意有穩定增長，不過見佢盈利增長的力度不及生意，這反映佢賺錢能力有所減慢，這點要注意。

此股有長線投資價值，你買入價算合理區頂，唔係貴。佢本質無明顯轉差，只係大市氣氛較弱，佢跟住跌，你照持有係可以。但要留意，佢中短期股價都會較為波動。

Q23673：

丫sir 你好！我今日溫習返進階班第三課既生意完整週期圖，1558中既應付脹周轉日數，計完同你上堂比的價值網數差好遠 我計80，佢係220，諗極都唔明。

（應收款同存貨計出黎都差唔多）

龔成老師︰

東陽光藥(1558) - 2020年

銷貨成本︰3.52億

平均應付帳︰(0.34 + 1.23)/2 = 0.785億

應付帳周轉率︰3.52 / 0.785 = 4.484次

應付帳周轉日︰360 / 4.484 = 80.28天

如果用我教方法，你的計算是正確的。因為價值網有時抽取數據或者匯價轉換，加上可能公式少少唔同，可能會有分別，所以你用佢作參考好了。

最終結果，以我上堂教的算式為準。

Q23674：

龔sir你好，請教下，欄目寫「人民幣（K¥）」，請問是千元的意思嗎？要將下面數字加上3個零，對嗎？

龔成老師︰

係，人民幣（K¥）代表千元人民幣，所以你只要在下面數字，加入'000 咁就係佢個實數。

Q23675：

龔sir你好，我想買啲黃金來分散投資，但又唔識買實金（金條），所以想買2840ETF來代替實金，唔知兩者有咩風險嘅分別，又或者有邊隻ETS最接近實金呢？

龔成老師︰

SPDR黃金ETF(2840)，為交易所買賣基金，投資目標為反映ＬＢＭＡ黃金價格。

我投資貴金屬的目的，是對沖巨大不利事件的風險，例如超級天災、第3次世界大戰等，這些機會發生的機率極少，因此只要投資少少貴金屬已足夠。

但由於我投資是由於上述因素，因此我不買金ETF，而會投資實貨。

當然，如果你唔識或者唔想持有實貨，用這隻ETF代替都可以，因為佢背後都有實金支持，故風險唔算高。

但你要明白，始終係隔左一個機構，去持有實金，同係自己手上保管，安全性點都會有分別。

Q23676：

老師，關係私有化，想再問一下，假設10元買入，私有化后，有機會10元以上的價位私有化嗎？

定還是私有化一般都會以低價進行？

龔成老師︰

私有化一般都會係佢市價，遠低於內在價值時進行。

所以，好大機會私有化價位，係低於你買入價。

當然，這個唔係必然，因為私有化有好多原因。如果唔係單純退市(可能係無左轉上主板而退市)，有機會係用較合理價值去回購股份，所以好難一概而念。

Q23677：

你好 龔sir,想問下1836九興控股的投資價值？感謝

近期想買入做長線投資

龔成老師︰

九興控股(1836)主要從事設計、開發及製造鞋履產品。

客戶包括全球領先運動品牌及休閒鞋履公司，分別為Hoka One One、Nike、OOFOS、Saucony、Under Armour、Johnson & Murphy、Merrell、Sperry、Teva、Timberland、UGG及Vionic，以及領先的時尚鞋履品牌，如Cole Haan、Everlane、Kate Spade、Michael Kors及Tory Burch等。

佢都有投資價值，但你預佢增長力唔強，主要都係收下息。而且，佢派息唔算十分穏定，都會受盈利所影響。

此股投資價值一般，現價合理，但不宜太大注。

Q23678：

致龔成老師：請問3088同1810有什麼關係，3088是etf , 此股優質，現投資此股比小米適合，多謝回覆，謝謝

另外285同868 日日都跌，現價可以入市嗎？

龔成老師︰

華夏恒生科技(3088)和小米(1810)主要分別，前者是一個ETF組合，當中包含一籃子科技股企業。而小米(1810)，則是單一企業。

華夏恒生科技(3088)可長線。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、美團（3690）等的新經濟類公司，小米（1810）也包括在當中，長遠有潛力。

由於基金有30隻股票，比起買單一隻小米(1810)，風險較低。

不過，現價都唔平，大約在合理區中上部，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買可次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

信義玻璃（0868）和比亞迪電子（0285）近期雖然出現回調，但本質上無明顯轉差，現價算係合理區中上部，無貨已可以首注。

Q23679：

Hello，我有買你書睇，睇緊第一本，感恩大部分都睇得明唔係好深，beginners都ok

我月入24000，而家有$50000流動資金，與家人同住。暫時未有任何股票。我想問如果恒大破產，我應唔應該趁個市跌，入一d傳統籃籌股收息

e.g. 中電，長和，長實？同埋我想入加里物流, 你覺得係咪可靠？定係都係月供個種適合d?

因為睇左你本書，我好想建立第二收入來源，但之前係ig賣韓國飾物反應好差，而家計畫考瑜珈教練牌以增加資本。

見到你成日覆讀者問題覺得你好nice!! Thankss so much!!

龔成老師︰

你可以先睇我架《80後百萬富翁》、《財務自由行》和《股票勝經》，都係較易明，比較適合初學者。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

因此，你在選擇應該投資那一類股票時，會係因應你人生階段、投資經驗和風險承受能力，去做決定。

假設你係年青至中年人士，你就應以增值為主，先去累積一筆財富，而唔係去收息。因此，中電(0002)這類收息股，就未必適合，其餘3隻股都可以。

你也可以參考以下「平穏增長股」 + 「潛力股」的組合，如果你係偏年青，比例大約可以去到各一半。

但由於「潛力股」有一定波動性，較適宜年青和有投資經驗人士。若你投資取態較保守、經驗較淺或者較接近中年，「潛力股」比重就要相對下調。

作為初學者，你未懂得如何定企業平貴，建議你先用月供模式去儲貨。現在你每月先用5成儲蓄做月供。其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

而你去創造第二收入來源，係一件好事。但創業好少一次就成功，要不停去試，才會找到一個賺錢的方向。

你可以研究下，一些同業佢地點入貨、點銷售，睇下自己有無可以改進地方。

考瑜珈教練牌，都值得一試，畢竟現在香港人很注重健康，絕對有市場。

創業要不斷學習，無人一做就得，但你開始做，就是不斷學習的過程，你就會不斷進步，加油！

Q23680：

我上次同你討論人性這話題，可能我表達得不夠詳細:

例如 我阿姨2000年諗住用50萬買居屋，佢去咗問佢老細( 香港地老細立場，唔會抵得打工仔發達)，佢老細叫佢唔好買。

我阿姨直到依家都冇買樓，2013年我買樓嗰陣，我問 阿姨 買唔買樓好。佢話樓價跌到沙士嗰陣時買

最近我上司係咁介紹美股，富途我買 之前$89陣話好穩陣，我入咗之後佢話會跌到六十幾蚊。我$86放咗，我放咗之後佢話會升到九十蚊

我嘅工作係推廣信用卡，九月開學我哋 係 唔同大學推廣信用卡。一開始我淨係hold咗理工一間大學 去推廣信用卡

我個朋友日日黑我面， 話我hold咗佢間學校，咁我心軟呀冇再去其他學校做嘢。

我事後先知道， 位朋友香港嘅七至八間大學都去咗一轉做生意。我所表達人性方面嘅嘢係指呢樣嘢

憎人富貴厭人貧

感謝你閱讀我詳細分享

龔成老師︰

不論你本人，還是你阿姨，都有一個嚴重錯誤，就係所有投資決定，純粹都係聽人講。

我經常鼓勵同學努力增進投資知識，就係希望佢地可以自己有能力判斷投資項目，不受別人影響。

就好似你阿姨，如果係有投資知識，一早就把握先機，甚至係沙士期間入左平貨，享受緊資產增值的成果。

而你自己，都會明白富途投資價值，就唔會出現投資決定受人左右的情況。所以，你要努力增進投資技巧，做自己財富的真正主人。

現時香港樓市唔平，不過你唔好預佢大跌，因為始終有一個好大潛在需求量存在。

如果你阿姨係自住，只要間屋係配合到佢未來10-20年生活所需，同時間佢又有信心供得起，其實已經可以入市。

富途（FUTU）有增長力的。但監管因素，會令佢風險高左。

佢係一家在線經紀公司，提供一站式在線投資服務，騰訊（0700）為股東。該公司通過網上平台提供服務，其中包括香港、中國大陸，以及美國股市的市場數據、交易服務和新聞源。

佢以經紀佣金，以及手續費服務的形式產生收入。

早前佢由於被質疑在內地《個人信息保護法》不合規，令股票大跌。但公司已出來解釋，一直嚴格遵守和踐行相關法律法規。暫時睇，長線本質無大變。但政策風險係高左，暫時要控制注碼。

這企業雖然有發展，但現時市盈率好高，股價變化大，要留意風險。這股小注都可以，長線有增長力。

至於工作，無話邊個HOLD邊個，只要你係做份內事，其實唔太需要理其他人點睇。