以往青冰很喜歡在六月底及十二月底時，用彭博資訊機做一些篩選，睇吓恒生綜合指數及港股通的半年大檢，會有甚麼潛在新標的，近一年就已經放棄了這份功課，因為近年加入綜合指數的股份，大多是半新股，靠上市初段逾50億的市值，跨過門檻入指數，那些舊有股份，仍要循12個月月均市值逾50億，仲要計一個極之煩的流通成交比率，才可染指港股通資格，實際上由幾億起家而最終爬過門檻的，屈指可數，咁啱今次所講的兩隻股，就是其中的少數。
必瘦站(1830)現時市值約百億，去年十月時，其實只有30億，只要在今個月尾埋數時沒有急瀉幾成，12個月月均市值將逾50億，夠資格納入恒指綜合指數，亦即係可以加入港股通。今次或許是最後一次講必瘦站喇，因為公司改名的投票已通過，日後要叫做「完美醫療健康管理」，但在青冰心目中，佢永遠都係叫必瘦站，代言人永遠都係佘詩曼(雖然已經換咗Sammi)，醫美板塊在內地好旺場，相信加入港股通後又是另一番景象。
力勁科技(0558)這股去年底還是藉藉無名，踏入2021年後憑著Tesla壓鑄機供應商的身份，被大小專欄輪流品題，曝光率奇高，此股去年底還是19億市值，現時已經近150億，股價半年內飆六倍，以一隻正經做生意的廠佬股來說，實屬難得，Tesla概念在內地都算受歡迎，所以屆時北水應會捧場。
兩股的企業形象及管理手法可謂天與地，前者將港交所(0388)的披露易當作宣傳易，之前青冰都寫過佢大半年出咗幾十份通告，踏入六月好似有點收歛，可能因月底是業績期所致；力勁科技雖然半年來狂升，但通告卻是寥寥無幾，亦都唔同你詳細講Tesla相關的業務，近半年最大的新聞，就是4月底配股，及上周發的盈喜，究竟月尾的業績會否仍然保持低調，多數事少說話，真係拭目以待。
--